السلام عليكم ورحمة الله وبركاته
أسعد الله مسائكم بكل خير
نطرح لكم ديوان أحد الشعراء المبدعين والمتميزين في منتدى الهيلا
شاعر مبدع في جميع حالاته
لقد أبدع في شعر المحاوره
ولقد أبدع كذلك في شعر النظم وله الكثير من القصائد الجميله
والتي نالت على إعجاب الكثير من المتذوقين
وهو أحد أبناء قبيلة مطير العزيزه
وهو الشاعر / زياد بن ناهس الشطيطي المطيري
إليكم قصائده عسى أن تحوز على رضاكم
القصيده الأولى : ياللي تعذرب خل عنك العذاريب
ياللي تعذرب خـل عنـك العذاريـب = هاذي بساط الريـح قضايـة الشـان
مركـوب قـومٍ يعكفـون الاشانيـب = اللي لهـم وقفـات فـي كـل ميـدان
هلي تخلي من معـه جـرحٍ يطيـب = كم وصلت رجلٍ مـن البعـد ولهـان
فالبـر والديـره تسـد المطالـيـب = عند البدو تلقونهـا وعنـد حضـران
موتـر مجـرب مايبالـه تجـاريـب = يقضي لزوم اللي معه حيـث ماكـان
اللي صنعها صانع الشـاص والجيـب = افطس زقم ماخش فـي قلبـه ايمـان
مبدع ولا في صنعتـه شكـه وريـب = اسم الاصالـه مقتـرن باسـم يابـان
لاجيتها مـن قـدم يطريلقـك الذيـب = والجنب حرٍ من علـى العاليـه بـان
وخطوطها اللي من على الجنب تركيب = ياكنهـا توقيـع شيـكـات سلـمـان
ولا انـت والله ماجنيـت المكاسيـب = خسران واللي يشري الفرت خسـران
موتـر بلـد يحتـاج دقـه وترتيـب = ما يصلح الا مـع سواويـق نسـوان
تلقاه وسط السـوق ياعنـك مايغيـب = ما يبعـد السجـات راعيـه يافـلان
علة نحـر ماهـو مـودي ولايجيـب = لا شايـلً حملـه ولا شـال قـشـان
مطبـةً وحـده تسـبـب تهـاريـب = تعطب عكوس الفرت وتخـل الاوزان
وأدنات علـه فيـه لاقيـل توضيـب = وفي نهاية المشـوار خربـان تربـان
شاريـه ماهـو حاسـبٍ للمحاسيـب = نكبه ربي يـوم سـاق ابـه الاثمـان
وفي نهاية المقصود والوقت تجريـب = ما نقبلك يالفرت لـو جيـت مجـان
القصيده الثانيه : ياليتك موكد على الزقم مضربك
تسلم يمينك ويش ماكـان مذهبـك = مادام خميـت المعـادي بجزمـه
ياليتك موكد على الزقم مضربـك = وحطيتها من بين عينـه وخشمـه
يا بوش هذا عندنا قـدر واجبـك = وابشر نزيدك كان تحتـاج خدمـه
والثانيـه ياليتهـا يسـار منكبـك = من بين حجان المعـزب وزقمـه
المالكـي يانعنبـو فـود شاربـك = لذل في وجهـك علامـه ورسمـه
من بعد ابو عداي رزيت منصبـك = لو كان لاجسمك ولا الاسم باسمـه
خبلٍ تهز الـراس لوحيـت لدبـك = اتسرّحك كلمـه وتضويـك كلمـه
ان رحت ولا جيت ما احدٍ بحاسبك = قدرك تراه مساويٍ مـن تعزمـه
واليوم خلك جالسٍ جنب صاحبـك = هو جاه قسمه وانت لك معه قسمه
القصيده الثالثه : ياجارنا مسيت بالطيب والخير
ضاق الخفوق وكـدر البـال تكديـر = ونثرت دمعٍ من على الخـد سكـاب
وبـردٍ عظامـي كأنهـن المكاسيـر = ولا سوات اللي قرص قرصة الـداب
