السلام عليكم ورحمة الله وبركاته
أسعد الله مساكم بكل خير
يسرني أن أطرح لكم ديوان الشاعر / سلطان بن دحيم الرويس العتيبي
أحد شعراء النخبه في منتدى الهيلا
و شاعر مبدع في النظم و في المحاوره
وأقل من حقه إهدائه هذا الديوان الذي جمع الجزاله و الإبداع و قوة المفرده
القصيده الأولى :
الصاحب الطيب أليا صد اناديه =بالصوت كله لين يسمع مناداي
وان كان جاوبني عسى الله يحييه=اقوم له حشمه واحط اله مركاي
وان كانه اوحى الصوت ما قال لبيه = كنه يقول انه يبى اليوم فرقاي
اقفي مثل ما اقفى ولاني براجيه =من باعني وشلون اصير اله شراي
خله على كيفه وعقله يقديه = يبى يحصل من يوافق له الراي
وحقه عليه كل ما حل طاريه = ذكره بخير ولا افرح اعداه واعداي
لو كان يبقى الجرح ما احد(ن) يداويه = اصبر ولا اشكي غير لله مولاي
ولا خاب من يرفع يدينه لواليه = وانا لغير الله ما ابديت شكواي
وختامها درس(ن) زماني عطانيه=منه استفيد ان عشت في وقتي الجاي
القصيده الثانيه :
يا وليف الروح مال الهجر داعي = صدتك عني تراها اكبر خطيه
لا توادعني ولا ابغالك وداعي = دام مالك فالوصل يا زين نيه
راح عمري من سبب حبك ضياعي = ليه ما لديت بالعينيين فيه
ليه ما لديت بالسود الوساعي = كود تبرا علة القلب القويه
اعشقك من نجد ما فيها نزاعي = وذمتي يا زين من غيرك بريه
حب من قلبي ترا ما هو صناعي = عكس ناس(ن) عندهم مليون نيه
ولا نفعني في بحر حبك شراعي = صرت انا لك فالزمن هاذا ضحيه
والهواء سم(ن) مثل سم الافاعي = من ينوشه تصبح احواله رديه
بس مهما كان ما تلوي ذراعي = لو تحاول فالصباح وفالعشيه
وان بغيت الجد مال الهجر داعي = والخوي الذرب ما ينسى خويه
القصيده الثالثه :
مل قلب(ن) كل ما غنى المغني = دق هاجوسه وزادت به همومه
والسبب كله وليف(ن) غاب عني = صاحب(ن) فالقلب صاطيت(ن) سهومه
صاحب(ب) زينه بهالدنيا فتني = غاب عني وارمست حتى علومه
والله اني من فراقه والله اني = ساهر(ن) فالليل واراعي نجومه
طول ليلي ساهر(ن) وحدي واوني = والهموم تقول فالصدر معزومه
لا بغيت النوم جني وازعجني = وطير(ن) عن جفني النعسان نومه
ولا بغيت ادله هجوسي ذكرني = ثم خذا فكري مع التفكير حومه
ثم ذكرت ايامي اللي خالفني = يوم كان العز كاسينا هدومه
يوم بالزين والوصل متهني = ما دريت ان الزمن عجل(ن) هجومه
ويا وليفي بنشدك وش جاك مني = الجفا والصد قلي وش لزومه
ما حصل مني خطا واخلفت ظني = الغلا بعته كذا بأخس سومه
روح جعلك من غيابك ما تثني = كيف اخيل البرق لا قفت غيومه
القصيده الرابعه :
كل ما جيت ابى ارتاح يا نواف = دق هاجوس صدري وذكرني
ثم تذكرت خل(ن) حسين اوصاف= لا ذكرته هكالحين دورني
لا ذكرته يجيني ولع واشعاف = ثم نصيته وشوقي محاصرني
دون داره ما اوقف ولا ميقاف = لين عيني بشوفه تبشرني
وكان شفته ترا ما علي خلاف = البلاء كان خلي تعذرني
صاحب(ن) بالغلا في ضميري ناف= أله رب السموات صاخرني
صاحب(ن) مسرف(ن) بي اغلاه اسراف= وشوقي لطلعة الرجم يجبرني
وكل ما ارقبت في عالي المشراف = هل دمعي كذا ما يشاورني
السهر والحزن والدموع احلاف = حالفتني يا ربي تصبرني
القصيده الخامسه :
