بسم الله الرحمن الرحيم
مساءكم شعر وطيبه وإحساس
أقدم لكم هذا الديوان الشعري لـ شاعر متميز أصبح حضوره مطلب للأمسيات روعة أختياره
يتميز بالقصائد الجميلة والحس الشعري الفريد .. لا أريد أن أطيل إليكم السيرة الذاتية ..
الأسم : مشاري النثري
الميلاد : 1985
المولد : عريفجان (هجرة الشيخ ناصر الشغار)
ترعرع في هجرة الهمجه التي أسسها
الشيخ حمود النثري
الواقعه غرب نفي 30 كم
السكن حاليا : الرس (القصيم)
شهد له الكثير من مشايخ واعيان المجتمع الخليجي والسعودي خاصه
قالو عنه :
الشيخ بندر بن حميد : أنه من مكاسب مزاين الهيلا " قالها بعد ألقاء قصيدته في المزاين
حبيب العازمي : كتب عنه صفحة ثناء في منتدى المرقاب
محمد بن الذيب : الشاعر الذي لفت نضري من الشباب
الشاعر مرير الحبيل : ابشر عتيبه بمولد شاعر كبير
الشيخ نايف بن نماس : افضل شعراء شباب عتيبه
مدغم ابو شيبه : قال بعد أنتهاءه من ألقاء قصيدته في عتيبه
" على الطلاق انها فريدة من نوعها ونادره من شكلها "
أرسل له الشاعر والأستاذ حمد السعيد عضو لجنة تحيكم شاعر المليون قصيدة اعتذار بعد خروجه الغير مبرر من تصفيات شاعر المليون الاولى ولم يصلنا الا هذه الابيات
العذر يالنثري من الله ثم منك=حاولت في شتا الطرق لكن ازريت
واحد وهم واجد وهرجتهم عنك=لاشك ماجتني على ماتمنيت
والله لو للشعر ياصاحبي بنك=اليا طغى رصيدك فيه ياذايع الصيت
إليكم الديوان ..
( الفاتنه )
دخيلـك البعـد لحظـه لاتهوجـس بـه=خـل المقاديـر لاتشغـل بهـا فـكـرك
الناظر اللـي ظـلام الليـل دامـس بـه=وش عذرك اليا جرحه الدمع وش عذرك!!
تراي ألي مجلس(ن) بظلاله اجلـس بـه=اليا أنفهق ليلك المنسـاب عـن بـدرك
يسريبي الشوق مع رمش(ن)تناعس بـه=وآطيح من سحرك الغامض على سحـرك
عقد(ن)على عنقك أنـواره تعاكـس بـه=ايـذوب مابيـن عاتقـك وسنـا جمـرك
حـلاك مافيـه عيـب الا العقـل يسبـه=وجسمك مابه ضيّق الا عنقـك وخصـرك
عاتب يمحلا عتابـك يـوم تهمـس بـه=وخل الهبايب تعبث فـي طـرف شعـرك
الساحـل الآمـن تعيـش النـوارس بـه=ونوارسـي تآمـن بساحلـك وفبـحـرك
البعـد لاظلّـم بفكـري وعسعـس بــه=قمت اشعلك في لهيب الشوق وانصهـرك
اجيك من غربـة ابـلاد(ن) مئيـس بـه=لين اني آقف علـى دارك وانـا مـادرك
ادور لوصلك ايـة شـي (ن) آنـس بـه=في دايـرة شارعـك وبواجهـة قصـرك
حتى الهوى اللي بصـدري آتنفـس بـه=اقـول هـذا لعلـه جـاي مـن صـدرك
( يا مسافره )
المنظرالخلاب مربـاع القلـوب المستحـب=بعيون ترفات البنات اللي خواصرهن ضمـر
وأنا خذتني كلمـة أقلـط ياهلابـك يارحـب=على شفى مزيونة ٍ تبختـرة بيـن الزهـر
قريت لي بعيونها مشاعـر ولهفـه وحـب=وأبحرة مع غموضها أبحار السفينه فالبحـر
أنا عيوني ضاميه وعيونها أضلال وسحـب=سحب ٍ تكون من مشاعر فالعيون وتنهمـر
استقبلتني عاشق ٍ ينسج لها العشق ومحب=تجمع بقايا ضيقته وتفلها فل الشعر
