الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > منتديات قبيلة عتيبة - الهيلا > شعراء قبيلة عتيبة

« آخـــر الـــمـــشـــاركــــات »
         :: كل عضو او شاعر يسجل بيتين غزل الفهاا من قصائده .. بشرط ان تكون غزليه فقط .. (آخر رد :الريشاوي)       :: ودي ولا ودي وابيهم ولا ابيه (آخر رد :الريشاوي)       :: واكتبي هذا أنا أنا ليلى العامرية (آخر رد :الريشاوي)       :: البيت لاعْجَبني اجاريه باحساس (آخر رد :الريشاوي)       :: أنـا لا تلوموني ولو ملـت كل الميل (آخر رد :الريشاوي)       :: اوافق .. واقول النفس صعبه مطالبها (آخر رد :الريشاوي)       :: الحب اقفى في ديانا ودودي (آخر رد :الريشاوي)       :: امير قبيلة المحاقنة قبل الدولة السعودية (آخر رد :متعب الوحيدب)       :: امير قبيلة المحاقنة قبل الدولة السعودية (آخر رد :متعب الوحيدب)       :: الشيخ عبدالله ابن جزعاء العازمي جمع غير الفروسيه الحكمه والفكر السياسي وبعد النظر (آخر رد :متعب الوحيدب)      

إضافة رد
أدوات الموضوع انواع عرض الموضوع
غير مقروء 25-Jul-2009, 01:30 PM رقم المشاركة : 1
معلومات العضو
محمد العتيبي

مشرف منتدى شعراء قبيلة عتيبه


الصورة الرمزية محمد العتيبي

إحصائية العضو






التوقيت


محمد العتيبي غير متواجد حالياً

إرسال رسالة عبر مراسل MSN إلى محمد العتيبي
Thumbs up ديوان الشاعر الكبير : محمد بن راشد السندي الغنامي ..

بسم الله الرحمن الرحيم


يسرني أن أقدم لكم ديوان أحد شعراء قبيلة الغنانيم من الروقه من عتيبه

وهو الشاعر الكبير / محمد بن راشد السندي الغنامي الروقي العتيبي ..

وإليكم ديوان الشعر الأصيل .. فشكرا للعضو آلاد غنام

الذي عرفنا عليهم ..:





على دربك سهرت الليل واعلنت احتلال الصمت = اشيد من جمالك من بيوت الشعر شاهقها
ركبت بقارب الأحلام في دنيا عليها همت= هي أنتي يالمزون الي سحرني ومض بارقها
خذي دنياي يامبدأ الغرام الي عليه أقمت = وعطيني منك كلمة وعد تملني واصدقها
تراني من غيابك عن جميع مفطراتك صمت=وحلفت أقيد البسمه عن شفاهي ولا اعتقها
رحيلك يارحيل الروح ياجمل من له استسلمت= رحيل الشمس عن ناس ٍ وموج البحر غرقها
أنا مجنون حبك لو بسر الحب ما علمت = برغم أن المشاعر في ضميري شاب مفرقها
أطوع لك بيوت الشعر باسلوبن عداه الشمت = بدايع من ضمير وفكر تاخذك بطوارقها
على بحور الخليل وجبت شيء غيرها والهمت=شياطين الشعر جزال المعاني قبل تنطقها
باساليبٍ عجز عن مثلها الشعار لو عممت = أنا صادق بما قلته (وخير الخيل سابقها )
قصيدي فيك معجز للنخاع وفيه تهت وزمت = سوا حررتها ولا بديهه ما أنسقها
عسى غيبتك مدتها قصيره مثل ما علمت= عليك الروح نار الشوق ولتفكير محرقها
تراى من غيبتك ياعين من يهواك ما داومت = مصيبه غيبتك ما تدري أنتي وش يرافقها