انا افرح بشوفك يا هوى البال بس الموت= ليا من ذكرت ان المفارق تواليها
يصير الفضاءفي عيني اصغر من التابوت= وتحيى الجروح اللي بشوفك مداويها
جروح(ن) سببها شفتن مثل لون التوت = وعين(ن) هدبها نصف الاوجان غاطيها
ليا سلهمت ما عاد تسمع لي اية صوت = وتناجا العيون وشرنا من تناجيها
نسولف ونفهم بعض لوكان حنا سكوت= وتبين العلوم اللي عن الناس نخفيها
علوم(ن) نخفيها عن الحاسد السربوت= ضعيف(ن) اليا اوحاله علوم(ن) يوفيها
يزود عليها والنميمه تهدم بيوت= ونقالها يبشر بنار(ن) يصاليها
و لو ان محبتنا كما عقاب هو ونوت= محبة شرف ما تنتغير مباديها
و يا خلي ترا حبك بوسط الحشاء منحوت= محبتك في قلبي ولا ني بناسيها
من اسبابها نفسي ما تقبل شراب وقوت= ما تقبل لذيذ الزاد من عقب غاليها
ومنها سهرت الليل والمسلمين خفوت = ومنها ياكم هلت عيوني عباريها
ومن شين حظي صار هجسي كما الريموت= ليا جيت ابى ادله ذكر العين مشقيها
عطيتك كلامن من صميم الحشاء مثبوت= كلام اللذي نفسه غرامك معنيها
تغانمني بوصلك قبل لا يفوت الفوت= ترا الوصل زادن للمحبه يغذيها
وعسى الله يجيب الدره اللي ببطن الحوت=ونرتاح من شر المحبه وطاريها
القصيده السادسه :
كل ما قلت الهواء صكيت بابـه=اعترض لي واحد(ن) غير مزاجي
واعـذاب القلـب والله واعذابـه=منك يالمجمول يا طلق الحجاجي
يوم شفته قال قلبـي مرحبابـه=وصاب قلبي مثل ما قيل ارتجاجي
قلت يا قلبي علامك وش تبابـه=لا تورطني وانـا ادور خراجـي
قال والله ما نجنب عـن جنابـه=لين اذوق الماء حلو والا هماجي
والله اعلم في طريقي ويش جابه=لين سبب لي مشاكل وانحراجـي
والله ان العشـق شققنـا ثيابـه=وللمحبه فاصل(ن) سلك البواجي
والهواء يا قلب ماء يمطر سحابه=المطر ما به مطر كله عجاجـي
قبلنا كم واحد(ن) عاش وشقابـه=قبلنـا راح الدجيمـا والعواجـي
القصيده السابعه :
يا سعـد هـاذي منازلنـا القديمـه= عانها يا خوك تتطرقهـا الهبايـب
كن ما شيد بهـا بيـت(ن) وخيمـه= وكن ما حلوا بهـا ربـع وقرايـب
عقب نزل(ن) كنه جنـاح العتيمـه= بالجهـام اللـي يزيـن بالجنايـب
والمغاتيـر النظـيـرات المقيـمـه= ورثنا من شايـب(ن) قـدام شايـب
اصبحت يا خوك تشبـه للخريمـه= مـا بهـا سـكـان لله العجـايـب
كـل مـا مريتهـا عينـي هميمـه= بالدموع اللي كما وبـل السحايـب
وينشي بجوي من الاحـزان غيمـه=واخذ شويـه مـع الافكـار غايـب
كني اللي واقع(ن)له فـي جريمـه=عايش(ن)عمره مصايب في مصايب
ومن تمكن جرح وقته من صميمه =لو صبر جرحه ترا ما هوب طايب
والرجاء في مشفي النفس السقيمه = خالق الانسان من صلب وترايب
انه يمد المشقا بالعزيمه = ويفرج الضيقه وهو جزل الوهايب
وكل طقه من زمنا بتعليمه = والعمر رحله والايام الركايب
القصيده الثامنه :
انا ما تهيض لين اشوف البروق تلوح = ليا شفتها جاني من الارض خفخافي
وقامت هواجيس الضماير تجي وتروح = وقمت ابدع القيفان قاف(ن) ورا قافي
اوسع بها صدري وانا خافقي مجروح = اجر اللحن واللي خفا فالحشا خافي
لعل البروق اللي لها فالغداري ضوح = تخيل على دار(ن) لها القلب ميلافي
على ديرة(ن) نسمة هواها ترد الروح = ولو هي عجاج وحر ما هيب تنعافي
لعله من البره ليا الوادي ابو سروح = ليا مرها الطرقي يقول المطر ضافي
