الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > منتديات قبيلة عتيبة - الهيلا > شعراء قبيلة عتيبة

« آخـــر الـــمـــشـــاركــــات »
         :: كل عضو او شاعر يسجل بيتين غزل الفهاا من قصائده .. بشرط ان تكون غزليه فقط .. (آخر رد :الريشاوي)       :: ودي ولا ودي وابيهم ولا ابيه (آخر رد :الريشاوي)       :: واكتبي هذا أنا أنا ليلى العامرية (آخر رد :الريشاوي)       :: البيت لاعْجَبني اجاريه باحساس (آخر رد :الريشاوي)       :: أنـا لا تلوموني ولو ملـت كل الميل (آخر رد :الريشاوي)       :: اوافق .. واقول النفس صعبه مطالبها (آخر رد :الريشاوي)       :: الحب اقفى في ديانا ودودي (آخر رد :الريشاوي)       :: امير قبيلة المحاقنة قبل الدولة السعودية (آخر رد :متعب الوحيدب)       :: امير قبيلة المحاقنة قبل الدولة السعودية (آخر رد :متعب الوحيدب)       :: الشيخ عبدالله ابن جزعاء العازمي جمع غير الفروسيه الحكمه والفكر السياسي وبعد النظر (آخر رد :متعب الوحيدب)      

إضافة رد
أدوات الموضوع انواع عرض الموضوع
غير مقروء 02-Sep-2012, 03:10 AM رقم المشاركة : 1
معلومات العضو
(مہودع دنہيأهہ)

رابطة محبي الهيلا

إحصائية العضو





التوقيت


(مہودع دنہيأهہ) غير متواجد حالياً

افتراضي ديوان الشاعر عبدالله بن مصلح الجازي الثبيتي(رحمه الله)

عبدالله بن مصلح الجازي الثبيتي

هو الشاعر عبدالله بن مصلح بن ثلاب الجازي الثبيتي,وقد ولد في عام 1320هـ,وتوفي ـ رحمه الله ـ في مكة المكرمة عام 1392هـ.

قال الشاعر عبدالله بن مصلح هذه القصيدة عندما أشاروا عليه بشراء الغنم ولم يوفق في تربيتها.

شكر يابارق(ن) (فالشام) لاح....لاح برقه على (الريعانيه)

قمت أخيله وقلبي ما استراح....ما هوى النوم جوف أعيانيه

فوق مرباك يا الريم الضياح....يا عفر قايد الغزلانيه

مير حظي عرج وإن قام طاح....كل ما قام طاح الثاينيه

مثل طير(ن) مصوب بالجناح....ماقعه في أسفل العيدانيه

والغنم ماش لي فيها صلاح....كل أبوها عشا سرحانيه

فقرتني ورأس المال راح....وأحوجتني على العمانيه

1ـ يقصد بالشام أي اتجاه الشمالد

2ـ الريعان منطقة تقع بين السيل الكبير والسيل الصغير

وقد روى هذه القصيدة ـ عوض بن مبارك الجازي ـ وعبيد بن راضي الجازي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــ

(أم الدود)

قال الشاعر عبدالله بن مصلح هذه القصيدة لشيخ محسل بن عبدالله الجازي الثبيتي


هاضني عصر في أم (الدود)....عصر في طايل الفيه

فــي ديـــار(ن) خــلا مـــارود....مـا يـجـيـنـا إخـبـاريـه

كود (مرضي) معه (مسعود)....فالـمـراكـز زكـرتـيـه

وأوجــوداه كـــل وجــود....راكب(ن) لي عمانيه

ناصـي الـلـي قـرونـه سـود....فوق الأمتان مثعيه

لازم الـظـهـر في (سـعـود)....طمعتي في بناخيه

قـلـت أذنــه يـعـذل الــعــود....لين يسمح لي النيه


1ـ هي أم الجود حالياً بمكة المكرمة

2ـ مرضي ومسعود هم أصحاب الشاعر ولا نعلم أي شي عنهم

3ـ هو سعود بن مسحل بن عبدالله بن الشيخ مسحل وهو ابن أخته وايضاً نسيبه

وقد روى هذه القصيدةـ عوض بن مبارك الجازي وعبيد بن راضي الجازي ومنصور بن مطلق الجازي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــ

(يا ابو سعود)

وقال الشاعر عبدالله بن مصلح هذه القصيدة فالمعنى نفسه:

يا (أبو سعود) يكون فالبال معلوم....عـريـان ربـعـك كـن ثـوبـه جــديــدي

هذي ثلاث اسنين أنا اطيح وأقوم....أرسلت (نجم) وكل صقر(ن) سديدي

أبا مكان الصقر عن مسند الـبـوم....يأتي ولـدهـا قـبـل حـتـن الـوعـيـدي

وإن كان لي في داعج العين مقسوم....يأتي ولو دونه يصك الـحـديـدي

1ـ هو الشيخ مسحل بن عبدالله الجازي

2ـ نجم هو نجم بن عبدالله الجازي أخو الشيخ مسحل الجازي

وقد روى القصيدة ـ محمد بن سهل الجازي وأخيه صالح بن سهل الجازي وجابر بت وادع الجازي وعوض بن مبارك الجازي

ــــــــــــــــــــــــــــــــــــــــــــــــــ ــــــ

(ياشريم)

كان لدى الشاعر عبدالله بن مصلح الجازي فنجال دام معه أكثر من عشرين عاماً وأسماه(شريم)لتشرمه, وعندما انكسر الفنجال قال هذين البيتين:

ياشريم تسوى لك ثلاثين فنجال....لولا العدم ياشريم ما منك طيبي

لولا العدم ياشريم معاد تنشال....مير العدم ياشريم حطك صحيبي

وقد روى هذه القصيدةـ عبدالمحسن وعبدالرحمن أبناء عبيد بن عبدالله بن مصلح الجازي وصالح بن سهل الجازي

ــــــــــــــــــــــــــــــــــــــــــــــــــ ـــــــ

(عديت في برقه)

في أثناء حراسة الشاعر عبدالله بن مصلح الجازي لجيش الشريف قال قصيده لم يبق منها سوى هذين البيتين:

عـديـت فـي بـرقـه وبأم راس ربيَّه....ب(مشوك الروس كـلـه صب عصملي)

وإن كان ماجاني اللي فيه أماريَّه....ظبي(ن)يقود الضبى ماهو من التلي


1ـ المقصود هو البندق العثمانيه وكان يقال في مامضى عند ابنا الباديه البندق العصملي او الريال العصملي نسبة للعثمانين


روى القصيدةـ عوض بن مبارك الجازي

ــــــــــــــــــــــــــــــــــــــــــــــــــ ـــــــــ

(أهل الوفا والسلومي)

وقعت مشاكل لإبن ناصر الشريف على أرض يمكلها بسبب نزاعه مع أبنا عمومته عليها.وشهد عليها الشاعر عبدالله بن مصلح بالأبيات التالية:

عديت في مرقاب في رأس (مشذاب)....في رأس ضلعها الطويل الزمومي

ســيــرتـها ولـيـنـهـا أضـلاع وأشـعـاب....الأولـيـن أهـل الـوفـا والـسـلـومـي

(مـن يـمـهـم تـحـدهـا بــرقــة أذنــاب....ويحدها درب الـرحـا والـخـشـومـي)

وذياب تظهر من ســراحـيـن وذيــاب....تاكل عـشـاهـا يـوم كـل(ن) يـنـومـي

في ديرة إبـن ناصر امـغـلـق الـبـاب....الـديـره اللي ماحــووهـا الـرخـومـي

وعــز الله...إنـه...حط للـنـار شــبــاب....وعـيـالـه اللي فـي طـرفـهـا قـرومي

ياكـثـر مـا ودا....ويـاكـثـر مـا جــاب....وياما ذبح من راس كبش(ن) شحومي

وأعد هرج الصدق..مـاني بـكـذاب....ويـشـهـد لي الله...والـقـمـر والـنـومـي

1ـ هي منقطة بعد مكه

2ـ برقة اذناب ـ الرحاء والخشومي ـ مناطق قريبه من مكة وهي حدود لأرض ابن ناصر الشريف

وقد روى هذه القصيدة فالح بن ضيف الله الجازي وعبيد بن راضي الجازي وروى بيتين منها عوض بن مبارك الجازي

ــــــــــــــــــــــــــــــــــــــــــــــــــ ــــــــــــــــ

(راعي الغنم)

أتى الشاعر مطلق بن حميد الجازي إلى الشاعر عبدالله بن مصلح الجازي وكان بالطايف,وعندما أقبل مطلق قال: (وان طرق البوري وجابت لها ضيف يا أبو عبيد),
فقال عبدالله(رحب بهم عداد مدرج عجلها).

يالله من نو(ن) سرى له رفاريف....عساه يسقي كل دار(ن) لهلها

راع الغنم مبسوط زاين له الكيف....مبسوط راعي عشر فيها فحلها

وإن طرّق البوري وجابت لها ضيف....رحب بهم عداد مدرج عجلها

مستد عن سمن البحر والمغاريف....عنده عطايا الله ليا الله قبلها


روى القصيدة ـ عبيد بن عبدالله بن مصلح الجازي


ــــــــــــــــــــــــــــــــــــــــــــــــــ ـــــــــــــــ

(فرخ العمانيه)

ياشعيل فرخ العمانيّه....إقطع بي المخرم الخالي

دار الضما مالها ابقيّه....نــهــارك...الـيـوم بـالالـي

تطا النهد كسرت الفيّه....شـلـيـل ومـرار زرفـالـي

والأصل تشرب من الطيّه....من قاع مطويه الجالي

ذكرت ربعي وأهــالــيّــه....ذكرت حــمــايــة التالي

لوكان ماجا حفوفيّه....في ذر ربـع(ن)...لـهـم والي

مدري متى تبدي النيّه....وأروح وأســنــع أحــوالي

إما يجا الحبل في أيديّه....ولا قـطـعـتـه ولــه والي


روى القصيدة صالح بن سهل الجازي

ـــــــــــــــــــــــــــــــــــــــــــــــــ

(شديد الراس)

عندما مرض الشاعر عبدالله بن مصلح مرض موته وانقطع عن زيارته الرفاق الذين كانوا مل يوم يزورونه ويجلسون بجانبه.حزن حزناً شديداً وقال قصيدة طويلة لم يبق منها إلا هذه الأبيات الثلاثة,فلما سمعها وادع بن عبدالله ـ رحه الله ـ ذرفت عيناه من الدمع وأصبح من بعدها لايفارقه حتى توفاه الله.

يالله يا عالم بـخـصـات الـعـرب والـنـاس....تـعـافـيـنـي...إن كــان لــي حــبــل مــدود

وأنا أحمد الله دامت إني شديد الراس....وأنا جوف ربعي والنسم في جثتي ماجود

تعيين يامحسين للرفاقه والمجي نوماس....على فنجان قهوه والسوالف فالمريض اتزود



روى هذه القصيدة عبدالله بن ساري الجازي


ــــــــــــــــــــــــــــــــــــــــــــــــــ ـــــــ

(الوصيه)

أراد الشاعر عبدالله بن مصلح أن ينصح ابن أخيه صالح بن محمد الجازي فخاطبه بهذه القصيدة.

وانا هيض عليه يوم عديت....بعد ماهاجت هجوسي عليه

تصاف في وادي يوم لديت....كما صفق السيول اللي قويه

ولايا صالح أسمع يوم وصيت....وخلك لازم(ن) حبل الوصيه

ترا الأجناب لو فيهم تـمـريـت....نهار(ن) مر ولا لك قابــلـيـه

تصبر في ديارك ولو تجفيت....وربعك لا أوقفو كلهم حميه

روى هذه القصيدة حماد بن حمود الجازي

ــــــــــــــــــــــــــــــــــــــــــــــــــ ــ

(ياراكب اللي)

أرسل الشاعر عبدالله بن مصلح عندما كان بالقطانية هذه القصيدة لمحمد بن عفين الذي كان بالعرج وقتها.

ياراكب اللي طلوع الناب....امصيف(ن)بالقطانيّه

ركـابـهـا ما يـبـا مـشـعـاب....اتنشط...البال عمليّه

تنصا (محمد) و(ابن ثلاث)....ربع(ن) يعقلون مثنيّه

تلقى الشحم عنده أول باب....ودلال,,,والبن بريّه

عطهم علومك بغير كــتــاب....وخص عنهم بـرديّـه


أما رد محمد بن عفين فلم أجد منه إلا بيتاً واحداً وهو:

العرج منزل رجال اعراب....منزل ابويه واهاليّه


1ـ محمد هو الشاعر محمد بن عفين الجازي وابن ثلاب هو عبدالله بن ثلاب الجازي


2ـ روى القصيدة عوض بن مبارك الجازي ـ عبيد بن راضي الجازي ـ جابر بن وادع الجازي


ــــــــــــــــــــــــــــــــــــــــــــــــــ ـ

ياسابحة من عندنا بالجناحين

بعث الشاعر مطلق بن حميد الجازي بقصيدة عندما كان يدرس في بريطانيا,فرد عليه الشاعر عبدالله بن مصلح بهذه القصيدة يطمئنه فيها على أحوال قبيلته ويوصيه.


ياراكب اللي سابحه بالجناحين....تطوي بعيد اللال في سرع تطويه

مسراحها من عندنا يوم الاثنين....الساعة أربع يم لندن وأهاليه

ود الخطوط ل(مطلق)بعلمه الزين....تبشره بالخير وتكثر تهانيه

حنا بخير وفي سرور امتعافين....والله يتمه فوق خلقه ويضفيه

خطك وصلنا زايد البسط بسطين....مستر كتابه ومستر قاريه

تمم دروسك واشرح الصدر والعين....والصبر مكسب راعي الصبر لاقيه

هرج العرب خله سواة الهبابين....لاجايب المركب ولاهو موديه

الناس قدامك على قسوة ولين....ومن لا صبر للمر ما ذاق حاليه

والصقر فالميكار عقّب شياهين....(محسين)و(تركي) رياجيل تكفيه

يحمون ميقافه وصف العتابين....عان الجربتي حلّقوا فوق أذانيه

وأدعي لك التوفيق والربع داعين....الكل منهم جا سلامه ويهديه


1ـ المقصود بمطلق هو الشاعر مطلق بن حميد الجازي شاعر المحاروة المعروف.

2_هو عبدالمحسن بن عبيد حفيد الشاعر.

3_وتركي هو تركي بن مطلق ابن الشاعر مطلق.

القصيده مأخوذه من رساله للشاعر وهو بلندن,ويهو مصدر الرساله,وتجدون الرسالة في اخر الكتاب .


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ

(طاوي الجبل)

كتب الشاعر عبدالله بن مصلح هذه القصيدة رداً على قصيدة أخرى للشاعر مطلق الثبيتي معبراً فيها عن أشواقه,ويدعو له متمنياً له التوفيق.

اشتقت من خط(ن)وصل بالعلاوين....بعد قريته قمت والليل محييه

وأخذت من معناه تسعه وتسعين....وأبيع في صدري من العرف وأشريه

وانا من أول طاوي الحبل طيين....ما أمد حبلي للشعاعير طاويه

لكن جاني قول مكتوب ذلحين....ذكرني الي كنت غافل وناسيه

ترى البهيته دار ربع متعافين....اسمي وقسمي قبل شي(ن)تسميه

واللي مضى قدام مثل السكاكين....لانوم في ليله ولانوم ضاحيه

والحمد لله عوض الله بثنتين....راحه ودين لمن يحقق مساعيه

وإن جبت مكسب رحت مثل السلاطين....واللي سواتك ما يبانا نوصيه

وأنا ليا صليت جوف المصلين....أدعيلك التوفيق من عند باريه

وترى (جويبر)منفتل بالذراعين....خاله(محمد)بادي الريع باديه

1ـ هو الشيخ جويبر بن وادع الجازي شيخ شمل قبيلة الجوازي.

2ـ هو الشاعر محمد بن عفين الجازي.

رواية القصيدة من رسالة مرسلة للشاعر مطلق الجازي وهو في لندن,وتجدونها في آخر الكتاب.