حتى سجع طير الحزن على غصونه وانتحب=وانهارة جسور الفرح بعيوننا جسر جسر
يوم استعدت للرحيل وجهها الطاهر شحـب=قلت الغلا مايخلفه عن واقعه حتـى السفـر
يامسافره صدري يبا يبقى لمنزالـك رحـب=تجتال ساحاته طيوفك في صبح ولا عصـر
وأنا لاشفت فلول وصلك من دياري تنسحب=ماني بشاكي دمعة ٍ تسقط ولا ضيقة صـدر
مدام يوم الحشر كلا ٍ ينحشر مع من يحـب=روحي فمان اللي خلقنا واللقا يـوم الحشـر
( يا وجودي )
ياوجودي كيف اسامحك ياعيد رمضان=اغربت شمسك ماشفت الغزال النافـره
أتنقل لجلها مـن مكـان اليـا مكـان=لين دوّى الليل واقفى النهار بسافـره
معظم نجوم السما اللي تجلّـت للعيـان=قمت اراعيها وهي بالافـاق مسافـره
النفوس بعيدهـا تحتفـل بالمهرجـان=وانا في صدري جموع الحزن متضافره
كل ماسرجت الخيالات واطلقت العنـان=اصطدمـت بعالـم الهجـر وبتنافـره
الحزن في عالمي له مقـر وبرلمـان=فارض(ن) حكمه على صدري وقوافره
ليتها يوم انثنت مثل عـود الخيـزران=ماتمادى رمشها بطعن روح (ن) زافره
الغلا فاحت دلالـه بريـح الزعفـران=واروة ضلوع (ن)بفوح المحبه طافـره
البنات عيونهن بر خوف وبـر امـان=ميـر هـذي كلهـا عندهـا متوافـره
لاجرحت بعيونها ادّاوي بكلمة حنـان=المشاعر مسلمه والوصايـف كافـره
( الجادل )
الجادل اللـي سـرة والنيـه النيـه=تغيرة وجهـت دروبـي بمسراهـا
خلتنـي اعيـش حـب الأنعزاليـه=ساعت سرة واخذة الخافق وخاواها
سرتبهـا لكـززٍ بيضـاً خليجـيـه=اللي عن الريح مرخيـت ٍ زواياهـا
مضى عليها ثلاث شهور وشويـه=وانا على شرفة القصـر اتحراهـا
اخذ لها صـورة ٍ فالبـال مطويـه=وافلهـا فـي خيالـي واتهجـاهـا
شاشة خيالي تعرض اطيوفها ليـه=لين اني اقف على مرقـاب فرقاهـا
الشوق ناره لازالت فالحشـا حيـه=والبعد بسهومه اعيا النفس واضناها
اثر الهوى سطوته ماهـي بعاديـه=تمرض بها النفس لين تزور مثواها
اليا سطى بنظرة العيـن الحياويـه=يفلج ضلوع الصدور ويسهج حماها
هذي ضلوعي يادوب تضمها يديـه=من حربة ووداعها وفعـول يمناهـا
يمكن لو طعونهـا بالعيـن مرئيـه=تقدر تمد النظر مـع درب شلفاهـا
( مايسة القد )
ياوجودي ياصبا نجد العذيه=لاقبلت كن النسايم دافعتها
في ضلوعي نار نظرتها البريـه=تعبث بعوج المحانـي واروقتهـا
والله اني مانزعجت بكـل كيـه=ولا نويت احراجها ومعاتبتها
لانها من صغر سن وطيب نيه=تجهل ابعـاد الحيـاه ومعمعتهـا
ماتعرف مـن المهـد للثانويـه=غير ابوهـا وامهـا ومذاكرتهـا
لادعاها الشوق ساقتهـا الحميـه=وانفرش وردٍ من الجوري تحتها
عودهـا الريـان كلـه جاذبيـه=لاطرقتها النود بالشوق املكتهـا
فارعٍ من كثر ماهـي ضامريـه=ينشبك في خصرها عقد رقبتهـا
لاتثنّـت بيـن ريضـان ٍ نديـه=فاحت عطور الزهور وعانقتهـا
وادرجت خطواتها شويه شويـه=كن وراها صحيبـة ٍ متحريتهـا
في فياض العشق لوماهي جريـه=اجذبتها ورودهـا واستدرجتهـا
وقادها من اصطبلها الخافق عليه=لين كفـي بالعنـان استقودتهـا
في مياديـن الغـرام الشاعريـه=اتحفاهـا واخـاف مضايقتـهـا
روحها في ضف والدها طريه=مابعد مرت بضيقه والفحتها
لو مشاعرهـا زجاجـه واقعيـه=كان حتى نظرة عتاب اكسرتهـا
عندما زار في احد المرات قصر الامير سعود ال سعود بدعوة الامير سلطان بن سعود ال سعود ووجد والد الجميع الامير سعود بن محمد ال سعود والامير عبد العزيز بن سعود (السامر) قال مخاطبا الامير سلطان بن سعود ال سعود
سلام يامجلس زحول الرياجيـل=اللي تمثل فالحكومـه حكومـه
ديوانكم يجمع ضيا الصبح والليل=مثل الفلك بالحجم وانتم نجومـه
انت بسماه الجدي والسامر سهيل=وابوك شمسن واضحه ومعلومه
مداه ماتلحقـه حتـى الدرابيـل=ماطال من مد النظـر مايرومـه
الزل ربيعن عطره البن والهيـل=والعود الازرق بالمباخر غيومه
وانهار بنـن تنهمـر بالفناجيـل=ما تختلف مابيـن ليلـه ويومـه
ارجومه ظهور البعارين والحيل=اللي لها من زومة الحال زومه
على سما رحابه تشـع القناديـل=ويسير ركب العز فيه بعمومـه
ممشاي فيه يطول خطاي تطويل=واطاول الكوكب براسي واهومه
متنكبن بشتـن كمومـه مسابيـل=عن صكة الايام تـذري كمومـه
علاقتي معهـم معـزه وتبجيـل=موقعه على الفخـر ومختومـه
هذي حكومات الفخر والمواصيل=اللي تصدى للزمـان وهجومـه
وانا بضف شعوبها شاعر الجيل=واللي يلوم النثـري الله يلومـه
( الفراق )
السما من غيمة الوصل جاء فيه صحوه=كل شجره قام يمش الضمـا بعروقهـا
انكسر وجه السماء في عواتقها ضحوه=واقفت الافراح برعودهـا وبروقهـا
الفراق اللي نحى الشمس للياس نحوه=نكّس اعـلام شعـار المحبـه فوقهـا
واعذابي كان مالي من الحـزن لهـوه=من ضروف ٍ تقصر احلامنـا وتعوقهـا
والله اني مشته ٍ صوتها العذب شهوه=لكن العشاق بعض الحضوض تبوقهـا
جادل ٍ للحسن فيهـا طـراوه وزهـوه=حسنها حتى بحـور الخيـال يفوقهـا
جسمها كيكن مغلف وهرجتهـا قهـوه=مرهي ٍ منها لكنـي عجـزت اذوقهـا
( الطائرة )
الهموم اللي نبت حزنها بصدري نبـوت=كل ماقلت صفحت عن خفوقي ماصفحـت
مايفرّق جمعهـا ليـن يجعلهـا شتـوت=غير من تدني بعيـد المسافـه لانتحـت
الجناح جناح طاير لو ان الشكـل حـوت=تشبهه لاناحـرت بالشكـل ولا سنحـت
الجوانب حجمها ضخم والخشـم معفـوت=عن مصادمته هوى الجو منخفض ٍ تحت
لارزمت وسط المدرّج تـرزام الخفـوت=ومالت الساعه لوقت المغـادر وارجحـت
استلمهـا كابتـن ٍ بالثقـه كلـه ثبـوت=واستقل بها للاجوى البعيـده واجنحـت
تعزل عنها طفوح المـزن حتـى تفـوت=مثل ماتعزل رغاة الحليب اليـا طفحـت
غادرة في رحلة ٍ تنبي بزيـن البخـوت=يوم اقلتنـا علـى متنهـا ثـم سبحـت
لي ثلاث سنين صابر على ضيم الوقوت=واتلزى عن سموم الهواجـس لالفحـت
ودي اتمكن بفرصة لقاهـا قبـل أمـوت=واسمع طيور الغلا فالروابـي لاصدحـت
