الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > المنتديات الأدبية > قصائد الأعضاء > منتدى دواووين شعراء المنتدى

« آخـــر الـــمـــشـــاركــــات »
         :: كل عضو او شاعر يسجل بيتين غزل الفهاا من قصائده .. بشرط ان تكون غزليه فقط .. (آخر رد :الريشاوي)       :: ودي ولا ودي وابيهم ولا ابيه (آخر رد :الريشاوي)       :: واكتبي هذا أنا أنا ليلى العامرية (آخر رد :الريشاوي)       :: البيت لاعْجَبني اجاريه باحساس (آخر رد :الريشاوي)       :: أنـا لا تلوموني ولو ملـت كل الميل (آخر رد :الريشاوي)       :: اوافق .. واقول النفس صعبه مطالبها (آخر رد :الريشاوي)       :: الحب اقفى في ديانا ودودي (آخر رد :الريشاوي)       :: امير قبيلة المحاقنة قبل الدولة السعودية (آخر رد :متعب الوحيدب)       :: امير قبيلة المحاقنة قبل الدولة السعودية (آخر رد :متعب الوحيدب)       :: الشيخ عبدالله ابن جزعاء العازمي جمع غير الفروسيه الحكمه والفكر السياسي وبعد النظر (آخر رد :متعب الوحيدب)      

إضافة رد
أدوات الموضوع انواع عرض الموضوع
غير مقروء 02-Aug-2009, 11:37 AM رقم المشاركة : 1
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

Thumbs up ديوان الشاعر / بندر بن مصقال المرشدي العتيبي

السلام عليكم ورحمة الله وبركاته


أسعد الله مساكم وصباحكم بكل خير


مازلنا نواصل مسيرة طرح دواوين شعراء منتدى الهيلا المبدعين

واليوم نطرح لكم ديوان أحد عمالقة شعراء منتدى الهيلا

ومدير المنتديات الأدبيه في منتدى الهيلا


الشاعر / بندر بن مصقال المرشدي العتيبي



شاعر تميّز بقوّة وجزالة أبياته في النظم وفي المحاوره


إليكم قصائده الرائعه وتمنياتي لكم بالقراءة الممتعه



القصيده الأولى : الأسهم



يازين وجه الآدمي يوم تلقاه = كسبان في سوق التـداول ومبسوط
يضحك ويرسم من ثرا الحلم دنياه = مايدري انه بالمفاهيم مغلوط
مايدري ان السوق واجد ضحاياه = ميت ومشلولن وبأشهار مربوط
غير الذي صابر على عظم بلواه = قلبه من اسواق الفلس ضاربن شوط
عقب الطمع يصفق يمينه بيسراه = ويقول شيئ صار ماهوب مضبوط
وانا الذي مثله جرالي معناة = وكنت احسب اني باول الامر مغبوط
درست علم السوق والعلم مشكاة= لكن ضاع الجهد و السوق مضغوط
سحاب صيفا ماتهنيت في ماه = هبت عليه الريح ثم صاطته صوط
صارت لنا بسوق الهوامير مأساة = اموالنا نهبت بلا قيد وشروط
تبخر اللي من هنا كان منشاه = ما جاني بسرقه ولاهوب مسفوط
و غيره ديون للبنوك المسماه = وقيمة بكار وضح وارقابهن نوط
من غير حيلة صحت والامر لله = حلوق السباع بجوفها صرت مقطوط
ارفع يديني للولي واترجاه = يفرج لمن كنه على النار محطوط
يارب بندر ساعده حل بلواه = ياناصرن موسى ويامنجيا لوط





القصيده الثانيه : الفكر من كثر الهواجيس مشغول




الفكرمن كثر الهواجيس مشغول = والقلب كبرت حيرته من طواريه
همٍ تولجني هذا داير الحول = عكر مزاج النفس والحال باريه
صبرت مار الصبر له حد معقول = واليوم مافي داخل النفس ابا ابديه
واشرح لعراف العرب صايب القول = حملٍ من العام ارهقتني بلاويه
وانا على دربي وقف ناسٍ خبول = وصديت عنهم ما بغيت المشاريه
مار ابتلاني بالحكي كل دعبول = اهل الوجيه المظلمات المكاريه
ناسٍ زغرها ابليس واعقولها طبول = تركض ورا هرج القفى ماتخليه
كم واحد سيفه على الخلق مسلول = يشذب عراقيب المقفي ويذيه
خبلٍ بعد ما أمتس بطنه من الفول = ولع قديحتها وشانت هقاويه
زيف على الغياب اقاويل وفعول = كذبه بحلفه مقترن به يباريه
حلوٍ لسانه باللقاء مار معلول = معلول قلب الله يغثه ويخزيه
يخوض فالمجلس بلا عرف ووصول = ويصجه بكثرت رياه وعزاويه
عن هرجته سمعي مسكر ومقفول = مار البلاء ناسٍ تسمع دواديه
وما للنصيحة في عمى القلب مفعول = لا جيت له نصاح كبر علابيه
ومادام طبعه هاكذا .. ماله حلول = والله لحده لين أطلع خوافيه
أبين اللي للعرب كان مجهول = حتى يفارق درباً أهواه وأمشيه
وروحت مقيط اللي بالأمثال منقول=لا صد عني قلعته ويش لي فيه
ماني مكلف في صلاحه ومسؤل = من لا هداه الله ماني بهاديه
عن ديرته تبعد بي اخطاي واقول = يازين بعد اللي تردا هقاويه
ممشاي مع خدٍ من الوسم مسيول = اخير من قربه وشوفه وطاريه





