طلو ع سهيل

[عايض التوم]

الجو زان وحان وقت المطاليع=الله يبارك في سهيل وطلوعه
أشوف نجمه من ورى الظلع أبو ريع=وهلال غرا دوب كمل أسبوعه
وهب البراد وروحن الذعاذيع= والمرزم بلاهوبه أعلن رجوعه
وهذي طرات أهل القلوب المواليع =اللي ولعهم دوب ولع شموعه
شعوان الاولاد الحرار القواطيع= كلن على صيد الخلا طار شوعه
تخابرو خبت نباته تناويع = متشابكن مع قحويانه قشوعه
تلقا الحباري فيه درج و مواقيع= اللي ورى بعض المدارق خدوعة
وجاها من الحر النداوي مفاجيع= بالمخلب اللي كل خرب يصوعه
ليا أبدع بها فرخ القرانيس تبديع= شوفه ليا أثعى فبرق الريش روعه
مع رفقة اللي يعرفون التسانيع=ما يجهلون العلم شكله ونوعه
وشبيت نارك والنشامى مصاليع= وكلن يجيله للمعاميل فوعه
هاذي طرات أهل القلوب المواليع=اللي ولعهم دوب ولع شموعه
البر فيه لضيقة الصدر توسيع = لو ما حصل للرجل ما سد جوعه
سج القدم في البر فيها منافيع= يكفيك من نسمة هبوبه نفوعه
و أنا بشوف البر ما سمع ولا أطيع= نفسي من قصور المدينة جزوعه
ترى هواي تجارة ما لها ريع= موسع صدري ونفسي قنوعه
أخير من يجلس يعد الاسابيع=وسط المدينة لو خذاله قطوعة
ماهوب رابح لو يسوي مشاريع=مادام حتى ما يزاور ربوعه
لو يودع الأموال بالبنك توديع= من كثر صفقاته وكثرة بيوعه
ونجد العذا للقلب يمه مراميع= عليه جعل الغيث يكثر هموعه
وتساوقه غر المزون المهاميع=وماها على هاك الدهاكل تزوعه
و قرارته فيها تزين المرابيع = وواد الرشا ترعى الغوالي فروعه
جا للسيوف الحدب دونه تلاميع= في ما مضى كانو عتيبه دروعه
يوم ان أخو نوضه يحد الطماميع=بروح على ظرب المخاطر بتوعه
دون الطمايع والحلال المراتيع= كم فارس لاعه من السيف لوعه
لأهل الوفا ونسه وعزه وترفيع= اللي حياتي عشتها في ربوعه
وللطيب عد وللمعرفه ينابيع = يروي عطش فكري عذوبة نبوعه

مع تحيات أخوكم

عايض بن عواض التوم

[معلا إبراهيم الأسعدي]

بيض الله وجهك

عزالله انك شوقتنا للمقناص ياولد العم

بارك الله بك , شكراً أخي الكريم

[أبو نجر النفيعي]

..

الله أكبر . الله أكبر ..

صح لساااانك على هالجزله يا عايض ..

شوقتنا لجديدك ... وفي انتظاره بأذن الله ..

.

أخوك..

[خالد بن ضمين]

صح لسانك يا عايض وبيض الله وجهك على الجزاله

[مرزوق حمدان العتيبي]

...
.
اولا يسرنا ان نرحب بالشاعر الجزل
عايض التوم في منتداه وطال الوقت وحنا ننتظرك يابو عواض
ولكن جيت وجبت لنا الدرر صاح لسانك واعتلا شانك وبيض الله وجهك
على هالشامخه ..
....

[الذيبان]

الله الله ياعايض التوم شكرا وبيض الله وجهكــ

ولكـ خالص تحياتي

[صقرالحره]

ياهلا ومرحبا بالاخ عايض التوم

صح لسانك ومشكور بارك الله فيك

[هدهد عتيبه]

صح لسانك يا عايض وبيض الله وجهك على قصيدك الجزل تقبل مروري

[عايض التوم]

بيض الله وجيهكم جميعا على المرور وهذا من طيب ذاتكم وبعد نظراتكم

وآسف على عدم التواصل معكم بشكل مستمر


أخوكم

عايض التوم