السلام عليكم ورحمة الله وبركاته
يسرني ان اضع بين يديكم مااستطعت ان اجمعه
من القصائد كتابةً
لشاعر الكبير/ حمدان بن مناحي المقاطي
((علامة إستفهام؟كلمـه عابـره))
يابنت معجب فيك وانتي خابره=والأفضل ان الشك نقطع دابره
وفي قلبك ان كان الثقه معدومه=قلبي ليا من عاف محداً جابره
ان ما وثقنا في بعضنا يعني؟=علامة إستفهام؟كلمه عابره
وليا فهمتيها وقلتي عادي=صغرتي بعيني ولا انتي كابره
تلقين في دربك حبيباً غيري=يهز لك راسه ويفرك صابره
مشي عليه اللي يجي في بالك=وقولي له اصبر والحياه مثابره
وانا غنياً عنك يامزيونه=لو كان فيك الزين ربي زابره
احيا واموت وهامتي مرفوعه=ومادام قدري حي ماني قابره
وطبيعتي لا يمكن اغيرها=والدرب الايمن عارفاً معابره
أعطيتك المؤجز واظنه يكفي=والافضل ان الشك نقطع دابره
((الــــــهــــــا جــس))
بيني وبينك لاتضيع المواثيق=ان كانها ضاعة بلاش العلاقه
للطيبه نرقا بروس الشواهيق=ماهمنا صلف الهواء وأصطفاقه
والهاجس اللي دق بأقصى المعاليق=ماهو على حب البنات إشتياقه
شيً ليا دقق به الرجل تدقيق=شاف الخلل مثل السلوك الدقاقه
وعذره يقول ان الليالي توافيق=الله ولا بعض البشروالصداقه
ابشرك ماحدنا الله على الضيق=حتى لو ان الصبر علقم مذاقه
واغلا رصيد اللي بوسط الصناديق=وقناعة الرجال مبداء انطلاقه
وان كان عندك بعد وصلتك تعليق=حاول تمعنها بهدؤ ورواقه
وان بينت قدم الرماه التفافيق=حزن ابدوياً وخذة اغلا نياقه
والرزق لوهو في يدين المخاليق=بعض البشر يحسدك فنجال.ساقه
وقبل على قلبي مراسيلك تويق=اخوك يهديلك من الورد باقه..
((الردى عنه نظرتها بعيد))
قلت ياهاجسي وين القصيد=مد يمناك للي مدهـا
صاحبي قال لي هل ممزيد=وأنت قلي لعلك قدها
قال انا اضرب بسيفً من حديد=سلة السيف يعجب حدها
لايهمك مادامك مستفيد=والنوادرلأهلها عدها
وأبتدى الهرج والمعنى مفيد=مدها.قال دوك وشدها
كل فكره عليها مانعيد=مدة اللي بعدها يدهـا
قلت عينت علياء وابوزيد؟=سالفتنا هنا.لابدها
قال بس انت قول اللي تريد=قلت عشقي معرب جدها
والردى عنه نظرتها بعيد=ونظرتي للردى مألدها
حبها سار في وسط الوريد=وعانقتني غلا من جدها
قلت سبحان خلاق العبيد=يوم شفت العيون وخدها
ولين العود والعنق الفريد=وقذلةً كل يوم تكدها
والنحر مخملاً توه جديد=من دفع قيمته ما ردها
والنساء باسهن باساً شديد=مثلها كل وحده ودها
وحقها دون شرط ودن قيد=تأخذه مايوقف ضدها
ترضخ الروس للراس العنيد=من تماري تجي في سدها
والنهايه تبي العلم الأكيد؟=في خفوقي مسيطرودها
وقربها والله انه يوم عيد=والقصيده مأدور ردها
((اخاف يصبح حبنا مسألة وقت))
قولوا لعبدالمحسن أني توهقت=توهيقةًيأهل الهواء ما بعدها
توهيقةً منها إلى الحين ما فقت=والله لأروح أن مافزعلي بيدها
قولوا له أن القلب حب وتعلقت=وخوفي يكون الخافي أمر وأدها
أخاف يصبح حبنا مسألة وقت=والفاتنه توعد وتخلف وعدها
كانه تغير رايها ماتوفقت=والله ماتسوى حياتي بعدها
أنا عليها كل ماتطري أشتقت=سبحان من حط الجمال بجسدها
حوريةً لا طالعت في دنقت=وبعض العلوم تضيع وتقول عدها
حاولت أوقف قدمها بس ماطقت=يرسل نظرها أوامره وأعتمدها
وأن ساقني مع دربها قلبي أنسقت=لا ناشداً قلبي وهو مانشدها