فارع ٍ لافضفضت لي نواظرها السكـوت=احتداها الصمت عن فضفضتها واستحت
المشاعـر يمهامبحـره مثـل اليخـوت=ماحرفتها امواج بحر ٍ من الهـم طفحـت
كن خيالي شاشه وكن طاريهـا رمـوت=وين ماينحـى خيالـي طواريهـا نحـت
صار طاريها شـراب ٍٍ لخفاقـي وقـوت=اتقوابه على اوضاع وقـت ٍ ماصلحـت
ايه ياسلمـان والعشـق جبـار ٍبهـوت=لابطـش جلالتـه فالقلـوب استجرحـت
في ثراه اتعبنا الافكارواحفينـا السبـوت=لين حطت عند باب الفـراق ولابرحـت
وانهدم حلمي بليل ٍ مـن الفرقـا مقـوت=اسفهلـت بالامانـي نجومـه وادبحـت
واتركتنـي للسهـر ولتمتـاع الشمـوت=لين ضاقت بي من الهم الارض وما طحت
اشرف المرقاب بالهم واسـج الخبـوت=وافتح الثوب لهبوب الشمال اليا نفحـت
المحبه بعضها قبـر والهجـران مـوت=والنفوس اليا دخلها الغـرام استذبحـت
ملاحظه : سلمان بن محمد السليمي الحربي
قصيده موجهه للشيخ / حمدان بن محمد بن راشد آل مكتوم
راكب اللي كنها فـي مـدارات الفضـا=سابـح ٍ فـرّق يديـه وفهـق مناكبـه
مايلاحـظ شكلهـا لاعتلـت غيرالحظـا=في مسار ٍ تعبر مـع السحـب مراكبـه
صوتها لادوى وراهـا بالافـاق ومضـا=صوت موجـة رادو ٍ ماهـي بمتراكبـه
ماركبها غير مونس علـى كبـده لظـا=مـن همـوم ٍ نارهـا بالخفـا تنحاكبـه
برّكت باقصى ضلوعه عصر مثل النضا=لين وجّه فـي سمـاه الدجـى مواكبـه
ماله من بروكها لا عويـن ولا إعوضـا=حتـى ليلـه بالآمـال إنتحـت كواكبـه
وإنتهابه ليل الأوهـام فـي بـر ٍ فضـا=خرمسيا ً تـذري الريـح مـع مناكبـه
ليل همه مايزيحـه ضيـا نجـم ٍ يضـا=غير شمس ٍ نورها يصعـب الادراكبـه
عقب يافزاع هوجاسـه بذكـرك حضـا=واصطغى فكره على مجـدك ومرقاكبـه
جاك حاديه العنا مـن حواسـد وبغضـا=وانت فعلـك ماكـذب واحـد ٍ زكاكبـه
لا أظلمت بالياس الافاق والصبر إنقضـا=جـر طيبـك لانبلـج تنـور الافلاكبـه
جاك من بطش الصواديف وأسباب القضا=ومن كثر ماواجهـه فالزمـان وواكبـه
يصطلي بأعماقه من الغضب جمر الغضا=لولا صـدره ذابـت ازراره المتواكبـه
معتل ٍ له كونكـرد ٍ مايلحقهـا الشضـا=من سلاح اللي مركـز ونفسـه هاكبـه
غادرت دار ٍ عليها من العفـو الرضـا=وإ هبطت دار ٍ عليها السحب متساكبـه
( الخوه )
علام الشعر يوم اقطف بيوته مثل قطف الزهر=مايجلاعنـي همـوم ٍ برتنـي بـري برايـه
الياسجيت مع قافه وقته مثـل قـود المهـر=تنحت بي عن السجه دروبه واخلف خطايـه
ودخّلني على آفاق ٍ من آفاق الحزن والسهـر=وقمت اغني الالحـان ليـن اضيّـع غنايـه
الاياوجد حالي يوم اغني من غبـون وقهـر=ياليت الزله اللي جات ماجـات مـن خويايـه
حدتني لين ورتني بطعنتهـا نجـوم الظهـر=وسرتني بليل الهم مسـرى الضامـي التايـه
ادورلي عذر واجهر بصوتي يوم انادي جهر=ولاسمع في مهب الريح صوت ٍ جاوب اندايه
وانا اللي للصداقه ريف وضلال ٍ ضليل ونهر=اعل فياضها وابني صروح امجادهـا بنايـه
