الشاعر الكبير /كديميس بن صالح العصيمي

[آل رداد]

مشكور على النقل الجزل
وصح لسان الشاعر الكبير كديميس العصيمي
اللذي دافع عن قبيلة عتيبة ضد اي شاعر من القبائل التي حاولت الانتقاص منها بشعرها
وهو شاعر دفاعي بارع له صولات وجولات تبيض وجهه
نشكره ونكن له الاحترام والتقدير

واتمنى تكريمه في مزاين عتيبة

[الرتوعي]

مشكور يا ابن العم مشكور

[ابن الأجـواد]

صح لسان قايلها وناقلها

بدون قصور في الشعراء يكفي كديميس قصيده المعروفه ومنها :

ندري ان ماقدامنا مزرعة تين ,,,, لكن على رؤوس الافاعي وطانا

اللي لو ماقال إلا هي تكفيه طول عمره وهذي ملحمة لازم كل عتيبي يحفظها .

[راع العوجا]

الشاغر كديميس مايحتاج وقصائده تتحدث عنه

[البعيـد النـايف]

	ممكن سوال يا ربعي عتيبه ليش في اول صفحه من موضوعك طولت في كلمت الهجـــــــــــــــــــــــاء ليش ماخليتها نفس طول المدح والفخر والرثاء اذا كان تقصد انه اشتهر بكذا ففعلاً انا اوافقك الراي ما فيه عتيبي ويمر عليه اسم كديميس العصيبمي إلا يتبادر لذهنه قصائد الهجاء لانه اشتهر بها وإذا كان قصدك انه يبدع في الفن هذا فانا لا اوافقك لان له قصائد اخرى في الرثاء مثل القصيده اللي اوردتها وهي جزله وارجوا منك التوضيح لانه يهمني شخصياً مع تحياتي

[سعد بن مطلق المقاطي]