القصيده الثالثه : هذي طرات العمر والعمر عاريه



يازين سج القدم باطراف عصرية=في ديرة يستريح البال لاجاها
جاياً عليها قبل يومين سيليه=ترقص زهور النبات الخضر مع ماها
يوم الولي ساقها مع درب وسميه=كن الفياض الخضر كانت تحراها
مكتسية بالنبات تقول زوليه=منوتك يامقزرا وقتك تمناها
ترمي همومك ورا لا مالت الفية=مع درب وضح يتل القلب ممشاها
وضح على كيف راع الصنف منقية=تبهج قلوب الشقاويه وتشعاها
وان مر عجلان فكسار الشراطية=يفرمل بسايقه قبل يتعداها
ماهيب بالرخص مبيوعة ومشرية=(بيل قتس) .. لو حط ماله ماتقفاها
ممشاك معها ولو لحظات رمزيه=تنسى المشاريع وأم فلان تنساها
(هاذي طرات العمر والعمر عارية)=دنياك لو امهلت لك تقصب رشاها
والاجل مكتوب والحسنات والسية=قدام عينك نهار الحشر تلقاها




القصيده الرابعه : الطيب




الطيب بين الناس هو رمز الأفعال=يبقى ولو تفنى جميع الفعايل
ومن لا يحوز الطيب ماهوب رجال=عليه فازن ناقضات الجدايل
حتيش لو يلبس له شماغ وعقال=على فعول الطيب ماهن دلايل
تبقى الفعول الطيبة مضرب امثال=لو دوروا عنها الخدوش البدايل
صحيح ماتبقى الليالي على حال=من عاش فيها شاف كثر الهوايل
كل تعزوا قال جداني ابطال=لو كان هو بالفعل ما من صمايل
ومن ميز الواقع ودقق بالاجيال=شاف الثريا في سماه القوايل
الناس هذا الوقت طيب وبطال=والظاهر ان اهل المروة قلايل
اكبارهم لاهين في جمع الاموال=كن العمر والمال ماهوب زايل
وشبابهم تقليد موضات وخبال=ولا عاد همتهم سلوم القبايل
صار التباهي بالمظاهر والاشكال=والا فعول الطيب ماني بقايل
تغيرت كل الطبايع والاعمال=وتغيروا حتى عيال الحمايل
واكثر ماغير طيبة الناس الانذال =صحف وقنوات تبث الرذايل
ثقافةٍ فرضة علينا بالاجمال=وصار التفكك وبالاسر والعوايل
لكن وين الي يحلون الاشكال=المجتمع يالله عليك العقايل





القصيده الخامسه : زعلان من لاشيء يرضيه لاشيء





ياصاحبي بالله تسمّع لي شويّ=بعلمك حكمة وابا اترك لك الرأي
زعلان من لاشيء يرضيه لاشيء=يزعل ويرضى لو على بيالة الشاي
هذاك لو ماباقي من البشر حيّ=ال خوته بياع ماني بشراي
أخاوي الطيب وفي خوته ليّ=ارمي له الكايد تحت سبت ماطاي
ما ياصله زله ولو زل مرفيّ=ادعس على زلاته ان زل بحذاي
ما اللحقته الشكة ولا يلحقه فيّ=لو فالعلوم تجمّع اعداه واعداي
ما اسمع به النمة ولا يستمع لأيّ=واحد دخل مابين الأصحاب وشاي
يصغيلي ومنه اسمع العلم وأصغيّ=ماني باللقي صاحب العرف علباي
آخذ مع أهل الطيب بالطيب وأعطيّ=معهم وعنهم دوم ماتقصر خطاي
وأهل المصالح دايماً قرصهم نيّ=عكس الطريق اللي مشوا فيه ممشاي
هذاه دربي كان ما اعجبك ياخيّ=جنب عنه واقول ياصاحبي باي





القصيده السادسه : وين العروبه ؟


وين العروبة والشرف والشجاعة=اللي لها باسم الجدود انتسبنا
منهم ورثنا السيف رمز ووداعة=وضاعت جميع رموزنا من سببنا
عند الخصم نرجي ونطلب شفاعة=باسم التقدم والتقدم نكبنا
ماعاد فينا للقيام استطاعة=قامت عن الواجب تثنى ركبنا
نشجب ونستنكر فقط فالاذاعة=والا امتحان الفعل به قد رسبنا
وصار الجفاء مابيننا والقطاعة=شقرت عصانا والبلا ما ارتكبنا
الاسم يجمعنا ولا من جماعة=كنا بتاريخ الملأ وانشطبنا
قلوبنا فيها من القوم راعة=تفرض علينا شروطهم وتغصبنا
على المنابر فاللسنتنا براعة=وحرب الخطب ما همت اللي حربنا
عان اليهود اربع وعشرين ساعة=تلوي اذانيا عشان تحلبنا