واصبحت مثل اللي وعى بعد تخدير = فاقد ولاهو حاسب لهرجـه حسـاب
اثر السبب شرهـة رجـالٍ مناعيـر = ضيق على بالي وشـدد فالاعصـاب
ياجارنـا مسيـت بالطيـب بالخيـر = والله ولاهي عندنـا صكـت البـاب
نزعل ولا في صكت البـاب تبريـر = مادام حنا فأمـن وإيمـان واحبـاب
حنا ضرينا نفـز لضيـف ونصيـر = مثل الجنود اللي تفـادي بالارقـاب
يلقى الشحم من بعد صفـرٍ مباهيـر = والعود الازرق فـوق صاليـه لاذاب
من بـاب حشمـه للمسيـر وتقديـر = حقٍ علينا واصبح الضيـف طـلاب
والمرجله مـن بيـن كـل الغناديـر = بنـتٍ عشقناهـا ولا بيننـا حجـاب
من شانها نارد علـى جمـة البيـر = ومن شانها ما نحسب احساب الاتعاب
ياجارنا محشوم عـن كـل تقصيـر = وانته سليل اهل الوفا عكف الاشناب
قدرك بوسط القلـب مافيـه تغييـر = الا يزيد الشوق لن غبت وان غـاب
اقبل سلامـي عـد ماغـرد الطيـر = واعداد ماسجل من احروف بكتـاب
ارفق سلامي جوف ظرف المعاذيـر = مادام يغفر ذنـب الانسـان لا تـاب
القصيده الرابعه : ما ضيع النسوان ياكود رجال
ياللي تقـول الحـب سجـه ومـوال = نايم ولا حولك من الوقـت صحـوه
تعال خذ مـن دلـة الحـب فنجـال = فنجال هيلٍ من طبـخ وسـط قهـوه
الحب هـمٍ يطـوي الحـال والبـال = كم ليّـن بقلـبٍ دخـل فيـه قسـوه
لا صار لك نفسٍ لها عـز واجـلال = ولا انته بضاري تلحق الناس رجـوه
جنّب ترا فالحـب مخـرج ومدخـال = ماكل مـن يدخلـه يطلـع برضـوه
وانا عشيـري كـل مـا قلتلـه قـال = ابشر وانا كلي علـى بعـض فـدوه
من باب حبـك جيتلـك عـز واذلال = اعطي ولا ني منتظر منـك عطـوه
يعني ملكت القلب من جـال لا جـال = ولا عاد له عني مـن النـاس غنـوه
يعني ما دام الشـوق بعروقنـا سـال = لاعاد يحسب قيـض وقتـه وشتـوه
ضلوعي وقت القيض له ستر واضلال = ووقت الشتاء صدري من البرد دفـوه
ياقـف ليـا وقفـت والقلـب ميـال = وان زدت خطوه زاد فالدرب خطـوه
يعني غلا يعني حـلا مالـه اشكـال = يعني في برج الحـب سويـت نـدوه
ما هو بحب ايميـل وعلـوم جـوال = وكلٍ علـى الثانـي مصـدّر بفتـوه
محتال يلعبله على شخـص محتـال = ولا يروي الضميـان ميـراد رغـوه
حبٍ على غير السنع نقص واخـلال = ساعـة زمـن يقضيبهـا ذل شهـوه
يا عنـك مـا يفـداه لوكـان بريـال = ان كـان ماهـو لاقـيٍ فيـه جـدوه
ما ضيّع النسـوان يـا كـود رجـال = ولا ضيّـع الرجـال ياكـود نسـوه
وانا عشيـري كـل مـا قلتلـه قـال = ابشر وانا كلي علـى بعـض فـدوه
القصيده الخامسه : لكن دام وجيهنا ما بها احساس
ياشعب غزه دون موقفك لاباس = والله يزيدك دون دينك مدافع
لا ترتجي نخوه ورا ساير الناس = غير الولي محدٍ معاكم بفازع
اعراضنا تهتك وتقتل وتنداس = وفي كل حزه نستمع للفواجع
وعريبيا تعقد قمم بين الاقواس = تشجب وتستنكر ولا احدٍ بسامع