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ

(ذوي ثلاب)

لم أجد قصة هذه القصيدة وهي ليست كاملة

يا راكب اللي يدحم الحزم بخطاه....وإن حثه الركاب ماهو رغاوي

ملفاك ربعي والبيوت المبناه....ربع(ن)يسرونك نهار النخاوي

حنا (ذوي ثلاب) والعز بالله....ولاقط ربعي يأكلون الرشاوي

عطهم علومك عقب ما تأكل الشاه....في ذيلها مركوز سكين (ضاوي)


1ـ ثلاب:وهو جد لكل من ذوي راضي وذوي مصلح وذوي عبدالله من قبيلة الجوازي

2ـ ضاوي:هو ضاوي بن صالح بن دخيل الله الجازي.

القصيدة مروية من عبدالمحسن وعبدالرحمن ابني عبيد بن عبدالله الجازي.

ــــــــــــــــــــــــــــــــــــــــــــــــــ ـــــــــــــــــــــــ

(دول مستعده)

كحال الشعراء في ذالك الوقت يصف فيها بداية الركاب.

يا راكب اللي صلبت بالأشده....محملات(ن)بالكلايف وصيلات

ضهورهن قيس حشو الأبده....لاهي سمان ولا عليها تخلاتد

تلفي على حي(ن) عيوني توده....قوم(ن)ترحب بالركايب ليا جات

اللي لهم عن ناضر العين مده....ودي بهم مير الزمن له ولايات

ترا(محمد)صحبته مستمده....مثل العسل جوف الخلايا والأبيات

ودي بشي(ن) مثل ماهو بوده....مير المعاني ماتطاوع صعيبات

علي فاتح باب وازريت أسده....مير الكرم لله وأهل المروات

والناس تحسبنا دول مستعده....تحسب ركايبنا تدمن جنيهات

1ـ هو الشاعر محمد بن عفين الجازي.

والقصيدة مروية عن عبدالمحسن وعبدالرحمن ابني عبيد بن عبدالله الجازي,وعبد المقصود بن عايض الجازي



المصدر كتااااب(شوارد) لبعض شعراء خامس الجوازي من الثبته

جمع واعداد(عبدالله بن عبيد بن عبدالله الجازي الثبيتي)















آخر تعديل (مہودع دنہيأهہ) يوم 02-Sep-2012 في 03:13 AM.
رد مع اقتباس
غير مقروء 02-Sep-2012, 04:27 AM رقم المشاركة : 2
معلومات العضو
رداد الروقي
عضو نشيط

الصورة الرمزية رداد الروقي

إحصائية العضو





التوقيت


رداد الروقي غير متواجد حالياً

افتراضي

بيض الله وجهك ياولد ثابت...الله انه يرحم الشاعر عبدالله الثبيتي















رد مع اقتباس
غير مقروء 02-Sep-2012, 06:39 AM رقم المشاركة : 3
معلومات العضو
(مہودع دنہيأهہ)

رابطة محبي الهيلا

إحصائية العضو





التوقيت


(مہودع دنہيأهہ) غير متواجد حالياً

افتراضي

رداد الروقي::اللهم أمين ووجهك ابيض وسلمت يالذيب على المرور ولاهنت















رد مع اقتباس
غير مقروء 02-Sep-2012, 06:41 AM رقم المشاركة : 4
معلومات العضو
(مہودع دنہيأهہ)

رابطة محبي الهيلا

إحصائية العضو





التوقيت


(مہودع دنہيأهہ) غير متواجد حالياً

افتراضي

(عديت في برقه)

في أثناء حراسة الشاعر عبدالله بن مصلح الجازي لجيش الشريف قال قصيده لم يبق منها سوى هذين البيتين:

عـديـت فـي بـرقـه وبأم راس ربيَّه....ب(مشوك الروس كـلـه صب عصملي)

وإن كان ماجاني اللي فيه أماريَّه....ظبي(ن)يقود الضبى ماهو من التلي


1ـ المقصود هو البندق العثمانيه وكان يقال في مامضى عند ابنا الباديه البندق العصملي او الريال العصملي نسبة للعثمانين



للتنبيه فقط..المقصود بجيش الشريف هو حلال لأن البل يطلق عليها مصطلح الجيش..وطبعن هذه الحراسه مثل ما سمعت إنه بعد تئسيس المملكه وهجر الشريف للاردن والله اعلم















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »08:26 PM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي