الشاعر الكبير" كديميس العصيمي " القوه العظمى

[نواف العصيمي]

الشاعر الكبير " كديميس العصيمي " القوه العظمى ..

لاشك أن قبيلة عتيبه .. من أعرق القبائل وأعظمها .. في الجزيره العربيه .. وأنها الركيزه الشعريه والقاعده التي .. تنتمي لها الهامات الشعريه في الجزيره العربيه ..
فهي المغذي الدائم والداعم .. للشعر والمحاوره وللأدب بشتى مجالاته ..

وهنا نسلط الضوء على القوه العظمى .. وشاعر عتيبه وأحد أعلام الشاعر كديميس العصيمي ..

..

كديميس العتيبي .. من قبيلة العصمه .. من الروامين .. يبلغ من العمر .. 60 عاماً تقريباً ..
يقطن بحوطة سدير ..

تصدى الشاعر الكبير كديميس العصيمي ..
في وقت مبكر للأصالة والذود عن التراث .. والرد على من يتعرض ويمتهن الشعر بأسلوب مشين .. وأجاد كل الفنون الشعريه .. وأمتاز فيها ..
بأسلوبه الرائع المتزن .. وشعلة فكره النير ..

ديوان الشاعر الكبير : كديميس العصيمي ..



الوعد هز الخناجر فاالأباهر

قصيده للشاعر/كديميس العصيمي والشاعر/سعيد ابن ودمان

قصيدة الملتقى للشاعر\كديميس العصيمي

قصيده للشاعر\كديميس صالح العصيمي رداً على من قال انه استرفد من الحروب

وصلت رساله مرسلـه مـن زوينـان لكديميس

قصيدة الشــــاعر\كديميس صالح رداً على معجب المطيري

مـــلحـــمــــــة عتيـــبـــه للشـــــاعر\كديميس صالح العصيمي

قصيده مو جه من الشــاعر\كديميس العصيمي الى شديد الهماش

من أجمل ماقال الشاعر الكبير/ كديميس العصيمي

قصيدة غزلية مرسله من الشاعر\عبد الرحمن الخميس إلى الشاعر\كديميس

مجاراةالشاعر\كديميس صالح لقصيدة الشاعر\عبدالله ابن عون

<<بوش وعصابة بوش>>للشاعر كديميس

.. الشاعر كديميس العصيمي .. موسوعه تاريخيه ..فالمتابع لقصائده سيجده ملم بالتاريخ إلمام كامل ..
مما يكسبه قصائده قوه وموضوعيه ..تتسم بالحده وإيضاح للأحداث التاريخيه بكل .. دقه ..

وهنا نتطرق ..لإحدى قصائده ..لإيضاح مدى إلمام الشاعر بالتاريخ..

رابط القصيده صوتيه للحفظ والإستماع ..

____________-__________________.wav - 2.9 Mb

------

يبداء الشاعر الكبير كديميس العصيمي قصيدته بالتساؤل " سؤال إستنكاري " ليجيب عليه .. رداً منه على أحد شعراء مطير .. ووصف أسلوبه وتفكيره بالرديء..لنجد أن أستخدم فن من فنون البلاغه .. لرد الشاعر الاخر الذي ( حاول ) أن يجاري كديميس .. إلا أن البدايه .. إستفاهم وتهكم وجواب ..

ياعبيـد وش حــدك تـفـوة بـتـاره=قلـي عسـى ماشـر ياشاعـر مطيـر
ماينبغـي ياعبـيـد قــدح الـشـراره=بـيـن القبـايـل يــاردي التفاكـيـر

------

الشاعر الكبير كديميس العصيمي ..يرد على الشاعر .. مخطباً له .. بأن جميع ماذكره في تلك القصيده .. مجرد زيف ودجل وتخريف .. وأنها ليس إلا أكاذيب .. ليس لها أي تسجيل في صحفات الواقع .. ولاشك أن الشاعر الكبير كديميس العصيمي فوت عليه الفرصه وتمرير الاكاذيب .. وقام بردعه ..وماهو ماتطرقنا على عن قوه الشاعر وإطلاعه على التاريخ ..
..