سر يالقلم ننقض كلام المحامين= لصارت الدعوه حمايا حمانا
نقض الحجج لابد له من براهين=ومعنا شهادة الوفا لدعانا
ومن مدنا بالصاع نجزاه صاعين=واللي ياعادينا عليه اعتدانا
كان الحميدي(1) وازملاه متصافين=على الحكي فيما ما تقدم حكانا
تلحقوا غارات ناسٍ قديمين=واخطوا وحنا من خطاهم خطانا
ودام الشريعه تاخذ العين بالعين=حنا ما تقضي الشريعه قضانا
حنا بميزان المعاني ثقيلين=وعلى مماشينا بعيدٍ مدانا
هيهات لو حولت عكس الموازين=قضا القضا فيما مضى وانتهانا
ياحرب لو حطيتم البيت نصفين=ماهوب موصلكم ليا مستوانا
انتم رجال بالمعارك غثيثين=لكن ما تلحق اخطاكم اخطانا
حنا عتيبه ملحقين المخلين=بعنا بسوق الطايلات وشرانا
قومٍ على صولات الايام ضارين=لو عضنا ناب الدهر ما قوانا
يهابنا الطماع لو قلبه اذهين=نبطش محلات الطمع لاغزانا
لنا سلوم غاليات المثامين=سلومنا محدن حملها سوانا
في سلم لوماء الوجه عام وشهرين=وابخيلنا مامون داخل حمانا
ثلاثماية يوم تزداد ستين =تنحا المنايا عنه هيبة لحانا
ومن حده الموت الحمر والديايين=تخير الحصن الحصين ونصانا
وبالحين نملى فارغات الموازين=جيب الصحون ومكرمات الصيانا
للضيف والجيران والمستحقين=إليا من وهاب العطايا عطانا
ابيوتنا للضيف مثل البساتين=يفرح به الملهوف ليلة ضوانا
نجود بالماجود بالعسر واللين=وضحك الحجاج وما حلا من نبانا
حنا على حفظ المواجيب حرّصين=مانعطي الطرقي قراطيع مانا
والجار له واجب وحنا وفيين=ندعيه للكرمه ولو ما دعانا
جيرانا دايم حشام وعزيزيين=وندرا شرفهم عن كلام اسفهانا
حنا بوجه الجار دايم جديدين=يزيد مع زايده اثنينه وفانا
وان جاء نهار المعمعه واللغا الشين=نبيع غلا الروح دون اقصرانا
وان راح نشدق قفاه بسكاكين =نحمي مجاله عقب عنه انتحانا
وخوينا لو هو من اللي معادين=يأمن بنا في كل درب مشانا
ليا عودة عشر اكثر الناس ثنتين=وصاروا بغرات الخوي عقربانا
ولصرنا مع الخوي بدرب متخاوين=نرعى الحقوق ولانخون خويانا
وحنا منازلنا ورا حضن ويمين=هاذيك ديرتنا فيها نشانا
وجينا نبا المرباع عند القحاطين=يوم الزمان بحد سيفه حدانا
وقالوا لنا ما تاسع الدار شيخين=ونجد العذيه تحت فيت عصانا
وتشاوروا طلقين الآريا الحكيمين=احدٍ ومر بالحرب واحدٍ نهانا
واحتار من يختار بين الأمرّين=اما الدهر ولا سيوف اقبلانا
وتقرر المحدار بالخط والقين=نمراً فأولها يرفرف لوانا
وندري ما قدامنا مزرعة تين=لكن على روس الافاعي وطانا
زحنا قبايل نجد عن نجد قسمين=وجينا بمثنات البلاد وبنانا
ابيوتنا كالقور بين الحديثين=وعلى السنام من البلاد استوانا
وأعداينا ما هم عنا براضين =لكن هابونا جميع احددانا
لشبت الهيجا بصوت المثارين=صديق عينك مايجي في نحانا
وليا ركبنا فوق مثل الشياهين=تكره صناديد القبايل لقانا
عاداتنا نخلي سروج المسنين=وأول موردت السهوم اومرانا
ليا اقبلوا من الخيل قدم المغيرين=وليا اقبلوا صاروا حماه لقفانا
حمّاية الساقات فالمقلين =باموالهم يرفون فقر فقرانا
وليا جاء الامر بين القبيلة حليين=حلوا مشاكلنا وحازوا رضانا
وان جاء الامر دولي زحول وميامين=عند الدول فالمعضلات اسفرانا
ومن كان ذا شانه يشيل الثقيلين=لو مات حي في قلوب حربانا
لو مات قالوا حرب ذا فيه روحين=يمكن قحص من وسط قبره وجانا
وبعض أُمراكم فالملاهي مغنين=على الوتر والعود دانا لدانا
مر مغنين ومر مساجين =وظهورهم ميدان للخيزرانا
متخلفين ينقلون العناوين=وركن التعارف سجلوا له ديانا
ولو سمعوا لعذال يقول غادين=قالوا نموت ولانبيع اخدنانا
الفرق واضح لاتقولون متساوين=ومصادر التاريخ منها ارتوانا
اذا ازعلكم التاريخ نكون راضين=يصبح زعلكم شعبةٍ من رضانا
ومناخ عرجا كان عنه متغاضين=حنا لتاريخ القبايل قرانا
قبيلتين لحربنا مستعدين=وحنا ليا زلزل رعدهم رسانا
وطبان وصنيتان(2) شفقوا شرهين=وحنا قبل يبدون فينا بدانا
وبعد مناخٍ دام خمسة وعشرين=احدٍ سرى بالليل واحدٍ احترانا
واللي قعد سوى سوات ام ظرفين=ويقول لو إنا درانا سرانا
يقول خلونا بعرجا وحيدين=ياليت هاديهم كذلك هدانا
دون المعقل كافحوا مستميتين=لكن في هم بالمهند سطانا
وخفوا وهفوا وادبروا مستخيفين=وحنا لما تملك ايديهم حوانا
اللي حضر من حرب باتوا ذليلين=واللي ربض عن لابته وش علانا
اللي هرب واللي لجى مستجيرين=واللي جضعناهم وراحوا عشانا
واميرهم ينخى بتالي المقفين=ويقول رده لاتخلوا نسانا
وعقب ما شاف انه كسير الجناحين=ألقى السلاح وصار ضمن أمنعانا
وبيته جلسنا فيه بين الصلاتين=وعلى اشداده باليسار اتكانا
وكشف قمرهم وسجدوا مستغيثين=وطبوا من السلم وحنا رقانا
صارت عليكم مثل نكبة فلسطين=من نار(3) قال الحمدلله نجانا
وابن نحيت حجاب بين المثارين=ثارت عليه بمعتلجهن رحانا
ينخى بني سالم وهم عنه مقفين=وخاب الرجا فيهم وعود نخانا
وجسمه تشارك فيه شلفا ورمحين=وشلناه وسقان نحيت في دوانا
وحزّن على ربعه وربعه حزينين=عليه يوم انه ألتوى في ذرانا
والحرمليه كونها يالمساجين=منتم في هاك النهار اقبلانا
لكن قابلنا صعوط المجانين(4) =الضيغمي جمع علينا عدانا
رخم الجموع اللي تسوق الملايين=وانتم عدتوا فزعته ياحلفانا
نفذ على كل القبايل قوانين=وانتم خضعتوا له وحنا عصانا
هدر جمل شمر وقلتوا مطيعين=ويوم إن حنيتوا للامر ما انحنانا
لنا عزايم تفدح الخصم وتهين=طنا الطنايا مانقص من طانانا
حصل لنا صولات وايام وسنين=نسقيه بالسم الذحاح وسقانا
وكم راس شيخ طاح بين الفريقين=نحط من فوق اذبحاه اذبحانا
وأنكف عقب ماشاف في جلده البين=هو مأيسن منا وحنا اكتفانا
وممكن قضيتوا من بعض دينكم دين=وحنا عقب عدة ليالي اقتضانا
وعبدالعزيز اللي رفع راية الدين =اللي ليا خم النشيط يتوانا
اللي تخاضع له رقاب الفراعين=من هيبته كلٍ يريد الأمانا
بالسيف صارعناه وسط الميادين=وانتم تخامرتوا سوات السمنا
ماعمرنا نذعن لحكم السلاطين=ألا بيومٍ ينتصر به حدانا
انتم كما شغل الهنوف ام وجهين=اللي لها مع كل عاشق ضمانا
توعد ولا توفي بوعد المحبين =ودايم تشبرق للجديد وتدانا
ليا شفتوا الحاكم نهضتوا خفيفين=وقلتوا ترانا ياسندنا ترانا
اسمع كلام الضيغمي وافهمه زين=فالحربي اللي نار عنه ونصانا
منتم بذمه والحميري مخيفين =من حرب نار والتقوا من ورانا
ماجالهم من حرب فزاع ومعين=كلٍ يقول من الضياغم بلانا
وحنا حميناهم بحدب العرانين =وشالت حمولن ضاهدتم ايدانا
وعن مانقوله حرب سمعوا دارين=ميرٍ فيهم من يحب المشانا
وان كان غاوٍ البنيدر وابوعين =الشرق الاوسط معترف ماغوانا
اخبارنا قد هزت الهند والصين=ولا همنا الهيس العور لو هجانا
ولو كان فالاعلام ضمن المذيعين=الباع قاصر والطويل اللسانا
عن الدعاية يا الحميدي غنيين=افعالنا تشهد عليها اعدانا
وقولٍ نقوله ثابتٍ بالدواوين =وتاريخ نجد المعتمد مانسانا
ايام عرجا قد عطتنا نياشين=وفي ايام معتق يشهدون اعتقانا
العفو عند المقدره للكريمين=وحنا ليا منا قدرنا عفانا
وكان الحميدي جاء مطية شياطين=لو يشعبونه ما لحق منتهانا
وان كان له خمة رخومٍ ملبين=حنا عن انصار الحميدي ما درانا
هذا كلام يفّحم المستحقين =وعاداتنا نقطع لسان طّلبانا