القصيده السابعه : مابقى شيء ٍ نداوم على شانه


مكتب المشروع ماعاد له حاجة=مار صكوا ياهل الشأن بيبانه
واكتبوا من فوق بابه ومزلاجه=ما بقى شيئاً نداوم على شأنه
صار علة قلبي ومصدر ازعاجه=فيه كأني عايشٍ وسط زنزانه
لا ذكرت اللي على الطيب منهاجه=ايتضايق خاطري بين جدرانه
واحدٍ لا جيت له يضحك حجاجه=وان طلبته فزعته ثار بركانه
يصطفق مثل البحر ترعب امواجه=وان هدى مزن يباريه ربانه
كلما يصعب على يديه مخراجه=لا وقف للكايده مالها خانه
ما تشيله نجمينه ولا تاجه=هو يشيل الرتبه بهيبة امتانه
يوم يفزع ماحسب هرج هراجه=فطرةٍ من خالق الخالق سبحانه
ما يحب المدح ماهو بمحتاجه=مار ما في قلب بندر على لسانه
عن شعوري قلت اعبر من انتاجه=واذكر العمار باسمه وعنوانه




القصيده الثامنه : السناعيس



سلام ياهل المرجلة والنواميس=ساس المروة والكرم والرجوله
تسليمة من صادقات الاحاسيس=عطرتها بالمسك توله وتوله
اعداد ما هبت هبوب النسانيس=وأرخى من المنشى مقادم ثعوله
كرستها في غاية النفس تكريس =للي بنوا في قمة المجد دوله
تاريخهم مسس على العز تاسيس=وسط الجزيرة ثابتاتٍ اصوله
يوم اليالي مظلمات معابيس =وكلاً من الحربة يسطر فعوله
الهم على جمع المعادي مراويس=حريبهم عيش الهناء ما ينوله
يجيه منهم في منامه كوابيس =ويشرق من الدار لا شرقو له
والي يبا يسوي سوات السناعيس=يحفي على الجرة سماري ذلوله
ما هو بحبر فوق بيض القراطيس=قلته ومن عقله طبيعي يقوله
كل الرجال محرقين المحاميس=لا مر ذكر الشمري صفقو له
وانا من الي يبعدون المراميس=عتيبه الهيلا ارموز البطولة
عراف وان ركبوا على الخيل فريس=لاجاء نهار فيه صوله وجوله
ينكسون اعلام الاخصام تنكيس=واليا نزلوا في دار شدت نزوله
تاريخهم تضرب به اعلى المقاييس=وامجادهم ما سطرت بالسهوله
واليوم في ظل الحكومة خزا بليس=وكل يحقق في ذراهم ميوله
قلته بعد ما دق صدري هواجيس=واشتالني ليل السهر في حثوله
سلام ياهل المرجلة والنواميس=ساس المروة واالفخر والرجوله




القصيده التاسعه : البارحة صدري من الهم ضايق




البارحة صدري من الهم ضايق =وأثر على قلبي وجاء فيه دقاق
النوم من بيني وبينه عوايق=حتى صلاة الصبح والنوم ما لاق
عزلت نفسي عن جميع الخلايق=وقضيت ليلي في هواجيس وارهاق
ولو كلموني قلت ماني برايق=البال من كثر الذي فيه ما راق
نكد عليه علم راع السرايق=ماهو حرامي مار بالعكس سراق
اللي نهب مالي غدر في دقايق=وأصبحت ادور من غثاء دينه أعتاق
ماعاد لي في هالزمن من طرايق=تقفلت في وجهي ابواب الارزاق
وقتٍ يولع فالضماير حرايق=وراع الكرم يعطيه في خده طراق
والألسن اللي تاتقول الحقايق=تموت ما بلت من الحق الارياق
حاولت اعدل شيء ماهو بلايق=لكن اشوف الوضع ما عاد ينطاق
فتقٍ على قول الحكيم متمايق=ما ينرفي لو وقفتي له على ساق



القصيده العاشره : في سلامة سمو الأمير سلطان

ياللي تقول انته من أيّا فصيله=انا فصيلة دم (نخلة وسيفين)
واليا نشدت عن البلاد الاصلية=هذا اسمها محفوظ في داخل العين
يكفيك عن كثر الكلام وقليلة=وتدرك منه قيمة بلاد الحرمين
ودار التقدم والرخى والفضلية=وطن ويستوطن اقلوب الملايين
مقدمين ارواحنا في سبيله=شعب وملك في خدمة الدار والدين
ما فيه واحد بيننا ينتمي له=الا سجد شكرن .. لـرب الثقلين
على سلامة مدرك المستحيلة=سلطان سلطان السعد والسلاطين
غيث الفقير الي قليل حصيله=وابو اليتامى والضعوف المساكين
يفرج لمن بعد الولي يلتجي له=مريض والا من حساب المساجين
وان جاه معسر من عدم يشتكي له=والله لينسى ساعة العسر والدين
مثل السحاب الي صدوق مخيله=بعده يصير القاع مثل البساتين
قايد .. شجيع .. محنكٍ ينعي له=وفيه الكرم والعطف واللطف واللين
الله يرده سالمٍ من رحيله=والله يطول عمره سنين وسنين



