ان السنين الغبر ماتمحي مواقيف الرجال=تبقا الرجال مأرخه باقوالها وافعالها
الوقت ينجب كل يومٍ من شغاميم العيال= ناس ٍ تجي وتروح والأيام هذا حالها
بس الدهاه اللي مآثرهم على روس الطوال = روس الشيوخ اللي تظلل ربعها بظلالها
على عدد عـد الأصابع لو بغيت أضرب مثال = ما كل من تنجب ولد يقدر يطيّب فالها
وأنا يحز بخاطري شمس ٍ تقفاهـا الزوال = وغيبة رجال ٍ ما يجي بين الرجال أمثالها
البارحة مات أبن جامع ياكريمين السبال = شيخ ٍ يغلق فالعلوم أخفافها وثقالها
مات الكريم أبن الكرام بليلة ٍ غير الليال = شد الرحال وغيره رجالٍ تشد أرحالها
عز الله أنه راس مال اللي بليا راس مال = وعز الله انه عزوة اللي عزوته يرثالها
حاتم عتيبه غاب زوله مير ذكره لايزال=له قصةٍ تبقا وتبقا فالحياه اطلالها
في ملتقى الهيلا مضيّف ربعه اخيار الجمال=و200 راس من الغنم سيقت بدرب جمالها
ساق الهدايا ماحسب فيها جنيه ولا ريال=كرّم بني عمه وطيّب فالها وعقالها
ضرب مثل بان الكرم لاهل الكرم سهل المنال=وماهو بسيط لناس تعبد قرشها وريالها
والله ماجا بيني وبينه جواب ولا سؤال=لوكان شفّي شوفة عتيبه وكل ابطالها
الطيّب من الناس يستاهل ليا عاش الوصال= وان مات تبكيه العيون وينتثر همّالها
وعبدالعزيز الشيخ تبكيه الرجال بكل حال=وتبكيه نجد ورملها وسهولها وجبالها
اعزّي الروسان وافين المكارم والخصال=واعزّي عتيبه جميع شيوخها واطفالها
واعزّي صحون الشبب والعود واصناف الدلال= اللي تقدم للضيوف وينشرب فنجالها
يالله وحنا طالبينك في خشوع ٍ وابتهال=تغفر لبن جامع ذنوبه دقها واجلالها
وتنزله في دار خلد وفي نعيم وفي ظلال=وانته كريم وتجزي الحسنه بعشر امثالها