احديات لقبيلة عتيبة

[المنيفي]

السلام عليكم رحمة الله وبركاته

اخواني الاعزاء
اولا : امسي الجميع بالخير وانا ماني غريب على هالمنتدى لان سبق لي ان كنت عضوو وشاركت بالعديد من المواضيع
ثانيا : احي الجميع في هذا المنتدى من اداره ومشرفين ومراقبين واعضاء وتحيه خاصه ( لعين العقل _وابو فراس _وابن مشيب) لان سبق انا تناقشنا في مواضيع مهمه

وموضوعي عن الحداء
والحداء نوع من الشعر
ويقول ابن خميس ,, انه خاص بصهوات الجياد وهو لا يكون الا في الفخر والحماسه وحيث الكر والفر ,,

ويقول الدكتور سعد الصويان ,, والحداوي هي الاراجيز اللتي يهرج بها الفرسان على صهوات جيادهم وهم في طريقهم الى الغزو او بعد عودتهم منتصرين ويقصد بها ادخال الرعب الى قلوب الاعداء او بث الحماس في نفوس المحاربين وتحريضهم على الاقدام والاستبسال ,,


وقبيلة عتبية من القبائل التي كان لها صولات وجولات بين القبائل وتمثلوو فرسانها بالكثير من الحداوي على ظهور الخيل وسوف نذكر ما تمثل به ابناء هذه القبيلة واحب ان اوضح انه ليس كل من قال الحداء شاعر اي ليس شرطا ان يكون صاحب الحداء شاعر على سبيل المثال الملك عبدالعزيز بن سعود وعبدالعزيز بن رشيد ومحمد بن هندي وغيرهم الكثير
نبدا ذكر احديات فرسان عتيبة حسب ترتيب الحروف الابجديه

احدية الشيخ والفارس تركي بن سداح بن سيف بن محيا من السوافر من الحناتيش من طلحه من الروقه فارس مقدام قتل في اول سنة 1323في وقعه بين بعض جماعته الحناتيش وبين ابن رشيد

ان كان شجعى مارمت عبدالله=والا مع الساير تروح
ارمي عشيرك ياظبي الخله=لو كان حماي اللدوح

احدية تركي بن صتهات بن حمد بن حميد يقول عنه المؤرخ العبيد وهو يتحدث عن ابناء تركي بن حميد ,,, وتركي وهو ابوهم فناهيك به فقد جمع بين الفروسية وبين الكرم وبين الاشعار الفصيحه والدين و الوفاء بالعهود والمحافظه عليها وبين الشيمة ونزاهة العرض ويعدل ذلك كله التوحيد الخالص فهو من خيار الرجال رحمه الله وقد توفي سنه 1280 عند جبل صغير يسمى سناف الطراد عند جبل ضريه البلد المعروفه بأعلى نجد وكانت قتلته تشبه قتلة بسطام بن قيس الجاهلي من بني شيبان فقد كانت خيل تركي تطارد خيل مطير من ذلك المكان وكان يوجد من بينهم رجل مختل ومشهور بضعف العقل قد وجد له فرسا غاب عنها فارسها فركبها فلما رأه تركي احتقره ولم يعره اهتماما وصرف عنه وجهه الى خيل اعدائه فانتهز ذلك الرجل فرصة غفلته فطعنه في عصبة رجله وهى تسمى المشتده فكان فيها حتفه ومات في اليوم الثاني وكان رحمه الله يزاحم قحطان وحرب ومطير ولا يخاف ولا يكترث من اعدائه لو كثروا ,,,,

ياواصلين جمل=لا يركب المثبوره
يذكر ليوم القرنه=يومن تحوم طيوره

المقصود جمل بن لبدة شيخ ال سعد من قحطان
وله ايضا

قد الضعن يامشرع=لي هبت الهيفيه
من له فرقن يبيعه=يبيعه على .......

مشرع هو جد ماجد بن خثيله المقاطي

احدية الفارس جهجاه بن نادر بن ثقل الهريفي والهرافا من الملابسه من الدعاجين وهناك من ينسبها للفارس بادي بن كامل المقاطي

وادي الرشا جاله يبا تبريش=عيى جنابه يقبل الحصنان
الطير ينقب عين ابن درويش=وان جاع نرمي له من الدوشان

الحصان : من شيوخ حرب
ابن درويش والدوشان : من شيوخ مطير

احدية الفارس حمد بن سحمان من السحامين من الشيابين

واهني من هو قدم حل الشيب=من طارد الغلبا على الزلبات
ارب والينا جيب عضيب=سداد زبن الجاذيات

الغلبا : قبيلة سبيع
عضيب : فالح بن مسيلط من فرسان القريشات من سبيع ويقال انه قاتل حمدان من السحامين وقتله الفارس قراش بن جعاري من فرسان المقطه المشهورين

احدية الفارس دجى بن سعدون من الربقه من الملابسه من الدعاجين

وضحن ترجى فزعة الرديان=ياربعنا عزالها
قطعاننا ترعي حمى جمران=ومهارنا تبرالها

احدية الفارس دحيم بن سعيلي من الفهيدات من الشيابين

يارجلي اللي في حصا التسرير=من دون سبلا خيرة الخلفات
يارجلي قدامك جهز ومنير=ووديد حامي الجاذيات
المعترض خلي عشى للطير=خلي عشى للحايمات

ذكر المؤرخ العبيد وقعه مع الغييثات من الدواسر قتل فيها خدر بن سعيلي وصوب دحيم حيث كسرت رجله وانتهت الوقعه بأسر غزو الدواسر وهم اهل ثلاثين فرس وثمانين مطيه
جهز : جهز ابن هذال ووديد: الجلاوي من الفهيدات

احدية ذعار بن مشاريبن سلطان بن محمد بن ربيعان

ياهل الرمك زيدو لهن فالمقام=ثم عاد يالمداد لا تشري شعير
قرصن على صاج سقي بالايدام=يزيد فى المرواس والابهر كبير
حنا حمينا نجد من علوى ويام=وش رهبنا معبول هو ويا الصعير

وله ايضا

ياللي تمنا سربة العتبان=ابشر بهم علمن وكيد
خيل تنازى فوقها فرسان=وبايمانهم صلد الحديد
مع دربهم عينت ابن شوفان=وحسين حماي البليد
البل اخذناها من الحيطان=حفنا الودايع والمعيد

احدية الفارس ساري بن مريف من الخلد من ذوي قاسم من القثمه وعن مناسبه هذه الاحديه ذكر انها قيلت بعد وقعه دارت بين القثمه (الخلد) وبين العبادل من مطير على رأس ابن جبرين وابن سقيان من شيوخ مطير وشجعانهم الا ان الوقعه كانت للخلد على مطير

يامطير ما جيتو بيوم سعود=للبل علانا واجبن نديه
حنا جنبها باشهب البارود=كم فارسن من دونها نرميه

احدية الفارس سند الملقب ابا الخيل من الشيابين

احلب لها عدولة الورعان=ام المقاري الشايبه
بكره اليا صلنا على السبعان=كلن يدور غايبه

احدية الفارس سويحل بن سميٌح من العلابيه من المقطه

انا ونوشه كلنا عرجان=يالله لا تقضي الوحيد
ياذود راعيتك من الخمجان=يبا مفا لله بعيد

وله ايضا

جبناك ياذود الطريسه=والخيل دونه مرزيات
كلن نقص من دون قيسه=وين العلوم الاولات

وجماعته الفارس هم سويحل ووهاطان وعبدالله وتقول شاعرة من احدى القبائل

انا ما اريد الجذعان=الا انت يابن سميٌح
انا هواي وهاطان=شق الطراد مديٌح

احدية الفارس شارخ بن معجب بن بارود البراق من الحصبان من ذوي ثبيت من الروقه

تكفون ياجذعان روقن وبرقا=عانو جوادي مع بني عبدالله
نبي علاا نحتمي الزرقا=والا نقرب حلة من حله

وله ايضا

ياحرب دوكم نجد فلوو فيه =................................
وادي الرشا يبكي على راعيه=مسلط اليا شب الحريب النار
ياما طرحنا في طرف واديه=من واحدن كلاه ذيب الغار
............................=.........................