القصيده الحادية عشر : في سلامة سمو الأمير سلطان ومرافقه سلمان


من فناجيل الشعر ودلاله الجذابة=ما يقند هاجسي غير البيوت الحية
بعد فاحت فالضمير وفج قلبي بابه=انطلق منها خيال وسج رجله فيّه
قد مضى له عام كامل والحزن ينتابه=مار غنت له على غصن الفرح قمرية
في سلامة سيدي لبس القصيد ثيابه=وامتطى صهوة معاني شرد(ن) منقية
انشرح صدر البلاد وفز شوق ترابه=وانتثر وبل الفرح فالكورة الأرضية
يوم شعب المملكة صفق له وهلا به=بعد بثوا صورته فالشاشة الفضية
فالنفوس من الغلا ياكثر ما يحظى به=تحت ظل الشوق ترقب له نهار الجية
الأمير اللي لسان الشعر لو غنابه=يستحي وزن القصيد وتخجل القافية
رافقه صقر الرياض وشال هم غيابه=وفيه صار أروع مثال لتضحية شخصية
سطر التاريخ في سلمان كل اعجابه=وارتوت صفحاته بوقفاته القومية
أشرقت شمس الوفاء من سيرته وكتابه=ولا بقي للطيب عرش(ن) ما اعتلا كرسيه
وغير حمد الله وشكره ما نقول الجابة=ودعوة(ن) فالغيب من قلب صدوق ونية
بعودة اللي حبهم من حبهم نحيا به =حبهم زاد الضماير والعروق الحية




القصيدة الثانية عشر:





اثر المشاعر تصطدم في بعضها=امس الفرح في خاطري صادم الضيق
حاولت افرق ركبهم واعترضها=بس الضمير يقول من غير تعليق
فرحان باحلام تحقق غرضها=زعلان لفراق الرجال المطاليق
الي على الطاعات ربي حفظها=امثال ابو تركي معد الشواهيق
اللي يمينه لو هلك ما قبضها=فيه الكرم وهبة وفطرة وتوفيق
وان ثقلت حمولي ووقتي فرضها=يشتالها لو كانت اثقل من طويق
من دون ما اطلب فزعته لي عرضها=واليا فزع يروي ضماء ناشف الريق
واليا استشرته بالخطط قال: خضها=وانا معك من دون كل المخاليق
وفي مجلسه ماني بلاقي عوضها=سوالف طرفه ومزح وطواريق
اسمه رفع روس الربع ما خفضها=لا مر ذكره قيل يحتاج تصفيق
مار اقفت اقدامي ونفسي غمضها=بعد الرفيق مفرق الهم تفريق






القصيدة الثالثة عشر: غزلية




هذاه قصر الحزن ماهوب الافراح=روح الغلا منزوعة عند بابه
طعنت قلوب اهل الهوا فيه برماح=والعشق مات بحسرته واكتئابه
برق الرجا في غيم الاحزان مالاح=والا القطيعة مثمرة في جنابه
والحب عوده منصرم والورق طاح=وقطفت زماليق الغضب في غيابه
وعلى السعادة مر قصاف الارواح=وفي مهدها ماتت من أثر الاصابة
خيم عليّ الهم فالقصر واجتاح=مشاعرٍ فيها غموض وصلابة
من حين جوالي بعد هزته صاح=نغمة رسالة مار فيها غرابة
حسيت فيها شيء ماني بمرتاح=من قبل ما اقرأها واعرف الاجابة
مضمونها توضيح من شخص لماح=كلا على فاله يسرح ركابه
لا والله الا رحت فيها وهو راح =الله يسهل له طريقٍ مشابه
مالي ورا بعض المضاهير مسراح=اخاف رب الكون وارجي ثوابه
مادام غيري جاب للقفل مفتاح=الغاء جهود الواسطة والقرابة
لو في ضميري من بعد بعده جراح=الذاكرة صفيت منها حسابه
خلاص بدد حلمنا قصر الافراح=وحبن بنينا بالشرف صك بابه



القصيدة الرابعة عشر: مرزوق حمدان الدغيلبي وهايف ومنتدى الهيلا




يامنتدى الهيلا على العين والراس=صدري وسيع ومن معزتك مليان
لبست معروفك مثل ثوبي لباس=وزرعت لك في داخل القلب بستان
الله يبيض وجه من ثبت الساس=وحط الك من فوق العناوين عنوان
اسم ومسمى ختم جودة ونبراس=يسمع به الاصقه ويرآه عميان
ما ينتقيم بالجواهر والالماس=ولا يغمره بحر القوافي والاوزان
كم ليلة نأخذ بشاطيه مرواس=على ثقيلات المعاني والالحان
وكم واحد من ملعبه فاز بالكاس=يوم اتقن الدرس بحذافيره اتقان
ينتابني لا بطيت عن شوفه احساس=احس بالوحدة ولو بين صدقان
يكفيني افخر به ويكفيه نوماس=انه معرفني بمرزوق حمدان
رجل بعرف وحكمة وعدل وقياس=وعقلاً لصعبات المواضيع ميزان
قاد السفينة قاسي الراس والباس=يوم ان غيره بين الامواج غرقان
غيور لبلاده ودينه وحساس=وقبيلته في منهجه شانها شأن
هاذي شهادة حق لبعيد الارماس=غنيتها من قلب صادق وصفطان
لو كان ما يحتاج مدحٍ من الناس=بيت القصيدة في سجياه نشطان
ولا هانوا رجالٍ على الطيب حراس=والي يشرف منتدى العز لا هان
والله يبعد عنك ياهايف الباس=لولاك ماتم التعارف للأخوان



