احديه لشعراء من عتيبه

[الباحث عن الحقيقه]

قال شاعر من عتيبه

نركب على اللي مشيهن انقاف انقاف ذيب يجر اعواه

بمسلبات ضربهن ينشاف واللي يبانا يقصرن خطاه

البيض لمبارك الكرناف يــــــــوم ماقفـــه خـــلاه


________________________________________________

وقال شاعر من عتيبه

من هضبة الخله الى السنفان مثل الجراد اللي ضبط ممشاه

________________________________________________

وقال شاعر من عتيبه

ياللي تجي لشديد العبود ياخذ من الفتنه هواه

ياخذ هواه من اشهب البارود والمدرق حنا وراه

________________________________________________

وقال شاعر من عتيبه

لي روحت شقح البكار وام الحوير كبته

نركب مزاغيف المهار والرمح نروي دبته

________________________________________________

وقال شاعر من عتيبه

عصرية في شعيب الضال غطا السبايا عجها

ما اخبلك ياللي حارب هذال سبع القبايل هجها

المقصود .. هذال بن فهيد الشيباني

________________________________________________

وقال شاعر من عتيبه

عط الشواكل فراج نوف على الخياله

عيال معيض الرجعه ردوا شفاة الغاره

المقصود بعيال الرجعه .. الاولاد الذين يأتون بعد تقدم سن الرجل

________________________________________________

وقال شاعر من عتيبه

نحفظك يا ذود الطريسه من بد ذيدان البنات

ونحماك من راع اللميسه ونحماك من راع الحصاه

المقصود براع اللميسه .. بن هملان السبيعي
والمقصود براعي الحصاه .. ابن حويل القحطاني

_______________________________________________

وقال شاعر من عتيبه

نجد حصان ويدبه راعيه واشتف به يوم عشبه زاف

خلوه علوى معذرين فيه والفرم حاربنا وعاف

المقصود بالفرم .. من شيوخ حرب

_______________________________________________

وقال شاعر من عتيبه

يا جاري ابشر بالحليب والا بجوز من الحياه

ما عاد الا بنصى شبيب وابو جهز من وراه

ابو جهز سقم الحريب نرعى وحنا في ذراه

المقصود بشبيب .. ابن حجنه
وابو جهز .. هذال بن فهيد

_______________________________________________

وقال شاعر من عتيبه

ناخذ ونطرح في هل الهيشان حوقان لومنا عليه

في نحور ربعي طاح ابن هملان بمصقلات حدها نرويه

المقصود بحوقان .. قرية تقع جنوب الخرمه
هملان .. القريشي السبيعي

_______________________________________________

وقال شاعر من عتيبه

خله يذوق الموت يا حبشان هذا جزاه بنطحته شبيب

صابه بشلفا جات من نجران تفرق حبيب من حبيب

المقصود بحبشان .. من قحطان
شبيب .. ابن حجنه

وكانت هذه الاحديه جواب على احدية لشاعر من قحطان يقول فيها :

ابا انشد الطرقي عن اللحيان وابا اتنشد ويش سوى ذيب

ان كان هو ميت فانا الوجعان وان كان هو طيب فانا باطيب

ان كان ذيب لحق ابن جرمان تقمح مشعثرة السبيب

المقصود بذيب .. هو ذيب ابن عبود شيخ آل مسعود من قحطان وقد مات متأثر من صواب شبيب من حجنه
ابن جرمان .. مناحي شيخ آل عاطف من قحطان

_______________________________________________


وقال شاعر من عتيبه

ياقلب ياللي جظ ياحلسان زايد جظيظه نزلتك للحيد

والله على اللي كنها الشيهان مع سربة قوادها ابن حميد

المقصود بالحيد .. هجره للحناتيش من الروقه

_______________________________________________

وقال شاعر من عتيبه

ضبعة خفا داجت على مسروح والذيب مع طير الخلا

من عقبنا العذراء تروح للرخص من عقب الغلا

المقصود بخفا .. ماء قديم بجانب هضبه صغيره شمال بلدة القيعيه غرب هضبة شرثه وشرق العرايس

_______________________________________________


من عنده معلومة عن من قال هذه القصائد يفيدنا بها مع ذكر مصدرها الاساسي


و سلامتكم ... الباحث عن الحقيقه

14/2/1434هـ