يا لجنة الهيلا تحية وتقدير= باسمي وباسم ربوعي الغانميني
انتم تكبَّدتوا طوال المشاوير=يا جعلكم يا أهل الوفا سالميني
وحنا بجيتكم نزف التباشير=ونبلَّغ الحضَّار والغايبيني
نفرح ليا جونا النشامى مسايير=وتبدي علوم الطيب للزايريني
يا مرحبا يا هل الوجيه المسافير=ترحيب وافي والمودة تبيني
في بيت عبد الله عقيد المناعير=عبد الله العبود يالسامعيني
أمير من ساسه ليا راسه أمير=شِيخة شداد جدوده الأوليني
شيخٍ يشاور فالمهمات ويشير=وليا بدى شوره لقيته ثميني
راعي دلالٍ في المناره مناحير=وعودٍ يفوح وكل كبشٍ سميني
يقود قومٍ في الملاقى بواتير=الآد القثامي عزوةِ المنتخيني
هذا ولي وقفة مناقش وتعبير=موجز كلامٍ يكفي العارفيني
وقبل النقاش وقبل رفع التقارير=نبغى اليمين اللّي تشد اليميني
حثَّوا لنا بالجهد كل الجماهير=ونقَّوا لنا نخبة من الفاهميني
وتدرون في عرض الفضا صار تطوير=في التقنيات وطاقم المبدعيني
نبغى صفاوة صوت وإبداع تصوير=حتى يزين الحفل يالطيبيني
وليا دعيتونا نجيكم طوابير=كل الرجال لحفلنا جاهزيني
الله على وقت الحيا والمحادير=لجوٍ براد وماطرة جمعتيني
باوسط نفود السر طلع النواوير=وفالقِرنة أهل الديرة مربعيني
ونلقى عطايا الله تشوق النواظير=اربع صفوف لمقرعات الحنيني
هذي مجاهيمٍ وهذي مغاتير=وهذيك صفر وشعل لونٍ حسيني
فيها الجنب فيها امهات المصاغير=وفيها الفحول اللّي تراطن رطيني
ونشوف فيها للمزاين مداوير=في كل يوم نشوفهم سارحيني
وليا اكتمل عقد الجموع المشاهير=وانضمَّوا التالين للاوليني
نبدى باسم الله يجي حفلنا غير=ويبقى رصيد لمقبلات السنيني
يالله عساها حفلةٍ كلها خير=ونكسب بها المعروف دنيا وديني

ابتدي بسم من نركع ونسجد رضى إله=بسمه ابدا عظيم الشان قبل الكتابه
وبعد ذكر الله المعبود جبت السجله=والهواجيس تشعاني على كل جابه
كل ما دار فكري من هجوس طرن له=والله ان كن في راسي تعاوا ذيابه
في لزومي هواجيس القصيد استون له=محفل ينشط اللي معه عقل وذرابه
مرحبا مرحبا عداد مبدى الاهله=بسم الآد القثامي مرحبا بالنيابه
مرحبا في محل ما خلف الوقت دله=مايقفل عن أهل العرف واضيف بابه
عزوتي فعلهم تاريخهم شاهدله=واصلهم من جشم تاريخ عز ومهابه
محتوين الوفا والعرف دقه وجله=ما خذيناه عارية ولاهو نهابه
جارنا لو يطول ابه المدا ما نمله=لو يعيش الدهر يبقى عزيز جنابه
والله انا ليا حان اللقاء محزم اله=لين حتى عن الديرة تقفي ركابه
والخوي كلبونا اللقا قدوة له=والله انا على يمناه ربع وقرابه
وضيفنا لو ما نلقى الا حدانا قرا له=ما شحنا قراه ولا حسبنا حسابه
ومن عدانا ترانا ما يجينا مذله =لو جمع كل فرسانه شباب وشيابه
كم عدو ذعاذيع الهوا ذعذعن له=يحسبنه يبا يبقى عذي شرابه
انكفت دولته ما بين سله وسله=بين ميت ومنصاب مايبرا صوابه
ما درى ان القثامي دولة مستقله=من قديم الزمان وفعلنا يندعابه
والعبابيد تزهى بالفخر كل حله=من نشد بارق العبود يلقا الاجابه
شيخنا كلبونا في اللقا فزعة له=اخو عبده سهمنا في نهار الحرابه
وابو فيصل وأخو مسلط ومسلط نجله=هم شيوخ القبيله سلم والا حرابه
وتحت راية ملكنا مقبل الخير كله=تحت ظل الملوك اهل العدل والمهابه
ابو متعب مليك العرب شعبه فدا له=الله انه عن الاسلام يجزل ثوابه
وابو خالد لشعبه مزنة مستهله=وعاشوا اخوانه اللي لابة حي لابه
درعنا اللي لهم بالدين كل الجبله=نهجهم منهج محمد ونهج الصحابه
اهل حكم العدالة واهل مذهب ومله=واهل بيت يذرينا ونلقى الذرا به
ومرحبا عد ما تبدا النجوم المطله=وعد وبل الخايل من غشين السحابه
قالها اللي يدل ولايبي احدا يدله=وبسم الآد القثامي حي لجنة عتابه
مرحبا بالجميع ومن حضر في محله=مرحبا بالمشايخ والجبر مرحبابه