اآه كـم ونـةٍ بالصـدر مخفيّـه=في حنايا من الأحـزان مليانـه

[رشيدالهديرس]

قصيده مؤثره جدا جدا ومن القصائد الشامخه اللي دايم اقراهـا رغم مافيها من حزن

آه كـم ونـةٍ بالصـدر مخفيّـه=في حنايا من الأحـزان مليانـه
عقب كانت حديث قلوب سرّيـه=ولعت جوف صدرٍ ثار بركانـه
يوم عديـت بالأقـدام عصريـه=فوق رجمٍ لـه الأقـدام طربانـه
رحت اغني واجاوب كل قمريـه=وفز قلبي كمـا طيـرٍ بجنحانـه
وهل دمعي كما همّـال وسميـه=لين راحت ثيابي منـه غرقانـه
يوم لديت في الـدار الخلاويـه=وشفت منزالنا فيهـا ومرحانـه
عشت لحظه مع احلامي الطفوليه=يوم كانت غصون العمر ريانـه
شفت نفسي بذيك الديـره الحيـه=طفل غرقان في لعبه مع اخوانه
نصنع من الخيال جمال وهميـه=مثل زمل البدو لاشدت اضعانـه
ثم نشعب جمال الوهـم طرقيـه=يوم تقفـي نغنـي ليـل يادانـه
كن ابويه يحقـق بالنظـر فيّـه=يوم اغني وانا اغني على شانـه
كني احس صوته مـن حواليّـه=واذكره واتذكّر ضحكـة اسنانـه
يوم يقبـل مـن ديـارٍ نحاويـه=رغم كل الشقا مايبـدي احزانـه
ثم يرمي بروحـه داخـل الفيّـه=وقبل يرتاح يزهم كـل ورعانـه
في عيونه لنـا نظـرات حنيّـه=تروي كبودنا لوكـان عطشانـه
ذكريـاتٍ تكـاد تلامـس يديـه=بعد مالامسـت قلبـي ووجدانـه
فرحةٍ عشتها لحظـات وشويـه=زهرة العمر واللحظات عجلانـه
كن ذاك الزمـان أحـلام ليليّـه=مابقا من كتابـه غيـر عنوانـه
فرقتنا ضروف الوقـت جبريـه=مات من مات واللي حي في شانه
فات عصر الصبا باحلام ورديـه=والطموحات والآمـال عجزانـه
مثـل منزالنـا وبيـوت مبنيـه=مابقا من بناهـا غيـر سيسانـه

للشاعر الكبير والقدير عبدالله الطلحي الهذلي