بالله يالي منتوين السفر تو=ودو بيوتن ساقها الفكر توه
للعارف الي طلته تشبه النو=الي فقدنا نور برقه ونوه
مدري بقا في الأرض ولا مع الجو= ولا مع اشباه الظبى زان جوه
اذكره لامنا اجتمعنا على الضو= الضو يذكرني سماحه وضوه
له مجلسن محشوم عن كلمة السو=وله فزعتن في الأمر خيره وسوه
لا شان وجه الدهر ثم قاله سو=يقول سو الي تسويه سوه
من ساس ناسن للمعالي تعلو=رجم المعالي عالين في علوه
ولاهوب يوقفها على الليت والو= تنجز قبل عله وليته ولوه
وبعض العرب مظهر مثل صورة البو=مبناه عن خافي ضميره يبوه




الهنوف الي ملت قلبي وحلت فيني=سرها عندي وخل العالم البلاسه
درةٍ مصيونةٍ عن كل شيٍ شيني=تا خذ العقل بمباديها وتملا راسه
عيبها في جاذبيتها تبي تفنيني=املكت قلبي بدون مفاهمه وسياسه
قصةٍ والله عجيبة والبطل شخصيني=اوجزت احداثها من دون أي دراسه
أذكر اني قلت وصراع الهوى يطويني=والمكان تقول لبسه السكون الباسه
يابعد كل أصدقاي ومن تشوفه عيني=امهليني بس لين أشرب بقايا الكاسه
جيت مثخن بالعطش ومشاهدك يرويني=كيف لو صدري على صدرك يحس انفاسه
لو اظن أن جيتي يمك تبي تغويني=كان كنسلت المقابل واللقا من ساسه
والله اني حاشمك عن نهج موسو ليني= وحافظك حفظ البخيل لتجرته واكياسه
يوم جيتك قام يجذبني شعورٍ فيني=صرت صادق حس وانا قبل ماش افراسه
قام يرقص لك خفوقي وامسكه بيديني=مثل حرٍ تل مسباقه وحرك راسه
كنه يسابق لشوفة زولكم رجليني= والضلوع العوج من دونه سجن واحراسه
جملة اوصافك عذاب وكلها تغريني= مثل ماتغري الورود العالم الحساسه
صرت لافكرت تفكيري يجمد عيني= وينتظرني النوم لين يضيع حلو نعاسه
لا يمي في حبك اعده من الغاديني= مايفرق بين مسبوك الذهب ونحاسه
للبحر فيك السكون وروعة التكويني=وللمطرفيك العذوبه والشرف واوناسه
ومن عفافك ستر ودروعٍ تبي تحميني= فوق دين وعرف وزيادة حيا واكياسه
ومن كلامك سحر بابل أو خمر داريني= ومن جمالك ظاهره منها البشر منحاسه
لويشوفك عابدٍ شارف على الستيني=دق قلبه للحياه وللهوى مرواسه
ولو تمرين بدوي راعي نياق وديني=يحترق بنه ويرمي من يده محماسه
ولو يشوفك (دانتي)ماجاب لو حرفيني=يرجع بخفي حنين ويقطع الكراسه
ولو (نيوتن) يلمحك بيصير له قوليني=قال أساس الجاذبيه عينك النعاسه
ولو نظرك أدولف هتلر صاحب التمكيني=كان ماعدوه بارز من كبار الساسه
ولو رميتي بيتهوفن ضيع التلحيني=وأعلن بدنيا الموسيقا واللحون افلاسه
عذبيني بالبعاد وعودي واحييني= مثل مايحيي الهميل من الشجر يباسه
وزعليني ياغلاتي وارجعي راضيني=واغمريني في حنان القامه المياسه
والله اني مثل وادٍ له ثمان اسنيني=ينتظر هامي السحاب ويرتجي رجاسه
كل مايشرق صباح اهديك دمعة عيني= مع عبير العود والجوري ونفحة آسه
شوفتك تنعش عروق الجسم وتهديني= فرجي لي من هواجس فكري ووسواسه
تبت عن غيرك وجيتك مثل ماجيتيني= ياكسجين الروح يفديك الغرام وناسه
اتركيني من سواليف الوحل والطيني= وحدثيني عن حديث الجوهره والماسه
قد حلفت برب يوسف والفلق والتيني= انك اجمل من ذوات البشره الحساسه





