هيه يالي نبش قلبي وحرك كنينه= هيه يالي سألني جاك رد السؤال
قالوا أعرست قلت العرس ويني ووينه= بينه وبينه مشاريع(ن) عريضات(ن) طوال
كان ودي من قبل تسأل اخليها دفينة = لكن إصرارك على التبرير خلى لي مجال
طالب ودايم مع الدكتور في جيمه وسينه= واصبح التزويج للطلاب أمرٍ مستحال
قالو الطالب مسيكين مايملا يدينه= لو جمع له قرش أو قرشين قافيها الزوال
قلت أنا ورزق الموظف ياجماعة ضامنينه= أو ضمنتوا له دوام العافيه طول الليال
بس أنا مؤمن ورزقي ضامنه والله ضمينه= وأعرف إن الرزق بعد الله على بنت الحلال
صح لوقلتوا زمنا صعب وأسعاره ثمينه= لكن الأصعب يضيعون البنات مع العيال
العزوبي كلكم تدرون به والله يعينه = والعوانس يحترنه مير مابه راس مال
لو بغى يجمع مهرها راح يشفى في سنينه= ثم تراكم فوق ظهره من ديونه كالجبال
صار طبع(ن) بين جل الناس ياقبحه وشينه=الزيادة في المهور وفالزيادة لاتزال
جمليني ياهجوسي وانهجي فالي تبينه= وابدعي مادامني خليت لك وقت ومجال
في هوى قلبي وروحه في غرامه في حنينه= فالتي نالت بقلبي شئ لايمكن يُنال
ساسها ساس(ن) عريب وتتبع الهادي بدينه= بنت شيخ(ن) من طحاطيح العرب روس الرجال
من بغى ستر وعفاف(ن) حق ياربي تعينه= فا أعني ياعظيمٍ عز جاهه ذو الجلال
والصلاة مع السلام عداد خطٍ كاتبينه= وعد ماوبلٍ تهامل من مراديم الخيال
للنبي الي عسانا في طريقة تابعينه = وياعسانا من يدينه نشرب الماء الزلال