يا قادة الامه ترا الوضع حساس = واللي مضى فالوقت ماهو براجع
غزه تصيح وتلفظ احرّ الانفاس = تحت الدمار وتحت ضرب المدافع
ياليت فينا نخوة اللي بكركاس = يا عنك ماهو للمذله بقابع
شافيز وانت معرب الجد والساس = سرّح سفير القتل واعلن يقاطع
ثم قال مالك عندنا اليوم مجلاس = مادام لك وسط الجرايم مراتع
وحنا ورا الكوره ونبحث عن الكاس = الواقع اللي حضنا فيه واقع
لاكن دام وجيهنا مابها احساس = الواجب انا نستتر بالبراقع
القصيده السادسه : ياليتك تشوف جوف الصدر وتويق
ما بهذل القلب غير الهـم والضيـق = همٍ نزل داخل المكنـون مـا شـد
واصبحت لا انام من جوره ولا افيق = سوات منه علـى الاعـدام موعـد
يذوق طعم المنيه قبـل مـا سيـق = ويعـد لحظاتهـا بالثانـيـه عــد
بري لاكنّ الزمن مـا فيـه تفريـق = يلعب كما الموج بين الجزر والمـد
قضيـةٍ لفقـت فالجنـب تلفـيـق = واعلن قرار القضـا تنفيـذه الحـد
هذا وجودي لو ان الوصف ما يليق = هو نده السيف وانت اليووم لي نـد
يا ليتك تشوف جوف الصدر وتويق = وتعرف وش ناتج الهجران والصـد
العين ما تشوف يوم النوم ما ذيـق = والدمع من قطرته كم واسـم الخـد
والصوت مبحوح ماهو لاقيٍ ريـق = والحيل من سبّتـك هالـك ومنهـد
فرقاك همٍ عليـه الحـال مايطيـق = تعال واعلمـك عـن خافـي الـود
وان كان في دربنا صارت معاويـق = واصبح فراقـي معـك لابـد لابـد
ودعتـك الله ولا فالوضـع تعليـق = الله يبيحـك علـى خونتّـك للعهـد
من عادتي مـا ترجيـت المخاليـق = رجـواي للـي نصليلـه ونسجـد
روّح وتبقـى مسيطـر بالمعاليـق = وبين الحنايا سوات الجمـر توقـد
مهما خذاك القدر غرب وتشاريـق =لا يمكن الشوق لو لحظـات يبـرد
القصيده السابعه : ياليتني قدام لا أشوفه أعرست
عز الله من البارحه ما تناعست = النوم عيّا يا صحيبي يجيني
من عقب ما شفته تكدرت وانحست = سرّ البلا بالقلب ولا بعيني
يا حظي الله كل ما قام دنقست = ابنشدك وش صار بينك وبيني
سهران مار من السهر ما قد افلست = كسبان هم وغم يالله تعيني
مكبلٍ قلبي ومن وين هوجست = وش عاد ينفع لو يطلّق يديني
يا ليتني قدام لاشوفه اعرست = وارتاح باقي ما كتب من سنيني
انا اشهدني في خلا الحب غرّست = منجوم ما عرف من يساري يميني
لاكن دامك بالضلايم تغطرست = تدرج حبوبي ثم تاخذ طحيني
سرّيت قافي للمفارق وهجرست = من بعد ما شح الغلا والحنيني
لجلك ياكم وقفت لي ناس واجلست = حسبي على الايام باح الكنيني
واليوم يا قلبي بعد ضلمه اونست = وشلون تبغى واحدٍ ما يبيني
القصيده الثامنه : كم لحية ٍ مقدارها من على الروس
وش حيلتي لادق فالصدر هاجـوس = مالي ياكود اجيب حبـرٍ وقرطـاس
اليا نطقت بهاجسي حاسني حـوس = واليا كتمته يشغل القلـب والـراس
ياهاجسي روٌح ترا ماانت محبـوس = واسبح بحورٍ مالهـا حـد وقيـاس
