حصرياً لمنتدى قبيلة عتيبه الهيلا لقاء مع الشاعر المميز :صالح ال كحله...!!

[أبو مرحبا]

أخواني الأعزاء أعضاء وزوار منتدى قبيلة عتيبه الهيلا

لقاءانا اليوم مع شاعر مميز .. شاعر مبدع .. شاعر جزل بكل ماتحمله الكلمه من معنى

شاعر حلق بنا إلى عالم القوافي والاوزان ...

شاعر عذب استطاع خلال فترة وجيزه ان يكون له قاعده جماهيريه ومعجبين

شارك في شاعر المليون نسخته الثالثه ووصل مرحلة المئه وتميز بالصوت المميز الشيلات ومشاركته في مسابقة نجم القصيد سنة 2008

شاعرنا هو /





صالح ال كحله المري


يامرحبا ياابوعلي وابرك الساعات تواجدك و قبولك الدعوه ومشاركتك أخوانك أعضاء منتدى قبيلة عتيبه الهيلا

والرد على أستفساراتهم...؟

هذه بعض قصائد شاعرنا أتمنى أن تنال على أعجابكم



قصيدة الشعر .. والأعلام ..

الكامل الله .. والله ماني بكامل
انا بشر يخطي .. ولي قلب واحساس
احب واكره .. واتجاهل .. واعامل
واتعب على رفقة بعيدين الارماس
اشوم من ترديد ( نرجوا ... ونأمل )
وقلبي .. يحب مرافقة طيب الراس
رفقة وفاء .. ماهي برفقة مجامل
تبنى على وضح النقى .. ساسها ساس
مليت من غض البصر .. والتحامل
ونفسي ما تقبل .. خوة اضعيف الباس
والى قسى وقتي .. بثقل المحامل
نقلتها لو كل... وقت ٍ له الباس
ما عشت في تقبيل روس الانامل
ولا ركعت .. بعزتي .. لأجل قرطاس
كرامة الرجال .. تأمين شامل
وعمره خساره .. دون ذكر ٍمع الناس
من لين الجانب .. لخامل ,, وهامل
يشوف ما يكره .. من اصناف واجناس
هذا وجمهور الشعر .. له عوامل
كل ٍ وله في ديدن الفكر .. نبراس
ما كل من يكتب عن الوضع صامل
ما غير حبر ٍ .. ناشف وسط كراس
من لا فرض نفسه بفن التعامل
الشعر والاعلام .. ماهو بمقياس
صورة ولكن جوفها ... به دمامل
يا شين عقب البهرجة .. صك الافلاس
اقولها ..واللي بيمسك ,, فرامل
يعيدها ويفك ,, (ماببين الاقواس )




قصيدة تبت يد اللي تجرأ على سب الرسول

تبت أيد اللي تجرأ على سب الرسول
وقبح الله ... وجه.. من يرسمه رسم مهين
الحبيب المصطفى صاحب الوجه الخجول
اصطفاه الواحد الفرد ... داعي (ن) باليقين
خاتم للرسل تشريعنا من ما... (يقول)
وأمته.... خير.. امة(ن) أخرجت للعالمين
هيه يا الفجار ما احد(ن) على قدره يطول
الرسول اشرف من رسومكم .. يا الملحدين
وناسخ الأديان .. باق (ن) ولا يمكن يزول
رغم انف الكفر ... وألا... كلام المغرضين
ويا حماة الدين قوموا على ..قرع الطبول
طبلة الحرب أقرعت والوعد نصر(ن) مبين
درسوهم مثل درس... عطيناه (المغول)
وعيدوا التاريخ... للدين في ماضي السنين
يا هل النخوة ترى العز يأتي بالفعول
والحمية دون الإسلام ... عز المسلمين
حربهم بمقاطعتهم.. ولا نعلن قبول
لو تعذر ... ريس... ولو لفونا خاضعين
اضعفوا عبادة المال ورعاة العجول
واظربوا ... القاسي مع الوقت لين انه يلين
دون دين الله ما نقبل أنصاف الحلول
لين يدرك(( قدر الإسلام)) قوم(ن) حاقدين
وش ترجى من ورى من يسبون الرسول
حقت.. أللعنه عليهم ... مع إبليس اللعين




قصيدة خاطرك عندي يعادل له شعوب

اسوق جاه الله عليك وجاه حرفي والقصيد
لرضاك ياللي خاطرك عندي يعادل له شعوب

اعتب علي وازعل ولا كن لا تبعدني بعيد
خطر(ن) خفوقي من فراقك يا مغلبني يذوب

انا اعتبرك(اكبر رصيد) ان كان في عمري رصيد
وشلون اشوف وشمس وصلك هيفت يم الغروب

رسالة (ن) وصلتك ياقلبي مع ساعي البريد
مضمونها في ذمتي كذوب ياقلبي كذوب)

انت تعرف قدرك وتدرك وش مكانك يا عنيد
لا تخلط الاوراق يالبى عروقك ياللعوب

صحيح متأخر ولاكن ما وصلني لك جديد
و(قلت الظروف) الله يجيرك من ظروفك والكروب

عيدك مبارك يا مغلبني عسى عيدك سعيد
عيدتي لك من حروف الشعر و(المذنب يتوب )

لبيه ياللي بك( زعامةراس) واسلوبك فريد
ولبيه( يامشاركي انفاسي) وفي كاس الشروب

تبي الصراحه والله ان شيطانك الطاغي مريد
(يغويني)ونفسي تحب اللي يجيك من الدروب

بتقول لي مجنون (قلها) واعرف ان حبل الوريد
حبك جرى وسطه وباسبابك غداء الدم محبوب

اسوق جاه الله عليك وجاه حرفي والقصيد
لرضاك ياللي خاطرك عندي يعادل له شعوب

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي