الحر عينه يم روس الطويلات
الحر عينه يم روس الطويلات=ماهيب عينـه مثل عين الجراده
اليا اسدل الجنحان صاد الجزيلات=قولن بفـعل ويستحـق الاشاده
يكتّف يدين الضروف الصعيبات=حتى يصـافح في حياته مراده
ويحط له في هامة المجد هامات=ويلبسّ التـاريخ فعلـه قلاده
ما يلتفت لأهل النفوس الضعيفات=عنده على خوض التجارب إراده
إليا أرتكى شال الحمول الثقيلات=صلـيب راس وفيه عزم وجلاده
مايحسب حساب التعب والمسافات=رايـه عنان وكل غايـه جواده
يقطع فجوج البيد من دون وقفات=ويأخذ من يدين السنيـن الشهاده
إن طالت الايام وإن راحت وجات=تجاربـه من فوق عمـره زياده
يقديّ أكبر منـه راي وقنـاعات=الشـور شوره والمراجل شداده
الذكرى
تومي بي الذكرى من السيف للسيف= والقلب نسناس الغرام ألتوابه
في ليلةٍ فيها تجر الغطاريف= موقف تعب ما فيه للنفس ثابه
ذكرى رسوم وهمس ود وسواليف= زالت .. ولا زالت محل الكتابه
يبقى لها في سيرة الحب تعريف= : أول غرامٍ ما يجي له مشابه.
ياغالي الذكرى... ذكرت المواليف=فأول مشاوير الغلاء والصبابه
كتمتها وأحلام عمري مراديف=أسعى وهي تسعى ورحنا نهابه
ما باقي إلا صورةٍ كنها طيف=وعطرٍ نسيم العشق للروح جابه
تأخذ لها في دوحة الروح تشريف=وتنزع عن الصمت المطول ثيابه
غيداّ طغت ما مثلها فالبشر شيف=لها على عرش الجمال الرحابه
تخلف موازين الرجال العواريـف=وراع الصواب إتضيعه من صوابه
معربة منسب لها الأوله كيف=من صلب شيخٍ كل مجدٍ رقابه
مروي عطش حدب السيوف المراهيف=راس الحسب وأًصل النسب والمهابه
محشومةٍ عندي مثل حشمة الضيف=وعلى لساني من غلاها رقابه
من دونها حالت دهور و صواديف=وكلٍ عذابه في حياته غدابه
أعدها من ضمن الأموات يا حيف=ويبقى الرجاء مع واحدٍ يرجابه
راحت ورحنا والخواطـر ملاهيف=وكلٍ يعيد الذاكره من عذابه
هيل التعب
ياطويق فاح العبير وفاحت الدله=وحنا ورى حلمنا تركض خطاوينا
ياطويق راسك ركزنا العشق في ظله=لا تلحِق الحال شرهه كل ماجينا
وش حيلة الخل دام أنه بغى خله=مدام هذي مطالبنا وأمانينا
ياطويق قلبي ماكل إنسان يقبلّه=لو العذارى تسوق الموج للمينا
عشت وشربت التعب دقه على جله=من شأن هقوة عزيزٍ هاقيٍ فينا
عشنا وكلن مع أيامه تخيل له=صوره لمستقبلٍ يرقب حراوينا
أثنين نطوي شريط العشق ونهله=ولو تنشد الشمس نادتنا بأسامينا
أنخاوي الليل ماتطري لنا الذله=وشواهد الحال فالدنيا مسارينا
وإليا سرى الشوق فالشريان وأحتله=عز الله إن البحر ماعاد يروينا
واليوم لغز التعب فالوجه من حله=مادامه الظلم يرفعنا ويرخينا
إندق هيل التعب بالعزم ونزله=من محجر العين لين العين ترثينا
ولو نعتذر عذرنا ماهو على المله=مستقبل العشق يشره فوق ماضينا
للوقت غدره وتجتاح العمر كله=أشوفها فوق شوك الظلم ترمينا
يا أول الناس في قلبي ولا بله=إلا أخر إنسان يسكن فالشرايينا
عشنا نزف الغلا فالقلب ونجله=ونكبر وتكبر مع الدنيا هقاوينا
والوقت ظالم ولا لحظوظنا طله=وعمري وعمرك غدى ماظن يمدينا
المحيط الهادي
يالمحيط الهادي الوقت العوج يسرج خيوله=وجيت يمك مابقى حيله ولا فالحال حيل