وقد اجاب الشاعر مرزوق حمدان الدغلبي بهذه القصيدة



بعض البيوت تمر مآجآلهـآ احسآس = اتمر عـآدي كن ماكاينن كان
وبيوت بندر حركت كل هوجاس =ثم افتحت بالصدر للشعر بيبان
يخفق لها قلبي مثل خفق قرناس=واحس في وسط الحشى تقل بركان
يازين شيلتها ليا هب نسناس=تطرد هموم الي شكى كثر الاحزان
اكتب له التقدير من فوق قرطاس= وارفع له البيضاء على كل مابان
كله طموح وعزم مايعرف اليآس = وان عدو اهل الطيب عدّ ابو سلطآن
لنا الشرف في معرفة عطر الانفاس =في خدمة الهيلآ ترى كلنا اعوان
المنتدى الي فيه من كل الاجناس = كل القبايل ماهم ابس عتبان
اشهر من الي يعلنونه على واس= تدريبه العربان في كل الاوطان
مثل الربيع الي جلب كل عساس = تجيه ضايق بال وتروح طربآن
تصفّحه يجلي عن الخاطراعماس = مثل البحر مليان لولو ومرجان
مافيه من دون المناعير ترباس = الطيّب العاقل مكانه بالاعيان
مجمع نشاما ماهو بمجمع انجاس = مكملينه بالوفا طوال الايمان
مابه مكان لكل مغرض وهلآس = الي يسبب للمشاكل والاضغان
والفضل لله ثم لمعرّب الساس = الله يجازي هايف الطيب بأحسآن







القصيدة (15) ســــــــــــــــاهــــــــر






حسبي على ساهر بلا ذنب واسباب =سجل وزج مخالفاته عليه
ما كنت اظن انه منافق وكذاب=ولا كنت اصدق يرتكب له خطية
كنت احسب انه منصح لي بما جاب=واثره ما غير يدور الخمس مية
وانا نظامي واحترم كل الآداب=وآخذ تعاليم السلامة مطية
رحت اشتكي للعسكري قال نصاب=مضبوط باللوحة ورقم الهوية
قلت له لو كذبت عكفان الاشناب=لا انته ولا ساهر ذممكم برية
اي والله اني ماهر بضبط الاعصاب=لكن ذاك اليوم فيه وفيه
ساهر على راسي فتح له مية باب =لكن ابا ارفع ضد ساهر قضية
عز الله اني من نواياه مرتاب=عيني سهرها من خطاه ومجيه
لخبط نظام الفكر سجة وهنداب=خرب مزاجي خرب الله نويه
ودك تكسر كيمراته بمشعاب=والا تحطه للتواير ضحية




القصيدة (16) صرخة مواطن




يالله يــاجــامـــع شـــتــــات الــمــوالــيــف=ومن فضلك ابصر من عيونه كفيفه
افــرج لـمـن هـمـه يـفــوق التـواصـيـف=وجــرحــه عـمـيــق ولا يــوقــف نـزيـفــه
مـن وقـتـه الــي قــام يـاخـذ عجـاريـف=ويـحــد خـطــلان الـيـديـن ال رصـيـفــه
وقـتـن تـغـيـر فـيــه حـتــى العـواصـيـف=قد بندر ابن سرور ابه شاف شيفـه
يــوم يتفـكـر فـالـوطـن معـظـمـه ريـــف=لــكـــن مـــــن ريــفـــه يــدانـــا نـضـيــفــه
وحــنـــا عـلــيــه مـبــذريــن الـمـعـاريــف=واروحـنــا تــبــذل عــلــى كــيــف كـيـفــه
يــوم انـهـا بالسـهـم والـرمـح والسـيـف=مــن هــم فـيـه انـقـص راســـه بسـيـفـه
والـيـوم نـدفــع فـــي سـكـنـا مـصـاريـف=مـسـتـاجـريـن وحـالــنــا بــــــه كـسـيــفــه
مـــا نمـتـلـك شـبـريـن غـيــر بتكـالـيـف=كــــأن الــمـــوارد والأراضـــــي قـصـيـفــه
وبنـك العقـار يطـفـف الـحـق تطفـيـف=جـــدي مـــازال ســـراه داخـــل ارشـيـفـه
ويمكن بعد مية سنه يصـدق الطيـف=ويـفــرح حـفـيـد احــفــاده ويستـضـيـفـه
ضاع الطموح بوعـد كـاذب وتسويـف=حـتــى الامـــل مـفـقــود مــالــه وظـيـفــة
نـوحـي عـلـوم تـرفـع الــراس تشـريـف=لـكــن مـاتــت فــــي مـهـدهــا الـشـريـفـة
كـــل وزرانـــا عـنــد فـتــح المـضـاريـف=قـلـيــل مــــن يـعـمــل بـنــفــس عـفـيـفــة
كـم واحــدن لا جــاه شـكـوى ملاهـيـف=يـخـبـط لــهــا صــــدره بـنـفــس لـطـيـفـة
لـكـن ينـسـى وش هــو الـكـم والـكـيـف=لا جــاه مــن صـحـن الـولايــم غـريـفـة
ولا نــنـــهـــي مـعـنــاتــنــا بـالـســوالــيــف=يـالــلــي تـقــولــون الـقـضـيــة خـفـيــفــة
حـكــي الـجـرايـد والمذيـعـيـن تصـفـيـف=مــا نـقـص الـواقـع لا يـمـكـن يضـيـفـه
نحـتـاج وقـفـة مــن عظـيـم المـواقـيـف=الــــــي نــجــاحــه فـالـمــواقــف حـلــيــفــه
مشهـور فـي حـل القضـايـا وتخفـيـف=الآم واحــــــزان الــشــعــوب الـضـعـيـفــة
مـن حكمتـه تـذهـل عـقـول العـواريـف=ومـن هيبتـه صـاب السلاطيـن خيـفـة
يهتز من تصريح ابـو متعـب جنيـف=ويطـيـح راس المعـضـلـة مـــن رهـيـفـة
قلـتـه بعـدمـا صــاب قـلـبـي صـواديــف=واصبح ما بين ضلوع صـدري قذيفـة
وانـا ضمـيـري لا حـصـل لــه تخالـيـف=لازم تـــجــــي ردات فــعـــلـــه عــنــيــفــه
شاعر واللي في منبر الشعر تعريف=وشـرد القـوافـي فــي لـزومـي عسيـفـة
كتـبـت زبــدة عـلـم مـــن دون تغـلـيـف=ولا بـــاقـــي الا نــنــشـــره فـالـصـحـيـفــة




