سـر قـصـيـدة يوسـف بن رزآق العتيبي الموجهـه للجنت المليون ؟.؛:

[الــســلات]

من اخرج من الشاعر أم اللجنة


العنصرية كالإرهاب فمن يعرفها لنا؟


ليس السبب الحقيقي في خروج يوسف رزاق العصيمي كما ادعت اللجنة انه تجاوز شرط من شروطها او حد من حدودها
فمن زملائه الشعار من طلب منه ان يتجاوز الوقت ومنهم من اخل بشروط المسابقة وذكر رجال قبيلته واعيانها بدون ان تصمه اللجنة بالقبلية.
اما القصيدة التي اعتقد انها اخرجت اللجنة وأبقت الشاعر الذي حفرها في ذاكرة متذوقي الشعر وكانت من اروع القصائد لتميزها بالأسلوب السهل الممتنع كما سيتضح معنا في التحليل النقدي لها:


قال في الابيات التي سبقت قصيدته :
إذا إن السالفة صارت عزاوي = أوردها على العد الرهاوي
أوردها على العتبان ربعي = هل الفزعات مخلفة الهقاوي
حيث يقول للجنه بطريقه غير مباشره نجحتني قبيلتي رغم أنوفكم فهذا احد الأسباب التي جعلت اللجنة تتحامل عليه وتجعل تقييمه 22 كي يقولون له أرنا ماذا ستفعل قبيلتك إن خسفت بك اللجنة في التقييم ،طبعا بعيدا عن الامانه والذمة والضمير وأصبح الوضع شخصي بين الشاعر وأعضاء اللجنة فردا فردا وليس كلجنة وشاعر.


القصيدة الرئيسية:
نعود إلى القصيدة الأم التي تسببت فعلا في ما حدث ، ولا أنكر أن الشاعر تطاول في قصيدته هذه على اللجنة كلجنة حيث بطنها بكلام جارح وقوي ولكن هذا الشعر.
وهو لم يتطاول عليهم كأشخاص بل كلجنة وكنظام.
مثل أقول أن أسلوبك غير حضاري ولا أقول أنت إنسان غير حضاري، وهذا كلام غير صحيح ولا أقول أنت كاذب)
.
تأهلت للدور النهائي يابو منصور = وباقي مبارتين وتخلص الدورة


يقول الشاعر هنا أنني تأهلت من ضمن الشعراء الستة وباقي جولتين على الحلقة النهائية


وأنا كل ما يطلع بها لاعب مشهور = أحول على خط الوسط واقطع الكوره
يقصد الشاعر هنا الشاعرين محمد بن ساقان والشاعر محمد سرور فهم شعراء مشهورين وقد تغلب عليهم رغم تحيز اللجنة وعدم إعطاءه حقه حسب اعتقاده .


إذا الشعر بحر وكل شاعر وله منظور = أنا كل ما غنيت زانت لي بحوره
هنا يفتخر الشاعر بمقدرته وان الشعر يسايره وتزين له بحوره


ولا نيب اعد بيوت شعري على الجمهور = إذا صار ما تطلع مطاليع اخو نوره
وهنا كذلك افتخار بمقدرته الشعريه يوصفها بتشبيه جميل حيث شبه شعره بالملك عبدالعزيز رحمه الله حيث أن الملك مميز بين الرجال وكذلك شعره هو .



ولا أطير لا من طار عند العرب مطيور = على شان تطلع له ثلاثين مطيوره
هنا يقصد الشاعر انه ليس كبعض الشعراء الذين يستخفون ويأتون بالحركات الغير مقبولة والمجاملات الكاذبة (والمهايط) وهم معروفين.


