من عادتي مانيب أحب اهل السواليف الكبار=ولا اعترض في سالفة تخفى علي اسبابها
اسمع واميّز واتنقى فالطوال وفالقصار=حاجة تجوز وحاجةٍ ترجع على اللي جابها
واصمت ولا انشد ويش صار وكيف صار وليش صار=مالي دخل وش صار فالاصحاب بين اصحابها
اللي تجي خلف الستار تروح من خلف الستار=تروح عني ما التفت فيها واقفّل بابها
قررّتها من نظرتي واصبت في صنع القرار =قرار عاقل يكرم اللحية وروس اشنابها
هذه شريحة من شرايح مجتمعنا باختصار =كلٍ يزّهب بندقه لا زان له مضرابها
اعوذ بالله من لسانٍ شغلته يقدح شرار =وناسٍ على الفتنة تحد ضروسها وانيابها
ناسٍ لعل الله يحمانا تزيد النار نار =والنار تبغى واحدٍ ينفخ على مشهابها
استغفر الله واشكره في سر والا في جهار =والوذ به في ساعة كلٍ يحسب حسابها
ماودي اسهب واخذ العبرة برد الاعتبار =من قصةٍ فيها العجب للي يبا يقرى بها
والمعذرة يا قابلين العذر حان الاعتذار=العذر طيّب من رياجيلٍ عريب انسابها
صحيح لي وجهة نظر كانت تعيش الانتظار=واليوم قامت واستقامت واعتدل هندابها
سيرة طويلة والمسيرة دوب سارت فالمسار=حسب النظام وحسب تقدير العرب واعجابها
لاهب نسناس الهوى من وجهته ثم استدار=يبا يشيل الخيمة ام اطناب هي واطنابها
والمزنه اللي مع مذر الشمس قدام النهار=همالها في ديرةٍ قامت تسيل اشعابها
حظ اللقية والهدية والمنيحة والحوار =وحظ الجمال اللي مع الطرقة تعوج ارقابها
والطايرة طارت وطاحت فوق رادار المطار=سرعة جنونية وشرهتها على ركابها
في داخل الصندوق الأسود خشم ذيب وخشم فار=يا هجرةٍ تشابهت فيرانها وذيابها
حزب اليمين يصرّح انها من قبل حزب اليسار=وحزب اليسار ارخى على العورة طويل اثيابها
دبرة وخبرة واستشارة وارده للمستشار =عاش الحياة الجارية واقبل بها واقفى بها
أفكار حصرية تطبّق في نطاق الاحتكار=سيناريو يمضي كما جنبيّته ونصابها
الضحك واجد و البلا فالحنجرة مثل الزرار=والكارثة فالعين مير العين وين أهدابها ؟
أكل عليها الوقت وانهارت من آثار الغبار=ما باقي ألا شكلها وعروقها وأعصابها
والقنبلة باقي عليها ضغط ويصير انفجار=ريموتها في حجرةٍ نسمع نعيق غرابها
ازرى بها حمزة وفرده عادته لا ثار ثار =يا اما على جنحانها والا على مخلابها
الكل يدري وش حصل هاك السنة في قندهار=والمقبلة سود الليال الغايبه تسعى بها
حضر التجول يتفق مع شكل تشديد الحصار =لو التجول كلمةٍ كلٍ يعرف إعرابها
اللي مع قوة وله قدرة وله قدر ووقار=لا عاد يا من جيرة العقرب وجيرة دابها
الشك فالاسم الحقيقي قبل الاسم المستعار=بعض الاسامي تنعرف بسطورها وكتابها
على العموم آسف على التطويل يا طوال العمار=والعذر طيّب من رياجيلٍ عريب انسابها