حصريا مقابلة مع الشاعر د. حمد العصيمي. ضع سؤالك.؟

[أبو مرحبا]

أخواني الاعزاء أعضاء وزاور منتدى قبيلة عتيبه الهيلا

نلتقي بكم علي ضفاف منتدى قبيلة عتيبه الهيلا الاول على الشبكة العنكبوتيه

بلقاء نسعي من خلاله تسليط الضوء علي شاعر اثبت شاعريته وجزالته

وتميّزه في شعر النظم و شعر المحاورة..



لقد أتصلت على الشاعر الكبير وطلبت منه بأسم منتدى قبيلة عتيبه الهيلا

ان نعمل معه لقاء حصري معنا هنا فوافق رغم مشاغله الكثيره..

وأما الان ننتظر أسألتكم التي سوف توجهونها للشاعر د حمد العصيمي..

ملاحظة هامة:

الشاعر د حمد العصيمي يتأهل في مسابقة شاعر العرب (3)


أترككم مع بعض قصائدة لكي تتلذذوا الشعر الاصيل

قصيدة/أبناء السبيل!!

يا عازف سلوك الربابـة يـوم حركـت السلـوك =حركـت فـي قلبـي معاليقـه وولعـت الفتـيـل
لك مقصد وغاية وانا لي غايـة ومقصـد يخـوك =ما ابغى بديل بها ولا اظنـك تبـي فيهـا بديـل!
انا ادري انك تبكـي احبـابٍ تناسـوك ونسـوك =وانا بكاي العاديـات الصبـح والسيـف الصقيـل
مثل الجياد الصافنات اللي غـزت غـزوة تبـوك =اللي حوافرها تثيـر النقـع فـا اليـوم الطويـل
لا سرجت للمعركة صـف العـدا مـا واجهـوك =وليا اقبلت مثل الرعد وليا ادبرت تصهل صهيـل
يا حيف لا حنـا شريناهـا ولا احبابـك شـروك =واصبحت دون احباب واصبحنا سروج بدون خيل!
والشعر قرية مطمئنـة وان دخـل فيهـا الملـوك =عاثوا بها حتى افسدوها بيـن يـوم وبيـن ليـل
ما يطلع من الشوك ورد ولو طلع للـورد شـوك =ثنتيـن وقفـت بيـن حـد الممكنـة والمستحيـل
يا اللي عطيت الناس من شعرك تخيل وش عطوك =بخلوا عليك بما عطيتـه ثـم سمـوك البخيـل!!
ان عشت والعزة ماهيب امك ولا التقديـر ابـوك =اسمك يتيم ومن يـذوق اليتـم فـا الدنيـا ذليـل
رضعت نهد الابجدية لين صـار الضـاد اخـوك =والضاد قابيل وقتـل هابيـل واصبحـت القتيـل
لا قالوا الله يرحمـك عنـد الممـات ولا بكـوك =ما شفت قبلك ميت بـلا رحمـة ودمعـة تسيـل!
من مـا الوشايـة والنكايـة والضغينـة غسلـوك =ما هوب من سدر وحنوط وعذب مـاء السلسبيـل
واضفوا من ثياب الحسد والحقـد ثـوب وكفنـوك =ما بين حسد وحقد راحوا بين حـط وبيـن شيـل
حطوك في نعش الردى والكـره جثـة وحملـوك =ما اخذت من دنيـاك هـذي لا كثيـر ولا قليـل
في مقبرة نسيـان سـووا قبـر واسـع ودفنـوك =واصبحت في دار المقام ورحت عن دار الرحيـل
لكن يميـن الله لتبقـى وشـم فيهـم مـا نسـوك =والطيب اللي ينذكر با الطيب جيـل ٍ بعـد جيـل
لو اخذوا من ظلوعهم نار وحطب ثـم احرقـوك =الخاسـر النمـرود والرابـح براهيـم الخلـيـل
تبقـى نبـي الشعـر لـو كفـار مكـة كذبـوك =رحمتك با المخطين والمسكيـن وابنـاء السبيـل