يكفيني إني من حوالي ثلاث شهور = مغير اركض ورجلي على الركض مجبورة
يقصد انه من ثلاثة أشهر وهو ينافس في هذا البرنامج ويصارع فيه منذ بدء المسابقة وهو مجبور على الصبر على هذه اللجنة وعلى المشاركة لأنه لا يستطيع الانسحاب فمن العيب الانسحاب بعد المنافسة.
معا حرة كيعانها ما تنوش الزور = على ظهرها ما غير بندق وباكورة
الحرة هي قصيدته وعلى ظهرها أدوات المنافسة والحرب وليس في أدواته إلا أدوات منافسه وليس معه أدوات مجامله أو إسعاف.


من الليل تركض لين يطلع عليها النور = تبي ديرة ما هي على الوصف مسبوره
من المجهول الغيب لذلك شبهه بالليل والنور هو الحكم النهائي والديره هي المركز الأول.


رماها الرقيب اللي مركب على الناظور = ووصلت وهي تضلع ولا هيب مكسورة
الرقيب هنا لجنه التحكيم ويقصد أنها حاولت تأخيره في الحلقة الماضية ولكن لم تستطع صحيح أنها أثرت في تقييمه ولكن لم تستطع إيقافه فوصل رغم انف الرقيب.


يا صدري تحمل ضيفتك والصدور قبور = دفنا السوالف ما كشفنا لها عوره
ليس له هنا غير الصبر وشبه صدره بالقبر الذي تموت فيه الضيقة ولا تخرج مطلقا ولم يكشف القصة للجميع ولم يصرح بها فهو هنا يبطنها ولم يعلنها واللبيب بالإشارة يفهم.


لكن ودك الرجال لا قال كلمة زور = قبل ما يطلعها توقف على زوره


يقول للجميع وللجنة وهذا ما أثار حفيظتهم وجعلهم يستعدونه حيث اتهمهم بالزور دون أن يباشر بهذا الاتهام بل جعله مبطن ولم يصرح به وتمنى أن تقف الكلمات في أفواههم وكما يقال المعنى في بطن الشاعر .


مواطن وأطالبهم بحقي من الدستور = ومشكور ما قصرت يا مجلس الشوره
وهو يقصد انه شاعر من عرض الشعراء وله حقوق دون تحيز وما قصرت أي لم احتج لكم آيته اللجنة حيث رشحت من قبيلتي ومن متذوقين الشعر بشكل عام فأنت تقول لشخص لم يخدمك ما قصرت وأنت تقصد انه قد قصر خصوصا إن أخذت حقك غصب عنه وهذا من التبطين وعدم المباشرة .


ولاهو صحيح تحطني بأخر الطابور = على ساس لاعندي طوابع ولا صوره
يقصد انه لم يكن من العدل في الحلقة الماضية أن تضعني اللجنة أخر الشعراء في التقييم لاني بدون.


يحزن الشوارع لا تبكي عيون الدور= لك سنين وأرصفتك من الناس مهجورة
يقصد الغوغائية والهمجية أي الشوارعية في حكم اللجنة وأنها ليست مؤهله بالكامل وان كان فيها بعض المؤهلين وأنها لا تبكي المتذوقين للشعر بظلمها وعدم إدراكها فالساحة النقدية هي الأرصفة والناس هم النقاد الحقيقيون وهي مهجورة منهم وليس بها ناس أي نقاد.


لك سنين ما مرك حمامه ولا عصفور = وحنا علابينا من الذل ممزوره
أي لك سنين ما مرك ناقد واعي ولا محلل منصف يقصد الساحة الشعبية وحنا علابينا أي شعرنا من الأغبياء والغير مؤهلين منتهك وممزور أي مشتت ومنتف بين ايدى كل من هب ودب.


شعب يشبه الثيران والثور ينطح ثور= وثيرانهم واجد ولا عندهم ثوره


هنا شبه الشاعر اللجنة بالثيران وهو تشبيه مباشر الا انه استخدم كلمه شعب بدل لجنه وهذا من الأسباب الحقيقية التي جعلت اللجنة تأخذ منه موقف ولا عندهم ثوره أي ليس لديهم مبدءا وهذا ما اتضح من تقييمهم في الحلقة الأخيرة لأنهم اخذوا الموضوع من ناحية شخصيه بحته .


