قصيدة حل النزاع بين قبيله عتيبه وحرب من الشعراء الكبارقاعد الحويقل وصالح وبن صخيبر

[خيال سمحات]

مساء الخير بعدي اطلعي في اكثر من منتدى سؤاء كان من منتديات حرب وعتيبه وجت ان قصائد الشاعر قاعد الحويقل و الشاعرصالح بن صخيبر لم تكون كامله او اخطاء املائيه اومعدله اوغيرها

وبعد بحثي جبت قصيدة قاعد الحويقل وصالح بن صخيبر من الشاعر / قاعد الحويقل لازال محتفظا بها

هاذي القصيدتان في عام 1404 حلت النزاع بين قبيلتين حرب وعتيبه الذي دم في حدود الثلاث سنوات
فقام الشاعر قاعد الحويقل الدماسي العتيبي بارسال قصيده الي قبيلة حرب ورد الشاعر عليه صالح بن فهد بن صخيبر الحربي(توفي في عام 1414 رحمه الله )

جزاهم الله خيرا

قصيدة الشاعر الكبير / قاعد الحويقل

الله من هجسا على القلـب مشتـب=شب الجحيم الى حطبهـا عريني
من شـد صاليهـا سناهـا تلهـب=سبـة هواجيـس تـروح وتجينـى
بأسباب شعـار كلامـة تعـاقـب=غنتبهـا الشـرطـان للسامعيـنـى
ياراكـب ستيـن جمس منـجـب=في كل واحـد صصممـو عابرينـى
مخليات البعد يدني على القرب= كن المواتر قدمهن صافطيني
ركابهن خطو العيال المهذب = مربية سود الحاء الغانميني
ما منهم ألي رد لتتن يشرب = ولا بعض أقوالهم تايعيني
عشرين للشرق وعشريـن للغـرب=وعشرين نية وجهكـم مشملينـى
أمنجبات بالرسايـل علـى حـرب=خـص الشيـوخ وجملـة الطيبينـى
وتريحو عقب المسيرة مـع الصلب =مستانسيـن وعندهـم مكرميـنـى
مجالـس بهـا رجــال تـرحـب=كسابـة للنـعـم دنـيـا وديني
ومد خطوط بالكلام المذرب=مضمونها يقرونها المهتجيني
يفتح مجال الزين وتغلق السب =ويرضون ء به لونهم زاعليني
في طيها عذرا على كل صايب = لا قايلين اقصد ولا راضيني
عذرا نبا زينه يحل المناشب =ولن ما به لا بة ً خايفيني
حتيش يلقصاد مع راعي الكلب = ان اطلقه ولا يكبه سجيني
خلو عواصيف الهبايب عن الهب = وكثر الكلام ألي بشين ً وزيني
مافيه داعي يحمل الضيق والكرب = ولا يستوي العقال والجاهليني
ولا كل من غنا با لالحان يلعب = ينقص بتعبيره عن العارفيني
شفنا عقول الناس في صفحة الكتب = كلا ً بعقله في كتابه يبيني
أزريت أميز كل صاحي من أجرب = إلا بعد نطحات عسرا ً وليني
حنـا شبابه بينـا داول ا لغـلـب=رب السما منشى حقـوق الغشينـى
يا مدبرنا ً أجموعكم من قسى الضرب= ويا ما علنا ونتم الفايزيني
على النظا وستجنبو قرح القب= مقفين ولا مثلها مقبليني
كم واحدا ً عن ماقفه ما تغيب = من دون حد حدودحهم واقفيني
وكم واحدا ً يمشي بعد ما صار يشعب =عشره في مقام الثنيني
وكم واحد بالمعركة طاح وأنكب = تعوده سبع الخلاء الجايعيني
عليه شهبان الذيابه تقانب = ومعيدات ً فوق مزد الهجيني
يوم أنها في حزت السلب والنهب= وقتا مضى لا عاد للمسلميني
ماني بله باغي ولانيب طالب= والوجب أنا ياعرب شاكريني
قولي صحيح ويعرفه فاهم القلب= ومسجله في صفحة الاوليني
الله يعز على الحكم قاضب = ألي جعنا بالبلاد أمنيني
ألي حكم بالشرع والسيف الأحدب= ولا عاد به مأخوذ ولا أخذيني
عقب ألقوامه بيننا العدل ناصب = وبنعمة الله كلنا مهتديني
اخوان واعوان على الدين واجب = والله يساعدنا على المعتديني
وصلو على ألي جاره الله من الذنب = نبينا المعصوم عن كل شيني
عداد وبل هله المزن وانصب = وارجع بدره عقب غبر السنيني

