بسم الله الرحمن الرحيم
(فرحة اعدائي)
نكبة الاسهم
حي الجواب اللي ضحك له حجاحي = شفته وبانت فرحته في محياي
قافٍ لويلات المتاعب علاجي = من شاعٍر يعرف سبب داي ودواي
ياسعود في غيبتك غاب ابتهاجي = واصبحت اسيرٍٍ بين ناري ومركاي
جزت السياج وصارغيره سياجي= واتسكرت في وجهي ابواب دنياي
ماقلت لاحدٍ لوعتي واحتياجي= الا انت لانك تبخص اقصاي وادناي
قصرت رجلي لايبين ادواجي = اخشى كلام الناس لاكثر ممشاي
واللي رفع ضغطي وعكر مزاجي= ان البلا ياسعود من فعل يمناي
انا ابتليت بسد ماله خراجي= و(اسواق الاسهم) ساس همي وبلواي
دنياي تسئلني بكل احتجاجي= وين الطريق اللي تبي؟قلت مخباي
ماينحني لرضاك غير الدجاجي= والا انا تبطين ماجبتي اقصاي
ماجيت ادور في كهوفك ملاجي= اليا بغيت اشكي على الله مشكاي
اليا صفا لي ماك كنه هماجي= وانا عطيتك كل ماتملك ايداي
حتى شقا عمري وجوهر نتاجي= بعته على شان اشتري(فرحة اعداي)
وانا الى ربي بشكواي لاجي= ارفع يديني وارفع الصوت بدعاي
لابد بعد الضيق يات انفراجي= والله سبحانه هو اعلم بدعواي
واللي كتب ربي على الراس تاجي= يمكن بها ربي يكفر خطاياي
ياسعود انا عارفك مرح وهجاجي= اخوي ماعدك من حساب خوياي
لاجاك قافي لايجيك انزعاجي= فل الحجاج ولا تاثر بمعناي
خلك على خبري طليق الحجاجي= واعلم ترا فرحتك هي غاية رضاي
بقلم الشاعر/عبدالرحمن العقيلي