يالله تستر في الليال المقابيل=وتلطف بقلب(ن) بالهوى مبتلينـــــــا
عناني القلب الخضر ياحمد حيل= لولا لهوى الملعون لا ماشكينـــــا
أسهر لياما يطلــع سهيل ويزيل = لعل من جدد عنانا يجينـــــــــا
يازين لاتسمع كلام العواذيل =وشلون تسمع هرج عذال فينـــــــا
عيشتني يامهجتي في بهاذيل= ولارحمت القـلـب يابن الذينـــــــــــا
انته بلاي ان عودت علك السيل=وعن حسن غيرك ياوليفي عمينـا
يانعومة الفاين ليــــال مقابيل= النا ان لفت ولا علينــا علينــــــــــــــا





مل قلبِ شاف له بارق خيال=واستماله في الظلام المدلهم
وماحصل غير النظر والصبر طال=والقيود اثنين والباني هدم
ويش حيلة من بغى صعب المنال= أويش حيلة من سرى حافي قدم
اويش حيلة من شكى غبرالليال= واجتمع له فقر مال وفقر دم
قال حظه لحظة اغفايه تعال=قال: سَم وقاله بالكسر سِم
كل مانشن على صيدٍ جزال=الهدف ينحاش والرمية تزم
قالب الدنيا ولا خلا مجال=كل ما حاول له أمرٍ مايتم
يالله اني طالبك رزقٍ حلال=ماسعابه لابن خال ولابن عم
منك يامنشي المراديف الثقال=ياكريمٍ علم الناس الكرم
قمت اسلي النفس في دنيا الزوال=واستر بحلو الأمل مر الألم
والصديق الي نخيته لايزال=يتشبه بالضرير وبالأصم
واليدين تريد بذل بلا ابتذال=والفقر للجود قيدٍ له ورم
قَل من حصل (نعم) في بوس حال=وياكثر من نال بغناه النعم
تبت ايدين الفقر ذل الرجال=وتبت يدين الغنى زوّر قمم
ماينال الطيب من رز القفال= وحط له خدام وبيوت وحشم
والشهاده لله أن المال فال= بس طيب الشخص موروث وخِيَم
والدراهم كالمراهم والسؤال= ذل والحاجة بلا والقول تم
والله الي ينحمد في كل حال=ألتجيبه وأبتديبه واختم




أنا عتيبي وأفتخر وارفـع الـراس = يموت ماماتـت معانـي شموخـه
يشوم للعليـا علـى كـل نومـاس = ليا نام خطو الي مضيْـعٍ مطوخـه
يشهدلنا التاريخ بالطيـب والبـاس = يومن كلن صـار يمـدح شيوخـه
في ساعةٍ فيهـا يضكـن الأنفـاس = ياكثر من يلبـس حـزامٍ وجوخـه
نرد الخطرونقول يانفـس لابـاس = الموت واحد والبـلاوي دخوخـه
يشهدلنا التاريخ علمٍ علـى سـاس = بالطيب والعـزه ملينـا صموخـه
حريبنا نعطيه علقـم مـلا الكـاس = لياشافنـا يجيـة ضكـه ودوخـه
اهل الكرم في ساعة العسر والياس = لياصاردمث الأرض يشدي صبوخه
ولااذم انا باقي القبايل والأجنـاس = وكلن بفعل اجدوده أظهر طنوخـه
وعلى النبي ازكى صلاتي بلاقياس = عـداد رمانـه وتينـه وخـوخـه




هيضني البرق يوم انه برق في الشمال= وانـا مـن اهل الولع واحب عشاقته
سـرى تكاشف بروقه في ثقيل الخيال= واقـفا وريح السعد من خلف مستاقته
نـصا ديـار عـذيّه مـرتع لـلحلال= راع الـبل ان طـبها مـا تتعبه ناقته
فـيها النفل والخزامى والربل والظلال= يعنالها واحـد شـوف الـحيا فاقته
المشي والسير فيها مكسب وراس مال= ريـحة هواها البختري جاي في ساقته
سواقه اللي مضرى بالخطوط الطوال= مـا هـو غـشيم يـعل الكبد بسواقته
يـصلي الـظهر في نبت دقاق وجلال= نـوار عـشبه تقول الصبح واشراقته
مـن لين عوده ليا هب الهوى في مال= تـوّه نـشف مـاه بيّن غثو عشراقته
وجـدي على جلسة فيها لو اربع ليال= اشـم ورد طـبيعي مـا اشتري باقته
يا زين جمع النشاما حول صفر الدلال= ويـدور فـنجالها والـنفس مـشتاقته
بـريّة جـاية مـن شـامخات الجبال= مـن الـيمن جـابها الـتاجر بعلاقته
فـي وادي ما وطاه الظلف ولا النعال= مـا تسمع الا لحون الورق في اطباقته
عـزي لرجل يبا العليا ولا من مجال= مـا احـد يـلومه ليا منه بذل طاقته