لأني ليا عاهدت باموت مابقت=وهي واعدتني ما تغير وعدها
وأن ذقت من معسولها قلت ماذقت=مأرضى عليها أن البشر تنتقدها
وقمة سعادتنا ليا راقت ورقت=وفلت جدايلها وبين نهدها
وتحققت مني ومنها تحققت=هذا منى الارواح هذا سعدها
وأن قالت بشعرك لغيري تطرقت=قلت ايه شعري كل جمه وردها
لكن توي للقصايد تشوقت=لعيونك أقل برقها مع رعدها
يشرح مطرها خاطري كل ماضقت=ويشفي غليل أهل المحبه بردها
وأن كان ماعانقت حرفي وصفقت=خليتها مدفونةً في لحدها
واخر علومي فرحتي كان وافقت=وكانك رفضت يحلها اللي عقدها
((عذرنا منك وشهو يأول القبلتين ))
انتهى الصمت واعلنها وجرحي دفين=وانت ياصبرنا ليلك جليد وضلام
عذرنا منك وشهو يأول القبلتين=دام مافيه لارحمه ولابه سلام
دونك الروح اقدمها فداء هالحين=ليه بكره لعل ارواحنا للعدام
برفع الصوت بأسم القدس للمسلمين=واخذ البندقيه واحتزم بالحزام
واجب التضحيه بأموالنا و البنين=صف واحد نسوق ارواحنا للزحام
مستباحه على شانك دماء المعتدين=ذبحة ابن الحرام اكيد ماهي حرام
لعنة الله على الكفار في كل حين=شبوا النار في جسم الكهل والغلام
والنساءفالهن في كل الاحوال شين=بين نار إنتهاك العرض والانتقام
والارامل ينادنا بصوتً حزين=والمنازل على الاطفال راحت هدام
والصواريخ تقصف من يسار ويمين=وفي رجا الله لهم بالصبرخمسين عام
بالحجاره بوجه المعتدي صامدين=وان نخونا حدانا الذل للانهزام
مالنا ضلع في وقت المداحم متين=بين الضعف فينا مايبيله كلام
ودنا ودنا لكننا خايفين=والجمل طاح بالحمله ولعاد قام
والحقايق نغطيها ولكن تبين=والدليل العدى مشت علينا النظام
وأمرنا للإله معذب المشركين=في حماه الضعيف من القوي مايضام
ياإلهي تفرج كربة الصابرين=وانصر المسلمين اللي يبون السلام
((الله يلعن اللي كذب))
غيرت رايي وأنا كنت اكتب الأوله=لأن المشاريه جت بين الجفاء والعتب
والظاهر السالفه في هجرك مطوله=وان طولة قلت تبت يدك يأبي لهب
كان الثقه بينا للعكس متحوله=بريال ابيع الغلا الله يلعن اللي كذب
لافايده في غلاناوالخطاء بأوله=مصيري اتعب وتتعب والمسافه تعب
تعال للي يبيك وماتبي سوله=الروح تفديك لو الدم وصل الركب
غضبك من كلمتي لإرض الرضاءحوله=مابيك مثل الذي يبحث عن اتفه سبب
دامك مربيك شيخ فعوله مهوله=اكيد علمك للفزعات وقت الطلب
ولولا الغلاكان معك الهرج مأطوله=من يزعلك مايعرفك؟!ويخسى ويعقب
وصلتك ما جبتها منقول ومقوله=وعادي لو اكسيك من راسك للرجلك ذهب
وأن كان يرضيك اخاوي ناس متسوله=خذ راحتك شبها وانا ضلوعي حطب
((ابك انت ينهج بك عن كل حاسد خلا))
قالت تعرف الحلا؟قلت إيه كلك حلا=هو فيه غيرك حلا؟هذا هو المستحيل
وابشرك نحترمك ولك مكان وغلا=ونموت في غيبتك ونقول صبراً جميل
ابك انت ينهج بك!عن كل حاسد خلا=مألوم من في غيابك دمع عينه يسيل
وانا الذي في غيابك خاطري ماسلا=وانت الشفاء والسعاده والدواء للعليل
ياليتني بس انا وياك دوم قبلا=وليا تمسكت في عودك عليه يميل
عليك جاني بلا والشعرصابه بلا=والحرف مايشرب إلا الصافي السلسبيل
اذكرك واذكرعيونك دون كحل كحلا=واشوفك الصبح يفهق عن محياه ليل
وختامها ان رحت وإلا جيتلي ياهلا=وان قلت حبيت غيري قلت لك مستحيل