مـدري تكلـم جــد ولــى عـيـاره=ولا سمعت من اجرب الحلـق تصفيـر
سحبـك مجنـون العـمـار بمـسـاره=( وشلتو من الهرج المزيـف قناطيـر )
راع العمـار الــي بنـالـة عـمـاره=من الهرج حيثنـة علـى غيـر تسعيـر
يـعـد شـعـرة مرجـلـة بـطـراره=( ومن هرجة التافـة يـوزع فواتيـر )
لوهـو مـن الـي يفهمـون الاشــاره=وعنـدة مـلافـي للـكـلام وتفاسـيـر
تبـي تحـط الطايـرة فــي مـطـاره=وتسلمـة خــط التقـاريـر وتطـيـر
لكـن مرجـوجـاً بـراسـة عـهـاره=كبير فـي سنـة وفـي عقلـة صغيـر
ابـتـرك المـرجـوج جعـلـة وداره=مـال للكـلام الـي بـلا عـدل تاثيـر
حـتـى يـرجـع لسفـيـة اعتـبـاره=وليـا رجـع نعـرف مكـان الخوابيـر
امـا انـت كاننـك تعـرف المـشـاره=دعوتـك وصلتنـا وجونـا المسايـيـر

------

وفي الرمز ارتفاع بالأدب والوصف .. عن العاده في التعامل مع المعاني .. والقضايا .. وهنا يعلن الشاعر كديميس العصيمي .. البدء في الرد على هرطقات الشاعر الاخر .. وردعه بالعوده للتاريخ والإقرار بكل ماحدثه .. وإحضاره ..

( عن لوحة الماضي رفعنـا الستـاره )=وركب الرشا من فوق هـدف النواعيـر
ورد الجـزاء جنـس العبـارة عـبـاره=وعلـم تـراء مايعتبـر كــل تعبـيـر

------

هنا .. يوضح الشاعر كديميس العصيمي .. أنا ماذكره الشاعر ليس إلا أكذوبه وأنا ما أوضحه من أنه قتل شيوخ قبيلته عتيبه ليس إلا إثاره ..

ذكـرت بعـض شيوخـنـا لـلأثـاره=( لكـن ماعنـدك شهـادة وتقـريـر )
ولايبنـي الرجـل الفهـيـم افتـخـاره=علـى التمنـي وخـتـلاق المذاكـيـر
ومدامتـنـك جيـتـلـك بسـتـمـاره=وعبيتها بسمـاء الخفاجـي مـع الزيـر

------

معركة الجرير

وهذه المعركة ..جرت في وادي الجرير.. في يوم المعركة الحاسمة .. ذبح السياحين والجذعان تسعين(90).. من خيل مطير وكسروهم ... وقتلوا ..مبلش بن جبرين وقتل معه شاعر من الملاعبة ..

دور ( لبـن جبريـن ) عنـدك جبـاره=اذا وجـدت لقطعـت الـراس تجبـيـر
ماسرتـة حقـب العـيـون وفــراره=خمـة قطامـي كـن عينـة سنـا كيـر
ادلـى علـيـة مجـربـاً فالصـقـاره=حـراً مخالبـيـة ســواة الشناكـيـر
عـدو عينـك نطلـبـة ربــع بــاره=ان طار والاّ في وطى الارض ويسيـر
نجيلـة اقـرب يالغـبـي مــن زراره=حتـى نطيـر هامـة الـراس تطيـيـر

------

معركة العويند عام ( 1273هـ )

معركة العويند واحدة من أشهر واولى المعارك بين عتيبة ومطير وحدثت عام 1273 للهجرة

أسباب المعركة :

لما رأت مطير ان عتيبة ضربت بسطوتها في وسط نجد بعد معركة سناف الطراد طمعت في اعادة أمجادها القديمه في نجد بعد اجلائهم لعنزه وقبل أن تخرجهم منها قحطان فجاؤ بعددهم وعتيدهم لمحاربة عتيبة وهذي هي بداية المعارك بين عتيبة ومطير لان عتيبة ومطير كانو قبل 1269هـ حبايب ولم يوجد في كتب التاريخ ألا انهم كانوا يتعاونون مع بعض قبل تلك المعركة ولما اجلت عتيبة قحطان بدت المشاكل بين مطير وعتيبة ومنها معركة العويند الأولى.