[وهاذي قصيدة الشاعر الكبير/ صالح بن فهد بن صخيبر الحربي رحمه الله

ياعني الي كـن فـى موقهـا شـب=والقلـب والله منكـون كيتيـنـي
أسباب قولن مـع سموعـى تسـرب=جرحه سطـى بالـروح ياعاذلينـي
لـولا جـواب اللي لفاني مرتـبي=يطول سهـرى والعـرب هاجعينـي
جاني كلام الطيب والمرسـل أطيب=مـن الحويقـل عـارف العارفينـي
نـوب اتسمعلـة ونوبـا تعـجـب=لين افتهمت مـن المعانـى يقيني
هذا وانـا قبلـة ضميري معـذب=انا احسبن أهل الوفـاء غافليني
واليوم طاب الكيف و أثني على الـرب=ماخليـت الدنيـا مـن الصالحينـي
حي الجموس اللى تجهز على النـب=عـداد مـاطب الحـرم محرميـنـي
اللى عليهـن كـل قرمن مشـورب=مرسال قاعد فوق راسـى وعينـي
يا هل الجموس اللى دفعهـن معـرب=تريضولي قيمـة الساعتيـنـي
تريضوا مقدار مـا يحمـس الحـب=ومهيـل يزهـى بفنجـال صيـنـي
كيفن لعكفان الشوارب مخضب = بزعفران وكيف لشاربيني
مع كبش مصلاحا غصيب مغصب = حق علينا واجب المشكليني
ولينتها قراكم طلبكم مزهب = اللي عنيتوله بحرز مكيني
خلوا ديللتكم على الجمس يركب = وتيسرو من عندنا غانميني
انتم لنا عزوت بني عم وأقرب = وحنا بعزوتكم بعد معتزيني
ومرسالي بطيب النشامى تطيب = من فوق جمسن يعجب الناظريني
ماوقفه عند المهندس يوضب = مختاره السواق من صفتيني
يشدي تمدري جادلن يوم تخطب = من طيب أهلها تعاند الخاطبيني
وليا اندفع مع سهلتن كنه السطب = عين الأسد بحظرت الغاصبيني
ولولا شبابه ماتحرك ولا تب = لكن زعلهم يقعد النايميني
لرجل واجبها وللخمس مقضب = لين يتبين لك بيوت القطيني
حروت دماسين سنا النار تجذب = تشعم لهتاش الخلى بالبطيني
و أنص البيوت وطبها لا تهيب = بيوت بها تعيش القاصريني
تلقابها رجال ترحب وترهب = لطامت العايل وهيف السميني
برقى وروق اللي بها الطيب ينسب = ألليلهم شيمه وعلم يبيني
ثم خصلي قاعد وخلك مؤدب = أحشم حشيمك ولا بربعه دويني
ثم قله الأسباب والي تسبب = ظلم نصيبه والعرب سالميني
وحنا عن القول ألردي أنتهرب =نسمع ولا كنا سمعنى الدنيني
ندري شعور معرب الجد والأب = حق علينا واجب المستحيلي
وللي لهم دقلات وأسبور وأسرب = منا ومنكم والعرب خابريني
ياما ازعجو في رأس رمحا ً مكعب = خلوه يارد مارد الهالكيني
ما باقن الاعلومهم يوم أحسب = وحنا على ميرادهم وارديني
والحربي الي صادله ذيباً أشهب = ما للعرب عنده مطاليب ديني
مفادين شمط اللحى لاتقضب = بكلمات تمليها تقاليد ديني
واضرب مثل يوم الامثال تضرب = مايستون أصابع كف اليميني