يقولون تجمعهم مصالح مع الساطور = وأنا أقول ورقبتك من السيف مخطوره
أي تجمعهم المصلحة بعضهم مع بعض وسيتحيزون لبعض ويجاملون بعض وربما كان هناك كيك يقسمونه سويا وأنا أقول رقبتك من السيف مخطوره أي رسالة للشعراء الآخرين أن ما حدث لي ربما يحدث لكم لان ليس هناك حكمه وعدل .


ولد لا تقول الحق لا تكشف المستور = عن الحق ثلثين السواليف محضوره
وهذه رسالة لمن يفهم مغزى القصيدة انك لا تكشف المستور فمن يفهم يفهم والإمعة إمعة.



واخيرا احب ان اقول للجنة
كانت العرب تقول:
رب رام لي باحجار القذى= لم اجد بدا من العطف عليه
فهل سمعت اللجنه بهذا البيت وهذا الكرم في التعامل ام انها مع القول
على بكر اخينا اذا لم نجد الا اخانا
وهم وجدومنافس لاخوانهم




يقول البعض ان الشاعر كتب قصيده يرثي صدام حسين ولذلك احتجت اللجنه وغير هذا الكلام.
هذا كلام غير صحيح لان من يكتب قصيدة ويجهزها وتمنعها اللجنه كيف يجد وقت لكتابة هذه الرائعة .







( وهـــــذهـ ردود الـنـــآس عــلــى الظلــم اللى حصـــل لشـآعرنـآ )

الشاعر ناقد عكاظ في قصيدة ايوسف اعرض ودع هؤلاء

أيوسفَ أعرضْ ودعْ هؤلاءِ ِ= فقد أضحكَ الناسَ شرُ البلاءِ
أتيتَ إليهم من الرافديْنَ = فباتَ السعيدُ بدركِ الشقاءِ
أتيتَ إليهم بمجدٍ تليد ٍ= عتيبةَ يومَ الوغَى واللقاءِ
أتيتَ إليهم بجودِ الرياحِ = عتيبةَ رمزُ الندَى والعطاءِ
أتيتَ إليهم بحرفٍ مضيئٍ = فكادوا إليك بكيدِ النساءِ
أتيتَ إليهم بما يجهلونَ = فزادوا على الجهلِ خُبثَ القضاءِ
فما هم بهذا كفحلِ عكاظِ = ولكنهم مثلُ ذاتِ اللواءِ
فهم مثلها عندَ بدءِ الأمورِ = وعندَ الفحيحِ وملءِ الوعاءِ
وهم مثلُها بعدَ حولِ الدعيّ = وفي النقدِ هم كدعيِّ البغاءِ
وما هم من الشعرِ في منسبٍ = وما هم إلى الحرف من أقرباءِ
وما هم من الفكر في ربوةٍ = وما هم إلى الرأيِ من أولياءِ
فقبّحكِ الله من لجنةٍ = تُحكَّمُ في قولِ أهلِ الوفاءِ
وقبّحكِ الله من لجنةٍ = تُضيفُ إلى الحُمقِ نقصَ الحياءِ
وقبّحكِ الله من لجنةٍ = وقبّح عُهراً نما في الفضاءِ
وقبّح بوشَ الخنا والفجور = ومن قال فيه حروفَ الثناءِ
فيُوسُفُ أعرضْ ودعْ هؤلاءِ = فقد أضحكَ الناسَ شرُ البلاءِ



الشاعر فارس الرسيمي الظفيري وقصيدة : بانت مواري اللجنه الكذابه

بانت مواري اللجنه الكذابه = ولكن يحده للتحيز طبعه
احدن يحد النار صوب اقرابه = واحدن يدور للترف والسمعه
واليوم يوسف ينتخي بأعتابه = ومن يطلب العليا يفوز بربعه
الذيب صاح وجاوبته ذيابه = يا عتيبه الفزعه وثم الفزعه