المعركة :

رأى الدويش انفراد عتيبة بوسط نجد فجمع مطير علوى وبريه والتقت جموعهم بجموع تركي بن حميد على العويند في يوم تشيب فيه الولدان والتحمت الجموع وسالت الدماء وتناثرت الجثث وقتل من مطير الكثير ومنهم عدة شيوخ وانهزمت جموع الدويش.

المصادر : يقول ابن بليهد رحمه الله عن معركة العويند : "واما الوقعة الثالثة فكانت بين تركي بن حميد ومعه رؤساء عتيبة الهيظل وبن جامع وجندهم عتيبة وبين الدويش رئيس مطير وانتهت المعركة بهزيمة مطير بعد قتال عظيم ، وهناك شجرة اعرفها بينها وبين ماء العويند كثيب الماء الذي يحيط بماء العويند ويقال لها شجرة ابي صفره أضيفت الى ابي صفره لأنه قتل عندها وهو من رؤساء مطير " أ.هـ كلام ابن بليهد ج/1 ص 46

عينت ( ابو صفـرة ) وكيـف اختبـاره=فالامتحان الـي جـراء شرقـي النيـر
جـانـا بكـامـل قـدرتـة وقـتـداره=يبـي العشـايـر جلـهـن والاباكـيـر
ولقـى السيـوف الساطيـة بنتـضـاره=بيمـان ربـعـاً فالمـلاقـا جـزازيـر
كــزة عتيبـيـاً شـلـع عـظـم زاره=بمهـنـد ٍ كـنـة ملـبـس بقصـديـر
تعـودة الوركـى وذيـب الخـضـاره=علـى ( العوينـد ) حوشتـة المقاديـر

------

مناخ الرشاويه 1327 هـ

وهنا يقصد كديميس أبو عبيد الدويش .. حيث قتله نايف ابالعلا ..

و (بـو عبيـد ) الـي يجيـد المهـاره=لاجـا اجتـوال معسكـرات المساميـر
فالمعـركـة يـقـدر يـديــر الاداره=يثنـي جـوادة عنـد تـال المضاهـيـر
جـاة ابلجـاً يكـرة عــدوة مــراره=اليا عـدى يطـرح صقـور وصقاقيـر
وتواجهـو والكـل جــرب جـمـاره=وطاح ( الدويش ) بوسط ذيك العثاميـر
انـشـد عـنـة ولا تقـفـة بـثــاره=تلقـاه فـي واد الرشـا كـنـة بعـيـر
متفرشـاً يمـنـاه عـقـب انكـسـاره=عليـة عقـبـان الفـريـدة مخامـيـر
وذيـب جبلـة ليـاخـوع الـيـل زاره=والطيـر ياكـل منـة والسايـر يسيـر

------

مناخ الحور..

وهو معركة بين عتيبة بقيادة الشيخ هذال بن فهيد الشيباني...ومطير القبيلة .. وقد قتل في هذة المعركة ..الفارس تراحيب بن بصيص .. اشهر فرسان مطير ..وكان قاتلة فاجر السلات الروقي العتيبي ...

و ( بن شري ) فارس وعنـده جسـاره=فـي نطحـة الغـازي لياجاكـم مغيـر
لياشافلـه جمـعـاً تـهـاذب مـهـاره=يلكد على الكـردوس والصايـر يصيـر
لكـن ضيـف نابـة اهــل المـغـاره=سباعاً تقانـب فـي خشـوم الشناظيـر
يومـاً جمعـة صـار فيـة اسـتـداره=تشاقلـن جسمـة وســاع الحناجـيـر

------

كون المجمعة عام (1325)

هنا يقصد كديميس فيصل بن سلطان الدويش وماجراله في كون المجمعة..وعتيبة هزيمة الدويش.. هزيمة قاسية اضطر الدويش فيها.. إلى الهرب والأ لتجاء ..إلى خلف اسوار مدينة المجمعة.. بعدما قتل فرسان مطير وأخذت ابل الدويش ...