قصيدة/أخرج من معطفه الجريدة

(يعربي في لندن ومن معطفه أخرج جريـدة)=والحمام يداعبه في لطف من خلفـه وامامـه
من بدأ يقرا عـن بـلاده والاخبـار الجديـده=طارت اسراب الحمام ولا بقي حوله حمامـه!
الطيور تخاف من اخبارنـا لـو هـي بعيـده=كل ما تسمع خبر عنـا تبـي منـا السلامـه
كل طير يخاف لا شاف عربي يكتب قصيـدة=يحسب البندق معه والصفر في داخل حزامه!
يا مهاجر عن بلد هارون خبـر عـن زبيـده=اننا جوعى وهي ترقد على ريـش النعامـه!
وانها منا باشـارة رمـش تاخـذ مـا تريـده=شاركت حتى الفقير المعـدم بمـاه وطعامـه!
وان حتى الطير لو يدخل حماها مـا نصيـده=دام خاتمها علـى ريشـة جناحينـه علامـه!
في بلادك يا مهاجر يحمي السـارق رصيـده=والشريف يمر يوم العيد مـا يلقـى العمامـه!
البس المعطف ولف الشال واحذف با الجريده=تصبح اول يعربي يكسب من الطير احترامه!!!

قصيدة/سلامة الامير سلطان بن عبدالعزيز(مسابقة المرقاب)

البيرق اللي كلمـة التوحيـد فوقـه والرسـول=الكلمتيـن اللـي نقـدس لفظهـا وحروفـهـا
بيرق عيال اللي سرى ليله على كـور الذلـول=كن الحصى يشتب نـار ليـا وطتـه خفوفهـا
الموت ماردها وهي ماهي عن المـارد جفـول=اعطت نحرهـا للمنايـا وذخـرت سرجوفهـا
صولة وجولة كونت دولة عساهـا مـا تـزول=ولا تغيرهـا صواديـف العبـر وصروفـهـا
دار ٍ غلاها عندنا ما يقبـل انصـاف الحلـول=مغروس باقفاص الصدور وحافظينـه جوفهـا
فيها الزعيم اللي كلامه فعـل وافعالـه تقـول=ان المناصب مـن وصوفـه تستمـد وصوفهـا
السيف قاطع والمليك القاطـع البـر الوصـول=راعـي يميـن ٍ تاصـل ولا ينقطـع معروفهـا
واخوانه اعوانه كعام الروس ماضيـن الفعـول=موطية هامـات روس الشـر تحـت كتوفهـا
واخص ابو خالد وابو خالد عسى عمره يطـول=غانم وسالـم مـن مقاديـر الدهـر وصدوفهـا
راع اليدين اللي على المدات ما تقصر تطـول=كن السحايب بيـن اصابعهـا وبطـن كفوفهـا
تعقل مطاليـق بنداهـا الغمـر وتفـك معقـول=من تحت قوم ٍ جردت يوم القصـاص سيوفهـا
يا مرحبا حييت يا مـن فيـك حيـرت العقـول=وابكيت فـي غيبتـك سكـان البلـد وضيوفهـا
قلوبنا بصدورنا تركض مثل ركـض الخيـول=خطوة رجاها فيك تبعد منـك خطـوة خوفهـا
والبحر والبيد الوسيعـه والنوايـف والسهـول=والكعبة اللي كل مسلم فـوق الارض يطوفهـا
ماهي على خبرك( تراها في مطارات الوصول)=تبغاك مـع مستقبلينـك بـا العيـون تشوفهـا!

هنا نقف مع فن المحاورة وتميز الدكتور حمد العصيمي بهذا الفن

محاورته مع الشاعر الكبير زبن القاضي أحد الشعراء المعروفين وعضو منتدى قبيلة عتيبه الهيلا

وكانت البداية عند

د حمد العصيمي( الداهية)/

يا سلامي على اللي فا الفضا حط بيت=تحت سقف السما والارض ما ناشها
يا زبن لا تقلي رحت ما عاد جيت=جيت والعج هج الذود واحتاشها

زبن القاضي

مرحبا ياسلام ٍ لنجـوم اعتليـت=بين لمح البصر والعين وارماشها
كل ديره تجيها ياحمـد ماغديـت=الله اكبر على العجه ووشواشهـا

د حمد العصيمي

انت لو تشرب البحر الحمر ما رويت=مير عينك على المزنه ورشراشها
مرجع العلم كله في قبيلة ثبيت=لو تزيد العلوم ويطول نقاشها