الشاعر عبدالملك الخديدي في قصيدة : رسالة إلى الجنرال

الشعر لعتيبة ملوك القصايد = من قبل ما تُخلق محابر قلَمْها
تاج الشعر حِزناه من عصر بايد = لين اصبحت ورثه لمن هو لِزمْها
حنا لنا بالشعر مليون زايــد = سلاسل التاريخ تشهد رجمْها
وحنا لنا بالشعر صيد الفوايد = من عهد بن جبران شيخٍ نظمْها
وحنا عتيبة من قديم العوايد = لا صوّت الشاعر يقّوي هممْها
هوازن التاريخ واهل الجدايد = ما هي هبات موزعة من لمَمْها
يا هل الشعروالفهم واهل الوكايد = صقل المعاني من عظايم قيمْها
ما هي دراهم واتصالات ( وايد ) = والاّ مذيعه تصبغ اطراف فَمْها
والاّ عضو لجنة مسوّي محايد = تصْفِق كُفوفه للّحُون ونغًمْهـا
وما هي مدايح كذب لاهل الموايد = وما هي عقولٍ ترتَخي في ذممْها
ما فيك حيلة يابن رزاق رايد = في حفلة المليون واسمك ختمْها

الشاعر طلب الظفيري والقصيدة : أصبحت عتيبي لو ماني عتيبي

أصبحت عتيبي لو ماني عتيبي=.فزعة مع الهيلا ولباسة الجوخ
من شانكم يامكرمين الصحيبي=ثورة غضب قامت علي شان مطنوخ
حلفت صادق خاطري مايطيبي=حتي نشوف مضيع الحق مصلوخ
الله يلومك يالخيال العجيبي=تكتب علي صدر الورق حرف مشروخ !!
مافيك طب ولايفيدك طبيبي=دامك عجزت تقارن التيـن بالخوخ !!
جيت متضامن وأستفز الطليبي=لقبيلةٍ في ناظري كلها شيوخ !!
ورد الشاعر العابر :
ازكى التحيه لابن هاك العريبي = اللي تضامن من حزازات ومشوخ
تلفيه في داره وقبل المغيبي = برد الو فاء من سرعها شبه صاروخ
تحمل وفاء قوماً تهد الحريبي = شكراً من الهيلا كبر خبت صلبوخ
للي شجب ظلماً علينا غريبي = تزعمه خمسه من العالم ادلوخ
مايفقهون الشعر شياً معيبي = من ظلمهم ياصاحي العقل مكموخ
ايجاوب اسباع الخلا بالقنيبي = الظلم ساده واصبح الحق مملوخ
ويوسف ولدنا بالمواقف نجيبي = حراً ولد حراً بداء راس شمروخ
ماينثني حيله بزود النحيبي = ومدافع الاخصام في عينه اشروخ
وحنا معه لازاد حر اللهيبي = فزاعتن وان جاء على دربه افخوخ
نارد حياض الموت شيب وشبيبي = رجالنا ومن السطر شبه ملموخ
الموت في عينه فلاة وشعيبي = ثوب الشجاعه لبس والذل مفصوخ
والشعر نلنا وافره والنصيبي = بكل الجزيره طوع القابه اتنوخ
يرضخ لنا غصباَ بماقف صعيبي = ويصبح لنا طايع وبالغصب مرضوخ
وهاذي رساله شاطحه من عتيبي = شكراً من الهيلا كبر خبت صلبوخ
ورد الشاعر محمد بن منصور الروقي
الشاعر فارس مقبل العصيمي وقصيدة : ولعي فالراس يانار الحميا