وقد كانت هذه المعركة خسارة كبيرة لقبيلة مطير ، فقد خسرت ثلاثة من أبرز فرسانها وهــم :
(1) حسين بن الجبعا الدويش
(2) حسين بن شوفان
(3) محسن بن زريبان
والذين قتلوا هؤلاء الفرسان من عتيبة هم :
(1) الفارس الشيخ مرزوق بن وبصان شيخ قبيلة الغنانيم
(2) الفارس الشيخ عــقاب بن ربيعان
(3)الفارس راكان بن عبدالله بن صلما الثبيتي

..وقد أصيب في هذه المعركة الشيخ فيصل الدويش... والفارس بندر الدويش ... كمـا استولى فرسان عتيبة على الودايع والمعيد ...
وهــي رعيتان كبيرتان للـدوشان.. كما غنم الملك عبد العزيز ابل فيصل الدويش وهي الشرف ...



قال المؤرخ ابراهيم القاضي :
" كان فيصل الدويش عند اغارة ابن سعود على شمر( باين شينه) ويضهر عليه التضجر من عبد العزيز بن سعود
وهمّ ابن سعود بقتل فيصل الدويش وإذا قومه الذي معه من البادية مطير وعتيبة ؟؟ ثم أحضر كبار العرب وقال وش ترون؟ وهو مدخل العلم مع محمد بن حميد وكبار عتيبة. وقالوا ما لك إلا تنكف. ابن رشيد دخل ديرته، وشمر هجوا، وأنت لاحق عليهم، قال انكفنا. ثم انكف القوم. والمقصد نكوفة مطير لا ينذرون. وواعد عتيبة يلتوون من قفا القصيم
ووعدهم الأسياح.. ثم ركب ابن سعود وسار مجنب يزعم أنه منكف لديرته ثم عارضوه عتيبة وعدا في فيصل الدويش وأغلب علوى معه هاك الوقت. انتذر الدويش، وزبن المجمعة وهي في هاك الوقت قوم لابن سعود، ونزل تحت
الجدار ، وظهروا أهل المجمعة مساعدين الدويش .؟ ابن سعود زتّها عليهم، وتهيا ملحمة وكون جيد، وكسرهم ابن سعود، وحجرهم داخل الجدار: البدو والحضر والطالعي أخذه كله. صوب فيصل الدويش صواب شين، والذي صوبه فاجر ولد شليويح. ثم انكف ابن سعود ودخل ديرته في ربيع آخر سنة 1325هـ." اهـ .
قال الدكتور عبدالله بن عثيمين في كتاب تاريخ المملكة:
" وانطلق الملك من بريدة حيث انضمت اليه فئات من قبيلة عتيبة بقيادة محمد بن هندي . وعلم الدويش بتحركهم
نحوه ، فمضى إلى بلدة المجمعة ، وعسكر خارجها . ودارت بين الطرفين معركة ضارية جرح خلالها الدويش ، واضطر اتباعه ومن انجدوهم إلى د خول البلدة والأحتماء بأسوارها . وكسب الملك ومن معه ماكان خارجها من إبل مطير وأمتعتها . ثم طلب زعيم مطير العفو من الملك ، فعفا عنه . وكانت تلك المعركة في الثالث والعشرين من ربيع الأول عام 1325هــ "
وفي الهامش الثاني في نفس الصفحة تعليقاً على جرح الدويش " يقول الذكير ( نسخة خاصة ، ص80 ) : إن الذي جرحه وألقاه من ظهر جواده فاجر بن شليويح . ويورد تفصيلاً عن مبارزتهما . ويذكر ذلك القاضي ،ص27