التوقيع

ديــــــــــــــــواني

[محب الهيلا]

مشكور على ماقدمت

[البعيـد النـايف]

	لا هنت على الأبيات يا المقاطي وصح لسان قايلها تقبل مروري

[عبدالرحمن الهيلوم]

المشاركة الأصلية كتبت بواسطة البعيـد النـايف

---------------------------------------------------------------------
لازلت يانايف !!!!!!!! تدور حولك الشكوك !!
صح السان اكديميس ( شاعر هل العوجا ) واقسم برب السماء
لواقابله لحب راس خشمه ابن عاصم اقطم المحزم فديته وفديت اعتيبه كلهم . البعد

[سعد بن مطلق المقاطي]

المشاركة الأصلية كتبت بواسطة الهيلوم1383

---------------------------------------------------------------------
لازلت يانايف !!!!!!!! تدور حولك الشكوك !!
صح السان اكديميس ( شاعر هل العوجا ) واقسم برب السماء
لواقابله لحب راس خشمه ابن عاصم اقطم المحزم فديته وفديت اعتيبه كلهم . البعد

القصيده نسقتها لعجابي بها ولالي نيه ثانيه
وحسن الظن يالهيلوم 1383 وهذي قصيدة المحدار ماحد يجهلها ولكن شفت الكتابه غير واضحه وجددت الكتابه والنايف قال صح لسان قايله
يعني وارده الراعيها فى لماذا الشكوك
وصح لسان كديميس وبيض الله وجه وكل قبيله فيها حقها من ارجالها والطيب ماهوب ملكن لحد ونعم بالاد عاصم ونعم باعتيبه كلها
وكديميس دافع عن القبيله بالقصايد ولاحد ينكر موقفه ولايغط النور رجلآ فيه غير
لك تحيتي

آخر تعديل سعد بن مطلق المقاطي يوم 26-Nov-2007 في 12:35 AM.