((قالت ؟؟علينا ؟! خاف ربك ياصبي ))
لقيتها بالسوق تفتر وتدور=وانا وغيري ما درينا وش تبي
ولدت وقالت لي نبي مصنع عطور=قلت العطور بفمك ياعنق الضبي
وذاب النظر فيها وهي جاها غرور=وانا بدون شعور قلت إلها أقربي
قالت هذا مجنون قلت بلا شعور=من ضمن ما قلته تمني وأطلبي
ماعاد افكر فالغياب ولا الحضور=ولإدري لو الحضار قالوا لي غبي
وبعد انتباهي قلت انا ما قلت زور=قالت ؟ علينا؟! خاف ربك يا صبي
قلت إعذريني قالت ابعد ومعذور=وخطيتي قلت امسحيها بشنبي
قالت ترى مأنته بجاهل بالأمور=وإن كان تبغاني تفضل عند ابي
قلت الصراحه ما حصل منكم قصور=ولا همني مالي وجهدي وتعبي
لكن حظي من دبوراً في دبور=إلياء طلبته فزعته قام يحبي
((اللي فعوله بس عند وخيته))
يا مرحبا بالهاجس اللي جيته=تبري جروحاً بالضمير اخفيتها
عرفت مقصوده وعارف نيته=وكثرة مطاليبه وانا لبيتها
قال القصيد وقلت اخذ حريته=ماتنطفي ناره إليا شبيتها
اركب المعنى على قافيته=ويطيب خاطرها ليا سريتها
واشوم عن كل البيوت الميته=واللي عليها وسم ماضميتها
عنها النظر فوق الجبال نحيته=وروس الجبال النايفه عديتها
وليا لقيت الصيد في محميته=ماتخطي البندق ليا مديتها
ما يفلس الرماي من مرميته=بأمر الولي من حيث ماحطيتها
والشعر جرحه ماله إلا كيته=عسى الجروح تطيب لاداويتها
وحقه علي اصب له بريته=اللي على جمر الغضى سويتها
ترتاح من فنجالها نفسيته=وعنه الضرم ينزاح لا صبيتها
والله ولا اطلب من بشر عانيته=ولاني من اللي ينتظر تصويتها
الفكر راعي ماتضيع رعيته=ويموت بالجزله وانا حبيتها
وصيت فكري واحتفظ بوصيته=وليا بناها الفكر ما هديتها
لقيت كل الزين في منقيته=وضحاً يقول اني عليك اهديتها
عطيته ما منها عطيته=يقول انا لاعطيت ما منيتها
وانا ذكرت من الكثير شويته=واللي عليها نقص ماضويتها
واطى على داب الطريق وحيته=للمجد سقت الرجل مارديتها
وقدر الرجال الطيبين مبيته=اهل الفعول اموت ماسبيتها
والشعر سيفه غير عن شبريته=ويفخر بشعاراً ينومس صيتها
واللي فعوله بس عند اوخويته=ياليتها سلمت منه ياليتها
((ترى هذولاك لاقومي ولاقومك ))
سمعت صوتك يناديني وانا نايم=قلت اه لبيه عجل عطني علومك
ماودي الصوت عني ينقطع دايم=مرتاح له ياعسى يومي قبل يومك
تبكيك عيني وعيني مالها لايم=وقلبي ليا جر ونه قلت مألومك
عن حب غيرك فديتك خافقي صايم=وان قلت له صوم عني قال مأصومك
متى بوصلك تجود وترحم الهايم=وتبشره ياقدوم الوسم بقدومك
وترد روحه من البياع والسايم=ترى هذولاك لاقومي ولاقومك
مادام الآرواح تفنى والله الدايم=تعال راضي بحكمك قبل مرسومك
انا غريق الغرام وموجه العايم=وارجيك في كل يوم وصرت محرومك
عليك صدق المشاعرطيرها حايم=بس انت نايم ولا أستيقضت من نومك
وان كان غيري بحبك حضهم قايم=معاد فكرت.في ماطرك وغيومك
((واوجودي))
واوجودي كل مالشمس هفت للغروب=وجد من شيب وتطريله ايام الشباب
والولد واحد وصايع ونصاب وكذوب=كل ماناداه رده عليه اكل تراب
منحرف عن طاعة الله ولا فكر يتوب=عاصياً ربه وناداه ابوه ولا استجاب
والبلى إنه بالخطايا على ابوه محسوب=والأبو ما يمرح الليل كان الابن غاب