قال ابوعبدالرحمن ا لظاهري مجلة العرب ج 11و12 سنة 1402هــ
" ولشليويح العطاوي ولد فارس اسمه فاجر قتلته سبيع في واديها رغم انه هزمها .
وقد شرب فنجال فيصل الدويش في حرب المجمعه رمز لتعهده بقتله واصابه بشلفا اخترقت جسمه ورغم هذا شفي منها "
وذكر رئس مركز عبلاء الشيخ خالد بن مشعان بن فاجر بن شليويح العطاوي بجريدة الرياض أن ماذكرة العصيمي بروايته أن جدي فاجر بن شليويح العطاوي ضرب فيصل الدويش بشلفاء في ظهره مخالف للحقيقة وقصته بالبندقية وليس بالشلفاء المصدر جريدة الرياض عدد 10148 الصادرة يوم السبت 18/ 11/ 1416

------

( فصيـل ) درا انـا منتوينـة بـداره=وحشد لنـا جمعـاً كبـر حـرة مطيـر
وطـوق نواحـي المجمعـة بالنـطـاره=وركب علـى روس الجبـال النواطيـر
وانهـا مشاعـر جمعـكـم وسـتـداره=للموقـف الـي بـة تـقـدم وتاخـيـر
وعقـب المواجـة صـارت الانكسـاره=( وضاقت على المطران كل المعابيـر )
عـقـب تـقـدم جمعـنـا ونتـشـاره=قفـو وعجتهـم ســوات المعاصـيـر
والشيخ ( ابن شوفـان ) تـم انشطـاره=عينـت راســة مالـقـوة الحفافـيـر
و (حسين ) قدامة و( محسـن ) يسـاره=و ( بندر ) قمز فالغرس مثل ارنب الطير
وفيصـل خـذالـة كـرتـاً وفـتـراره=وقفى يحـث كـروش مرخلهـا السيـر
والـدم مـن جسمـة يفـوح بـغـزاره=قفـى ودمـان ( الدويشـي ) شخاتيـر
وفي قصر ابن عسكـر لجـا وستجـاره=( ومطير مع وادي الكظيمـة قواطيـر )
حنـا نقـوم وكــل شـيـخ بـوقـاره=ماعندنـا فـي واجـب الشيـخ تقصيـر
ان زارنــا قمـنـا بــرد الـزيـاره=ونزيـد تقديـرة علـى الشـر والخيـر
حنـا نقـوم وكــل شـيـخ بـوقـاره=ماعندنـا فـي واجـب الشيـخ تقصيـر
ان زارنــا قمـنـا بــرد الـزيـاره=ونزيـد تقديـرة علـى الشـر والخيـر
ومكـارم الاخــلاق راس التـجـاره=ماجـودتـن فيـنـا بـكـل المعايـيـر

هنا يمجد الشاعر كديميس العصيمي عتيبة وان لهم اطيب واخصب مراعي نجد

حنـا بنجـد النـا مقـر الـصـداره=ولاحدن ينازعنـا عليهـا مـن الغيـر )
ولاجاتـنـا مـعـروف ولاسـتـعـاره=الـى بصولاتـن تـفـض الشراشـيـر
(عتبـان ) فالهيجـا سـوات النـمـاره=عاداتنـا دحـر الجـمـوع المناحـيـر
الياحصـل يـومـاً تـقـادح شــراره=خيلـن مناحـيـر وخيـلـن مدابـيـر
نسـد بــاب الــراي والاستـخـاره=وقـادو جمـالـن فوقـهـن الغنـاديـر

------

مناخ الشعراء " عرجاء " عام ( 1313 )

حيث طلبت مطير الامداد.. من حرب الذين لم يتوانو للقدوم.. لنصرة مطير وقحطان .. وعندما علمت الروقه ان كل هذه القبائل تقاتل برقا.. وان حرب امدت مطير وقحطان .. فقدموا الروقة لمناصرة ابناء عمومتهم برقا ..

عندها علم نايف بن بصيص بمدد الروقة ..واشار علي مطير ان تنسحب ...فنسحبوا ليلاً ونيرانهم مشبوبه لكي لايحس بهم احدا ..