بامر واحد(ن) يعلم بسدي قبل لا ابوح = الاه(ن) بخلقه دايم الدوم روافي
لو اني ليا من جيتها والصدر مشروح = وشفت المنازل باني(ن) فوقها السافي
تسكر بوجهي كل باب(ن) قبل مفتوح = وعجلت من عقب المغازي بالانكافي
بعد ما سكن بربوعها كل طايل شوح = رجال(ن) لهم يوم المواقيف ميقافي
بقت كنها ما حل فيها ولا ممدوح = خلي(ن) تهول العقل يارب يا كافي
تحصل بها خيمه وبيت الشعر مطروح = وبها الضيف ما ياقى ليا مر مضيافي
ليا شفتها عيني بزرق الدموع تفوح = وخصوص(ن) ليا مني تذكرت الاسلافي
ولا احد(ن) يلوم العين يا ناس يوم تنوح = وعسى لايمي باللي للارواح قصافي
القصيده التاسعه :
يا لايمي دامك ما تدري عن الحال = وش لون بالله يا صحيبي تلومي
لا صرت ما تدري عن اللي على البال = احفظ لسانك يا عوين الهمومي
ترا المغربل زاده الوقت غربال = يطيح لا وشك على انه يقومي
عاش بزمان(ن) فيه تحطيم الامال = وقت(ن) وقف ضد الرجال القرومي
وقت(ن) به الطيب يقولون بطال = وهاذا زمان مضيعين السلومي
لكن انا طالبك يا رب يا وال = يا واحد (ن) لجلك صلاتي وصومي
انك توفقني لزينات الاعمال = واغفر ذنوبي يالغفور الرحومي
وفرج هموم(ن) داخل الصدر تجتال = دايم بوسط الصدر ليلي ويومي
بصدر(ن) به الضيقه من الجال للجال = مغير في بحر الهواجيس اعومي
واسباب ذا كله بلا شك وجدال = من كثر ما عيني تخيل الغيومي
اليا تعدا خيال طالعة بخيال = اخايله لوكان منه محرومي
ويمطر على غيري من الوبل همال = ويسقيه وانا في لهيب السمومي
وانا المبدابه على كل الاحوال = لكنه اصبح حلم ضمن الحلومي
وترا القمر يرجع بعد مده هلال = ومن السماء تبى تغيب النجومي
والحر يبقى ماكره راس ما طال = والبوم يرجع بوم من ساس بومي
وانا احمد الله طيب العم والخال = وفي ساعة الشده قويه عزومي
مثل الجمل للحمل لو زياد شيال = ولا اشكي على من لا يسد اللزومي
واصبر على ميلات وقتي ليا مال = حيث الشدايد فالزمن ما تدومي
اصبر وربي للصعيبات حلال = مشكاي لا عضيت راس البهومي
مشكاي من نزل تبارك والانفال = رب(ن) عليم بخافيات العلومي
وصلاة ربي عد ما وادي(ن) سال = على النبي وعداد زرق السهومي
القصيده العاشره :
يا هاجس الشعر ابى اسجل معاناتي = في بيض الاوراق حتى الناس تقراها
انا جريح الهواء من فايت(ن) فاتي = وجروح قلبي عجزت احصل ادواها
حبيت لي ترفة(ن) راحت ولا جاتي = اخذت عامين عايش حلو ذكراها
اخذت عامين صورتها بنظراتي = واحاول انسى غلاها واتناساها
ونسيتها من فضل رب السمواتي = نسيتها عقب ما نجحت كواياها
وذقت السعاده بعدها والملذاتي = وارتحت من حبها يا كبر بلواها
وارتحت من كثر روحاتي وجياتي = ولا عاد افكر بها والا اتمناها
وقررت ما احب وابى اسحب سفاراتي = من الهواء لجل نكبه في سواها
وصدفه بمشفى الحرس قسم العياداتي = عند المواعيد جتني تقصر خطاها
بنت(ن) من اسبابها ضيعت كلماتي = مغير محبوبتي تشبه حلاياها
تسأل ومن زينها لخبطت اجاباتي = اجابة(ن) جت مدري ويش معناها
ومن يوم قفت وانا ارجع علاقاتي = مع الهواء غصب والسبه محياها
وقفت ابى اظني ارتب عباراتي = واشوف لي فرصة(ن) واسعد بلقياها