الوذ بالصمت الحزين اليا دجـى ليـل العبـاد=واسهر على ذكراك وادلوش الخلايـق راقـده
ياام العيون الي تزيد الوجـد وتذيـب الجمـاد=صحت فوادي من هجير الهـم وهيـه فاقـده
صرت انجذب يمك واهيم برؤيتك واشكي البعاد=وكنتي قريبـة لكـن الأشـواق فينـي واقـده
عاد الزمان الي مضى وش عاد لو بالشوق عاد=مادام في قربـي مـن الحسـاد نـاسٍ ناقـده
جربت اسافر واتغرب مـن بـلاد الـى بـلاد=وزادت الغربة عنـى قلـبٍ ضلوعـه حاقـده
جملة وصوفك علمتنـي كيـف يـزداد العنـاد=وعلمتها كيف السهـر يـوم الخلايـق راقـده

الشاعر / محمد بن راشد السندي الغنامي





يالله إني عايذن بك مـن الخصـم الخصيـم=والقلـوب السـود تحـت الثيـاب الزاهيـه
ويالله إنـي طالبـك ياغـفـور ويارحـيـم=فضلـك الواسـع ونيـل الجنـان الباهـيـه
بيـن لـذات وبساتيـن وانـهـار ونعـيـم=وفـي حيـاةٍ سرمديـة مـهـي متناهـيـه
ويا رفيع الشان ناهيـك عـن راي الغشيـم=لا توردهـا يـاكـود الـعـدود الراهـيـه
سوق الأسهم خبل والناس قالـت مـن قديـم=كـل خبـل لا امنـتـه يجـيـك بداهـيـه
شوفني من تسعة أشهر وأنـا حالـي سقيـم=من سبايب سوق الأسهـم فقـدت الشاهيـه
اشتـر بمكـة ولا تشتـري سهـم القصيـم=وكـل نـاسٍ فــي تحاليلـهـا متباهـيـه
وانت تدري وش مضى لك وخذ نصح الحكيم=ليـش أعيـد الفعـل واعـيـد لا الناهـيـه
مـر هذيـك المشاعـر وزمـزم والحطيـم=خير لك من سوق الأسهم ومـن بـه لاهيـه
واعرف إن المـال أمانـه يقدرهـا الفهيـم=وبعض خلـق الله يعـدد حججـه الواهيـه
ويصرفه في غير وجههه ويصليـه الجحيـم=يوم مرضعـت الولـد عـن ولدهـا فاهيـه