ومن المصادر التي ذكرت هذه الوقعة:
كتاب صحيح الاخبار عما في بلاد العرب من الاثار , لمحمد بن بليهد

من الي سحـب جمعـة وتـم اندحـاره=وقفـت ركـابـة بالمـذلـة محـاديـر
( الي سر مـن عقـب ماشـب نـاره )=عقـب التحـدي يشعـم النـار وينـيـر
( ويخفي مسيرة عن حليفـة وجـاره )=وختـار للمسـرى بطـون التسـاريـر
ورتـب علـى درب الكسيـرة خفـاره=ووزع علـى الحـراس عـدة نواظيـر
حتـى نـزل بـيـن الورعـيـة وواره=ورتاح عقب مواصـل السيـر بالسيـر
هـذا السـبـب يعبـيـد فالانـحـداره=خـل الكـلام الـي مزيـف وتـزويـر
( مهـوب حـدرت نجعكـم بختـيـاره=جـاك الكـلام الـي وراة التقـاريـر )

------------

اورد صاحب صحيح الاخبار ...الشيخ محمد بن بليهد , ج2 , ص119 وكان يروي له خلف بن إبراهيم بن خلف من اهل الشعراء قصه حدثة له مع مطير وهي طويلة ليس المجال هنا ذكرها ..

ذكر ان عماش الدويش طلب من بن خلف راعي الشعراء هذا مانصه (( إذا وصلت بلادك فزن وزنتين من القهوة وانطلق بها إلى محمد بن هندي ابن حميد وقل له: هذه لك من عماش الدويش تجديد لما كان بيننا من العملة السابقة , فإن احب ان تبقى فإنه ياخذها تجديداً لها , وإن احب ان تنقطع فسيتركها ))

وتراء الدويـش الـي رفعتـو شعـاره=خيالـكـم فالمعـضـلات المعاسـيـر
غـرة خـوي الجنـب يـوم استشـاره=ونـوخ علـى داورد عربـاً خـواويـر
عقب اضرستة الحرب وونـس عـوارهق=ـام يتـردد بيـن عــذال ومشـيـر
( ورسل لبـن هنـدي جميـل عتـذاره=وبريـتـاً مشـريـتـن بالدنـانـيـر )
ارسلبهـا المنـدوب قـبـل انهـيـاره=لـكـن ماتنـفـع سـمـان المعـاذيـر
خسـر الدويـش ولاربـح مستـشـاره=وولـو يسجـون الضعـن بالبواكـيـر

-------

مناخ الجنيفا

هنا يقصد محاولت ..شري بن بصيص.. مصالحة عتيبة في مناخ الجنيفا وبالفعل اعطت عتيبة مطير الامان.. حتى يرحلوا بالكامل..

و( شـري ) خطرنـا منتـدب لسفـاره=وصارت نتايـج سفـرة الشيـخ تسفيـر

------

الملعبي.. هو من قام بتكسير جمجمة الشيخ تركي بن حميد ..عندما وجدها عندما ..تذكر افعال الشيخ تركي بربعه ..وهذي حيلت العاجيز المريض .. الذي لايستطيع المواجهه.. والجبن والإنسحاب هو عنوانه ..

وليتك نشدت ( الملعبـي ) عـن بكـاره=شـرشـوح ذودن كلبـوهـن مغاتـيـر
و( الملعبي ) فالرمـح مثـل الصهـاره=الي عمـل لـروس الامـوات تكسيـر
هـذا دليلـن انـة يعـانـي حــراره=يحـز فـي كبـدة سـوات المناشـيـر

------
هذي قصتها ..غزو الملاعبة من مطير على ..سبيع وعندما كشفو امرهم سبيع.. تواجهوا ..وخافوا مطير من مواجهتهم وهربوا وبعد ان ادركوهم سبيع وكادت ان ترتكب في حقهم مقتله شنيعة توجهوا لقبر احد مشايخ قبيلة سبيع الذين.. كان لهم قدر كبير في نفوس سبيع وهو قبر الشيخ ( فهيد الصييفي ) ..والتفو مطير حول هذا القبر وقالوا ياسبيع حنا داخلين على الله ثم على راعي هالقبر.. منكم فاعطوهم سبيع الامان تقدير لراعي هذا القبر

