تعال..تعال شوف الجمال على وصوله.. ها وش رايك

[صنيتان قرداحي]

قصيدة للشاعر (الفراعنة)

قالها يوم سباق المزاين سباق ملكات جمال (الابل)

فيها وصف رهيب للحياء ووصف للاربع الاولى وهي المجاهيم-والمغاتير-والصفر-والشعل


خذوا القصيدة



[poet font="Simplified Arabic,4,white,bold,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
يوم كل(ن) لابن عمه عصب راسه وشاش"="شش ياراسي لارحم رحم ابومجناك شش
يوم جينا للمزاين وغاض الماء وطاش"="بانوا اهل البل وبان الاصيل من الغشش
يوم جاكر ذودنا ذود الاجواد استغاش"="ذودنا يفرق بفرق البصير اعن العمش
طق للذيدان بصبع وغيض الجاش جاش"="جعل ابو من يجحد الحق يشرا له نعش
اربعة ذيدان سيقت على ريع(ن)مشاش"="كن خده فدرقان الحرير اليا انبرش
بين صفرا وشعلا كنها طش الغراش"="وبين ملحا وبين وضحى تقل وجه(ن)غبش
ويل قلب(ن)دقته كنها طلقة كلاش"="يوم صيح عامري لعمري والديم رش
كن تنظام الجماهيروغترها تباش"="طقم لؤلؤ في ثغر حلوة المبسم بهش
زبدة الاربع ثلاث(ن)رقشناها رقاش"="يافهد والرابعة جالنا فيها مخمش
يا بن علوش البل البل اربوعي يا بلاش"="هم هل البل دونها وردواخضر النمش
يافهد حنا هل البل مدلعت البواش"="دونها ما ينتفخ راس شيخ الاوفش
دونها كل اشقر(ن)بالشبيلي ما يحاش"="فالنحر رمح(ن)مدبض وللعلبا مقش
دونها حشنا السلاطين بالبيض الحواش"="ولنفهقنا لين عود غضنفرهم جحش
دونها شهب المعارك دفشناها دفاش"="في نهار(ن)وابل الموت براقه رهش
يافهد ياما حلا من عقب خمس(ن)غشاش"="شوف الاربع رتع(ن)والشجر منشاه هش
اربعت ذيدان ترعى سماليل الحشاش"="لاضرب نجم السويبع ثلاثة في ثنعش
ماحلا تدريجهن يوم للسيل ادحاش"="في مداحي عثعث(ن)حطه الوسمي منش
في رغد قاع(ن)زماليق جيانه تجاش"="اشهرين(ن) ودهم الغيث فوقه يمتحش
يلعب الزملوق في خايعه لعب الفراش"="وام سالم تتطلب وابوسالم يبرهش
غادي(ن)كنه زواليف سجاد(ن)تهاش"="من عقب ماهو مثل خدة الوجه الخرش
كن صواك الغظا فيه بوابه قراش"="وكن زهرورده طرابيش ترك(ن)تتهش
وكن زبيديه اليا صللعت روسه وكاش"="روس حجاج(ن)عقب حلقوا سود القشش
اول الاربع جهامة مجاهيم(ن)تناش"="كنهن سهاب نو(ن) على القمرا غطش
لنثعن كنهن سبيب ادهم(ن)غادي(ن)طشاش"="وان تتالن كنهن من طوابير الحبش
من زبار الخاطفية الياحزم الرقاش"="في عروق الربع نزو المجاهيم يهقش
مثل مشي الحافية خايفة وطي الخشاش"="لمهل(ن)وان عجلن يلعبن الطرقعش
قطف ما في اوبارهن لام ريحانه عراش"="والمذيل مثل ريش النعام المنفرش
كنهن روس(ن)تحاذف اغترها في هواش"="لانحوهن عن هواهن وظاميهن جهش
وكن بين اعيونهن ضوح نار(ن)في قشاش"="وكن وبرهن يمرخونه بماء عين الوحش
وكن برهان الفحل يوم جا يدقش دقاش"="وهن من حوله صفوف(ن)تجش القاع جش
حاكم(ن)يهتف له الشعب كله عاش عاش"="كبروا راسه ولاعاد يحتشه محش
وليا ملحا تحت ظل الجماعة ما تناش"="كنها لاشفتها يافهد ترعى المشش
بنت شيخ(ن)لبسوها اسود الخامة قماش"="في حداد وعمرها ما تعدا اربعطش
وثاني الاربع شرارة مغاتير(ن)بشاش"="كن وبرهن برش(ن)من الفضة يرش
كن مرافضهن صياني سلاطين(ن)غباش"="وكن قريش اثفانهن سنديان(ن)منقرش
وصف قبة مسجد(ن)سقفت بالبيلكاش"="وصف مقدودم سنام(ن)على العطف وقش
وصف قاعت برلمان(ن)تلاقوا للنقاش"="وصف دمث اردوفهن لاتبدن عقب طش
وكن حس ارغيهن قرقشت طفل(ن)بقاش"="اوتضحك خفرتن غازلت راعي بكش
وكن برهان الفحل بينهن يوم استهاش"="ثم هدر وضحى(ن)خشيع(ن)خضيع(ن)ماتهش
ضابط افراد(ن)لقا وقفة الطابور ماش"="فار دمه ثم عطا الامر ثابت يا حوش
وليا وضحى(ن)كنها قطنتن تربط بشاش"="فوق اصيبع جاهل(ن)طش دمه ثم نش
كنها تحت الذرا من عقب طق الرشاش"="جادل(ن)دوبه خذا له يا بن علوش دش
وكنها لافررعت مع ظهر حزم(ن)نكاش"="خفرتن ضاقت وذبت عبايتها طفش
لختفا بدر الظلام اكشحت مثل الفلاش"="وان تبدا زادت النورنور(ن)ورتهش
وثالث الاربع من الصفرحلوات الرهاش"="كن سمار ازوالهنه قصور(ن)في جرش
تقل ساعة يفترشن ابيض الارض افتراش"="روس اصابع حرتن بخضر الحنا تمش
وكن حسك اظهورهنه زواليق العشاش"="بينها القمري بنى له مية عش(ن) وعش
وكنهن لاهملن في ثرا الواد الهشاش"="سلك سبحة ساحر(ن) حبها غادن طشش
وكن علابيهن ورزات الاذاني هواش"="قبعة جندي خفر صوتوا له ونخرش
يافهد لوشفتهن يوم جن والماء نشاش"="ثم طقن روس في روس من حر العطش
كنهن نسوة شريف(ن)تلاقن بالمقاش"="يوم غارن من بعضهن تلاقطن الشوش
وكن لعوب اذيالهن لاغدا يرعش ارعاش"="قرن مملوح(ن)بليلة زفاف اخته رعش
ورابع الاربع من الشعل حلوات المهاش"="فالدحي كنهن شيوخ(ن)مذهب فالجمش
كن وصف الشعل فوق ابيض الخد الحراش"="عقد سلسال(ن)على صدر ابو رمش(ن)عكش
وكنهن حدر المطر خرد(ن)بالماء تراش"="والحوير تقل ورع(ن)يدور له مخش
وكنهن ضوح الشفق يوم بارقهن تواش"=" اوكسر ياقوت حدري مصابيح(ن)توش
وكنهن قرشوم متجود(ن)حف القراش"="تغري الضد المناحر واليا هد ابتلش
وكن غواربهن محاريب رهبان(ن)نواش"="وجرة الميسم عليهن تقل جرة حنش
وكن حدرهن يخت ملياردير(ن)فوق طاش"="وكن اذانيهن مزامير عباد الدبش
يافهد هذي وصوف البل وجاشت بجاش"="شاعر(ن)له فوق عرش الشعارا مدقش
يافهد جاني على سفكة المعنى خراش"="كن من بين اضلع حشاي الف جني(ن)غوش
افرق النقطة عن الفاصلة بثنين داش"="لا ابوحش الردي لا ابو واليه حش
ولا ابو عين(ن)عن الشوف لاحقها عماش"="ولا ابو اذن(ن)عن السمع لاحقها طرش
قال تال القول مثل اوله والاش لاش"="شش ياراسي لارحم رحم ابو مجناك شش
[/poet]

[ابن فرحان]

الله يعطيك العافيه يا صنيتان القصيده مبهره ومعجزه صاحب هذه القصيده شاعر لا يشق له غبار في الوصف واختيار القوافي الصعبه ..

اخوك \ ابن فرحان

[البدوي نت]

بيض الله وجهك يا صنيتان حقيقة قصيدة جزله ومعانيها كبار

والشاعر ناصر الفراعنه السبيعي شاعر معروف بابياته الجزله والقويه مثل ما قال اخوي ابن فرحان
تحياتي

[صنيتان قرداحي]

ابن فرحاااان

الشكر الجزيل لمرورك.. الجميل.
وما قلت الاحق.

تقبل تحيااتي
...........

[صنيتان قرداحي]

البدوي نت......... وجهك ابيض طال عمرك

شكرا لتعقيبك.. ومثلما قلت شاعر يروم الصعاب

تحياتي لك
..............

[ابو فراس]

يوم كل(ن) لابن عمه عصب راسه وشـاش" "شش ياراسي لارحم رحم ابومجنـاك شـش

بيض الله وجهك وصح لسانك ولسان من قالها

[صنيتان قرداحي]

هلا والله بالمتنبي

وجهك ابيض يابعدي صح بدنك

وشكرا لمرورك

تحيااتي
.........