لاهاجت امواج البحر كانها طعوس = ماينطح الغبـات ياكـود غطـاس
عشنا واخذنا فالزمن علـم ودروس = وفيها عرفنا الناس باشكال واجنـاس
كم لحيةٍ مقدارها من على الـروس = وكم لحيةٍ من تحت الاقـدام تنـداس
احٍد على الطالات كسـاب نامـوس = لاهـو بنمـامٍ ولاهـو بـهـلاس
وراع الوفا والطيب ما هو بمطموس = يشع صيته كانه اشعـاع الاكبـاس
وفالمجتمع يا ناس ناسٍ كما السوس = والسوس كلٍ يعرفه زيـن يانـاس
اليا طغى كم شلّع ضروس وضروس = حتيش لو راعيه بـه قـوه وبـاس
وترا الله اللي يرفع نفوس ونفـوس = تطمن ولامعها على الطيب مجلاس
القصيده التاسعه : نذكي هالزمن مثل الذبايح
عقب هاضت على المسرا قرايح = ألا ياقاف شعري ويـن رايـح
تخيٌر فالـدروب اللـي تباهـا = معك من حيث مالاح الك لايـح
وقال الوقت بـه تسعيـن علـه = وحنـا فالغـزل ولا المـدايـح
تعلمنـا نميـدح فـي بعضنـا = ونصف هروجنا صف الصفايح
مديـرك لوتزايـد بالضليـمـه = تصفقله ودمـع العيـن سايـح
حقيقـه والحقيقـه ماتـزعـل = ياكود أهل الردا وأهل القبايـح
اقوله واعرف إن غيري يقولـه = لو إن الذل له طعـم وروايـح
بعضنا مايقـرب مـن بعضنـا = لأن الذل بيـن النـاس فايـح
مساجدنا تشكـى مـن جفانـا = ومن غبار الزمن قامت تطايـح
عقب كنا علـى التوحيـد امـه = تقسمنـا أعاديـنـا شـرايـح
تقسمـنـا دول ولامـذاهــب = وكـلٍ صـار لثانـي نطايـح
عقب كانت لنا صولـه وجولـه = نذكى هالزمـن مثـل الذبايـح
عقب كانت لنـا ثـروة غنيـه = توقينـا مـن سمـوم ولفايـح
اشوف الغرب مص الخير منـا = ويحلبنـا كمـا حلـب المنايـح
عقب كنـا عقـب كنـا وكنـا = يكفي ما وصلنا مـن فضايـح
تنـادي يامنـادي مـن تنـادي = ماتسمعك الجنازه لـو تصايـح
القصيده العاشره : قالوا نذاله
ابدأ بذكر اللي به النـاس يبـدون = ربي عظيم الشـان جـلا جلالـه
يبقى وكل اللي بهالكـون يفنـون = الكامل اللـي مايوصـف كمالـه
يالله طلبتك قاف وافي ومصيـون = من الخلل ومن الزلـل والهزالـه
وأن يسر الله نكتب البيت مـوزون = مافيـه زود ونقـص ولا ميالـه
اما يجـي ياكنـه اللـول مكنـون = ولا علـى ماقيـل نكتـب بدالـه
في خافقي علمٍ له سنين مدفـون = واليوم صغته في قصيدي رسالـه
ياوقتنا ياللي بك الحـق مطعـون = والله يستـر لايسـبـب زوالــه
اشوف بعض الناس قاموا يزيـدون = من الخطا والكـل ياخـذ مجالـه
قالوا مطيري نذل من عدة قـرون = وأصل النذاله فالمطيـري جمالـه
هاتوا لنا البرهان ياللي تهرجـون = ماتثبـت الحجـه ياكـود بـدلالـه
وان كانكم من غير نيشان ترمون = هاذي جهالـه مابعدهـا جهالـه
ألا هبيتوا ثـم هبيتـوا وتخسـون = ياهل الردى في كل حولن وحالـه
حتى الدجاج اليوم صاروا يطيرون = من عقب ركب ريش وجناح شاله