مقامي عن طمان القاع في جو المعالي شهـر=لوان اللي حصل يبحث خفاي ويلحق اقصايـه
حدى اركابي على فجوج ٍ بلاقيع ٍ طواها الدهر=سراب فجوجها يلمـع بعينـي لمعـة مرايـه
بروك ٍ في محاجيها همـوم ٍ سرهـا ماظهـر=تصالي صدري بنار ٍ مـن الاحـزان لضايـه
بعضها كل مايصهر ضلوعي بالسعاير صهـر=قعدة افهق شماغي وآتحامـل فـوق مركايـه
لكن الصحبه اللي سيرتنـا بالنقـا والطهـر=مايخدش جدرها يدين ٍ صرح الطيـب بنّايـه
لاجتني زلة ٍ محد ٍ نهرها قبـل تظهـر نهـر=لقت صدر ٍ رحيب ٍ ماتحد ارحابـه اعضايـه
مدايه عن مضايقهم بعيد ٍ مثـل بعـد الدهـر=يبا يعيشون ويموتون ماوصلوله نـه نهايـه
قصيدة متواضعه في صاحب السمو الامير : سلطان بن سعود آل سعود
حنة رعود الشعر في صدري وعديـت الرفـاع=في مدح شيخ ٍ شايخ ٍ مجـده بـراس الطايلـه
امضى من السيف الحدب واشد من بطش السباع=واكرم من المـزن المصـدّق لارتخـة همايلـه
خصايله تمدح بها الشعّـار فـي شتـى البقـاع=مافيه شخص ٍ يمـدح الافـي حـدى خصايلـه
ولافيه طيب ٍ ورّث من آدم وعاش بلا انقطـاع=ياكـود طيـب ٍ ينتقـل بالـورث مـن سلايلـه
لاسمه مهابه من مهابة سطوته خطـل الـذراع=لاقيل سلطـان مـع الآسمـا زاد هيبـة قايلـه
سلايل سعود الكريم الوافـي الشهـم الشجـاع=اللي وسم خـد المراجـل مثـل وسـم الحايلـه
ياسيدي سلطان لـو امدحـك قـدر المستطـاع=والله مايوفـي جنـابـك شـعـري ومثايـلـه
لو ان شاعرك اليا غنى القاف في عال الرفـاع=قصيدتـه تاخـذ وسـام الزيـن مثـل النايلـه
ملاحظه : النايله احد ابرز ابل فنجال الشيباني
( الولا والمحبه )
يا ذا الجلال اللي لوجهك يخضعون الراكعيـن=تعزعبـدالله وترجـع للبـلـد وال عـهـده
حكام دار الدعـوة ودار النبـي والمسجديـن=اللي من أصقاع الدول تهوي اليهـا الأفئـده
من عظمها حتى العلم لونه مع الناس اجمعين=كنّه وسم فخـر ٍ مـن الله جاعلـه فـالأورده
ياسيـدي سلطـان بغيابـك ترانـا متعبيـن=اصدورنا من لفح نيران الفراق ألهـا وقـده
يامن عليك شرود هاجوسي مخالجها الحنيـن=ماتستريـع ألا علـى طـاري سمـوك لاوده
وانت المدايح في جنابك ريح مسك وياسميـن=مرصعـات ٍ بــالآل وبالنـجـوم مقـلـده
من كثر ماتزهى المـدح بمعلقـات المادحيـن=شوي ويصير المدح في فعل غيرك منقده
انت الصباح اللي مايحجب وين ماترحل تبيـن=ماترتفع شمسـك ياكـود بمجـد ولامحمـده
وانت الدجى اللي بين قبضاته عداك محاصرين=مال المعادي منك ملجـأ ويـن ماكـان بلـده
وحدك تكبر بالفخر والنـاس تكبـر بالسنيـن=وحدك تعطي من رها والناس تعطـي مجهـده
عن البخل بعدك مهوب من الثرى للفرقديـن=بعدك من آدم طولـه ليـوم القيامـه ووعـده
لون نور الشمس مركز مصدره يدك اليمين=ظني بيقضي ماقضى جود ٍ بكفك تنفده
المزن ترجيه الصحاري بس من حين ٍ لحيـن=وانته ماياقف جودك بوبلـه وبرقـه ورعـده
لرعاية الايتـام وإيغاثـة بيـوت العاجزيـن=صدرك مخازن خير ويدينك جسـور مشيّـده
وانا على سلامتـك قبـل ماهـن المسلميـن=على مدايحك بقصيـدي اشكـر الله واحمـده
( معلقة الشعر الثامنه )
تجلـت عظامـة قـدرة الواهـب الـدوام=الـه تسـاوى بعزتـه فـوق كرسـيـه
بعد مانشى بامره سحـاب ٍ مـن الالهـام=يغطـي مساحـات الخـيـال الفلكـيـه
ثقيـل ٍ مقاديمـه لهـا بالآفـاق ركــام=تـقـول ٍ ربـانـه جـبـال ٍ جليـديـه
دوي الرعـد باطرافـه يصحـي النـيّـام=ولـو زاد صـدّع بالمبـان الزجاجـيـه
ولمعة بروقـه نورهـا يجلـي الاظـلام=لالاحت بـروق المجـد باغلـب نواحيـه
بعـض خطهـا مثـل التواقيـع بالاقـلام=تشـوق المخيّـل لاحتمـة باشتعالـيـه
من الغرب حدّر لين وجـه بشكـل ٍ عـام=تناحـا مقاديـمـه وتـزمـي توالـيـه
يسوقه هبوب ٍ هـادي ٍ مشيهـا وانسـام=تلملـم شتـاتـه وتـحـداه بشمولـيـه
هبوب ٍلوان الرجـل يرقـب بضلـع ٍ زام=يحـرك هواهـا شماغـه شويـه شويـه
بعد ماوصل دار ٍ عربهـا ضمـي وحيـام=ركد عنه مـد الريـح وارخـى عواليـه
تهاما على ارض ٍ وجهها بالضمى منضام=بوبـل ٍ يحـد الشـوف كثـرة تهامـيـه
وقامت بدون سدود تجـري مـع الآنـام=فرايـد خيـال ٍ ماسبـح بالفضـا زيــه
خيال ٍ فلك لاقيس حجمـه مـع الاحجـام=ماخذ منه حجم الافق عشريـن بالميـه
مع رحابه يصير السما بحجمـه المتـرام=مثل حجم الارض مع الرحـاب السماويـه
تعبره بيوت الشعر مثـل الضيـا فالجـام=ليا سـار موكـب ركبهـا مـن محانيـه
بيوت ٍ مرصعت ٍ بعـاج وذهـب ورخـام=وزنهـا يعـادل وزن الارض الكـرويـه
تعرض المشاعر مثل ماتعـرض الافـلام=على هامش احـدث الظـروف الحياتيـه
ماغرتنـي بعظمـة منازلهـن الاوهــام=ولاسمـع هـروج الساذجيـن الاقلـيـه
مدام النفوس احيـان ماتصـدق الاحكـام=علـى ماتـوده تنـجـرف لاشعـوريـه
لكـن الحقيقـه وجههـا ماعليـه اقتـام=تجلى على ارض الواقع بشمسهـا الحيـه
غموض الليالـي معـول ٍ للامـل هـدام=ولكـن ثقتنـا راسيـه مـثـل ماهـيـه
نعرف ان رحلات السفن في بحرها الطـام=تواجـه صعوبـه قبـل ترسـي موانيـه
هذا الياس يحدى الركب من ماضي الاعوام=ولاطـال هامـات الطموحـات مولـيـه
اخذ من مدانا اللـي ماينقـاس بالارقـام=كثر مالغصن ياخذ من الشمس لـه فيّـه
لكن الفياض اللـي لهـا نتعـب الاقـدام=ويهمى السحاب برحبهـا كـل عصريـه
مصير الزمـان بجوهـا ينحـي الاجـرام=وتبقـى الكواكـب فالرحـاب الفضائيـه
وانا عن دروب الظـن والشـك والايهـام=جنح بي على فيـض الصـدور الربيعيـه
قصيـد ٍ سـواة الدهـر وبيوتـه الايـام=تـوارد هواجيـسـه وتتـبـع معانـيـه
ادلـع بـه الترفـات واطربّـه الحـكـام=وتعتق به ارقـاب ٍ مـن السيـف مدنيـه
( العنود )
لبيه ياطلة عنود ٍ تخلـف العقـل الرزيـن=يوم اقبلت تنثر ورود الحسن محـد ٍ قدهـا
عليها من لبس الترف نعومه ورقه ولين=لاصار حتى العقد يجهـد حيلهـا ويهدهـا