ولـعي فالـراس يانـار الحـميا = نعـنبو رأسً يـعيش بلاحـمـايـا
لابتـي منـزالهـا فـوق الثريـا = خير وأشرف من ركب فوق المطـايا
شجـرةً يرقـد تحتها من تـفيـا =وغـابةً يامن بها سبـع الضـرايـا
مارقينـا قمـة العلـيـا كـذيـا = غـير بفعـولً تشيـد بها الـبرايـا
فزعة شليويـح وخيول المحيـا =وسـطوة العفـار وحظوظ المحايـا
جبـت من تاريخ ربعي ماتهيـا = لابـةً تاريـخهـا كـلـه مـزايــا
دام غسان الحسن كـابر وعيـا =ينـثـنـي للـحق ملعون الحـلايـا
حطوا بكبـده من النـيران كيـا = واشعلـوا في لجنتـه حـمر اللظايـا


الشاعر عبد الحكيم بن طلق العضياني وقصيدة : ظلاُم يوســف مقتفيـه العذابي

يالجنة التحكيم دوكم جوابي = جواب شافي يسبر أغوار غسان
جوف السموع يسير سهل انسيابي = على السعيد يمر تركي وسلطان
ولا علي ماظن مثله يحابي = بس الشرور يعم لو كان ماكان
يالجنة التحكيم طار الذبابي = على قمام الزور ظلمٍ وبهتان
سقتم ظعنكم جور وسط الزهابي = يوم النتايج مخزية فعل خوٌان
ليل التلاعب مثل جنب الغرابي = ولا نهار الحق مخفي ولابان
لو يستمر الحق حكمه غيابي = لاتتعبون الناس تاتي وتنهان
أنتم بديتوا فوق هام السحابي = بس النهاية بينة خير برهان
حدر القدم من فوق سطح الترابي = امجاملة واجحاف واخلال ميزان
يوسف عليه تسل روس الحرابي = أما هذا المليون فاله وربحان
لاجل المعارف والوسايط يجابي = يمدح وغيره ماله أصحاب واعوان
انا ماذم الناس باسلوب نابي = شعار ولا اتهم فلان وفلان
أنا انقد التزييف وارسل عتابي = أصحح الغلطان وادل عميان
عسى يدل الدرب مخطا الصوابي = ويصحح الفكرة ونيات الابدان
ظلاٌم يوسف مادرى بالحسابي = في يوم فيه الحشر جنة ونيران
كلٍ شهد له طيب الشعر طابي = من جملة الشعار من غير عتبان
المنصفين الشعر شيب وشبابي = بيض النوايا حصلوا الصدق نيشان
يالجنة التحكيم زاد الضبابي = عج التمادي ثار من كل ميدان
زيحوا ضباب الجو قدم الركابي = العدل والانصاف للشعر تبيان
إما اعتراف بقول قولي غدابي = زلة لسان انسان مغويه شيطان
ولا يكابر مقتفيه العذابي = يرزح مع الغاوين خسران خسران
ونقول للشيخان جاه الخرابي = برنامج المليون بيدين سفهان
يالجنة التحكيم ليه التغابي = الحق حق وراعي الحق سلطان



الشاعرة قهر يزيد وقصيدة : على مسرح تعبهم

على مسرح ( تعبهم ) والشقاوي = شرحت الدرس يالنجم السماوي
وصححت الورق قبل النهائي = ( ولم ينجح شحادة المستكاوي )
وعلمته دروس ٍ لو فهمها = يشوف الدرب ويعد الخطاوي
اذا هم لجنة المليون درهم = وبيع الشعر والحال متهاوي
عتيبة لجنة المليون شاعر= تقيم العدل وتصك الدعاوي
وأصغر شاعر ٍ فيها محاضر= بجامعة البطولة والهقاوي
نعرف الحق ورجاله وندري = يغوص الدر وتعوم الرغاوي
نعرف انه زمان أم المهازل = زمان الفبركة وكثر البلاوي
ولا هو فخر للفارس بطولة = يمنتجها المخادع والهواوي
وإذا تعجز عن العدل القواضي = على ويش اللحى ووين الغطاوي ؟