يطلب الله يصلح الابن ويغفر الذنوب=ويعرف انه فيه يوماً لا بد من الحساب
ويذكر انه في شبابه على الامر مغلوب=بين جنيه للخطايا ونسيان العذاب
ويذكر انه طاوع النفس في كل الدروب=والحقيقه كل شيً مسجل في كتاب
وحس يومـ(ن) المصايب جته من كل صوب=وادرك انه كان جاهل ويطردله سراب
وقامت الدمعه على جفنه النازل تذوب=وسلم امره للبكاء والقهر والاكتئاب
والتوجد راس ماله وعنه احيان انوب=صرت مثله بالتوجد ذهاب بدون إياب
بس قلبي علته ما شكاها للقلوب=ولا طراله وإن طراله تعشاه الذياب
وان تعب من حرها قال هبي ياهبوب=وايده على قراره وهو عين الصواب
قلت خل السر في بير مانته بمغصوب=قال انا احرص منك مأفتح على الموضوع باب
قلت له تبي الحقيقه ترى لازم نتوب=والحسايف بعد مده لطراد السراب
((معونتي مهيب بشتاً حساوي))
يا مرحبا بالطير كله على شان=زيزومها وقت الحدى والعزاوي
فهد له الوقفات في كل ميدان=وخصمه على البيدى يطيح متساوي
من روس قوماً يوم صكات الازمان=تخضع لهم روساً وراها بلاوي
شجعان وان ركبواعلى الخيل فرسان=وقبلي روى بفعولهم كل راوي
ولانيب ناشد عنهم فلان وفلان=وبفعولهم مانيب جاهل وغاوي
ومدحي لهم واجب ولانيب غلطان=لأل المحيا المدح سيله نحاوي
ولاقلت فيهم قول من دون برهان=حبلي على الجمه طويل ورهاوي
وحتى القصيد اعطوه حقه ولاهان=وهذا فهد كنه لجرحي مداوي
فهد بمكتوبه رجح كل ميزان=كنه يذكرني قصيد العطاوي
لقيت فالمكتوب لؤلؤ ومرجان=وبعده تقول الذئب بالصدر عاوي
وتحركة معه القريحه مسيان=الله يكون بعون قلبً هواوي
فهد شكالي من هواء خدر الاعيان=ويبشر بعزه في جميع الدعاوي
بالجاه وإلا المال مانيب خسران=ومعونتي مهيب بشتاً حساوي
وان كان بالقوه هذا السيف شامان=اللي يجي للروس قدمه تهاوي
((الذكي يدريبها وإلا الغبي))
الزمن سيفه يسله والحياه صعيبه = ناصل الاهداف وإلا احيان ما نا صلها
كل ما فكرت في وضعي وفي ترتيبه = ضاعة علومي وضاعة فكرتي بأكملها
والحضوض إليا تردة للرجال مصيبه = والبلا يوم الرجال حضوضها تخذلها
رجل ما يسوى وتقبلبه ولا تقفيبه = خلته بين النجوم اللي محد يا صلها
ورجل يستاهل وذاق من الزمن تعذيبه = عزتي للي يبا العليا ولا حصلها
كل ما يسلك طريقاً قام يعوي ذيبه = وخلته دنياه تحت السافلين أسفلها
ان صبر ما يدري الايام وش تلفيبه = وهامته للناس لو يموت ما نزلها
وصار عند الناس عادي في رداه وطيبه = وعز نفسه سلعةً لا يمكن يبدلها
ودون وجهه يمتلي جيبه ويفضي جيبه = وفي رجاء الله وان لقا الايتام قال اكفلها
رجل مؤمن ماكتبله خالقه راضيبه = وان نخيته في قضيه قال عنك ازهلها
ما تحصل عنده إلا الطيب والترحيبه = يالله إنك قدمه البيبان لا تقفلها
والصحيح يقال والجمله لها تركيبه = والظروف تمر بعض الناس واتخيلها
وإلا انا والفضل لله لي مكان وهيبه = والعطايا من يدين الخلق ماستقبلها
والحياه دروس ودروس الحياه تعيبه = الذكي يدريبها وإلا الغبي يجهلها
((شرهة الغالي على الغاااالين))
هلابك يالغلا كله هلابك كل ماتطرين=على بالي وأحس بضيقة الفرقاء ولوعتها
هلابك كل ماقال الإمام ومن وراه أمين=هلابك كل مأقراء الفاتحه وإلا تبيعتها
هلابك كل ماتذرف دموع عيوني الثنتين=هلابك من بدايات الحياه ليا نهايتها
