بسم الله الرحمن الرحيم
يطيب لي أن أقدم لكم ديوان الشاعر الكبير / سلطان بن مطلق الغنامي العتيبي ..
ونشكر الأخ العزيز / الآد غنام
على ماقدمه لنا من قصائد شعراء قبيلة الغنانيم من عتيبه ..
فكل الشكر له
..
يابعد دنياي تسأل وفي عينك جواب=ليش احرث ارض القصايد واشم ترابها
لاتحرك جمرة الصمت ياسمح الجناب=وانت طب الكيه الموجعه وانت اسبابها
علني مابكيك ماملّت الروح انسكاب=في قــــوالب نرجســيّــتك يـا سكـابـها
خذ من اعماقي قصيده وانا يابو الغياب=شـاعـرٍ حمـلت الاقـلام هـمّ اصـحابــها
الكتابه حلقت بـي على متن السحاب=كيـف يــرويــني مطرها وانا سيــابها!
فاتني عمر الغرور وتجاوزت العتاب=صـرت سيـد الكلمـه المبهـم وكتّـابها
لو حروفي مبهمه دون معناها حجاب=عذرها بعض العقول وقفول ابوابها
في رؤوس الجاهلين الطغم شر الدواب=زمرةٍ تتبـع رخـوم العـرب واذنـابها
والله انـي ماحسـبـت لتجمعهم حسـاب=انقر الدوده براس اصبـعي ماشقابها
خلك فبستـــان ذاكـرتي آمــن لا تهاب=مملكة فكري تـتولاك وانت اولابــها
ياعيون امي وابوي الهوى شغلة عذاب=والشعر رمانة الجوف وانت احبابها
دفتر ومجنون وعيون غاشيها الشهاب=لاعبٍ فيها السهر والنجوم ادرابها
كتلة احساس ومشاعر وضيقه واغتراب=تحرق الوجدان (والنار من شبابها)
دوزنه لاوتار شوق ولحن مثل الشباب=لانطلق من حنجرة شايبٍ غنابها
راح من عمره عمر وانكسر خلف السراب=مالقى ارضٍ يكتب الشعر فوق ترابها
لميت عيدان السهر من وجدي = وشبيت في وجه الظلام وظهره
تبختري لاياخلايف جدي =ترى البنات كبودهن منقهره
مري عليهن بالحرير الوردي =اكلي على الحلوات جو السهره
امشي دلال ولاوقفتي لدي = قولي يبه باسمك كسبت الشهره
تاجك غلاي وقطعةٍ من كبدي = يارقة الريم وشموخ المهره
الليل في عينك وقف متحدي =وفي خدك نجوم السما منصهره
السكر بحمرة شفاك مندي =ومع ريحة انفاسك تفوح الزهره
يأم البراأه والشعور الودي = في سر سلطان القصيد وجهره
عذري ياديما لاوصلت لحدي =انك مثل غيث السحاب وطهره
واني ليا باح الحنان بسدي =رقت عصافير الهوى منبهره
كل عام وخزرة عيونه الحلوه بخير =خشف ريمٍ كل مالد لي شع اكثره
واحدٍ يسوى قبيله وهو توه صغير =يسكن بقلبي وطن وبغلاه يعّمره
لو مااحبه مارسمته على سلك الحرير =حاجب ورمشٍ طويل وخدودٍ مزهره
في مخيلته يسولف طفل ويرف طير =في عيونه غابتين وسحابه وسفره
في جبينه بدوٍٍٍٍ ادرك عطشهم جال بير =قيلوا بطراف خده وماتوا بثغره
لاطوى لون المسا في جديله من عصير =هامت اسراب الفراش بزوايا دفتره
ليته ليا هم ذبحي كذيا يستخير =يذكر ان العفو "سلطان" عند المقدره
وانّي بدرب المواعيد مجهول المصير =احسب العام بثوانيه ماهو بشهره
واننّي عن بعض ناسٍ تفكر فيه غير =لانويت الفعل جاله نتيجه وثمره
حافظٍ عورات جاري مجير المستجير =طايعٍ لامي وابوي احمد الله واشكره
ذكرتك يا مسافر من زمان ولا قدرت انسـاك =خذاني شيء من ذكراك ولا ادري وين ودانـي
تخيّل كم سنة مرت وانا واقف علـى الشبـاك =وعيني لآخـر الشـارع تودينـي وتنسانـي
تتوه مسافرة بين الوجـوه ونفسهـا تلقـاك =ولا تلقاك وامسح دمعها بسكـات و"القانـي "
وحيد اتخّيّلك جالس تسولف لي على مركـاك =سوالف حب واتخبّى تحت رمشك عن احزانـي
وتضحك والمحك غيمة ويلمع برق بين شفاك =ويستر شعرك الدنيا وينسـى البـرد عنوانـي
واضيع بهمسك وتمطر براءة وارتوي من ماك =واعود من الجفاف احيا وينبت عشب وجدانـي
وتشرق شمس نظراتك على وجه الاماني ذاك =واشع الوان طيف وتنكسر في خـدك الوانـي
ويغرق عطرك الغرفة واشمّه وامسك بيمنـاك =واحلّق في الفضا عصفور طاير وانت باحضاني
ويصرخ هالجدار بكل حرمان السنين "اهواك" =ويرجع بالصدى "عبد الحليم" وتختفـي ثانـي
واناديلك تعال ويطفي الشارع وامـوت هنـاك =ورى الشباك في الظلما على طاريك وحدانـي
حـبيبي و الـزمان الـلي تـخبره فرق العشاق=جـريح الـوقت من خبرك/ جريح ولا لقا احبابه
حـبيبي و الـفراق اللي ذبح (هالقلب) ما ينطاق=فـقدتك والـفرح بـعدك هـمومي سكروا بابه
تـركتك و الـدموع الـلي تـغشت خدك البراق=قـصيدة طـرفك الـناعس لـضحكة فـم كذابه
لـك الله مـا عـلى مـنظر دموعك لوعةٍ تنذاق=حـسافة يـا دمـوعك و الوداع المر وش جابه؟
تـخيّل لـوحة الـدنيا /غـرابيل / وحـزن / وافراق=رسـمها طـير خـفاقي على اضلاعي بمخلابه
اشـوفك كـل مايبدي غروب الشمس والمشراق=اشـوفك كـل مـا يـقبل ظـلام الليل واشقابه
اشـوفك فـي تـعابير الحنين وزحمة الأشواق=اشـوفك فـي زوايـا الـذاكرة عـمري تسلابه
اشوفك في تعب جسمي وانادي و انتظر و اشتاق=يـرد بـصوتي الـجرح الـقديم و ينكشف مابه
انـا ويـاالمشاعر يـا حـبيبي و الـقلم بسباق=مـن الـلي يـسبق الـثاني على حزنه ويغتابه
انـا ويـا الـقلم نـنزف ومـنا مـلت الأوراق =ثـقل حـمل الـدفاتر و الـحبر و الدمع متشابه
حـبيبي تـذكر الـعشرة وذاك العهد والميثاق؟=انـا بـاقي عـلى عهدك واموت الحب واحيابه
حـبـيبي لاتـناساني زمـاني فـرق الـعشاق=جـريح الـوقت مـن خبرك حزين وفاقد احبابه
ولكم أجمل واطيب التحايا ..
| التوقيع |
للتواصل عبر twitter تويتر
al_bargawy@ |
« آخـــر الـــمـــشـــاركــــات »
25-Jul-2009, 02:48 PM
ديوان الشاعر الكبير / سلطان بن مطلق الغنامي ..
العرض العادي
