مرّت سنه والقلب (مِحْرِمْ وصَايم) = يِخيلْ بَرْقْ الوصل حولِك ويمّكْ
أحيان جوّه عَجّ واحيان غايم = وحاديه وقته عن مواريد جمّكْ
ميّت على شوفك ومغرم وهايم = ودّه بقربك ، و إيتمنّى يضمّك
وإن طعتني دامه يردّ النسايم = (إلحق عليه) ان كان وضعه يهمكْ؟
ما عاد يسمع فيك ناصح ولايِم = اهل الدوادي و الكلامْ المنَمّكْ
انا و عذّالي ما غير إنتزايم = ولا أسمح لأحد منهم بكلمه يذمّكْ
وان قلت دلّوني على حلّ دايم = قالوا لي: (إنسه والعوض بنت عمّكْ)
متى على الله يصبح الحظ قايم = بقدرة كريم انه عليّه يلمّكْ
بأمره .. يسوقك من يسوق الغمايم = من بعد مانبدي على أبوك وأمّكْ
بالمال , وإن عيّوا , حَذفْنا العَمايم = تجي معي لازمك بأطراف كِمّكْ
نفرح بجمعة شملنا و إنتلايم = وننسى العذاب وكل همّي وهمّك
كنّي بيوم (النصْرْ) وأنت (الغنايم) = لاصِرت في بيتي .. بلحْمِك ودمّك

صح لسانك ياعبدالله

ابيات بعيدة عن التواضع راقيه جدا اهنئك واشكرك عليها

وتقبل مروري

كنّي بيوم (النصْرْ) وأنت (الغنايـم)=لاصِرت في بيتي .. بلحْمِـك ودمّـك

صح لسانك كتبت فأبدعت