الشاعر الكبير شباب بن فايح العضياني وملحمه جديده

[عاشق الاطلال]

يالله ياوالـي علـى كــل والــي=يامنزلن سـوره تبـارك والاحـزاب
أنت الـذي تحـي العظـام البوالـي=وانته رجاي ومـن ترجـاك ماخـاب
يـاوراث الدنيـا علـيـك اتكـالـي=ياغافـرن زلات عبـدك اليـا تـاب
طالبـك يامـولاي تقبـل سـوالـي=ترفع مقامي مع محمـد والاصحـاب
هاض الضمير وقلـت ممـا طرالـي=مثايلـن يطـرب لهـا كـل لـعـاب
غنيت يـوم الشعـر جالـه مجالـي=ولانيب في بـدع التماثيـل نصـاب
لي وقفتـن فالشعـر بيـن الرجالـي=يرومها قلبـي علـى كيـف ماطـاب
وان كـان ماقالـو يجيـب الجزالـي=والا تركت الشعر وأغلقـت الابـواب
والشاعـر اللـي يرتخـي للهزالـي=يلقون فيه اهـل المناقيـد مضـراب
وان شفت في بعض الصفوف انعزالي=مالي عن الربـع المواليـن مجنـاب
ربعي وأنا عن صف ربعـي مبالـي=في صف ربعي لوتحملـت الاتعـاب
رجلن بـلا ربعـن قصيـر المدالـي=لوكان يفعل فعل أبـو زيـد وذيـاب
ومن لاعرفني كـان عنـي يسالـي=أنـا عضيانـي مـن اولاد غصـاب
ربعـي لهـم فالمجـد سلـم علالـي=عراف وقضاتـن يفكـون الانشـاب
واهل الصخا فـي مقدمـات الليالـي=ماحسبو في واجب الضيف بحسـاب
وان جاء نهارن فيه مـس الحبالـي=وحول بسوق المجزره كـل غيهـاب
خصيمهـم منهـم يـذوق النكـالـي=يقفي بكبده مثل سـم أسـود الـداب
وان حولـو بالسيـف دون التوالـي=يشهدلهم عمهـوج قطـاع الارقـاب
عمهـوج سيـف متيهيـن المتالـي=اللي لروس اهل الطرابيـش قصـاب
من كف شالـح محتمـي كـل تالـي=تسعين غير اللي به الجـرح ماطـاب
الضيط ستر اللـي زهاهـا الجمالـي=بنت الشيوخ اللي زهت زين الأسلاب
جابو جملها وأشهب الملـح صالـي=يومن بعض الناس عن موقفه غـاب
وجاء للرمك بين الصفوف أجتوالـي=وشرع بمذلوق القنـا كـل معطـاب
بياعتـن للعمـر لـوكـان غـالـي=ياما رمو بالسيف من لابـس الكـاب
اشيوخن تروي مرهفـات السلالـي=يبرونهم مزحـم طوابيـر واسـراب
شيخه شمل ماهوب صفـرن يشالـي=وموثقه مـن قـدم شالـح وتعـاب
يشهـد لهـم تاريـخ نجـد المثالـي=يومن كلن يقضب السيـف بنصـاب
عبرت عـن ربعـي وللعلـم تالـي=حنا عتيبه مـن عريبيـن الانسـاب
من روس هيلاً مثـل شـم الجبالـي=أهل المهار السرد والسيـف حطـاب
فـي نجـد مالـو ميلتـن باحتمالـي=برقا وروق منزحـة جمـع الأجنـاب
تطحـن رحاهـم كـل حبـاً جلالـي=السيف يقصب وأحمر الـدم سكـاب
لين أستحلو وسـط نجـد احتلالـي=كم بيت شيخن يشلعونـه بالاطنـاب
يومنهـا ميـدان سـاحـة قتـالـي=مابيـن منهوبـن ومابيـن نـهـاب
قلته وأنا ما بخس حقـوق الرجالـي=كلن يكيـل ويوفـي الكيـل بحسـاب
أحدن شرب من سلسبيلـن وحالـي=واحداً شرب سمن على الكبد غيـاب
لين استتب الامـن والجهـل زالـي= ظل حكـام الشريعـه والاعـراب
اللي لهـم هيبـه وحكمـن عدالـي=وتخضع لهم هامات عكفان الاشنـاب
قـاد السفينـه صيرميـاً نضـالـي=عبدالعزيز اللـي دقـم كـل مخـلاب
ورفع علـم رايـه عزيـز الجلالـي=ونادى مناد الحق فـي كـل محـراب
وكلن بسـط كفـه لكسـب الحلالـي=والشعب بايعهم علـى حـق وكتـاب
والصف واحد ماش فيـه انفصالـي=في وحده الكلمه وفي نبـذ الارهـاب
تحـت شعـار معدلـيـن الميـالـي=عزوة هل العوجا مذللـت الاصعـاب
وفي عهد عبـدالله كريـم السبالـي=ماعـاد بـه طالـب ولافيـه طـلاب
طور بـلاده مـن جنـوب وشمالـي=وصارت صحاريها بساتين وأعنـاب
وصلـو عـدد ماكبـرو للهلالــي=على الرسول الهاشمي خير الأحبـاب

الشاعر شباب بن فايح القوبع العضياني

[/عبد العزيز الجذع/]

وش فيك؟؟؟



حاط اسم الشاعر بس!!!

وين القصيدة؟؟؟

[ماجدالمسعودي]

عاشق الاطلال

يطيب حط الشعر خلنا نتمتع معه