القصيدة (17) تشجيع الأندية




يامشجعين النوادي فكروا فيها=وابغى نتيجة من التفكير علمية
الكورة اللي تفرقكم نواديها=هي لعبةٍ هادفة والا سياسية
الغرب لو جابها يفهم مغازيها=وفالشرق ما عندنا للوضع خلفية
انقلد اخطأ خطاويهم ونخطيها=وفعيوننا كل ما جابوه ما زيه
نسعى ورا الكورة ونخسر مساعيها=ونقول ياقمة الروح الرياضية
صرنا بالألوان نبغضها ونغليها=حتى غرقنا بتيار العصبية
وفي لحظة دكت الملعب ضواريها =كم دكت اخواننا غارات جوية
عيوننا مبصرة واللهو معميها=وادمينا باردة ماهي طبيعية
في هامش العالم الي ما نجاريها =نكذب على نفوسنا بامجاد وهمية
ننسج من خبالنا قصة ونرويها=ونعيش غيبوبة احلامٍ خرافية
نسبح بحور الترف ونغوص أمانيها=احرار لو شرقنا ما فيه حرية
على المنابر بلوناتٍ نعبيها=وعلى المقابر دموع الذل مكفية
متى نسمي مواقفنا باساميها=ونشمي بدرب السنع خطوات جدية
الغرب ينفخ لنا الجمرة ويركيها=وحنا نتبسم لها كية ورا كية
لو بعض الاحيان له فزعة نحييها=ماهيب لعيوننا لآبار نفطية
شمس العدالة سحاب الظلم غاطيها=ياللي تقول العدالة شمسها حية
هاذي فلسطين تبكينا ونبكيها=وعراقنا تشتعل به حرب عرقية
حتى ولو نعقد القمة وننهيها=الهرج روتين والأفعال سمعية
اوضاع الأمة عسى ربي يسويها=ماعاد فينا عمل لـــحلول جذرية





القصيدة (18) بتال القوس





ما يطلق الهاجس اعنانه لطاريه=ويسرج لمفتول المعاني حصانه
الا لطبيعة موقفن مثر(ن) فيه=يكسر عن المخزون قفل الخزانة
واليوم مر الموقف الي يخليه=يصدر لزيزوم المواقف بيانه
رجلآ ورا كل الحراوي حراويه=نجمه برز بين الكواكب مكانه
في طلعته كل المشاعر تحييه=وكلآ يعبر عن عظيم امتنانه
سمعت بذني ما احد(ن) كان يرويه=في مجلس ما للحسد فيه خانه
كلآ يعد الي يشوفه ويوحيه=والي على قلبه يقوله لسانه
والراس شاش لحاضر(ن) مثل ماضيه=بتال ابن ساير مشيد كيانه
يوم ان كلآ بالنعم قام يطريه=كاني ملكت الشام وارض الكنانة
فعله نماري به ونعرف مواريه=بعد النظر غير الدهى والفطانه
يفرق عن نجوم الفضاء في مساريه=ويثير دهشة عقل عنتر زمانه
وياشين حض اللي وقف له يماريه=في ساحة الميدان يكرب بطانه
ومن يلبس ثياب العواري يعريه=ويكشف خفا الباطن وزيف البطانه
المرشدي في وقفته من يناحيه=كنه يسوق الفوز بالخيزرانه
سيف البراعة باسط به مباديه=ورمح الثقافة راكزه بالامانه
قول(ن) تثبته الفعايل وتحكيه=وتسمو بيوت الشعر في مهرجانه
كأن المديح بكل الاشخاص يعنيه=وكأن الوصايف مالها غير شأنه
ورغم اشتهاره ما تغير مماشية=بالدين والسلم الأصيل اقترانه
ماخاب ظن الشايب الي مربيه=هوج الهبايب ما تهز اتزانه
يمدح وفعله عن رجا المدح يغنيه=لكن بيت الشعر طقه جنانه
قام يتفلت بالمدايح ويسخيه=ما ارتاح باله لين خاض امتحانه
ومهما بلغ في وصف فعله ما يعطيه=من خانت المليار حتى ثمانه
لكن سقته يوم زانت معانيه=فالموقف اللي كنت شاهد عيانه
للقوس في بادي كلامي وتاليه=بركت في بيض الصياني سمانه