مسلط : مسلط بن محمد بن ربيعان

احدية الشيخ الفارس شبيب بن بادي بن حجنه من ذو مفرج من النفعه

من عيٌن العفرا الشقاح=الي جرسها له دنين
ذبت طويق مشيها صوفاح=تمشي وتجرع بالحنين
ياليت من واجه عندها كوكاح=انا وربعن مستحين

كوكاح لقب شجاع بن منيف بن قويد لانه كريم عين
وله ايضا

حنا ذبحنا عيال ابن شمعول=على القليب مواليه
كله لعين الفاطر الزعول=ترعى الرسوم الخاليه

عيال بن شمعول من قبيلة سبيع
وله ايضا

وضحن تهوم الخد هوم=وانا على ابرالها
لى طالعت سبار القوم=تتكل على خيالها

وله ايضا

ترى الوعد طخفه وابا الحيران=انا كان راسك فيه زود
والله لتركبها بدون اعنان=وتخطي مصاريع الهبود

وله ايضا

لي سايقن تسبر نجوم الليل=تبغي الحرايب سرمدا
اخذ الدبش جرعان قدم الخيل=والرزق ساع انه بدا
تبا خشوم عريقيه والريل=وتبى مراة وثرمدا

احدية الفارس شامان (شويمان) بن مبارك بن مدغش ابا الجلادا من الجلاة من العصمه

واد الرشا ماهوب لحدن من قديم=ياكود من ساق الجمل ثم احتماه
خلوه من عقب القسابني مضيم=نطرد شرايدهم لصبحا والحصاه
عنه الدويش محدرينه للقصيم=ماهوب حربي نفخ ذربه يباه
الحر الاشقر نتفوا ريشه عصيم=وذبحت شيوخه يوم ربي ما هداه
في راي ابن هندي عسى عمره مديم=وحنا كما طير كتف عقب مهواه

وله ايضا

كلنا دولة على سلطاني=والهنيدي يوم قام اوزانه
ارجحوا بالعلم للحمراني=والشفيعي راجحن ميزانه

وله ايضا

سلام يا شيخ القبيله=ياحاكمن حكمه عدال
الحرب حنا اللي نجي له=يوم الرشا ركب المحال
بقومن كما سيل المخيله=يحز من جالن لجال
وجموعنا دايم ثقيله=وتهد نايفة الجبال

قيلت في مناخ النبوان
والمخاطب الشيخ محمد بن هندي بن حميد

احدية الفارس شليويح بن ماعز من المهادله من ذوي عطيه

تضرب بالاربع كل ابوهن صف=المهرة اللي بالرسن مطواع
ان قامت اطراف الجموع تصف=في ماقفن يوم العمار تباع

احدية الشيخ الفارس صنيتان بن شال بن متاعب الضيط من الفداعسه من العضيان

صفرا تزعوق من تحت راكبها=تجفل ليا ما ناشها السروال
المرجله عسرة على طالبها=ما كل من ركب الفرس خيال
ترعى بنا العرا على طايبها=وترتع بنا الواد المغر ان سال

احديه للفارس طاحس بن شعف بن مشنوطه من العضيان

يادارنا لا ترهبين=اقفاينا اقبال علاك
جلوى ورا ما تفزعين=يوم الحرايب جت وراك
برقا يحمونك من يمين=وحنا من الشام نحماك

وله ايضا

ياليت خلي شايفن بالعين=يوم ابن هندي دفع مركيٌه
حنا ذبحنا جيشهم واثنين=غير الصويب اللي تشل دميه
نعمن بربعة ناهس الادنين=هاك النهار وحزة العصريه
لى قلت راحو وادبحوا مقفين=ياسرع ردتهم على المنقيه

ناهس الذويبي شيخ بني عمرو من قبيلة حرب

احدية الفارس ضيف الله بن تركي بن حميد الملقب بالعفار

بدلت انا حم الرمك بحصان=بدلتها بولدن جموح
ابي اليا جا لرمك ميدان=عليه ارخص كل روح

وله ايضاا

حنا حمينا نجد بالعيدان=من فوق قبن كنهن الصيد
ما عندنا في باقي البدوان=لو سندوا يبرون لابن فهيد

احدية الشيخ الفارس ضيف الله بن زايد بن رجا بن مرزوق بن مسفر بن عميرة من ذوي يعيش من المغايره من ذوي عطيه واحد من ابرز فرسان عتيبه في عصره

ياهل الرمك كلن يجيب حداه=حاذور من خوض الكلام
كل يمد بسابقه يمناه=والبل ورى ريع الجهام

قال عنه العبيد ,, كالنجم الثاقب يدعي ضيف الله بن عميره وكان شنها شجاعا فارسا لا يفتر من المغازي ابداا فكان اذا اراد االغزو وعلمو به رؤساء عتيبه لم يتخلف عنه احد منهم لتوفيق حظه فقلما يرجع مفلساا في كل غزواته وما يروي لنا انه في بعض مغازيه غزا معه شيوخ من عتيبه منهم هذال بن فهيد وكان اكبر منه زعامه ومقاما وغزو معه صنيان الضيط وغزا معه صايل الخراص وغيرهم كثير وله ايام مع حرب منها العرفجيه والبعجا
وقال عنه المؤرخ ابن بليهد ,,ضيف الله بن عميره الفارس المشهور والعقيد الجرار للجيوش واورد له ابن بليهد قصته مع الشيخ الفارس خزام المهري رئيس الدغالبه في تنافسهما على المروءه والشجاعه عند ابن مسعود راعي الشعراء وجاءهم محمد بن خالد بن حميد ورضوه حكما بينهم فحكم حكما ارضى الطرفين
وذكر ابن بليهد خبر مقتل الفارس بن عميره على اثر لحاقه بابن وهق بن سقيان من شيوخ بني عبدالله من مطير ودفن عند هضاب الصقار قريب من بلد ضريه

احدية الفارس عايد بن تايب من الغزايله من البصصه من المقطه

نركب على الصفرا ام شامه=ونوحد الرب الجليل
في ظل لباس العمامه=عبيد لهاب الذليل

عبيد بن تركي بين حميد قتل سنه 1304هـ تقريبا

ويتبع هذه الاحديات حداوي غيرها في صفحة اخرى انشالله
وسلامتكم

[ابن مشيب]

وعليكم السلام ورحمة الله وبركاته


اشكرك على هذا السرد المثري والرائع يالمنيفي , رحم الله حداتها , وحياك الله من جديد , وفي إنتظار إبداعاتك , ومشاركاتك المثرية



تحياتي

[المنيفي]

مرحبا يابن مشيب ومرورك اسعدنا طال عمرك

[ظافر الجنيبي]

سلمت يا المنيفي

[المنيفي]

الله يسلمك يا ظافر ومرورك اسعدنا

[راع العرف]

الاخ المنيفي
السلام عليكم ورحمة الله وبركاته
مشكور على الموضوع ونعم بعتيبه وشيوخ عتيبه
وصح الله لسان الشعار ولكن لي تنبيه بسيط
ارجوا ان لاتأخذه بحساسيه ............................
أنت تقول :
(( وادي الرشا جاله يبا تبريش //عيى جنابه يقبل الــــــــــحصنان
الطير ينقب عــــين ابن درويش // وان جاع نرمي له من الدوشان
الحصان : من شيوخ حرب ))
وهي : الحصنان .. كما هو موضح بالحداء والحصنان ليس من شيوخ حرب
وإنما فخذ من حرب يقالهم الحصنان ,, هذا ماعندي واكرر شكري على هذه
الاحديات الشجاعه الجميله وقول وفعل عز الله ........
تحياتي
راع العرف

[المنيفي]

الاخ راع العرف ونعم بكل القبايل و حياك الله وسعدنا بمرورك
واشكرك على التوضيح وانما كلمة الحصان زلل مني بالكتابه طال عمرك انا اقصد بالحصنان

ولاهنت على التوضيح اخي الكريم

[ابن الاجواد]

المنيفي

بيض الله وجهك على الاحديات

[المنيفي]

ومن يقول يابن الاجواد ولا هنت على المرور

[ابو فراس]

لا هنت يالمنيفي موضوع جيد , مع انه سبق ان ذكر في المنتدى , الا ان موضوعك به اضافات جميله
ويبدو لي انك استفت من كتاب الباحث الكبير / تركي القداح
تحياتي وتقديري