المشاركة الأصلية كتبت بواسطة فـهد النفيعي (المشاركة 453791) والنعم وثلاثة انعام بالداعي والمدعو ما يجي منك قصور يالصقر وصح لسانك على هالقصيده واليا جيت تراك بين اخوانك وعيال عمك ياهلا ويامرحبا

جينا من الطايف على هبة الريح= سكون مع هتان شوقـه وكـادي
شوق يحد القلب من دون تصريح= وحب يهز الذات ماهـو حيـادي
يم الطنا شوقي وان اقوم واطيح= مدري فرح والا بلاي اعتيـادي
حبيت بالديـرة وجيـه مفاليـح=فيهم حياة الطيب مثل الجيـادي
شمر ولاغير الطنايـا تباريـح =خويهم فوق الغـلا لـه ريـادي

المشاركة الأصلية كتبت بواسطة بندرالحبسي (المشاركة 453820) صح لسااانك على القصيدة ويمرحبا ترحيبه المطر يالولد شمر بين اخوانك

المشاركة الأصلية كتبت بواسطة حاكم الغنامي (المشاركة 453920) ارحبو يالطنايا الله يحييكم في حلة عتيبه الهيلا ارحبو ارحبو

اخوي الشمري

حياك الله ومرحبا بك في ديار عتيبه
ودام معزبك ابا العلا فأنت في ضيافة شيخ والكلام يقصر عنه
ونعم الضيف ونعم المعزب

لكن مانسمح لك ماتزور باقي مخيمات عتيبه ويتشرفون بك
وترى لكم معزه وغلا عندنا زايد عيارها عن باقي الناس

وجواباً على سؤالك

عندك عدة طرق

الاول تفرق من الخط السريع من عند عفيف وهذا خطر وما انصحك به

الثاني تفرق له من جهة كبري الرويضة قبل القويعية
ومع الكبري تروح يسار
وتنزل على عروى ثم الشعراء ثم من عند المحطة تروح يمين متوجه للدوادمي
ثم تطلع على الدوار وتتوجه يمين للمحمدية

الثالث تفرق له يسار من عند مزعل قبل القويعية
وتطلع على الحفيره ثم يعترض عليك االخط السريع
وتروح يمين وتصير الدوادمي وراك وتتوجه للمحمدية

الرابع تتعدى القويعية ويجيك كبري لبخة وحويته
وتروح يسار مع الكبري وتصير النفود يسارك
واذا تعديت الطويله بيجيك خطين ( مثلث ) يمين لشقراء ويسار للدوادمي

اما تروح يمين وتطلع على الخط السريع قبل شقراء من عند مزارع فنجال الشيباني وتصير المحمدية يسارك

او تروح يسار وتطلع على مزارع الروسان ( مركز القرنه )
وبعد المسجد تدخل يمين على شارع سيدسن فيه نخل
وتصير المحطة يسارك وقصر الشيخ بن جامع ابو قبب يسارك

وتستمر لين تطلع على محطة العصيمي على الخط السريع ثم توجه يمين للمحمدية

وطريق لبخة وحويته مزحوم جدا وحاول ترفق وانا اخوك

واذا وصلت لموقع المزاين بتشوف لوحة السوق الشعبي

قبلها بتشوف على اليسار مخيم كبير وخلفه حوالي 500 خيمة للضيافة

هذا هو مخيم الشيخ ابا العلا


لكن وصيتي لك وانا اخوك انك تمشي في النهار
وهذي طلبه مني لك ووصاتي لك