هذه قصيدة قدمها الشاعر // مرزوق بن سعد المطرفي الهذلي
بين يدي صاحب السمو الملكي الامير سلمان بن عبدالعزيز آل سعود في قصر سموه بالرياض
بديت بحمد رب البيت منزل سـورة الإنسـان =عظيم الملك وعظامٍ بلـت فـي يـوم يحييهـا
إليكم ما يلي شعر هذلي من هاجـسٍ نشطـان =نحت جزل البيوت ولا تموت أبيـوت يبنيهـا
قِصيده صاغها منقوشة الياقـوت والمرجـان =إلى نسل الزعيم الفيصلـي مـرزوق يهديهـا
هل الحكم المجيد وعزنـا فـي درة الأوطـان =عيال معـزي اللـي مبهـر الدنيـا وماليهـا
عيال الفيصلي عبـد العزيـز مجـود البنيـان =ملك لا من طريت اسمه عدود المجد يرويهـا
كريم الأصل حر الفصل حرٍ مطلق الجنحـان =معرب من سلالـه حاكمـه والعـز كاسيهـا
عبد الرحمن بن فيصل وتركي ثانـي الجـدان =ولد عبد الله اللي عقََّبـه مـن كـان مرسيهـا
هذاك محمد اللي أسس الأولـى علـى القـرآن =وأبوه سعـود وآل سعـود تنسبلـه باساميهـا
بن محمد ولد مقرن ومقرن من ظهر مرخـان =بن إبراهيم بن موسى وموسـى مـن معاليهـا
هذاك ابن ربيعه شبل مانـع زاكـي السيسـان =مريدي والمريدي في حنيفـه مـن رواسيهـا
هذه بيت النقا دين وتقى والساس فـي عدنـان =نسب در وذهب مـا خالطـه عـرقٍ يرديهـا
هذه صقر الجزيره يومها كانت بـلا سلطـان =عرب ثارات والغارات فـي شتـى نواحيهـا
أحدهم ما قرا بإن الجروح قصاص فالفرقـان =على ما هو لقى قال النقـا وإبليـس قاضيهـا
أحد يقنى الحجر واحد يتبرك بالشجر مرضان =والآخرماتطهّـر للصـلاة اللـي يصليـهـا
أمن معدم وفقر وجوع وضعوف العباد تهـان =تخابط والترابط غيـر ضابـط بيـن اهاليهـا
وهو فأرض الكويت وباسـطٍ كفيـه للرحمـن =يفرجهـا ويقنـع والـده فـي رد ماضيـهـا
وفي ساعه على طارف من الديره لقاه وبـان= جواب الدعوه اللـي بثهـا لاسمـاع باريهـا
نصاه ومن بعد قبـل يـداه وراسـه المليـان =فَرَش بشته وقال: اجلس يبه والحـال يبديهـا
يبه نجد العذيـه حـرةٍ ورثـه لهـا ضمـان =وحنـا وسمنـا فيهـا لــك الله مانخليـهـا
نظر فيه الامام بعين حرص وخاطره شفقـان =وقلَّه: كيف؟ قـال: السيـف يعقلهـا ويثنيهـا
ابي منك السماح وبالسلاح وفزعـة الفرسـان =وبأمر المعتلـي رب العبـاد إن الوعـد فيهـا
أخذ مايسر الله من عراب ومن زهاب وحـان =مسير الأربعيـن وبـارق الوحـده يباريهـا
وحث الجيش صخفات الأيادي شمـخ النيبـان =علاها الكـور والباكـور فالممشـى يعديهـا
وقاد العاديات الصافنات اللي برسـن وعنـان =وسار السير حيث الخيـر معقـود بنواصيهـا
تقدمها الأسـود آل السعـود وكلهـم شجعـان =هل العوجا مقابيـس الظـلام وعـز ناخيهـا
لها في كل هيه نار حيـه عـزوت الضفـران =مِفتِلـت العضـود وعجـت البـارود كاديهـا
وكملهـا وجملهـا الإلـه الـواحـد المـنـان=على سنة هـدى تمشـي وعيـن الله تراعيهـا
وصل ضلع الشقيب وحكَّم الخطه بكـل اتقـان =براعـة عبقـري ماينقـري وعـداه قاريهـا
ثلاث أقسام قرَّرها كما الحبَّـه علـى النيشـان =الأولى في جَنَاب الضلـع لَيـن العِلـم ياتيهـا
واخذ قسمين ساروا لَين حلَّـو داخـل البستـان =وامر خيَّه محمـد بالمرابـط فـي ضواحيهـا
وقِسم بصملته قاده صميـدع راس وكحيـلان =على الأقـدام والضرغـام فالممشـى يقديهـا
دخل بطن الرياض وناض برقٍ شرع البيبـان =واخـذ يتفقـد الأوضـاع والخطَّـه يمشيهـا
بعدها ارسل لخوه محمد اللي فالضواحي كـان =وجاه بساع معه سباع مـا تخشـى غداريهـا
على المصمك سرا ليله وفيه مشبهِر الاعيـان =حدق عينه كما جمره من الصملـه مواضيهـا
