حاكم الغنامي
الا يامرحبا ترحيبةٍ لهل الوفـا تنسـاق=كما سوق الدلال اللي تخن بريـح بريـه
ياشين المزنه اللي مالها راعد ولا براق=محد يدريبها لو تلحق الروحه ورى الجيه
عبدالله الحليفي
يدوم الك البقا ياللي ترحب والحياه اوفاق=ياسوق اهل المواتر مانكبك الا الشريطيه
انا مذهب من البارح وادور لي جمل ونياق=ابا ادور ذهيبي زين ماني مخلف النيه
حاكم الغنامي
بعد وقفتك يابو زيد جنب الماهر العملاق=عليك اللوم واجد كان ماتت نارك الحيه
بغينا نقلب السكه ونلغي رحلة السـواق=ولكن وش نسوي جنب ابو عرام ووخيه
عبدالله الحليفي
ليا منا وقفنا فالمواقف نيبس الارياق=ترا محدٍ هفا منا وعزوتنا عتيبيه
علاك اللوم لاغيرت فالميعاد والميثاق=وحكم الشرع دايم يقطع ايدين الحراميه
حاكم الغنامي
الا ياللي سعيتو بالبضايع داخل الاسـواق=تراها قبلكم بريـال مبيوعـه ومشريـه
اشوف الموس عوّد من يد الحلاق للحلاق=غريبه يالحليفي تجزي اهل الطيب بالسيه
عبدالله الحليفي
نجيب النادره من سوقها ونراعي الاذواق=ولامنا وطينا مانهاب الداب والحيه
وعد بلفور يطرونه وانا كنت احسبه صداق=واثر بلفور مايصدق ومن ناسٍ حونشيه
حاكم الغنامي
بنيت البيت مير البيت يبغاله ذرى ورواق=وانا ذالليـل بقلبهـا عليكـم مربعانيـه
تعرف انا ليا قمنا نجيب البشت بالمعلاق=ولكن ردنا ياعمنا اضـروفٍ خصوصيـه
عبدالله الحليفي
نقول الحمد لله يوم مانت مقسم الارزاق=طويل الباع عن نفسه يعدي ساعة الهيه
انا خابرك لابس لك عباة ماتنوش الساق=تحسب البشت ياحاكم مثل شكل الطفيليه
حاكم الغنامي
حضرنا والمياسم يالحليفي حمر ماتنطـاق=على قلتك يابو زيـد مربوعـه ومثنيـه
انا لايق على البشت الجديد وهو عليه لاق=ياراع الجوخه اللي من ثمان سنين مطويه
عبدالله الحليفي
ليا جبن المياسم فوق راسك جالها مطراق=وانا دايم ليا مني كويت اعرقي الكيه
كلامك ياولد عمي غثيث وملح ماينذاق=انا حصلت يالعتبان عيه عن مية عيه
حاكم الغنامي
لاولله بنت ابو زيد الهلالـي فارقـت افـراق=تبـا وبّـال ابـن وبّـال ماتبغـى الشواويـه
ترى شمسي على راسك لها طول الليال اشراق=يومني خابـرٍ عنـدك مـن الفيـه حساسيـه
عبدالله الحليفي
انا قابلتها يوم ان غيري حط له مدراق=ولن قلنا تقدم للصبيه قال مافيه
انا مافوق راسي غير شمس الواحد الخلاق=ورجلٍ مكتسي وانته مافوقك غير طاقيه
« آخـــر الـــمـــشـــاركــــات »
26-Mar-2009, 12:48 PM
العرض العادي
