ياحمود قم صلح لنا الكيف ياحمود = إن كان تعرف تشغله يا الهلالي
عليك شب النار والبن ماجود = وليا شعمته دن صفر الدلالي
وافهق بحمسه لين يخبا سنا العود = ثم احمسه لاصار للجمر صالي
وليا اصفر لونه والعرق بش ماكود = لاحق عليه ولايجي له توالي
ها ثم دقه واسحقه سحق بارود = واذهن تحبس النجر خله يلالي
وليا فاح وسط اللي قعابيبهن سود = زله بصفر لونهن با شتعالي
وترى بهاره هيل ويخلط معه عود = ويكثح عليه الزعفران الشمالي
ها ثم صبه واحترص كل منقود = واول ما تبدا به زحول الرجالي
اهل الكرم واللي لهم فعل مشهود = واهل المواقف محتمين التوالي
واللي ليا جاء المس والحبل مشدود = يحلها ويصير فيه احتمالي
وان جاء نهارً فيه حاوي ومردود = فعله يشاف ويحتمي كل تالي
وباقي الملأ ياحمود نقصً بلا زود = مافيه لامكسب ولاراس مالي
ان جاء العدد باسمه مع الناس معدود = وعند اللوازم مايجي له مجالي
واليوم وقت يستر النقص والزود = كل الاوادم فيه يا هملالي
اللي منول يكسب النعم ويزود = عود يدور بس ستر الحوالي
واصبح كثير المال ماعنه منشود = كنه من امثال ابو زيد الهلالي
قام يتحدى النذل والنذل محدود = هو يحسب ان الطيب جاء با لريالي
هومادرى ان الطيب كودً ورى كودً = مايدركه خبل قصير المدالي
الطيب كسب اللي لهم فيه مقصود= طبع لهم من ساس عم وخالي
واخير من هذا ومن ذاك ياحمود = فرض الصلاة وركعتين التوالي
وطلبة ولي العرش هو خير معبود = اللي خلق سبعَ رست بالجبالي
ينجيك من نار لها الخلق محشود= في موقف يرعب ذهون الرجالي
وصلاة ربي عد ماتذري النود = على الرسول المصطفى اول وتالي