القصيدة (19)برج العنود







بين برج العنود وفرع بنك البلاد=صدفةٍ رافقت قلبي معناتها
كنت في غايتي مالي شغل فالعباد=ما اللتفت في مظاهرها وغاياتها
مار سهم العيون يهز حتى الجماد=وريحة العطر مثل الموت سكراتها!
هب يانشوت النظرة ونفح البراد=تاهت اعصاب فكري في متاهاتها
شدة الفعل تعكس شدة الارتداد=اثبتت صحة المفهوم نظراتها
يابعد شوف كل الصافنات الجياد=ليت حضي يكرر صدفته ذاتها!
مار حسب التجارب واغلب الاعتقاد=دورة الحض ما احد يقدر اثباتها!
يبدو ان العلاقة مكتنفها سواد=لو نصوع البياض يعم صفحاتها
ما لقيت الطريق الي عليه اعتماد=كل طرقة تروعني مطباتها
احترفت الجهاد بغبت الأجتهاد=في ضميري همومه ودها هاتها
قيل كحْل العيون بشوفت الريم زاد=فيه تلقا العيون انواع لذاتها
واثر كحل العيون احيان يصبح رماد=تنثر العين من جراه عبراتها
في ضميري لكل هموم وقتي مزاد=بعد قلبي غدا مهبط لرحلاتها
ولا لجرح المشاعر غير صبري ضماد=ليت حضي يكرر صدفته ذاتها





القصيدة (20) ربع سنتي

مادام طولك ناقصٍ ربع سنتي=خلاص .. لا تتعب تدور وظيفة!!
بينك وبين الرزق حاجز اسمنتي=حكم النظام اللي طويلاً رصيفه!!
مافيه ضربت حظ وإلا بلنتي= ضربت عصا بين الأذاني عنيفة!!
قل للقلوب الساكنة لا سكنتي=مابه تعفف للنفوس العفيفة!!
وخلك على ابواب المساجد قرنتي=مثلك يكون اللي عيونه كفيفة!!
واليا صدفت اللي مزاجه تونتي=أضحك ولو ما قال حاجة طريفة!!
وقل للوسائط فالوظائف وش أنتي؟!=جيفة ولو صفق لك القوم جيفة!!


(21)



يالـجـنـة التحـكـيـم مـــن غـيــر تحـكـيـم=ذعـــــذع لـجــايــزة الـمــوســس هــوانـــا


لا تـتـعـبــون بــفـــرز طـــايـــل وتـقـيــيــم
=مــــــا يـــأخـــذ الاول لاجــيــنــا ســـوانـــا


لـلـجـايــزة فـيــنــا عــزيــمــة وتـصـمــيــم=مــهــمــا تــعــلــت عــالــيـــآ مـســتــوانــا

مثل ما تحجب شمس الاشراق بالغيم
=عـنـهــا نـحـجــب الــــي بـجـهــده نــوانــا


وعقـب التحـدي مثـل مـا تجـفـل الـريـم=يجـفـل مــن السـاحـة لـيــا مـــن لـفـانـا


قـبـيــلــة عـتـيــبــة عـــلـــي الــمــلازيـــم=مــــا فـوقـنــا الا ربــنـــا الـــــي عـطــانــا


اســم تسـامـت بـــه جـمـيـع المفـاهـيـم
=واشــرق بـكـل انـحـاء البسيـطـة نبـانـا


نـحــطــم ارقـــــام الـمـقـايـيـس تـحـطـيــم=الــفـــوز دايــــــم كــــــأن وده رضـــانـــا
 

امــجــادنـــا فــيــهـــا دروس وتــعــالــيــم=لــلــي طـمـوحــه مــثــل مــجـــدآ بـنــانــا


عــادتــنــا مـــاجـــت تــمــنــي وتــرهــيـــم=نــفــتـــل شــواربــنـــا ونـــكــــرم لــحـــانـــا




عاودوا الزياره مرارا ً وتكرارا ً

لتروا جديد شاعرنا الرائع / بندر المرشدي




احترامي[/align]















التوقيع
في منتدى الهيلا زحول الرياجيل = بيت القبيله و النشاما إرواقه
يزينه حرصه لزين التماثيل = ويجمله نبذ العلوم الدقاقه
رد مع اقتباس
غير مقروء 02-Aug-2009, 11:41 AM رقم المشاركة : 2
معلومات العضو
أخو جوزا
إدارة أقسام القبيلة
إحصائية العضو






التوقيت


أخو جوزا غير متواجد حالياً

افتراضي

الله لايهيننك ياعمر

وصح لسان ابو سلطان على القصائد















التوقيع
قال الله تعالى:

﴿وَالْعَصْرِ * إِنَّ الإِنسَانَ لَفِي خُسْرٍ * إِلاَّ الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ ﴾
رد مع اقتباس
غير مقروء 02-Aug-2009, 08:10 PM رقم المشاركة : 3
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة أخو جوزا مشاهدة المشاركة
الله لايهيننك ياعمر

وصح لسان ابو سلطان على القصائد

ولا انت يا اخو جوزا

وشاكر لك مرورك العطر

احترامي















رد مع اقتباس
غير مقروء 02-Aug-2009, 09:17 PM رقم المشاركة : 4
معلومات العضو
بندر المرشدي
إدارة الأقسام الأدبية
إحصائية العضو





