أدور الفرحة علـى هامـش الضيـق =وألقى الأمل ميت على شاطي اليـاس
والمشكله لامـات مـن دون تحقيـق = يبقى الهدف محصور من بين الأقواس
وإن جيت أبكشف مغلقات الصناديـق =أخاف لا تجتاحنـي شرهـة النـاس
السم لو يجـرع علـى فكـة الريـق = أخير من كشف السراير بـلا سـاس
تبدي بي الأفكـار روس الشواهيـق = وتبحر بي الأحلام مع كـل غطـاس
وإليا لزمـت النـوم مـاودي أفيـق = أخذت لي عن ضيقة الصدر مـرواس
حلم السنين اللـي عليـه المواثيـق =قفت به الأيـام مـع كـل نسنـاس
حظي يعاندنـي علـى كـل توفيـق = وأصبحت مما صار لي شايب الراس
أحيان أطيق الصمت وأحيان ماأطيـق = إذا الكلام يترجم شعـور وإحسـاس
ترجمـت ماأكنـه ببـدع الطواريـق = ونظمت عقد(ن) يشبه لعقد الإلمـاس
عقد(ن) يحلق في سما الشعر تحليق= ماسطروه اللي على بنـك الإفـلاس
ولو الكـلام يمـر مـن دون تدقيـق= كل(ن) لبس له ثوب من دون مقياس
الهـم غبـة والأمـانـي زواريــق =والدمع مثل الحبـر والخـد قرطـاس
نتايـج أحـداث المعانـاه والضيـق = اللي وطنها الصدر مع كـل الأنفـاس