يالله ياللي ترزق الوحش في الخلا = وإن صاد رزقه فالخلا قنعان

يالله ياللي ترزق الوحش في الخلا = إليا صاد قوته في الخلا قنعنان
والطير في وكره ميسر معوشته = وعند العناية طار بالجنحان
والفُلك يجري والعنايه تقودها = والعزم عند النار والدخان
والحفظ من رب السماوات العلا = سبحان من لايقهره سلطان
ياللي خلقت الحوت والثور والثرى = ومافي تخوم الارض شيٍ كان
ويوحي دبيب النمل في ملتقى الصفا = ويعلم بهم ماشين او سكان
والروح خالقها وتعرف مقرها = لها يوم فيه تفارق الخلان
ولا ادري جسدها عند مالك يعذبه = ولا سعاده توصله رضوان
قال المغني يوم هاضت هواجسه = في ليلةٍ مجموعة الاحزان
العين تدمع والنسم ضاق بالنحر = انادي فلان ولا لقيت فلان
اصحابنا عند الحكايا مية نفر = وعند الشدايد روحوا شتان
ولولا الشدايد مانبا صحبة العرب = ولولا الشدايد مانبا صدقان
وماقصدي يحييني رفيقي ليا زارني = حياة النفوس بدبرة الرحمن
لو كان واحد قط يحيي رفيقه = سلم الدوا لايدفقه لقمان
لي صاحبٍ ضليت لازم به الضهر = اشوفه سواة المدفع الغضبان
في خاطري لو جا عليه طلابته = نزل منزلي في كفة الميزان
جاني بعد عشرين ليلة من الشهر = بعلم الردى ليت الردى ماكان
عطاني علوم انا ماتوحيت فيها = ابرد من الما والعذر شدهان
خبل العرب من عند باب يمرني = يقل المشي لاقترع الحذيان
وانا ماهدمت الطيب بيني وبينه = على العهد لاضايق ولا شرهان
خويي ليا حذت ركابي ركابه = ثنينا رقاب العيس بالارسان
ثنينا ارقاب العيس تسعين ليله = كما قالوا اللي قاسوا الازمان
وراحت سوالفهم مخبر لمستمع = حتى الخبر هذا بلغ فرقان