والشاهـد ان مطيـر فيـهـم شـطـاره=محـدن لقاهـا غيـرهـم فالمحاظـيـر
( لياعارضـو جمعـاً وتـم انتـصـاره=يلجـون لقبـور الرجـال المشاهيـر )
قبر ( الصييفـي ) قـد طلبتـو جـواره=يـوم ارهقوكـم باللحـوق المغـاويـر
خطرتـو لقبـر ( السبيعـي ) خطـاره=سمعتـو انــة يعتـنـي بالخطاطـيـر
يجـب عليكـم يالمطـيـري مــزاره=يـوم احتماكـم مـن سيـوف المناعيـر

------

هذي مشكلة ..حصلت بين العوازم ومطير ..وكانت مطير تكابر وحاولت الاستيطان ..في النقيرة فنزلت فيها وماكان من العوازم عيال عطا ..الا ان سلوا سيوفهم ..وسلاحهم وتوجهوا للمطران الموجودين على النقيرة وارتكبوا بحقهم اشنع قتله..

علـى النقيـرة قـد بنيتـو حـضـاره=وصـلـت مبانيـكـم لجـوبـة نقـيـر
مـار ( العـوازم ) صيروهـا خبـاره=تقـول ناسفـهـا الدنامـيـت تفجـيـر
وزبنـتـو المسـجـد وراس المـنـاره=وجمع ( العوازم ) طهر الـدار تطهيـر
خلـو لكـم بيـن الصيـاهـد كــراره=ولـي سلـم منكـم زبـن ديـرة شقيـر

------

يذكر كديميس العصيمي هذا الشاعر والذين يستمعون لمراسلاتهم ..اكذاب وتزييف هذا الشاعر ..وتدليسة وتمجيد قبيلته بالكلام ..من غير افعال تذكر..

وقولـن بليـا شاهـد ويــش كــاره=يظربـة الحايـط ليـا صـار تبـريـر
( وانتـة كـلامـك يفتـقـر لـلانـاره=الله يلـومـك ياكبـيـر الجماهـيـر )

------
كون المباحيص

الشاعر في قصيدته.. مجد افعال ربعه وانهم اهل عطفة.. يحتمونها وقت المواجه
فماكان من كديميس العصيمي .. الا ان كشف كذبته وتدليسه ..وذكره بكون المباحيص ال..ذي هزمة فيه عتيبة مطير بقيادة الشيخ هذال بن فهيد الشيباني .. وسبت الدحملية بعد هروب جماعتها وتركها لوحدها ..

حيث ان الذي سباها هو فالح بن الحرير الشيباني ..وبعد ان سبها جردها من حليها.. الذي تزينت به حتى تشد وتشجع ..قومها للمقاتله والدفاع عنها ولكن لم يفعلو ذلك جماعتها ..بل هربوا وتركوها لوحدها في ارض المعركة.. ويعد هذا من أكبر الفضائح التي واجهت قبيله مطير وكان .. رد الشاعر كديميس العصيمي .. قوي ومشين .. على الشاعر الاخر .. فإنها من الحقائق التاريخيه وبصمات العار التي مرت على مطير

تقـول مـن يزهـي ذراعـة ســواره=لعيونهـا دمـرتـو الـنـاس يامطـيـر
لكـن مـدري ويـن تـلـك النـامـره=عن ( الدحمليـة ) يـوم جينـا معاييـر
نجرهـا بـيـن الــذراء والـغـراره=من الهودج الـي كـن وسطـة نواويـر
عفـر وواشعهـا صـفـار بحـمـاره=وباقي الموضوع اريـش العيـن تفسيـر

------

هنا كديميس العصيمي .. يلوم الشاعر.. على ماتفوه به من.. اكاذيب وتدليس.. وتمجيده بالكلام فقط لقومه..

