يامل قلب ٍ زايدات ٍ لهايبه = زادت لواهيبه وشبت شبايبه
العين عافت ما تبي لذة الكرا = والنفس من ما شافت العين طايبه
امسيت اكيل الغيض والناس هاجعه = اقنب قنيب الذيب باعلا رقايبه
اجاذب الونات من حر ماجرى = وما جابه القمري من النوح جايبه
يالله طلبتك ياعليم ٍ بحالتي = مالي سوى رجواك في كل نايبه
ياغافر الزلات ياسامع الدعا = تغفر لنفس ٍ جاتك اليوم تايبه
ياكبر غفرانك ويا قل حيلتي = من يومك الموعود نخشى عقايبه
فكرت فالدنيا كفا الله شرها = دنياً تغر الناس بالفعل خايبه
كم واحد ٍ يسعى لها ما تعينه = تسقيه مر الكأس تكثر عطايبه
تقفي عنه ماسرته في حياته = يلقى الجفا حتى من ادنى قرايبه
وكم واحد ٍ هلباج نفسه رديه = تجيه طوع ولا يتعٌب ركايبه
تضحك معه في كل يوم ٍ تغره = غرت قليل العرف والكبر صايبه
الوقت علمني دروس ٍ كثيره = دارس دواوينه وخابر لعايبه
ياجهل ٍ فالوقت يعجبك غيٌه = احذر ترى ليا دار تكثر نشايبه
انا بعد ما شفت فالوقت عبره = رضيت بالمقسوم والنفس طايبه

المشاركة الأصلية كتبت بواسطة عناد الشيباني (المشاركة 1129758) صح الساانك .. .. لاهنت