يا حيلة الله وين نومي وأنا وين= النوم جافاني وكدر مسايه
من همٍ إيفطر خشوم البعارين= على قصى دنياي زود قصايه
هم مخاويني من سنين ودنين= وآآآلي وله قلبي سوات الولايه
بدا ثلاث أميه وسبعه وتسعين= ولليوم وأنا بين حايه و حايه
أصارع الدنيا على العسر واللين= على مدا ألأيام ماله نهآيه
واليوم عمري فوق سبع وثلاثين= وأنا على ما قيل دآيه دوايه
مرت على اسنين وإسنين وإسنين= ما مر يوم ألا يعكر صفايه
ماهو بهم مجمعين الملايين= عزيز نفس( وراس مالي عصايه)
ولأهو بحب الزين ومفارق الزين= لو كان باني له بقلبي بنايه
الحب إله عندي شروط وقوانين= أموت حر ولا نزل مستوايه
الحب حب الدين ومناصر الدين= وحب البلاد وقبلها وآلدايه
وابطيت أجامل واقبل الزين والشين= واقول ليت وليت سبّت بلايه
يا ليت يصفيلي من الناس شخصين = واقول لإخواني وأبوي ازملايه
اثنين صافين القلوب ومتاقين= وأفخر إليا سميتهم بأصدقايه
وبعد لقيت من الثنين احمر العين= رجيت ربي لا يخيب رجايه
ودارت رحى الأيام ما بيننا بين= أفخر وأماري به وأزاحم إعدايه
واليا وشابه من حدا الناس واشين= صديت عن صدره سهوم الوشاية
وبعد نبت له في جنوبه جناحين= ثم قال الأرض ارضي وهذا سمايه
وأخطأ وقلت إيمين يا بن الميامين= نكرانك المعروف ماهو جزايه
وزاد الخطأ صده وهجران يومين= بعد حذف رأيي وقوطر برأيه
ويقول أنا النادر صعوط المجانين= أيضا ولا لحدن عليه وصايه
ماني بتبع ولأتبع الناس الأدنين= وإن قلت تايه عقل ماهو بتايه
إن عاد قرت مايلأت الموازين= وإن راح ما والله يبيّح خفايه
الله يسهله طريقه على الزين= جاني من ادروس الزمان الكفايه
وأنا احمد الله ماش لاحدن علي دين= ولي في ألوفا واعرف والعز رآيه
لاكن قفى هم واليوم همين = إليا متى همي ورايه ورايه
يا لله يا قابل صلاة المصلين= تجبر عزا الصحبة وتحبر عزايه