لشاعر بندر المحاسن وقصيدة : ألا هبي بصحنك

الاهبي بصحنك فأصبحينـا = ولاتبقي خمـور الاندرينـا
يقوله عمر ابن كلثوم ويسكر = وخلد شعـره بكـل السنينـا
وانا صاحي وابقول القصيده = وافخر فوق فخر الفاخرينـا
ابفخر في عتيبه تاج راسـي = رؤوس المجد ياللي عارفينـا
رجال ماتهاب المـوت واللهدفـاع للشـرف متسابقينـا
ليا من المنادي صاح فيهـم = يساوون الجبل بالارض طينا
ترى حنا عتيبـه لانظلمنـا = نـرد الظلـم للـي ظالمينـا
فلا قد ضاع حـق للعتيبـي = وخلفه شعب حـر ثايرينـا
والامن المسائل صار فيهـا = ومافيهـا تحزمنـا ورمينـا
نفجر كل من سـول لنفسـه = بأنـه قـادر يلعـب علينـا
ونترك في رضانا ماكرهنـا = وناخـذ مابغينـا مابغيـنـا
وننزل لانزلنا من تواضـع = ونرقى للسماء لامن رقينـا
والى منا نزلنا مثـل غيـث = على مسكين جانـا يرتجينـا
والى منا نزلنـا مثـل نجـم = على شيطان وفي حق مبينـا
عتيبه اسم لامن قيل زلـزل = يثير الرعب عنـد الحاقدينـا
عتيبه كالسماء محد وصلهـا = عتيبه بحر والعالـم سفينـا
ومن يجهل يروح لنجد ينشد = وش اللي صار فيها قبل حينا
نزلناهـا ولاحنـا بأهلـهـا = ولاجينا لأهلهـا وأحتمينـا
نزلناها وازحنا من سكنهـا = ودحرجنابها رقاب تعصينـا
حكمناها وعرش المجد واحد = ولايقعد علي عرشـه ثنينـا
وزرعنا بكل أرض جذع منا = من الشام ليمن وبوسط سينـا
وفي شرق العرب انشد وتلقى = عتيبـه ماكنـه بالرافدينـا
ولينا ومانسلـم مـن مذلـه = ولـو كنـا نسلـم ماولينـا
وولاء رجالنـا للديـن أول = وثم لارض منهـا ارتوينـا
فزعنا للامام اللـي زهمنـا = وصرنا لرايته نعم المعينـا
ووحدنا معه دولـه علمهـا = به التوحيد رمز الصالحينـا
وصرنا سيفه البتـار لامـنلفى = للدار جيـش المعتدينـا
لنا بالخيل والسيف البطولـه = بعهد رمزه السيـف السنينـا
ولنا في عهدنا الحاضر مكانه = تعلى فوق روس الحاسدينـا
كسبنا الاحترام بطيـب نبـعه = شيوخ القبايـل شاهدينـا
اذا جت فزعة والا وجاهـه = نعز اللي طلبنا مـا انتحينـا
ولنا في ساحة الشعار رايـه = اذا جاء خبل فيها يزدرينـا
نعز الشعر مانعتـز لاجلـه = ولا هو اكبر همـوم تجينـا
ولكن لاحصل فيه التحـيزعنا = للتحدي مـا انحنينـا
نسل حروفنا من كـل بحـر = ولانجلب سوى الصيد الثمينا
نكسر راس من جانا تحـدى = نذره بالهواء مثـل الطحينـا
وافخر فخـر لعتيبـي بإنـه = سليل اخوال خير المرسلينـا




