قصيدة في عاصفة القصيم العجيبة

[النايع]

قصيدة في عاصفة القصيم العجيبة

بسم الله الرحمن الرحيم
في آخر الموسم المنصرم. ضرب منطقة القصيم عاصفة نادرة الحدوث. حسب ما يقول أهل الاختصاص وكذلك الشيبان. وكان اليوم الذي هبت فيه هو يوم الثلاثاء. وأهل القصيم يسمونه (يوم الثلوث الأسود!) وقد عايشت هذه العاصفة وهي فعلا غريبة. لكن الله ستر.

http://www.graaam.com/up/Pic5/8327648c5e.jpg

http://www.9q9q.net/up2/index.php?f=02ZlHgsWR


وقد نظمت هذه القصيدة بعدها بيوم. وها أنا اليوم أنشرها أتمنى أن تعجبكم

يا الله يا معبود يا رافع السماء = ياللي بحكمك كل الافلاك دايرة
تغفر ذنوبي يوم كشف السراير = وتحل عبدك يوم هلت عبايره
النفس مجبولة على الضعف والخطأ = وعزومها قدم المنيبات خايره
يا مسلمين لمنهج الدين عوّدوا = عُودوا ترى لابد ما هيب صايره
كثرت معاصيكم وكثرت ذنوبكم = ودروبكم عن درب الاسلاف عايره
والله محذركم وبالرسل حجكم = حتى مع الآفاق بانت نذايره
يا كثر ما نسمع ويا كثر ما نرى = عن العالم اللي ضايعاتٍ بصايره
ناسٍ غزاها ناس في جوف دارها = و ناسٍ عليهم زمرة الحكم جايره
واللي فتك به سو الامراض والوباء = واللي مع الأمواج غاصت جزايره
نسمع ديارٍ هدّمتها الزلازل = ونسمع ديارٍ فيها الالغام ثايره
كم حاكمٍ مقهور ينعى بلاده = يستنجد العالم ويشكي خسايره
يشجب ويستنكر ويبحث عن الفرج = لعل الدول في حل همّه تسايره
ماحل بالدنيا لنا فيه عبرة = والمسعد اللي له ضميرٍ يخايره
ويا خوف قلبي كل هذا من اجلنا = ما يعاقب الله لين يبدي عذايره
و انا شد عيني عارضٍ لاح بالسماء = من هوله قلوب المخاليق ذايره
من ايمن القبلة لفانا هبايب = جتنا تحادى حزة عصير زايره
شماليةٍ غربيةٍ مدلهمة = تثوّع كما الدخان تضرم سعايره
لها شبهرت عيني وبالعين شفتها = و تنبه لها عقلي وزادت فكايره
يا فكرتي منها ويا فكرتي لها = تقول ضلعانٍ مع الأرض سايرة
وأنا عند رامة كنه أبان زارني = أبان الحمر متقلعاتٍ عوايره
وحيفها يوم اقبلت كنه الرعد = ولا براكينٍ من بعيد فايرة
منولٍ محرين بالخير والمطر = من المزن شفنا بالمواري بشايره
لطيفٍ عليلٍ يبهج الروح جوّنا = والاحوال عادية والاطيار طايره
لاحت مع الآفاق ترعب خشومها = وطيوفها من كل لون متغايرة
ومع الحزوم شمام شفت الثعالب = هرايب عن اللي شافت العين نايره
ويوم انها جتنا علينا ادلهمّت = واظلم سمانا واستتر في ستايره
خيّم علينا اليل من ريح صرصر = في عاصفٍ راسي المباني يهايره
لزيزها من قـوّ عاتٍ يلوفنا = يخلي الرجال يفقد ضمايره
وانا احمد الله يوم راحت عوافي = بعد ماقفٍ ضلت به الناس حايره
وسلامي على محمد وآله وصحبه = عدد ما يقر الماء ويملا محايره

آخر تعديل النايع يوم 14-Oct-2007 في 01:08 PM.