التوقيت


بندر المرشدي غير متواجد حالياً

افتراضي

والله مدري وش لون أشكرك يالأستاذ عمر العتيبي


لكن الله يبيض وجهك ويجزاك عنا خير الجزاء


والله أنك خدمتني في جمع قصائدي التي كل


يوم أقول أجمعها ولا أستطيع لكثرة المشاغل




تحية خاااااااااصة من الاعماق















التوقيع
يامنتـدى الهيـلا علـى العـيـن والــراس=صــدري وسـيـع ومــن مـعـزتـك مـلـيـان
لبـسـت مـعـروفـك مـثــل ثـوبــي لـبــاس=وزرعت لـك فـي داخـل القلـب بستـان
الله يبـيـض وجــه مــن ثـبـت الـســاس=وحط الـك مـن فـوق العناويـن عنـوان
اســم ومسـمـى خـتــم جـــودة ونـبــراس=يـسـمـع بـــه الاصـقــه ويـــرآه عـمـيــان
مـــــا يـنـتـقـيـم بـالـجــواهــر والالـــمـــاس=ولا يـغــمــره بــحـــر الــقــوافــي والاوزان

::

ديواني من إعداد الزميل/ عمر الدغيلبي ... بيض الله وجهه
رد مع اقتباس
غير مقروء 03-Aug-2009, 04:50 AM رقم المشاركة : 5
معلومات العضو
البريماني

رابطة محبي الهيلا


الصورة الرمزية البريماني

إحصائية العضو





التوقيت


البريماني غير متواجد حالياً

افتراضي

بيض الله وجهك يابو حميد...وافي دوم















رد مع اقتباس
غير مقروء 03-Aug-2009, 05:46 AM رقم المشاركة : 6
معلومات العضو
ابو ضيف الله
مشرف عـام

الصورة الرمزية ابو ضيف الله

إحصائية العضو





التوقيت


ابو ضيف الله غير متواجد حالياً

افتراضي

صح لسان ابو سلطان على هذه القصائد الجزلة الرائعة
وشكراً لك يا عمر على انتقائك لنا هذه القصائد المتنوعة



يازين سج القدم باطراف عصريـة =في ديرة يستريـح البـال لاجاهـا
جاياً عليهـا قبـل يوميـن سيليـه =ترقص زهور النبات الخضر مع ماها
يوم الولي ساقها مع درب وسميـه =كن الفياض الخضر كانـت تحراهـا
مكتسيـة بالنبـات تقـول زوليـه =منوتـك يامقـزرا وقتـك تمناهـا
ترمي همومك ورا لا مالـت الفيـة =مع درب وضح يتل القلب ممشاهـا















التوقيع
قال الشافعي رحمه الله: أركان الرجولة أربع: الديانة والأمانة والصيانة والرزانة.

قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة.


اضغط على الصورة لرؤيتها بالحجم الطبيعي

اللهم أنصر من نصر الدين وأخذل من خذل الدين
رد مع اقتباس
غير مقروء 03-Aug-2009, 11:11 PM رقم المشاركة : 7
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة بندر المرشدي مشاهدة المشاركة
والله مدري وش لون أشكرك يالأستاذ عمر العتيبي


لكن الله يبيض وجهك ويجزاك عنا خير الجزاء


والله أنك خدمتني في جمع قصائدي التي كل


يوم أقول أجمعها ولا أستطيع لكثرة المشاغل




تحية خاااااااااصة من الاعماق


ماسويت شي وانا اخوك

ووجهك ابيض والله يجزاك بمثله

مرورك في ديوانك شرف

احترامي















رد مع اقتباس
غير مقروء 03-Aug-2009, 11:17 PM رقم المشاركة : 8
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة الـوفـا طـبـعـي مشاهدة المشاركة
بيض الله وجهك يابو حميد...وافي دوم

ووجهك ابيض يا الغالي

لاهنت على مرورك

احترامي















رد مع اقتباس
غير مقروء 03-Aug-2009, 11:18 PM رقم المشاركة : 9
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة ابو ضيف الله مشاهدة المشاركة
صح لسان ابو سلطان على هذه القصائد الجزلة الرائعة
وشكراً لك يا عمر على انتقائك لنا هذه القصائد المتنوعة



يازين سج القدم باطراف عصريـة =في ديرة يستريـح البـال لاجاهـا
جاياً عليهـا قبـل يوميـن سيليـه =ترقص زهور النبات الخضر مع ماها
يوم الولي ساقها مع درب وسميـه =كن الفياض الخضر كانـت تحراهـا
مكتسيـة بالنبـات تقـول زوليـه =منوتـك يامقـزرا وقتـك تمناهـا
ترمي همومك ورا لا مالـت الفيـة =مع درب وضح يتل القلب ممشاهـا

العفو يا ابو ضيف الله

واشكرك على تشريفك لديوان شاعرنا بندر

احترامي















رد مع اقتباس
غير مقروء 03-Aug-2009, 11:27 PM رقم المشاركة : 10
معلومات العضو
معجب العتيبي

مشرف منتدى المحاوره

المحاولات الشعرية

إحصائية العضو





التوقيت


معجب العتيبي غير متواجد حالياً

افتراضي

يعجز القاريء عن اقتباس بيت واحد


كل بيت يغازل الاخر من جماله


ابداع وتوهج في سماء الشعر


شكرا لك ياعمر



وشكرا لبندر التحدي هناك

وبدر الابداع هنا















التوقيع
اضغط على الصورة لرؤيتها بالحجم الطبيعي
رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »12:54 AM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي