اذا غامرت في شرف مرومي=فلا تقنع بما دون القرومي
فطعم الموت في دار النشاما=ولا عيشة مداهيل الرخومي
أقوله واعسف القيفان وبدا=بذكر اللي على خلقه رحومي
فلا يالله يارب البرايا=تجملني بعد حان اللزومي
وتكتب يالولي ذا اليوم قسمي=مع العزوه من خيار القسومي
على دعوة أبو مالك حضرنا=وراع الطيب ما عنه نشومي
نجيب دعاه ونلبي لو انه= عن الخاطر كما بعد النجومي
أجل وش لون لا منه دعانا=رفيع الشان والحر الصرومي
بدون الشك والريب نعنى له=ونسيرها على حسب السلومي
ونعن الخيل في دربه ونرقى=على شانه مراقيب الرجومي
وترى الرجّال لا منّه توخر=عن الماجوب ما قيل محشومي
تغطيه الفشيله والفشيله=على الرجّال من سود الهدومي
كلام الصدق بهرج به وربي=يلوم اللي على الصادق يلومي
واسج القاف والباقي على الله=يقومها على حيل وتقومي
مقاطي جيت من ربعي لربعي=وبعد عامين من حزة قدومي
ابا أكشف للملا عن شي خافي=تبلاّني وانا مسلم واصومي
ابا أكشف شي من حزة عرفته=عرفت الناس معطى ومحرومي
عرفت الحب وأثر الحب بلوى=بلى قبلي قويين العزومي
وانا حبيت في نجد العذيه =محبة طيب والمعنى يعومي
هنوفٍ حبها من زود حبه=على صدري تقولون معزومي
وقلط مابين قلبي والحنايا=ولا منه بغى شي ..مخدومي
هنوفٍ لا طرى عالبال ضيقه=وغدا في جوي الصافي غيومي
عنيت لشوفها من غير موعد=فتال الليل والعالم حلومي
ولا منه حصل شمة هواها =تقول اني من الهم معدومي
تسولف لي وانا اسولف ودايم=تنشدني..ألا ويش العلومي
وختام الهرج يالسامع تروى=وانا بعلن قبل شن الهجومي
أبا أعلن للملا عن حب ( عروى)=وترى حبي لاهل عروى عمومي