هلا يامرحبا في محفل محمد ولد متـروك=نيابة عنه من باب الغلا والطيب والجيـره
حزام الشاعر اللي لاتقدم ماتجيه شكـوك=مخصص للغنا واللي مخصص للعطا غيره

بقيت أنته وابن متروك والعب والجمال ابروك =وراع الطيب يبقى له مع اهل المعرفه سيـره
أنا ربي عطاني وأنت يمكن في العطا مشروك=وعز النفس يرفع منـزل الرجـال ويجيـره

الا ياليت من ساقوا دلال الكيف مازلّـوك=بعد ساقوا لك الجاوي وفّذة تمر تصبيـره
انا اعرفك عزيز النفس لكنّك شتمت اخوك=اجل فيها مذلّة لا عطوه الحمل وبعيـره؟

تكلم وأنت ماعندك على بعض الكلام صكوك=لكن اللي سواتك يعتـذر وأقبـل معاذيـره
أنا وشلون أبشتم من على سطح القمر شالوك=لا لاهم معرف أبراهيم لا شـره ولا خيـره

دعيتوا وارضكم عطشى ومصراع السما مصكوك=واذا طـاح الحيـا فالمنطقـة كثـرو مداويـره
لك الله يوم ودوني علـى سطـح القمـر ودوك=لكن اصبحت في سطح القمر وامسيـت فالديـره

يصير اللي يصير اللي عطوك العلم ماغشوك=وحساد النبي يوسف جمعهم تحـت تدبيـره
أنا وياك مازلنا سوى وأثباتنـا فـي البـوك=توقع لايغـرك واقـع الشعـر وجماهيـره

اقول اللي يحب الورد لايجزع لاشاف الشوك=ومن يبغى الرحق يصبر على لسعة دبابيره
انا ماغير طرقي وانت راع المنزل المبروك=لو انّه ضاق تالي الوقت من كثرة مساييـره

ترى دون العسل دربين طين وشوك وأنت ارجوك=وش اللي تسلكه حتى العسـل تشـرب قواريـره
أنا خابرك شاعر تعرف المالك مـن الممكلـوك=لكـن الادمـي مملـوك للـوقـت ومقـاديـره