الشاعر / محمد بن راشد السندي الغنامي



لما بـدا الجـو كنـه عبقـريٍ حسـان=وبدت هجوسي لها بين الجوانـح هديـر
عبرت عن ما تكدس من دفيـن ودفـان=مابين فكره تمـر وبيـن فكـره تطيـر
شعرٍ عن شعور قلبي ما ارتـدا طيلسـان=يرسم مضامين يمليهـا الفـؤاد الضريـر
كله جواب لرسايـل مـن يجيـد البيـان=الجادل الي تبـث الشـوق عبـر الأثيـر
الله يسلمـك يارمـز الوفـا والحـنـان=ياوردة الجوري الـي مترعـه بالعبيـر
وصلت في خيـر للديـره وبـر الامـان=لكني بقربك أمسي وأصبح بألـف خيـر
ياوردةٌ ما طمثهـا قبلـي إنـسٍ وجـان=وأنا كذلك يالولا شـي جـوف الضميـر
غصنٍ تمايل مع الغربي وطرفـه جنـان=فعله بوسط الضماير فعل سيـفٍ شطيـر
الشيخه الي لهـا تيجـان عـز ومكـان=متواضعه.. قدرها فـي مجتمعهـا كبيـر
ياعذبة الروح يا اقوى من ضعف واستكان=ياضعف قويٍ يخلي الروح تصلى سعيـر
دقـت نواقيـس غاراتـك عيـانٍ بيـان=وعجز دفاعي عن المد الغزيـر المثيـر
كافحت موجات بحرك بين صـار وكـان=ورجعت مكسور طرفي في سماءك حسير
ديمومـةٍ سبّلـت تسقـي زروع الكيـان=في قربهـا زمهريـر وبعدهـا زمهريـر
ما عمرها ناولت مـن يرتجيهـا العنـان=قمة شموخ النفوس وعزمهـا المستطيـر
لبست ثياب الفخـر فـي قمـة العنفـوان=وتوشحت سيف عنتر واستحلـت جريـر
شمسٍ تعلـت سمـا الإبـداع والإفتنـان=تسير في دربهـا يـا حـي ذاك المسيـر
مستورةٍ مـا لحقهـا الشـك والإمتهـان=نظيفة الثوب مـا مالـت مـع المستثيـر
لبيـه ياصوتهـا الحانـي يذيـب الأذان=يروي العروق الظمايا في لهيب الهجيـر
والشعر الاشقر يـردد قصـة الإقحـوان=يطول ولا بيـوم العيـد يصبـح قصيـر
الليل طول وأنا .. في سيـرة الشمعـدان=لاضاق صدري أرددها شهيـق وزفيـر
في الجسم جمر الغضا في معبد الهرمزان=مابين ميراد زافـات الهـوى والصديـر
عبرت عن خافقي في وصف عود الليـان=لكن طعونـه تخلينـي بوضـعٍ خطيـر
شعر من شعور قلبي ما أرتـدا طيلسـان=يرسم مضامين يمليهـا الفـؤاد الضريـر
الشاعر / محمد بن راشد بن السندي الغنامي




تعبنا من تضاريس الطريق الي تودي غرب=ومللنا من حكايـات الصديـق الـي يسلينـا
نجوع لشوفتك يام الخيـال المستمـد العـذب=ونمشي في سراديب الحنيـن المبتلـش فينـا
تعالي عن كثب شوفي تباريح العطش والجدب=تعالـي والقـي النظـره إذا ودك تخليـنـا
تعالي شوفي الحسرة بوجه المستهيم الصـب=تعلي شوفي اش سوى انتظارك فـي معانينـا
براءة ..لحظة النسيان والا من سلـو القلـب=بذكراكـم يـذوب الـي بذكراكـم معنيـنـا
تعالي ياسماء الحسن مدري ياعذاب الشعـب=تعالي وأنظري ياروح وش سوى الشقا فينـا
على قولة هل الأشواق حنا طالبيـن القـرب=وعلى قولة هل النخاوات من لجروح ماضينا
إذاشعشع ضياء شمس النهارأ قول زال الكرب=أحسب أنك بعـد غيبتـك نورتـي أراضينـا
ومهما طالت الأيام روحي والهوى في حرب=متى يا قاطف البسمة يـزور الغيـث وادينـا

