حـــــــذراك من بعض المخــــــــاليق حذراك......

[نسيب امطير]

قصيدة نبطية رائعه واكثر من رائعه ولا اروع قمة في الابداع وذائقه شعريه رائعه للشاعر الجزل / راشد بن ناصر القحطاني
من زمرة الطاغوت حذراك حذراك
لا تبتلي بجروح يصعـب دواهـا
وإلى مشيت اعرف دروبك وممشاك
احرص على نفسك وخالف هواهـا
أمّارةٍ بالسوء مـا هـي بتنهـاك
اقبض عليها لين يجلـى صداهـا
اقطـع نواياهـا بدينـك وتقـواك
هلّـل وعنـد الله سريـعٍ شفاهـا
والعين لا تنظر بهـا مـن تعـدّاك
المحصنه لو تلتفـت لـك وراهـا
اصبر على همّك وغمّـك وبلـواك
عـف وتعفـف لا يغـرّك حلاهـا
واترك حرام القوت ما هو بيمـلاك
كل البطون الجايعـه مـا ملاهـا
رشفة حلال اتسد جوعك ومضماك
تسوى مشاريب الحـرام وغثاهـا
النار في جوفك وتصلـى حنايـاك
نار الجحيـم تزيـد للـي وطاهـا
واحفظ لسانك لا يجـرك ويبـلاك
اخذ الثمينه لـو غلـى مشتراهـا
الهرج ميزانك ويكشـف خفايـاك
كلمـة تعيبـك لا تبيّـن نبـاهـا
صون الكلام وصون نفسك ومبداك
للنفس حشمـة لا تفصّـم عراهـا
اصمت مدامك عارفٍ سير مجـراك
لا تنقـل النّمـة وتبحـث خفاهـا
يزول قدرك عنـد أقـرب دنايـاك
لو هو ولد عمّـك حياتـك جفاهـا
واحلم تراه الحلم يرفـع مزايـاك
هو سيّد الأخـلاق هـو مبتداهـا
وصّى به المبعوث ما هو بيخفـاك
شفيعنـا يـوم المـلاقـاة طــه
خل الجهل لا تجعل الغيظ ياطـاك
ترى الجهل سم القلـوب وعماهـا
وإلى ابتليت ارفع إلى الله شكـواك
لا بدّهـا الأيـام تكشـف غطاهـا
اصبر يزين الحظ ويزيـن مرمـاك
الله يفرجـهـا ويـدفـع بـلاهـا
لا تمنع المرحوم لا مـن تنصّـاك
الناس لأجل الناس وأحسن عطاها
ابـذل لوجـه الله والله يـجـزاك
مثل الغروس اتطيب للـي سقاهـا
لا ضاع معروفك ولا ضاع حسناك
إن كانـهـا لله تلـقـى جـزاهـا
جارك ولو هو جار تسقيه من ماك
عليـه لا ترفـع يدينـك عصاهـا
أحسن جوار الجار لو كان يشنـاك
ترى العرب تحشم كلاب اقصراهـا
بكـره يشـد ويكتـب الله فرقـاك
عساه يذكر جيرتـك مـا نساهـا
الظلم شين ويجعل النـار مثـواك
راع الظليمه عيشتـه مـا هناهـا
فوقك إله العـرش عالـم نوايـاك
ينظر قلوب الناس وش محتواهـا
يسمع بما تجهر وعارف خفايـاك
بأمره شروق الشمس ترسل ضياها
هو عالمٍ غيبـك وركّـب خلايـاك
هو خالقٍ فيك العـروق ورواهـا
والضيف له حقٍ إلى حل بحمـاك
قلّط ضيـوف الله وأكـرم لحاهـا
لا تحقر الضيفان واتشـح بغـذاك
من ما عطـاك الله قلّـط عشاهـا
وعليك باللي حزة الضيـق يفـداك
لا شانـت الدنيـا ودارت رحاهـا
لا من زهمته لو على الموت لبّـاك
عيني لجل عينك وروحـي فداهـا
ترى الخوي نبراس روحك وملْجاك
لا كلّحـت بقعـا وزادت غثـاهـا
حذراك من بعض المخاليق حذراك
بعض العرب ما تفرقه من نساهـا
تايه وضايع بيـن ذولا .. وذولاك
فيـه الجهالـة واصـلٍ منتهاهـا [/b][/color]
منقوووووووووول
سلام بن ملافخ

آخر تعديل نسيب امطير يوم 13-Feb-2011 في 03:22 AM.