زبن القاضي

انت لو تنحت الصخر انّحت مادريت=في ظروف ٍ كثير الناس ماعاشهـا
رجع السالفـه لاساسهـا كمبليـت=تقنع الناس صاحيهـا وغشاشهـا

د حمد العصيمي

يا زبن بعد خاويت العطاوي بخيت=في عجل تظهر الشوكه بمنقاشها
الحقيقه بغيت اقولها واستحيت=ما بلش فا المقابر غير نباشها

زبن القاضي

خوت الطيبين تزيد فالصيت صيت=واظبا روسهـا مافـاد عراشهـا
الغنايم لونـك ياحمـد ماحكيـت=يتعب الاش في دنيـاه ماحاشهـا

د حمد العصيمي

دام من كنز قارون العظيم اغتنيت=قفل المدرسة في وجه فراشها !
قدر الله على صدام غزو الكويت=ثم خاط الجروح اللي تحت شاشها

زبن القاضي

مع ملوك الذهب بعت وربحت وشريت=ماتّلفـت يـم الـبـدو وعشاشـهـا
يحيي الحي حي ويغبن الحـي ميـت=لحـف الميتـه لاتكشـف قماشـهـا

د حمد العصيمي

بكره ان صرت قاضي للخصوم وقضيت=وش تسوي بصاحيها وحشاشها
يشهد الله عليه ما سرقت وزنيت=مير جت ميته ما ينفع انعاشها

زبن القاضي

عن سلوم المراجل ياحمد ماحتديـت=كل لحيـة عملهـا يفـرش فراشهـا
أن عطيت انتبه تنشد عن اللي عطيت=أن نشدت اللتغت صورتك وفلاشهـا

تمنياتي للجميع التوفيق

أخوكم..أبو مرحبا

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي

[محمد العتيبي]

حجز المقعد الاول


ولي عوده لطرح الاسئله ..


نرحب بالدكتور حمد العصيمي ونترقب هذا اللقاء الرائع ..



شكرا لقبول الدعوه يادكتور

التوقيع

للتواصل عبر twitter تويتر al_bargawy@

[خالد عواض الذيابي]

مرحبا بالدكتور حمد العصيمي وحياه الله

وشكرا على تلبية الدعوه

ولنا الفخر بوجوده بيننا

[ابو محمد الدعجاني]

وعليكم السلام ورحمة الله وبركاته

اشكر الاخ ابومرحبا على جهوده المبذوله لرقي هذا المنتدى الكبير باسمه والكبير باعضائه والكبير بادارته.


ونرحب بالاخ الكريم حمد العصيمي ونقول مرحبا بك في محلك وبين اخوانك الاعضاء ونتمنى له التوفيق بالدنيا والاخره .


وجودي للترحيب فقط اما الاسئله فلي عوده باذن الله تعالى .


واتمنى من ضيفنا الكريم ان نرى له قصيده في الذب عن عرض امنا عائشه رضي الله عنها وارضاها فضلا وليس امرا هذا ان سمحت له الفرصه فنصرة نبينا صلى الله عليه وسلم واجبه علينا .


كل التوفيق والاحترام والموده للضيف الكريم والمضيف .

[فهد علي العازمي]

ياهلااااااااا وغلااااااااااااا فيـــــــــــــــــه

كل الشكر لمن أحضره لنا وإن كان بيننا

والله إنــــــي أحبـــــــــه وأحــــــــــب شعره الجززززززل



وسؤاااااااالي

لماذاء لا نراك في القنوات الفضائية والصحافة ؟ هل الأسباب منك أو منهم ؟

وسؤالي الثاني
هل تعتقد بإنك ظلمت في مسابقة سلامة سلطان مع أن القصيدة الأخيرة حصلت على إشادة من اللجنة ومن الإستاذ علي المسعودي على عكس لافي الغيداني اللذي لم تسلم قصيدته من الإنتقادات؟

وسؤالي الثالث
رسالة الدكتوراه من أي جامعة وفي أي قسم



مع كل الشكـــــــر والمحبـــــــــــة لكم جميعـــــــــــــــــــــــــــــــــــــــــــــا اااااااااااااااااااااااااا

آخر تعديل فهد علي العازمي يوم 22-Sep-2010 في 12:09 AM.