انــا بشـيـر ولانبيـلـك بـشــاره=جتـك الرسالـة والمعانـي معاشـيـر
يلـي تـدس يديـك وسـط الجـحـاره=تـراء الافاعـي ياكـلـن العصافـيـر
بينتـلـك مـاقـد سـبـق بختـصـاره=وصورتلك ميـدان الاحـداث تصويـر
وذكرتلـك سبعـة مـن اهـل النـداره=و ( الثامن ) الي طب في داخل الحيـر
ولاواحـدن منهـم قصـدت احتـقـاره=شـوخ الجهامـة محتمـيـن المثابـيـر

------

هنا كديميس العصيمي ..يقول جميع من ذكرتهم ..من شيوخك الذين قتلو في مواجهات مع قبيلة عتيبة ..نحن السبب في خسارتهم لامارة قومهم..

( وحنا السبـب فـي فقدهـم للامـاره=فقـد الحيـاة ومبعـدات المشـاويـر )
خسـارة ياكبـرهـا مــن خـسـاره=لياصار فـي رقـاب المناعيـر تقديـر
جمعـن يحاربنـا نضـيـق قـصـاره=فالحرب لين الصعب يركب على الضير
ونرمـي لجيـعـان الذيـابـة كـبـاره=وتبقـى العبـارة بـلا كبيـر ولامـيـر

------

وهذه ختام.. قصيدة كديميس العصيمي .. بعد ان كشف حقيقة ماقام بتدليسه.. وتزويره هذا الشاعر.. والذي لايستطيع ان ينكر ..حقائق ماذكرها كديميس العصيمي ..والتي بدورها تبطل.. مزاعم واكاذيب هذا الشاعر

وانتـة ادعـرت لمادعيـتـة دعــاره=بيـا سبـب يمتيـح لـوكـان قطمـيـر
نغـزك شيطانـك وغـزيـت شــاره=وعارضتهـا مابـيـن نـقـاد ومثـيـر
والرامـي التـفـاق يضـبـط عـيـاره=والمرتبـش يبلـش لياصـار تطـويـر

------

منتديات الهيلا

------

التوقيع

[محمد بن غازي]

جهد مميز يانواف وبيض الله وجهك ...


والشاعر الكبير " كديميس العصيمي " القوه العظمى ..

يستاهل إفراد المواضيع والصفحات له وذكر قصائده ومجاراته وهو منبع للجزاله والحميه ...

[الادعاصم@]

بيض الله وجهك يا نواف جهد جميل منك

[محمد العتيبي]

بيّض الله وجهك يانواف مجهود جبّار ..

بارك الله فيك ..

وشكرا لك لموافاتنا بتقرير مفصّل عن قصيدة

القوه العظمى الشاعر : كديميس بن صالح العصيمي العتيبي ..

تحيتي وتقديري لك ..
...

التوقيع

للتواصل عبر twitter تويتر al_bargawy@

[البريماني]

كفو كفو كفو كفو كفو كفو يانواااف يانواااف على
هالمجهوود الي يسر النفس وكديميس صدق انه قوه عظمى

[Man من العتبان]

كونغرس شعار عتيبه

الشاعر الكبير كديميس العصيمي

يعجز الوصف عن ملاحمه الشعريه

مجهود رائع يا نواف تشكر عليه

دمت بخير . .

[الرأي الآخر]

بيض الله وجهك يا نواف جهد جميل منك


ولشاعرنا الكبير / كديميس العصيمي ... وبلسان كل عتيبي ... نقول له : بيض الله وجهك وصح لسانك ... وأطال الله بعمرك

[وافي الخماش]

نواف كل الشكر على ما تقدم كديميس علم عسى الله يطول في عمره ..

[الاصمعي]

اشهد بالله انه قوه عظمى عسى الله يحفظه ويطول عمره الله لا يهينك يانواف على الجهد الطيب عن كديميس العصيمي .

[/عبد العزيز الجذع/]

بيض الله وجهك يا نواف...



ما شاء الله تقرير كامل عن القوة العظمى, الشاعر الكبير كديميس العصيمي...



لاهنت يا نواف..