الشاعر / محمد راشد السندي الغنامي




إن غفر لي خالقي لا ماعلـي مـن الدنيـة=مال قارون المسمى صار من شـر البلايـا
لو اعيش العمر كله في رضى ربـي عليـه=كني أملك كل شي فهالوجـود بـلا عطايـا
المصيبة لو حياتـي قبـل هجمـات المنيـة=مثل صحراء قاحله تهلك بها شهب المطايـا
أه لو قلبي رفق بي ماضـرب سبعيـن نيـه=يالله إني عايذن بـك مـن مذاويـع النوايـا
ويارفيقي كان تبغـى رفقتـي أطلـق يديـه=وردني عن بعض طيشي لا تسلمنـي هوايـا
الله إنـه لايسامـح شوتـة محمـد شلـيـه=كيف راحت للفؤاد وكيـف خشـت فالزوايـا
والذنـوب لرحمـة الله لاتـرددهـا علـيـه=الذنوب لرحمة الله وأنت غارق في الخطايـا
أعرف أن الله رحيم ويجـزي السيـه بسيـه=وأن عفى ماهي بسابق نعمته فـوق البرايـا
زين قلي أش يحدك ماتقول اخـش الخطيـه=قدر الي فوق عرشه عالمـن كـل الخفايـا
مصطلح ربي غفور ومثلـه النفـس الزكيـة=لا تكررها على الجمهـور تغـرق فالدنايـا
كل عبد له حضور وله غياب ولـه قضيـه=بس يوم الدين ياحـلال عسـرات القضايـا
بانت النفس الخنوع وبانت النفـس الرضيـه=وانكشف روض الأماني وانتهى خوف المنايا
واذعنت كل الخلايق للقضا والشمـس حيـه=وأمعنت كل النفوس وزيفـت كـل المرايـا
يالله إني عايذن بـك وأنـت عـلام الخفيـه=من كسوف شموس روحي في محاديب الحنايا
وإن غفر لي خالقي لا ماعلـي مـن الدنيـة=مال قارون المسمى صار من شـر البلايـا

الشاعر / محمد بن راشد بن السندي الغنامي


اتمنى أن ينال إعجابكم ..















التوقيع
اضغط على الصورة لرؤيتها بالحجم الطبيعي









للتواصل عبر twitter تويتر


al_bargawy@
رد مع اقتباس
غير مقروء 25-Jul-2009, 03:50 PM رقم المشاركة : 2
معلومات العضو
عبدالرحمن الهيلوم
عضو
إحصائية العضو






التوقيت


عبدالرحمن الهيلوم غير متواجد حالياً

افتراضي

بيض الله وجهك يابو متعب
وصح السان الاد غنام
والساااااانك يابن عاصم
دمت بود مبدعا















رد مع اقتباس
غير مقروء 25-Jul-2009, 03:53 PM رقم المشاركة : 3
معلومات العضو
محمد العتيبي

مشرف منتدى شعراء قبيلة عتيبه


الصورة الرمزية محمد العتيبي

إحصائية العضو






التوقيت


محمد العتيبي غير متواجد حالياً

إرسال رسالة عبر مراسل MSN إلى محمد العتيبي
افتراضي

ووجهك ابيض يااستاذي الغالي ..

عساك دايم فالوجود ..

تحيتي
..















رد مع اقتباس
غير مقروء 25-Jul-2009, 09:49 PM رقم المشاركة : 4
معلومات العضو
أبونواف

رابطة محبي الهيلا

إحصائية العضو






التوقيت


أبونواف غير متواجد حالياً

افتراضي

صح لسان الشاعر الكبير / محمد بن راشد السندي ..

ولاهنت يامحمد على الجهد الطيّب















رد مع اقتباس
غير مقروء 25-Jul-2009, 10:04 PM رقم المشاركة : 5
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

الله لا يهينك ولا يهين آلاد غنام

على طرح القصايد و الديوان

شعراء مبدعين وقصائد رائعه

لا عدمتكم

احترامي















التوقيع
في منتدى الهيلا زحول الرياجيل = بيت القبيله و النشاما إرواقه
يزينه حرصه لزين التماثيل = ويجمله نبذ العلوم الدقاقه
رد مع اقتباس
غير مقروء 27-Jul-2009, 09:36 PM رقم المشاركة : 6
معلومات العضو
@ـايل

مشرف المنتديات العامة

إحصائية العضو






التوقيت


@ـايل غير متواجد حالياً

افتراضي

ياسلااااااااام

الجزاله ليست غريبه على اهلها ..

لاهنت يامحمد ..

....















التوقيع
اضغط على الصورة لرؤيتها بالحجم الطبيعي

شكر خآص للأخ العزيز
(سمي جدي)
,,,




للتواصل,,,

hail-osaimi@hotmail.com

الفيس بوك : هايل العصيمي

انستقرام : hailosaimi

تويتر : AlHooL@
رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »08:19 AM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي