محاوره للشاعرين/ابراهيم الشيخي وعبدالحميد الفهمي... طرق مميز وابيات رائعه!!

[ريان الفهمي]

ابراهيم الشيخي :

سلام تسليم الوفـى والمعـزه والمواجيـب ^^^ عنـد الرجـال اللـي تقـدر وتكرم مـن نصاهـا
ياذيب ياللي قمت تعوي على روس المراقيب ^^^ دونك ذيابـه مايجـاوب عـواك الاعواهـا





عبدالحميد الفهمي :

يا مرحبا عداد مبدا القمر واثنـي التراحيـب ^^^ في حلة اهل الحلـه اللـي رفيـع مستواهـا
يا ذيب يا ذيب الخلا يالذي تعرف عوى الذيب ^^^ خلك خوي الذيب وأمش الديار اللـي مشاهـا


ابراهيم الشيخي :

عبدالحميد الناس من شهر تشعب شمخ النيب ^^^ والا انت ماشفناك مـن دونهـا والا وراهـا
ان كان ماجربت حظك ترى الدنيـا تجاريـب ^^^ والارض تقبل كل شيٍ يجيهـا مـن سماهـا





عبدالحميد الفهمي :

يا بن العرب بعض العرب ينفقد لو انه يغيب ^^^هذا هو المطلوب والناس من يدرك رضاهـا
عسـاك يـوم اغيـب تحـدد وتسد المطالـيـب ^^^ حافظ عليها بعد صاحبـك يالشيخـي بناهـا



ابراهيم الشيخي :

بعض الغياب يعذب الآدمي ويطلع الشيب ^^^والناس تجفاها المواقيف لاشابت لحاهـا
انته وانا في دبرة الله ولا أحدٍ يعلم الغيب ^^^ يمكن نشيد لك قصوراً تذرى في ذراهـا





عبدالحميد الفهمي :

ترى عريب الساس ما يلحقه شكاً ولا ريب ^^^تدرون كم ميله عدلها وكم ليلـه سراهـا
بغيت اعلمك الرمايه ووريـك المضاريـب ^^^الناس ترجى في ولدها وهو خيب رجاهـا

ابراهيم الشيخي :

خل النسب ينفعك لا أمسيت وانته خالي الجيب ^^^الناس لاجـا وقتهـا فـي نسبهـا ماتباهـا
انا بغيت ابرح لك الخط وارسل لـك مكاتيـب ^^^امـا تساعدنـي علـى جيرتـك والا بلاهـا





عبدالحميد الفهمي :

هذا زمان العولمه ماعلى ابراهيم تثريب ^^^ معاد نعرف وجه دنيا العجايب من قفاهـا
انا احمد الله واشكره واحترص وابعد عن العيب ^^^ ماني بسلعة واحداً باعها واحـد شراهـا


ابراهيم الشيخي :

تراني اغليكم وافاخر بكم عند الاجانيب ^^^ والناس ماتحكم على الحاجه اللي ما تراها

[بــرقــــاوي]

الشاعر/ابراهيم الشيخي

شاعر معنى بكل ماتعني الكلمه من معنى

مشكور و ماقصرت

و

سلمت على النقل

[عبدالرحمن الهيلوم]

صحت السنتهم وااالسانك

[ريان الفهمي]

اشكر الجميع على مروركم المميز والرائع


وصح لسان الشاعرين ,,, محاوره ممتعه وفي قمة الروعه



تحياتي................

[راع العبيه]

ياريان الله يعطيك العافية ويبيض وجهك على هذا النقل بس ودي كان جبتها بصوت حتى تكون احلى

[ابو فايح]

اعتقد ان الشيخي يقول للفهمي لماذا لم نراك تشارك في شعراء المعنى ولكن الفهمي يقول لاحاجة لي به فانا معروف

لاهنت ياريان على الموضوع

[/عبد العزيز الجذع/]

محاورة جميلة.

صحت السنتهم.

واعتقد المعنى زي ما قال ابوفايح.

ومشكور ع النقل.

@

[ريان الفهمي]

اشكر الجميع على هذا الحضور الرائع والمميز

تشرفت بمروركم يالغالين

وان شاء الله انزلها صوتيه

واما بالنسبه لتحليل الاخوان

لا تعليق لا تعليق


المعنى في بطن الشاعر


والناس ما تحكم على الحاجه اللي ما تراها


تحياتي لكم............