وصبَّحهم على وضح النقا ومقابـس النيـران =كما حـس الرعـود العقربيـه فـي مناشيهـا
وجا لرماحهم وسيوفهم ساعـه علـى برهـان =من الصفين واخـذت بيـن بايعهـا وشاريهـا
ومكيال الشجاعه في ذراعه واعتلـى البيشـان = وكـلٍ يعتـزي والـدم منـثـور بهناديـهـا
وكبَّر فوقهـم بالله اُكبـر واعتـزى شامـان = اخو نوره بعد قامـت تزايـد فـي عزاويهـا
ومن غيره لها لا كبرت الهيَّه علـى الأكـوان = ليا وصلت مغاليق النحـور وطـال صاليهـا
لها من غير ابو تركي جمل يركي لها الامتـان =عريب الجد فارس نجد راس المجـد راعيهـا
على روس العدى ميَّل رحاها وانهزم عجـلان =يبا المصمك ولكـن ساعتـه باخـر ثوانيهـا
غدى عند الصقور أرنب تكرنب يومي الكرعان =تعاقـب فوقـه وكـلٍ مخاليـبـه محنيـهـا
وحط اِخطامها فارس "منيفه" صامل الذرعـان =وقام المـذن اللـي واق فـي عالـي مبانيهـا
وقال الحكم لله ثم لبو تركـي نسـل حـوران =على روس الملا يجهر بهـا والكـل يوحيهـا
دخلها في سنة تسعة عشر شوال عـد ازمـان=بعد ألف وثلاث اميه من الهجري سطـع بيهـا
ومن حينه مضى في رحلة التوحيـد بالإيمـان =مجاهد فـي سبيـل الله وموحـد لاراضيهـا
ضرب شبه الجزيره بسيف حق وكل قاسي لان =وذي دارٍ يصبـحـهـا وذي دارٍ يمسـيـهـا
رجدها من البحر لين البحر بمجابـه العـدوان =وأقام من اليمـن للشـام كـل أحكـام واليهـا
ولا جاته بحبـة خشـم ولا رحـم ولادهـان =يداهنبه هـل الأطمـاع واشنـابٍ يراضيهـا
أخذها بصطوت الشلفى وسيف الملحمه "رقبان ="شهر "رقبان" سيـف العـز باولهـا وتاليهـا
جبابرت العرب لا من قرب ولاَ ضرب بإثخان =تحشرج ودها المخرج تبا مـن هـو يذريهـا
بحدَّه لو ضرب ضلعٍ يقـدَّه مـا بقالـه شـان =على ظهر "الصويتيه" طوال الأرض يطويهـا
وفي واحد وخمسيـن الموافـق أول الميـزان =بنى دوله عظيمـه عزَّهـا مـن عـز بانيهـا
سعوديـه قياديـه تطبَـق مـنـزل الـديـان =وعز الدين واهل الديـن والنصـره مباديهـا
علمها براية التوحيد يخفق فـي سمـا البلـدان =أبد ما ينتكس بيـن الـدول قاصـي ودانيهـا
ملك هِمَّه وهَمَّه وحدة الأُمَّـه كمـا الأخـوان =جمع شمل العرب بالعـدل ، والفتنـه يطفيهـا
ضرب أروع مثل حتى وصل أمن البلد عنوان =بأمن المملكه مـا بـه ولا دولـه تضاهيهـا
ملك شامخ شموخ المجد في شخصه لقى مسكان =يمينـه تصنـع التاريـخ والكلمـه يوفيـهـا
أكاديمي من الصحرا فنونـه تذهـل الأذهـان =ليا ابرم يقهر الجيش العرمـرم فـي تلاقيهـا
طِبخ فن السياسـه دلـةٍ وليـا هـرج بلسـان =فناجيـل السياسـه ساسـة العالـم يقهويـهـا
خصاله كلها طِيب واصالـه منبـع الإحسـان = أبو كفٍ علـى المـدَّات بالجزلـه مضريهـا
ملك علم وملك حلم وملك سلم وملـك ميـدان =طوى الإعجاز بالانجـاز والتاريـخ يرويهـا
هذ اللي سيرته عطره على الفطره ملك إنسـان =الأسطوره اخـو نـوره موحدهـا وحاميهـا
عسى قبره من الامزان ينبت فوقـه الريحـان =يهل الوبل وعظامه مـن الرحمـات يسقيهـا
عسى يجزاه رب البيت عن كل العرب غفـران =وقصر بجنة الفردوس يقطـف مـن ثماريهـا
رحل عنا جسد لكن بقى فـي داخـل الوجـدان =مكانـه حطهـا رب المـلا والنـاس تغليهـا
نشوفه فالصقور اللي على روس العرب تيجان=عيـال العـود فـي نهجـه مثبـتٍ كراسيهـا
ومنكم ياهل العوجا عن الخـلات والنقصـان = أبا المعذار وامجاد البطـل محـدٍ بمحصيهـا
وصلى الله على المُبعث محمد خاتـم الأديـان = عدد واِعداد ما عـدو عـدد واِعـداد ممليهـا
وسلامتكم