وا قلبي اللي موحيٍ فيه دقاق=دقاق من ضيم الدهر والغبينه
كنّه على جال اللهب يحرق احراق=هذا وحنا بالصبر كاتمينه
والصبر زال إنّا على الوقت ينطاق=لكن زاد و زوّد الضيم دينه
مشكاي لله رافعٍ سبعة إطباق=فرّاج هم اللي حياته حزينة
كم حزة وقنا على راس شوهاق=يوم الهداني نايمٍ بالمدينه
أدله مع الغربي ليا هب رقراق=وأجاوب لحون الحمام الحزينه
((يا معدّي المرقاب خله لمشتاق))=وألا لمن مثلي ظروفه تهينه
ويا مجاوب القيفان مع حبر وأوراق=خل القوافي بدعها لا تزينه
القاف للي دونه الرمح زراق=عارك حياته والدهر شق عينه
يا مل قلب منمزع فيه معلاق=يصالي المله غصب كل حينه
ويا مل عين دمعها سال دفاق=تبكي على فرقى الفقيد الضمينه
الطيب اللي من عريبين الأعماق=صارت حياته في النهاية تدينه
و خطو الردي يمشي مع الناس بوّاق=يكسب مكاسيب الشرف في سنينه
مار الدهر جحاد والوقت سرّاق=بسطح القمر ماعاد ترسي السفينه
كفٍ تمد الطيب ذا الوقت تنعاق=إليا رجعت قلنا سلامات زينه
ونفسٍ تحب الحق للموت تنساق=دام المجامل للحقيقة قرينه
لا شفت عبّاد الدراهم بالأسواق=قلت الهزيلة تستوي بالسمينه
وعند اللوازم منسرق يركز الساق=قلت الرفيعه تستوي بالطمينه
هاذي هي الدنيا مراكيض وسباق=والله يعين الصابر الله يعينه