عرفت الحياة .. و عشت بالواقع الملموس = و نفسي .. على اللي يعلم الغيب .. متكله
اشارك .. و اقوم بواجبي .. و الحياة دروس = وصد المشاعر .. و الهوى ما تحرك له
لكن .. شفت ما تل الحشا .و أيقض الهاجوس = و سجل هدف بالعين .. ماهوب بالركلة
غزال(ن) .ربى في نجد ..لكن خواله روس = و من نجد أخذ طيبه .. ومن روسيا شكله
إذا اقفى .. تقل خايف لا ياطى على دبوس = و إذا اقبل ..تقوم الجن والإنس تضحكله
ولا هز راسه .. دون راسه تمايل روس = يكم واحد(ن) .. جر التناهيد .. و اككله
غزال(ن) ..فرق بالملح ..والحسن ..والملبوس = لو إن البني ..تشرب و تاكل سوات أكله
و إذا بان وجهه .. ما بقى وصف فالقاموس = هو الشمس .. و أوراق النبات .. يتحركله
و أنا بعد ما سجل عليّه ..هدف مدروس = لزوم(ن) عليّ..أقف ..و أخطط و أتكتكله
و اجهز له سهوم المحبه .. و أشد القوس = و أعن الخيول اللي بصدري تدابكله
و إذا ما حصل ..لاماه ..و حظي المتعوس= حياتي غدت ..ما عاد تسوى ولا نكله
اعزيك يا حبي .. وتبقى معي محبوس = و محبوبنا نترك جميع الممالك له
و ابصبر على شانه .. و ادوس المشاعر دوس = و أبدعي لعل الله يوفق و اباركله