العازمي
يادكتور المعاني والهدف في سستم التشفير = ورقم الكود خمس حروف شدّاده ونزّاله!!
تضيّرها على جلد الحوار ولاترام الضّير= وذالحينه تعلّاها البعير وقطّع عقاله!!
النشمي
ياعيد ارفق بحال العود لاتشغله التفكير=ورقم الكود مايدخل مزاجه دور ابداله
زمانك لو صفالك يالعتيبي فيه شر وخير=وللبيب العقل يعرف مخرجه قدام مدخاله
العازمي
اخذ من راحتك راحه قبل لايلحقك تقصير = وفي هاذي وهاذيه يحط القرم معداله!!
هبوب الشك والريبه هبوب. وكنّها معصير = تمر السيل واطرافه وتطرح شمّخ جباله!!
النشمي
ياعيد انته معك بعض العلوم وخانك التعبير=ومن سوى سواتك يابن عاصي حالته حاله
انا ماصدق اللي قيل لين اشاهد التقرير=ترى الاعلام تال الوقت مما صار يرثاله
العازمي
على الدرب العوج شيّدت مبناها انت قبل الغير = وصارت حجّةٍ للي ورد للعد بحباله!!
ماغير طويق يالنشمي ضلع ياكود ضلع النير =رواسي قبل ابو زيد الهلالي يظهر هلاله!!
النشمي
مشينا فالطريق المعتمد وانته عكست السير=واقول اللي يعكس السير فال الله ولا فاله
نبا نشهر سيوف المعركه واللي يصير يصير= ومن لايمتلك عزم وصبر مشروب فنجاله
العازمي
عليك من الليالي ياثبيتي قيس حمل بعير = بعيرٍ مايزل الدرب كانك صرت جمّاله!!
انا ماقول فيك قصور تشرب من قراح البير = ولكن القلم غيّر نفوس وحطّها عاله!!