من يلومني في تنسيقها..؟
سلطان الجـذع
مرحبا ترحيب في حله / وعلمٍ في محله = والقرايح مستعده لادعا للشعر داعي!!
ياعلي حصلت لك صورة جديدة فالمجلة = تحتري دورك بطابور الضمان الاجتماعي!!
علي فلاح العضياني
البقا من شاعرٍ شعره يداوي كل علّه=دارسٍ شعر الثبيتي و العصيمي و الجداعي
الكرامه يالعتيبي فالها فنجال دلّه=وانت تعرفني عن الفنجال ما يقصر ذراعي
سلطان الجـذع
في فلك واحد تدور / ولاحفظت الدرس كله = يوم تقنعني وخمس ايام من دون اقتناعي!!
العزيز اللي مقامه يابن ثعلي مايذله = يامّدور خاتم سليمان فحلوق الافاعي!!
علي فلاح العضياني
في مدارات العلوم الطيبه و الحمد لله = و الجذع قدّام يثني ما نقول إنّه رباعي
لا تقولون المظلّي ليش حوّل بالمظلّه=في مهمّه طاريه ما هي مثيره للنزاعي
سلطان الجـذع
مالك الا في خيالك تفتل الحبل وتحله = لين تبني لك على الواقع من الواقع شراعي!!
قبل يغدى بك جبل ورقان خلك تحت ظله = بين ابن سرحان وسعود العصيمي والنفاعي!!
علي فلاح العضياني
يالجذع بلّغ سلامي كبتن عتيبه و قلّه= ضحكة اللقياء عليها الخوف من دمع الوداعي
التحدّي ما ترك لي عضو ما هو مستحلّه=و الشجاعه تعتبر تاجٍ على راس الشجاعي
سلطان الجـذع
قلت له قال الوادع أطيب وياليته / لعله = انتهى دوره بعد ما دمّت أنياب السباعي!!
في سما الاحلام جوك صحو ونجومك مطله = وفي دروب الحكي ماشاء الله على الدفع الرباعي!!
علي فلاح العضياني
الخطا فالجاهل اللي ما اكتمل عقله جبلّه !!!!= و الرعيّه فالخلا ما تنترك من دون راعي
ما عليه اللي بنى بمخطّط الأمجاد فلّه=من هروج اللي ملا بطنه حليب من المراعي
سلطان الجـذع
حجتي حجة وثبتها كلامك بالادلة =لاتروح مع الخلاء والذيب فالمرقاب واعي!!
الصحيح انك تسيرها بلا مذهب ومله =والحقيقة صوتك المبحوح مانال استماعي!!
علي فلاح العضياني
يا عذاب عيونك الثنتين من روس الأخله=الحقيقه ضاع عمرك في سنوات الضياعي
لا تخليني بعد ما قلت أزيد الطين بلّه=صوتك الناعم عليه القلب يشعر باندفاعي
« آخـــر الـــمـــشـــاركــــات »
16-Mar-2010, 11:28 PM
العرض العادي