لكن حنـا ترتقـي مانجـي دوون = ولاينثبر بالنـاس غيـر الحثالـه
قال المثل يانـاس يلـي تعرفـون = من طاول اطول منه ويبطي ماطاله
حنا هل الطالات وبليـس ملعـون = والنذل من يطلـق علينـا نذالـه
رجالنا بالعـز والطيـب مفتـون = وكلن على النوماس وصى عياله
اسم الوفا والطيب فمطير مقـرون = ولا ينذكر اسم المطيـري لحالـه
وحنا هل الوقفات والناس يـدرون = والي جهل ماني وصـي بضلالـه
وحنا عدود الطيب والناس يـردون = اسمع كلام العبدلـي يـوم قالـه
وحنا خذينا ونعم والسيف مسنون = يـوم انهـا ماتنوخـذ بالسهاالـه
يوم الحرايب فالجزيره لها كـون = ماعاش غير اهل السطر والشكاله
واليوم دارت واستدارت مية لـون = ولا عاش غير الي يقدس ريالـه
ان كان ورثوا من المـال مليـون = والكل منهـم راح يبـذخ بمالـه
حنا ورثنا المرجله بين هالكـون = ورحنا انتناقلهـا سلالـه سلالـه
ماينكر الريجيـل ياكـود مجنـون = ولا صديع زاد ربـي خبـالـه
ولايعطي الشرهات من كان مديون = ولايارد الـي قاصراتـن حبالـه
هذا الصحيح وقولوا اللي تقولـون = وهذا كـلام العبدلـي يـوم قالـه
القصيده الحاديه عشر : وهي عباره عن مساجله شعريه بين الشاعر زياد الشطيطي والشاعر شليويح الميزاني
زياد الشطيطي
الليل يا شليويح لا تسري الليل = ما فالمساري غير زود الندامه
ماهو خطر من ناقلين المصاقيل = ولا يابن عمي مقابل ضلامه
لاشك وانته من رجالٍ حلاحيل = اللي خذو فالمجد ذروة سنامه
لاكن دوك العلم دقه وتفصيل = اسمع كلام اللي يثبت كلامه
البارحه فالسوق عجلان بالحيل = قضاي لازم رغم كرهي عسامه
شافت عيوني واكتفت بالبهاذيل = ولاني بملحق شوف عيني ملامه
ريجيل لا والله ولاهم رياجيل = جنسٍ جديد النوع وانت بكرامه
عليه وصف من العذارى دواليل = راح الشنب مع درب طش العمامه
لو يستتر في لبس سود المراييل = اخير من بنطال مرخي حزامه
سماعته فالاذن فاليد منديل =وللي يسلم ما يثني سلامه
هذا شباب الجيل !! يا فزعة الجيل = ماعاد نبغى منه غير السلامه
ولا العذارى لابساتٍ بناطيل = والوجه نصه مكتسي باللثامه
يا كثر ما فالسوق منهن مداهيل = ولكل طرقي مر يلقى مرامه
ذلي مدابيرٍ وذلي مقابيل = والرجل ما يلقى ببيته طعامه
جوال مع سواق والهرج بأيميل = ولا ترانا للتخلف علامه
حرية المرأه وعنها ياكم قيل = فأعلامنا اللي صار مدري علامه
افكار خبثٍ تنزرع والمحاصيل = حصد الحيا والدين يعلن هدامه
ما قل دل وبينته التماثيل = والشرع ميّز فالحلال وحرامه
رد الشاعر / شليويح الميزاني
لي هاجسٍ لامن لفته المراسيل = ما دس راسه مثل راس النعامه
لا والله الا مثل برق المخاييل = لاهل هماله غمامه غمامه
يامرحبا ترحيبة الحط والشيل = مضمونها التقدير والابتسامه
بالشاعر اللي كنه الجدي وسهيل = من روس قومٍ ما تجيب الهلامه