تقبلو تحياتي خيال سمحات

[أبن حشيان]

يض الله وجهك


اجتهاد تشكر عليه يالطيب ويحسب لك

والجز ل مايصيد الا الجزل الله يعطيك العافيه

تقبل مرووري

[الامير حريبيش]

الله يجزاهم بالخير كانو مفتاح خير مغلاق شر لاهنت ياصاحب الموضوع

[(مہودع دنہيأهہ)]

صحت الالسن .وبيض الله وجيههم على تهديت الفتنه.والله يجزاهم بالخير ويكتبها في ميزان حسناتهم.


والله يجزاك بالخير انت بعد يا أخوي على نشر مثل هذي القصايد والله يكتبها في ميزان حسناتك



تقبل مروري:ونتتضر جديدك


أخوووووووووك

[ياسر العطاوي]

بيض الله وجهك
قصائد في قمة الروعه
بس ابي اعرف وش سبب القصائد ليش كان فيه خلاف بين العتبان والحروب ؟؟!!

[محمدالنفيلي الحربي]

المشاركة الأصلية كتبت بواسطة ياسر العطاوي

بيض الله وجهك
قصائد في قمة الروعه
بس ابي اعرف وش سبب القصائد ليش كان فيه خلاف بين العتبان والحروب ؟؟!!

أخوي ياسر ماكان فيه اخلاف فيه واحد عتيبي الله يرحمه قصد قصيده بالحروب وردوا عليه بقصيده مثلها وهذا الخلاف الذي يذكر الله يرحم الميت ويطول في عمر الحي على طاعته

[خيال سمحات]

انا سعيد بمروركم لهاذى الموضوع اما بي النسبه لي سبب الخلاف ان واحد من العتبان

شافله ذيب في محطه مسجون في الشبك وسئل منهو الي حابسه فقال له هاذي حربي فقام بسب الحربي وقبيلته

ودار القصيد العصبي بين القبيلتين في حدود ثلاث سنوات ثم جائت قصيده قاعد الحويقل موجهه لحرب

لقوله ( خص الشيوخ وجملة الطيبيني) وجاء ابن اصخيبر ورد على القصيده فهدئت المشكله والحمد لله

وجزاهم الله خيرا الجزاء

[الشوردي]

هذي مهيب قصيدة صلح ولاهيب يم صلح

هذا قصيدة خوي يشوف وش في خاطر خويه مثل جس النبض عقب قصايد شعراء هجائيين والحويقل يقول

مافيه داعي يحمل الضيـق والكـرب=ولا يستـوي العقـال والجاهليـنـي

وخويه طلع رجال فيه خير مداه بعيد وهو الحربي وقال

وحنا عن القـول ألـردي أنتهـرب=نسمـع ولا كنـا سمعنـى الدنينـي

والرياجيل اللي فيهم خير ماتزعلهم على خوياهم وربعهم قصايد وهروج لاتودي ولاتجيب

وقصائد الهجاء احد اغراض الشعر وهي باقية ومستمرة مدام الشعر باقي ولكن دائماً العقلا متجنبين هذا الغرض ولايقدم عندهم ولاياخر لان الشعر مليحه مليح وقبيحه قبيح

آخر تعديل الشوردي يوم 12-Aug-2011 في 06:47 AM.

[خيال سمحات]

صحيح وكلامك ميه في الميه لكن هدت النفوس عقب القصيد الطيب

للمعلوميه هاذي القصيدة وقصيدة صالح بن اصخيبر القاها كامله قاعد الحويقل عن صاحب السمو

الملكي/ سلمان بن عبد العزيز وقله ها الكلامه الله يجزاك خير يالحويقل ويابن اصخيبر عز الله نه

القصيد الي في محله وكان الطراف موجيدين بعد ماسمعو القصيد وبعدها هدئه النفوس

.

[البحر المتوسط]

قصيدتين رائعتين



رحم الله الميّت واطال الله في عمر الحي على طاعته




جزاك الله خير يالطيّب على هالموضوع الطيّب