[خالد عواض الذيابي]

نبدا بطرح الأسئله

س1/لماذا ظهورك على الساحه الشعريه شبه نادر بما انك دكتور وشاعر؟

س2/هل تفضل لقب دكتور ام شاعر؟

س3/سبب قلة ظهورك على الساحه الشعريه هل هو الاعلام ام المشاغل الحياتيه؟

س4/هل لديك الوقت الكافي لأرضاء جمهورك الشعري بما انك دكتور وشاعر؟

س5/هل مشاغل الحياه تبعدك عن جو الساحه الشعريه؟

[@ـايل]

جهود جباره بارك الله فيك يابو مرحبا والشكر موصول للدكتور حمد ( داهية الدواهي )وللاداره الكريمه واللجنه الاعلاميه على اتاحة الفرصه للجميع ..

ولنا تواجد ان شاء الله فيما بعد ..

..

التوقيع

شكر خآص للأخ العزيز (سمي جدي) ,,, للتواصل,,, hail-osaimi@hotmail.com الفيس بوك : هايل العصيمي انستقرام : hailosaimi تويتر : AlHooL@

[خلف المطيري]

مسا الخير يادكتور

وحياك الله في منتدي ربعك

انا غير ملم في رصيدك الشعري واول مره اقرأ لك نص بسب انت في دوله وانا في دوله

المذكور اعلاه من القصايد ثلاث قصايد

الاوله مستواها جيد جدا

والثانيه قمه واقصد قصيدة الحمامه وفكرتها جديده وممتازه

والثالثه مطروقه كثير من قبل الشعار ولا فيها جديد وهنا التمس لك العذر لان شعر المدح يقتل الابداع

امّا المحاوره لاتعليق عليها ولا اقدر احكم من طاروق واحد

عندي سؤال

هل تؤيد الاسلوب القديم مثلا مشراف وصحصح ام تؤيد الشعر ذو الكلمات المفهومه ولا اقصد الحداثه هنا ام المزج بينهم حتي تاصل لجميع الاعمار

وشكر للاداره علي تقديمك لنا

[فايز بن سرحان الثبيتي]

مرحبا بفيلسوف الكلمه وملك الابداع .. ودكتور القلطه الالكترونيه بلا منافس "

نصوصه تغرد خارج السرب واسلوبه مبهر "

دائما ً ما يلوي اعناق محبيه اينما حل "

و رغم كل هذا الزخم و توفر كل ادوات النجاح لديه الا انه لا يزال بعيدا ً عن دائرة الضوء الذي يستحقه "

ولسان حاله يقول :

على سكاكين الرضى بالجور في سلم العبيد = ماضن يبقى للحمول جمال قبليي وبعدي
يادانة الحزن اتركيني هكذا عايش وحيد= فـ الخانه اللي تقسم الحرمان والكف الندي !!

وهذه بيتين من احدى قصائدي للاستشهاد ليس الا "


اولا : هل اختار الدكتور حمد العصيمي لنفسه العيش في الظلام خشية ان يحترق في النور ؟

ثانيا : رغم مستوى الساحه الحالي فهل اصبح دور الشعراء المثقفين امثالك الابتعاد عن مسرح الاحداث للهروب من تهمة اغتيال الموروث الشعبي ؟

ثالثا : هل يؤمن ضيفنا الكبير بفلسفة التغيير التي طبعها الراحل مطلق الثبيتي في تحويل مسار شعر المحاورة الى افأق جديده نزعته من وحل الوقوع في الاعراض والعنصريه المنتنه !!؟


تقبل مني ارق تحية وكل عام وانت كما تحب "

التوقيع

إذا شئت أن تحيا سليما من الأذى=وحظك موفور وعرضك صين لسانك لا تذكر به عورة امرىء=فكلك عورات وللناس السن وعينك إن أبدت إليك معايبا = فصنهاوقل يا عين للناس أعين وعاشر بمعروف وسامح من اعتدى=وفارق ولكن بالتى هى أحسن

[علاي الحافي]

بارك الله في من احضر هذا الشاعر

العصييمي شاعر جزل وشاعر جميل
لي عوده معه



فاهلاً وسهلاً به