جيت منهك والهموم بداخلي عشرين دوله=حاصرت قلبي وأنا حاير على بيداء الرحيل
جيت والخطوات يمك بالتعب تمشي كسوله=اشعث وللهم في صدري من الضيقه صهيل
كل نظره من عيوني بائسه وجله ذبوله=راجعه من رحلة الصبر المسمى بالجميل
والصخب في وجه حظي كيف أجيه وكيف أقوله=والزمن جاير وأنا حلمي على الواقع فضيل
أسحب أذيول التعب والحزن تضرب لي طبوله=حاير العبره وجيتك من عناء وقتي دخيل
وكل كلمه في لساني شفتها تاقف خجوله=غير عندك لو نهاري في نظر عينك طويل
يا وديع السر يا صدر المحيط ويارسوله=ويالخليل اللي مكانك يدحم أضلوع الخليل
تايه الخطوه عيونه تلتفت يم الطفوله=ولا لقى من زحمة الحاضر مفر ولا سبيل
الفراق يسم حالي والعرب حولي جهوله=وكل ما مالت بي الحيله عرفت المستحيل
إنكسار الرجل صعب ولكن يحدد وصوله=لأبتسم لأحلامه البيضاء على حد المخيل
بالعزيمه ياصل ويملك من القوه حلوله=إن غدى مضرب مثال ولا يجي بعده مثيل
يالمحيط الهم وإن زادت على كتفي حموله=صرت أشوفه صاغرن قدامك وجسمه نحيل
داخلٍ بالله عليك الموج يغريني ميوله=وإن خذاني فأعرف إني حي لو جسمي قتيل
جيت أفضفض ما هويت ألا المكارم والبطوله=وماعطيت السر غيرك لا كثير ولا قليل
صوتٍ دعى الشاعر لربعه ولبّاه
صوتٍ دعى الشاعر لربعه ولبّاه=من الرجال أهل الوفاء والعزاوي
حتى صدح قافه وصاغه وغنّاه=في خايعٍ من جملة الناس خاوي
يتعب على سبكه وحبكه ومبناه=ولاله على نظم النوادر مساوي
إليا برق في غيمة الفكر معناه=تشلع له الجزله سوات النداوي
شعرٍ يبيض وجه منهو تنقّاه=وأنا عليه مع الليالي شفاوي
أبيّن أبيوته وأميز مزاياه=وأقول يا سرب المشاعر تخاوي
في ليلةٍ تجمع هل الطيب والجاه=روس الشيوخ مبعّدين الهقاوي
والمدح مقصوده ورمزه ومنحاه=فعتيبه الهيلا ولا ني بغاوي
ربعي سنام المجد كله ومرساه=وتاريخنا بفعول الاجداد راوي
مع المؤسس كل حدٍ وصلناه=لا قيل لحلوق البنادق تعاوي
نارد حياض الموت للدين ورضاه=وفي نصرة السنه مانرحم وناوي
فعولنا مع طيب فعله مسماه=ودقلاتنا دايم تفوق الحراوي
واليوم في حكمٍ سناء الامن يزهاه=زهو الذهب فأفخم بشوت الحساوي
في ظل أبو متعب عسى الرب يرعاه=وفي ظل أبو خالد وهاك النداوي
ندحرهل التخريب ويخيب مثواه=اللي من الارهاب سوّت دعاوي
ومنهو نوانا يخلف الله نواياه=عدونا في مجلس الذل زاوي
إليا أحتمى الموقف وضاقت زواياه=صار العدو في حفرة الضيم هاوي
الارض من دم الجنايز محنّاه=وبيارق النصر الموزر علاوي
ويبقى وطنا راية العز تبراه=في خدمته كلٍ يحث الخطاوي
وأكبر دليل بنظرة العين نقراه=فعيالنا الليله كعام البلاوي
يستاهلون الشكر لاحل طرياه=والمدح مثل الطيب عنبر وجاوي
أنتم قرانيس الوطن وأنتم أبناه=وفيكم مقاصيد الرجاء والمناوي
كلٍ نذر نفسه على شأن يحماه=من كل نذل وكل طامع وناوي
وأنتم دروع الامن سيفه ويمناه=حقيقةٍ ماهي سوالف مراوي
ويبقى ولانا واضحٍ ما حـجـبـنـاه=وعده مع عدود القبايل رهاوي
« آخـــر الـــمـــشـــاركــــات »
05-Aug-2011, 12:24 AM
ديوان الشاعر مرزوق بن دحيم العتيبي
العرض العادي