الشاعر شهاب الأحمد وقصيدة : للعد الرهاوي سلام

للعد الرهـاوي سـلام = سلام يانخـوة عتيبـه
الفعـل غيـر الكـلام = ماقصرت في مواجيبه
لياصارت عتيبه حزام = يوسف بعالي مراقيبـه
والله . علـي الحـرام = الطيب ينعد من طيبـه
وردوا ركايبهم حيـام. = قبيلة(ن) جاوبت ذيبـه
شالوه من وسط الزحام = بالمال والكل يدريبـه
تاريخهم عالـي مقـام = عدوهم يجني الخيبـه
بالمـال والا بالحسـام =الحر تشهـد مخاليبـه
تقدير منـي واحتـرام = مايلحقه شـك وريبـه

الشاعر مشعان البراق وقصيدة : على هامش الموضوع

على هامش الموضوع والا على طاريه = حصل ماحصل والوضع مانيب راضي به
ماسددت جوالي علشان اكلّم فيه = لاوالله .. عشان اصوّت لـ( شاعر عتيبه )
لاجت للحميّا .. حال دون الوجيه وجيه = وكم موقف ٍ ماعنه صدّه وتجنيبه
نشوف الغبينه .. والخطاء مالله براضيه = واذا انّا سكتنا عن هذا الواقع / مصيبه
تعدّي وظلم .. وكل هذا التحامل ليه ! = خطاء اللجنه الفادح ماتحمد عواقيبه
يايوسف سلمت ودمت .. لكّن للتنويه = قصيدك ليا جات الحقايق نماري به
علي الحرام يشوّش الراس يوم اوحيه = تقول اني اسكر معه وامشي واغني به
اسافر معه في حاضره لاذكر ماضيه = مثل من ذكر غاليه .. لاطالت الغيبه

الشاعر مطر الروقي وقصيدة : يايوسف الا الك لابه

يايوسف الا الك لابه كلهم فزعـه = والا العزاوي ليا جا وقتهـا جينـا
فزعاتنا للرفيق اسرع من السرعه = حنا رفاقـه ليـا منـا تعزوينـا
وان عودت كل شاعر ينتخي ربعه = حنا عتيبه من المينا الـى المينـا
حنا اشهر الناس بالنخوه وبالسمعه = مافيه فى الارض طيب الا لسامينا
مدام فينا الثلاث البيض مجتمعـه = على طوال الايادي طالـت ايدينـا
راياتنا من قديم الوقـت مرتفعـه = والله خلق روسنا اعلى من مبانينـا
مانكسب المرجله صدفه ولا رمعه = الحمـد لله علـى الطالـه تربينـا
سيل المكارم بدا من عندنـا نبعـه = حنا خوال النبـي هـاذي تكفينـا
الله خلقنا لنصرة دينـه وشرعـه = والناس تاخذ مبادي مـن مبادينـا
ويومٍ للسيف فى ارقاب العدا لمعـه = ياقوم ياقشر حـظ اللـي يعادينـا
كم شيخ قومٍ نعشي راسه الضبعـه = قصايد الفخر فـى الهيـلا تغنينـا





تــحـــيــــآتـــــى

آخر تعديل الــســلات يوم 02-Jan-2009 في 07:22 PM.

[العــــــــابر]

بيض الله وجهك ويوسف العصيمي رمز لعتيبه الهيلا

وهو رجل كفو وشجاع وشاعر نادر

اشكرك على الطرح الراقي والمتميز

دمت بود

التوقيع

سبحان الله وبحمده سبحان الله العظيم سبحان والحمدلله ولااله الا الله والله اكبر ولاحول ولاقوة الا بالله

[فايز بن سرحان الثبيتي]

كفو بيض الله وجهك على الطرح الرائع للموضوع


تحليل متميز وفق الله كاتبه لكل خير

اخي

السلات


تحيتي لك

التوقيع

إذا شئت أن تحيا سليما من الأذى=وحظك موفور وعرضك صين لسانك لا تذكر به عورة امرىء=فكلك عورات وللناس السن وعينك إن أبدت إليك معايبا = فصنهاوقل يا عين للناس أعين وعاشر بمعروف وسامح من اعتدى=وفارق ولكن بالتى هى أحسن