الوضع يابن العم يحتاج تحليل = وانته فهيم ولا انت ناقص فهامه
الاوله مالي علاكم مداخيل = انا الرفيق اللي نظامك نظامه
كد شفت لي رجلٍ رموشه مضاليل = ما تفرقه لامن ضحك عن مدامه
واضع على وجهه جميع المحاليل = ومن الدلع يمشي سوات الحمامه
يسهر مع دلامه كمنجا وتطبيل = وابو دلامه مادرى عن دلامه
ياليت ربي يرسل طيور ابابيل = وكلٍ مع الثاني تخالط عضامه
والثانيه يا زياد تحتاج تفصيل = تفصيل خامه عند خياط خامه
رجلٍ يبا ينصح رجالٍ مهابيل = مثل الذي يحرم بليا حرامه
مالله موكلنا على الناس توكيل = في وقتنا اللي ما بقابه شهامه
ما دامنا نمشي عل وحي جبريل = والروس ما جاها الجهل و الرخامه
روح وتسوّق والدعاوي تساهيل = وتشوف زرقا غير زرقاء اليمامه
تجرف بها الموضه كما جرفت السيل = هذا هي اخر مانتجه الدرامه
ويا راس قسمك غير عن قسمة الذيل = يعيش رجلٍ ما ينقص مقامه
القصيده الثانيه عشر : أداري حبنا بكفوف ٍ أرفق من يد الدكتور
على كثر المعارف فالزمان اللي رحاه تدور = وعلى الكثر القلوب اللي تبادلني وابادلها
سلاسل شوق مصنعها صميم القلب صدق شعور= اصممها لحبيب الروح في جيده وافصلها
وعلى رغم الظروف اللي حواجز دون ضوء النور = لقيت اسلاك حبك في صميم القلب واصلها
سوات الفيش بالكهرب ليا منه شبك محظور !! = يجوز انه يولع فآخر الدعوى على اولها
اداري حبنا بكفوفٍ ارفق من يد الدكتور = ليا شرّح عروق القلب لو لحظه ما يهملها
على ذمت يدينه والعيون اللي على الناظور = يراقب للخلايا اللي تحرك من منازلها
محبه من عظيم الجاه مالي من وراها دور = على كثر البشر تبقى خطاياك انتحملها
احصل عذر لو ما انته على اللي تعمله معذور = واجامل نفسك ! ونفسي ! اراضيها وازعلها
تسّلط حبك الطاغي وغيّر منهج الدستور = ونساني بنفسي دون هالناس وقبايلها
ترشح ثم رشح بعد ما صوّت له الجمهور = ولاية حب واحتلت خفوقي في مراحلها
ثواني وقت لاكن وقعها وسط الضمير شهور = مسلسل حي ناره كي يوم اشرح تسلسها
لو انه يشرح اللي داخل اعماقي حبر وسطور = كتبت من القصايد مكتبة حبك بكاملها
ترا فرقك عن العالم كما الاصلي عن الديكور = فروقٍ شاسعه حتى الجويهل ما تجاهلها
لوني بخبرك عن خافيٍ وسط الحشا مستور = عرفت ان الرجال صدورها توسع مشاكلها
وانا ما قول بادلني بنفس الخاطر المكسور = ولا ابغى منك تسهر عينك ومثلي تبهذلها
ابي خمسه حروفٍ لاهي محرم ولا هي زور = حقيقه والحقيقه ما تخيّب من يعاملها
ابيك تقدّر اللي صار لي وتقول للي (مشكور) = عساها تبري جروح الضمير اللي تورسلها
ختاما ً عاودوا الزياره لتقرأو جديد الشاعر / زياد الشطيطي هنا في ديوانه الخاص
احترامي 
« آخـــر الـــمـــشـــاركــــات »
03-Sep-2009, 12:36 AM
ديوان الشاعر / زياد بن ناهس الشطيطي المطيري
العرض العادي
