الشاعر الكبير حشر بن متروك المقاطي

[النويب]

راكب اللي يوم يلعـب علـى كبدالحمـاد
مثل صقر يوم يلعـب علـى كبدالهبـوب
من وكالة فـرت والكـل تصميـم البـلاد
مشترينـه ماحسبنـا لغالـب ومغـلـوب
لرتكـز بيـن المحاديـب وهـاج الفـواد
قلـت هاتولـي مفاتـيـح بــرَّاداللهوب
يآصل اللي نزلهم من ثلوم طويـق غـاد
منه لا وادي الرمه وأستند واجنب جنـوب
لابـةٍ للـي يباهـم مداهلـهـم جــداد
والبيوت كبار والنـار للناصـي جـذوب
لابـةٍ يـاوي لابـه ليـا عـدا الـعـداد
لابةٍ تسعد بها العين عـن هـم الكـذوب
لابتي عتبـان مافيـه شـك ولا ارتـداد
لابتي هاله تهايل علـى نطـح الوجـوب
من فعايلهـم يفـادون فـي يـوم العنـاد
تفرح الفاطر بمركاض عطبين الضـروب
والفعـول الباقيـه مـال طيبهـا عــداد
وافـيٍ ميزانـا مـع موازيـن الشعـوب
يوم نجد من الجهل حط راحـان وزبـاد
والتبس من غالي اللبس باجمل كل ثـوب
وامتشط بين العشاشيق من كـاد ورشـاد
والقماري فـي قواريـه غنـة باللعـوب
وقحطان أجموع دونـه يشنـون الطـراد
والدواسر والمطاري وشمـر والحـروب
والبقوم اللـي ليـا ولـع الحـرب بكـداد
حضرة الغيَّاب منهم تسـد عـن الغيـوب
والسباعي مدلـه الجـار حمَّـاي السنـاد
عزوةٍ من ناوشه حربهـا يمكـن يتـوب
غير من لسميت في نجد من حضر وبواد
كل قـومٍٍ حقهـا ماننقـص لـه وجـوب
ان حدر معهم ضعنـا وأجدانـا الجهـاد
لين اخذنا قسمنا بين غاصب ومغصـوب
قسمنا في نجـد مدهـال مقرعـة التـواد
قسمنـا يـوم القبايـل تداحـم بالجنـوب
امتلكنـا العقلـه اللـي نواعرهـا حيـاد
بين ضلعان البشاره وضلعـان الهضـوب
وامتلكنـا الأروسـه والهميجـه والبجـاد
والطويلـه والدفينـه وعبـاب وسحـوب
وامتلكنا في شمـال الهضـاب ام الجـراد
الرشاويـه وعرجـا وفاحـان الصبـوب
وامتلكنا بيـن طخفـه وسفـوه والطـراد
كم قليبٍ شوف هاذيـك ميـاح الغـروب
حدنـا منـا ومنـا نعـرفـه بالـوكـاد
من سواج ليا حبيـه وتشريـق وغـروب
شرقه العارض وغربه ورى الطايف قصاد
موطنٍ تورثه الاجـداد للـي فالصلـوب
ندفع البل فالمرابيـع فـي هـاك الوهـاد
والمشارب نقضةالجزو باعيـن الجـذوب
والحـدود الهـا قطيـع معـزن بالمقـاد
والجنب معها على الخيل والحارب يلـوب
ترتع الوضحى ام الأدلال قوس ولا تـراد
وانحماها من مقانيـص طمَّـاع ولعـوب
لختلـط عـج السبايـا ولمـاع الهـنـاد
من يطب السوق معنـا نمنيـه الهـروب
لابتـي عتبـان مافيـه شـك ولاارتـداد
لابتي هايلاً تهايل علـى نطـح الوجـوب

[فهيد مقعد الرويس]

صح والله لسان ابوسعود

شاعر علم

ولاهنت على النقل الرائع

اطيب تحيه

[سيف نت]

صح لسانه ولاهنت

[محمد المرشدي]

صح لسان الشاعر المقاطي

وان كان مانيب مخطي تراه اخو الشاعر الكبير عبدالله بن عون من الام


لاهنت ياراعي الموضوع

[مشاري الحبردي]

قصيدة انتشرت انتشار كبير ,,,
وتستحق الانتشار




صح لسان ابن متروك مليون

[النويب]

فهيد الرويس

سيف نت

الخذامي

مشاري الحبردي

بيض الله وجيهكم جميعا

وكل الشكر لكم

على المرور

تحياتي

النويب