هلابك ثم هلابك لين حتى بالغلا ترضين=هلابك والمحبه في حروفي من بدايتها
هلابك كل ماجيتي وراح الصدر لك قسمين=هلابك كل ماسجت ضلوعي مع تنهتها
هلابك كل مأكتب فيك شعري واللحون تزين=هلابك والقصيده فيك وافكاري تبنتها
هلابك كل مأذكر شرهة الغالي على الغالين=هلابك عشق والنيه من البارح مبيتها
هلابك كل ماقلتي؟حبيبي هو مكاني وين؟=هلابك قبل طرحك لأسئلتك وقبل أجابتها
هلابك والمكان إليا سألتيني مهوب ثنين=مكانك في خفوقي والآوادم في مكانتها
سألتيني سؤالاً؟ماهضمته؟! ليه ماتدرين؟=أنا لعيونك الحساد ياعمري مسكتها
((عــلى عــمــاهــا))
نقطة قلم وإحساس شاعر ونقاد=والوضع في هذا الزمن غير عادي
وحبل الرجاء مازال للشعر ينقاد=وانا على الله تكلتي وإعتمادي
وشعري معديبه على روس الأشهاد=وإليا بغيت الدرب مانيب غادي
أعرف دروب المجد وسلوم الأجداد=أهل المروه والكرم والمبادي
قوماً لهم عقب المحادير مسناد=ومن الشمال إليا جنوب البلادي
أبناء الجزيره دون محصي وعداد=ماني مفرق بين خطل الأيادي
يوم السنين دهور وحروب وجهاد=قطعانهم ترعابهم كل وادي
واليوم ساد الأمن والخير يزداد=رحمه من المعبود رب العبادي
والحكم لآل سعود ماعنه نشاد=أهل السيوف المرهفات الحدادي
وشعري من الموروث ثم فيه ينعاد=ولا أسمعك ياللي للحداثه تنادي
وش عاد لو مانعرب الحرف وش عاد=الشعر يفهم فهم ياأهل الدوادي
ناساً تجيب العيد قدام الأعياد=والبيت كسره عندهم شي عادي
خصيتهم بالنصح لكن مافاد=على عماها مهتوين العنادي
وعلى العلوم العوج سرداد مرداد=وتلونت نياتهم بالسوادي
والآ دمي له غير الأصحاب حساد=وفي هذي الأيام كثر الجرادي
وختامها صلوا على سيد الأسياد=على الرسول المهتدي خير هادي
((غطرسة توني بلير))
لو جمعت ورود بستان الضمير=وجبتهالك ماكفيت ولاوفيت
انت عنهم ياملاك الحسن غير=وانت كنك بالمحبه مادريت
تستفزالقلب واسلوبك خطير=لين جتك أسرار قلبي كمبليت
وأبك لوا قلبي كبر قلب البعير=ماقدر أصبر عنك حتى لو جفيت
يعلم الله بالغلا مالك خشير=وكل ماتطري على قلبي بكيت
في فضاي تشابه البدرالمنير=أستمد النور منك ليا سريت
حطك الله في نظر عيني كبير=ولارأت عيني سواك ولالقيت
وأشتياق الشوق مقطوع النظير=رحمتك مادامني فيك إبتليت
ضمني ضمتك لإخوك الصغير=لعنبوا حيك تراني مستميت
وأعرف أن أسرارنا في جوف بئير=والعهد مكتوب وأنت اللي قريت
جيت لك وأنت الغني وأنا فقير=قلتها وأستغفرالله لو نسيت
جيت لك جية فقيراً عند أمير= في حماك أن متت عندك وأن حييت
لو تبناء غطرسة توني بلير=طاعتك هي غايتي وإبها رضيت
((بى شعرها والنحر لافكته ))
البنت هاذي بالجمال مسكته=جمالها حتى بنبرة صوتها
ان مابغة ترحم خفوقي بكته=والقلب يحياها ومر يموتها
حلالها قلبي ولوا مازكته=لعل موت القلب يسبق موتها
لبى شعرها والنحر لافكته=ولبى شفاياها تحت كبوتها[البرقع]
مادامها باب الغلا ماصكته=أصير في يدها مثل ريموتها
ومادام لو تمسك عدوي ذكته=لعيونها الحساد في تابوتها
ومادام من يهرج وراي تسكته=تشري حكم وأنا ولد بيلوتها
تابع
« آخـــر الـــمـــشـــاركــــات »
09-Mar-2009, 12:43 PM
ديوان الشاعر الكبير / حمدان بن مناحي المقاطي
العرض العادي
