السلام عليكم ورحمة الله
أسعد الله صباحكم بـ اليمن والبركات
قصيده حصريه لـ الشاعر / محمد بن سمير الحزيمي
لـ تحميل القصيده بـ صوت .. الشاعر
{ هنـا ..
يا بندر بن عجير شفت الغرانيق=اللي تحت ريش الغراب محكومه
طوّق عليها بالمخاليب تطويق=وامست تحت حكمه وتقضي لزومه
سيطر عليها مالها عنه تحليق=تسيدت له ليـــن حقـق حلــومه
ليا كف عنها الريش تسمع غوانيق=وإليا كفخ ريشه تخامر بلومَه
فكرت أبنقذها ليا هي معاويق=تطبعت طبعه وشالت وسومه
على شبيهه يآقع الطير ويليق=والصقر ما ياقع مواقيع بومه
على الرداء والا النقاء بابهم ضيق=أهل القلوب الحاقدات الضلومه
خدوش الرخوم الخايبين المطافيق=سود الوجيه من الجميل محرومه
ضعاف العقول تسوق الهرج تسويق=ما جالهم في العرف نظره وقومه
لو جيت بعقود الذهب في الصناديق=قالوا هذه نحاس ما احداً يسومه
في معرفتهم نقص ما فيه تبريق=وألاسلاطين الرجال محشومه
ترى البشوت اللي عليهم خماليق=ولا يرفع الرجال سكبة هدومه
يجيك شكله من حرار الشواهيق=وإليا بحثته خرب في راس دومه
تضهر نوايا الخدش من غير تحقيق=لو يبتسم بانت بوجهه رسومه
جحاد للمعروف ماله مواثيق=من خيبته للناس بانت علومه
يعيش بأنواع الحيل والخنابيق=وعن الخشونه يكتسي بالنعومه
كذاب ومنافق ضعيف المعاليق=لا خير في رجل يعادي لحومه
هرجه ليا جينا يجي فيه تشريق=والله حسبيه في صلاته وصومه
ومن فرق الأقراب بالكذب تفريق=الله يكدر في حياته ونومه
لو يقصر الفنجال دونه ليا سيق=اخير من قولة هلا في قدومه
والجلسه اللي ما حضرها مطاليق=ماهي من العيب الكبير معصومه
ليا مرّها عقب الحرار المعاتيق=يعاف منها وابعد الحر حومه
تأثر على الرجال ويسج ويفيق=ويطري عليه اشياء ويرفع كمومه
ليا حلل الأوضاع يلحق ملاحيق=خوفً من الله ثم نظام الحكومه
الوقت ماهو هات دلتك وابريق=الوقت فيه رموز داخل رقومه
والنير يبى النير ما شد لطويق=ولا سدد الخفجي لوادي تنومه
والله فرق في الكون حتى الزماليق=ريح النفل يفرق على ريح ثومه
ليا صار للشعار في الشعر تنسيق=رفرف علمنا فوق عالي رجومه
اسمع كلام موثق العلم توثيق=من شاعر ثابت بليله ويومه
يبدي بقافً مادخل فيه تلفيق=وينطح نحر بحر القصيد ويعومه
وللخصم فنجاله معلقم ليا ذيق=ثابت وتثبت حجته في الخصومه
ويطبق الأحداث في القاف تطبيق=وأهل الخشوم أم العرام مخزومه
يشوّق السامع للابيات تشويق=واليا انكمش راعي الحسد ما نلومه
يجيه ما جاء المعترض في المشانيق=يضرب به التيار واحرق شحومه
ينلاف منا لوف نار المحاريق=لوف الهشيم اللي تلوفه سمومه
والموقف الغصاب ومنشف الريق=يطلع سلاطين الرجال العزومه
ناقف ونثبت في وجيه العماليق=ونحرق دفاع المعتدي مع هجومه
إليا نشق البارود في الخشم تنشيق=يخضع بأمر من سبحت له نجومه
ونضيق الدنياء على الضد تضييق=وترجع جيوشه والجموع مهزومه
والبيت له ، حكمه ووقفه وترويق=والمعذره ياهل العقول الفهمومه
انتم لجزلات المعاني عشاشيق=وانا اعرف ان العرف للي يرومه
ابي انثر الطقاق شيخ الطقاقيق=اللي بدون شعور ضيع سلومه
الأوله والثانيه في سواحيق=واربع طعش يم الجرير معزومه
البيت غمقنا معانيه تغميق=بنت الفرح في الطق جات مخدومه
اضرب ثلاثه في ثلاث بتوفيق=ومن بعدها تطلع بإجازة امومه
ابطن سراح وعشق الزند تعشيق=والجعبه اللي في ظهرك محزومه
ادخل سبات الليل مع دقة الميق=مجبر وقلبك تشتعل به همومه
حنا على الوقفه وصعب الطواريق=وقلوبنا عند المواقف جزومه
والصح يبقى صح والكذب ما حيق=ويطلع على راعيه عيشة نقومه
سيل السحاب ينطق الفار تنطيق=اليا أومى برمثه واستمر بطمومه
وقام يتصلّخ بالبرد والصواعيق=وصوت الرعد قامت ، تزايد رزومه
وبالمنعطف واديه جاله تصافيق=جرّاف والجيلان فيه مهدومه
يابو شدوق في النمايم مشاديق=تقرع صحونك والقدور مهشومه
اشتل شبيهك بين حليت وربيق=والجمش دوّج في صياهد حزومه
اصرف ويصرف لك بحكي اللماصيق=والا النزاهه عن شنبك معدومه
لزق عليك استيكر الكذب تلزيق=وأسكت ولا كلمه وسبعين كومه
شققت عنوانك من البوك تشقيق=واليوم صفحاتك عليك محسومه
ولولا ولولا كان امزقك ، تمزيق=بس اترفع والعلوم معلومه
انا اختصرت وزبدة القول تذويق=والوقت ما هم النشاما رخومه
اقصر لها وتواشك العرق وتويق=ومن جوّ تطلع جوّ صرماً صرومه
قامت تفك ابواب بنكِ مغاليق=والطقس ساعدها ولبد غيومه
مثل الرصاص تخرّق الصدر تخريق=وأم الجرب فيها البلا ومهيومه
ووسقتها عن مدخل النقد توسيق=في قمة صعبه على كل هومه
تثلج صدورِ للمعاني شفافيق=طلع حليم من الغضب عن كضومه
دق الجرس لإنذار ناس مدانيق=قدام نار من جهنم لهومه
الها شهيق تشهق الكون تشهيق=منها القلوب من النفاق محمومه
ماهو بشعر مطقق الهرج تطقيق=في مجتمع ناسِ ، بليا يمومه
وانا على اللي يظلم الناس ماطيق=ولا احب ناس بالظلايم جهومه
تم الكلام وصدق القاف تصديق=بختم اللذي ترهب عدوه ختومه
سبعين بيت ومبتداها على ايق=تمت ونقفلها على ايق وعلى أومه
آخر تعديل عنـاد الحزيمي يوم 01-Oct-2009 في 06:31 AM.
« آخـــر الـــمـــشـــاركــــات »
01-Oct-2009, 06:23 AM
[ سبعين بيت ] .. لـ شاعر الحزمان : محمد بن سمير
العرض العادي
