[هلال العتيبي]

الورقة 39

السحاب اللي من المنشا رفيّه=استباح الروح وعيوني سحرها
نوض برقه يخطف الابصارضيّه=شاقني واثّر على العين ونظرها
هلّي الما يالمزون العقربيه=غيمة الحرمان مانقّبل عذرها
احتويني في مجال الجاذبية=واحيي آمالٍ عثا القيظ بزهرها
كل غصن صابه الوقت بشظيّة=والجفاف اجتاح الاوراق وشجرها
مبطي ادعي خالقي وارفع يديّه=واترجّى نوّةٍ يهمي قطرها
مير حظّي ساق غيمة نرجسيّة=ساع ذيّرها الهوا واجهى مطرها
الهوى المجنون عاكسها شويّة=لين عكّر جوّها واعمى بصرها
واتركتني في سراب المهمهيّة=في صحاري طوّق احساسي خطرها
غيمة الحرمان راعدها قضيّة=صوته يزلزل ثرى البيد ومدرها
مير لا يمطر ولايصدق نويّه=مااغرق البيدا ولا سيله حدرها
من عذابه حط فالوجدان كيّة=مااحدن يسبر مداها من كبرها
من كبرها كنّها مقلع طميّة=تقْل نيزك طب من فوق وحفرها
ورغم هذا لوقسى وقتي عليّه=نفسي المولى على العزة فطرها
مارْجي المقفي ولااعاين نحيّه=والغيوم الذاهبة مامْشي فاثْرها