لكن حالت القدر من دون رغباتي = الناس واجد وانا ماني بوياها
واقفيت مجروح اكرر فالتنهاتي = بنزل تحت فالعماره واطلع اعلاها
واخذت ساعه مضيع كل وجهاتي = مدهوش عيني تعاين من تعداها
وروحت والقلب في قسم العياداتي = اخذته اللي كما اللولو ثناياها
القصيده الحاديه عشر
انا صابني يا زين بعد الفراق خلاج = خلاج(ن) نحل حالي وعيني مسهرها
بعد رحت عنك بعيد يا زين ما يحتاج = عليك العيون القشر هلت عبايرها
دموع وسهر وهموم قلبي تجيه افواج = هموم يوردها والاخرى يصدرها
وقعت ببحر حبك ولا عاد الي مخراج = ولكن حبال الوصل لا عاد تقصرها
جروحي غميقه والوصل للجروح علاج = يا ابو غرة(ن) سبحان رب(ن) مصورها
تميزة بالعين الوسيعه وزين حجاج = وباقي وصوفك كلها ما اقدر احصرها
القصيده الثانيه عشر :
المفارق بيننا يا زين حاصل = بس انا طالبك لا تبخل عليه
بالرسايل يا وليفي والمواصل = باتصال(ن) يفرح النفس الشقيه
العرب ترقد وانا دايم مواصل = من فراقك حالتي جدا(ن) رديه
وصابني بعدك رماتيز المفاصل = من كثر ما ادوج في نجد العذيه
انشروها في قطوف وفي فواصل=كود خلي بلتفت بالعين فيه
القصيده الثالثه عشر :
يــا بــداح مجـلـس هــل الـدقـات ماليـبـه=اخـذت عبـره مـن اللـي صـار فالمـاضـي
حتـيـش لــو يبـتـسـم ويـــزود ترحـيـبـه=لا بـد مـن كلـمـة(ن) تزعـلـك يالـراضـي
يجـيـبـهـا كـنــهــا مــزحـــه بـأسـالـيـبـه=وهـي كلهـا مـن لعـانـة قـلـب وابغـاضـي
وألـيـا لطمـتـه ضـحـك بسـنـون تركيـبـه=ثم قال انا امزح معـك وش فيـك مغتاضـي
وألـيـا تركـتـه مصيـبـه واكـبـر مصيـبـه=يغلـق الصـدر ضيقـه عقـب مـا غـاضـي
لكـن تــرا الـحـل يــا بــن الـعـم تجنيـبـه=وتركه على وجهته يرثـع علـى الفاضـي
عـلـيـك بـالـلـي قـلـيـلات(ن) عـذاريـبــه=اللي عصمه الولي عن نهش الاعراضي
ألـيـا نصيـتـه تحـفـوابـك ومـــن طـيـبـه=حرص(ن) على راحتك بالحيل ويحاضي
هــذاك ودك يـــا بـــن عـمــي بتقـريـبـه=وتبعيد ناس(ن) تجي من تحت الانقاضي
ناس(ن) لها خبـرة(ن) فالهـرج والغيبـه=وعلومهـم قـال عـايـض فـبـن عـواضـي
والــرجــل تـكـفـيـه فـالـدنـيـا تـجـاريـبـه=وانـا خذيـت العبـر مـن وقـتـي المـاضـي
القصيده الرابعه عشر :
انا يوم اسج الرجل من سجة الهاجـوس=ليا سجني سجيت رجلـي علـى الخالـي
ليا سجني لو كنت في مجلس(ن) مانوس=تركته ورحت اجلس يا ابو تركي لحالـي
تقول ان خفاقي يشطـب بحـد المـوس=وتقول انه يصلى على الحامـي الصالـي
ألا وا عذابي منـك يالواقـع الملمـوس=تسببت فـي همـي وغمـي وغربالـي
ليا قلت زانت واستوت جالهـا عاكـوس=وجيت متحدر عقب ما اشرفـت فالعالـي
زماني يلقني من اقسى الـدروس دروس=دروس(ن) تبى تبطي لك الله على بالـي
والا يا زمن كم شيبت من دروسك روس=وكم من عيون(ن) دمعها يا زمن سالـي
زمان(ن) وقف ضد اهل الطيب والناموس=وعطى اللاش وجه ونزله خير منزالـي
لكن الرجاء فاللي لوجهه تخضع نفـوس=يبدل لنـا الاحـوال مـن حـال لحالـي
انتظروا المزيد من دواوين شعراء منتدى الهيلا ..
احترامي 
« آخـــر الـــمـــشـــاركــــات »
22-Jul-2009, 11:57 PM
ديوان الشاعر / سلطان بن دحيم الرويس العتيبي
العرض العادي