شاهدتها بين الغلا والورد والعطر الثمين=حتى عبرنا بالغلا آفاق ٍ بعيد حدها
ولا خذاني من مداري في مدار الفرقين=الا مضاليل ٍ معلق ناضري مسودها
لاجيت اصد عيوني أعن عيونها النعاستين=قعدة اصد بوجهي وعيني عليها اصدها
رقيقة ٍ ماينجرح فيها شعور المستحين=الا ليا ناظرتها تبش الدما في خدها
صورة نعيم اوصافها سحر ٍ الناظرين=ابدعبها اللي رافع ٍ فالناس حظ مودها
بدر ٍ تجلى به يشع من العواتق للجبين=يعكس شعاع الشمس لو الشمس ماهي ضدها
ومجدل ٍ قام يتناثر من يسار ومـن يميـن=لاغطى غرتها استمالـت وفهقتـه بيدهـا
فيها من الظبي التفاتة خوف ومن الحر عين=ومن الذلـول اهيامهـا والخيزرانـه قدهـا
وضاهر ايديها فالكموم اتقول ضاهر قطنتين=الياقصرة عنها الكمـوم اتشدهـا وتمدهـا
تحاكت وسر الغلا في حكيها عيا يبين=ووقفت لي لحظات ماعرف مزحها من جدها
لاناظرتني شفت في نظراتها شوق وحنيـن=وانسولفت قامت تمنّـع كـن ماهـو ودهـا
ماتعطي الاحرف مداها غير من حين ٍ لحين=كن الحروف اللي تساقط من شفاها تعدهـا
وامسيت بين ايدينها طليق ٍ بحالة سجين=ارسل مراسيل الغلا لعماقها وتردها
ماضمه الحرير من حشمه وتركيبه وزين=امثقله هيبة جلالتها وشيخة جدها
( الثلج )
ياصاحبي تاج الحسـن واللباقـه=مع فارع ٍ تدلج بعقل الرجل دلـج
فيها من اهل الشام حسن ورشاقه=حسن ً صباحه في دجى شعرها يلج
خذتني بسحـر النظـر والاناقـه=لين أفلجت صدري بنظراتها فلـج
عيونهـا خـدره وفيهـا زراقـه=كنهن زجاجات ٍ محيطمبهـا ثلـج
ألها على حصون القلوب اختراقـه=مثل الليازر تبلج حصونهـا بلـج
لين القلوب يصير فيهـا انحراقـه=وتبات ليل الحزن بجروحها خلـج
( الخصر )
ياهل البلاد اللي تحصر الرغد حصر=رغـد بلدكـم مايعـادل رغـدهـا
مزيونـة ٍ لقيتهـا صدفـه العصـر=تمشي بريضـان المفاتـن وحدهـا
ميّاسـة ٍ لاطـول فيهـا ولا قصـر=تسحـر بممشاهـا ورزة جسـدهـا
ظني لو تقيس الاساور على الخصر=مشت سوى مـن ردفهـا لانهدهـا
تميل ميل الورد على نهـر مصـر=وتفوح فوح المسك من بطن يدهـا
ماقول في صدري بنت للهوى قصر=اقول صـدري صـار كلـه بلدهـا
قصيده فالرسول صلى الله عليه وسلم
الشعر ثروة هاجس ٍ تتعب سوابيـح الفكـر=مثل الجـواهر تحت غبات البحور العـاكره
اليا دوت غر المعاني فالخيـال المبْـتكـر=يبقى صـداها فالمسامع وتحفظـها الذاكره
والفخر مدحك للرسول وتاج فخرك لانذكـر=اليا صعد منابره ولا احشدة عساكره
والشاعر بمدح النبي لو يحكروصوفه حكـر=مثل العمى اللي ياصف الشمس بوحا مفاكره
يشهر خيالي في سما مجده ويرجع للوكـر=يبـي كواكـب طيبه ويرجع بيئس لـ ماكره
بعيـوننا مثل النظـر نقرابـه آيات الذكـر=وبصـدورنا مثل الـدم يغذ القلـوب الذاكره
شموخ مجده مايهزه نظرة اصحاب المكـر=نبـينا يكـرم عـن ارذال الشعوب الماكره
نور الهـدي بعقـولنا مايحجـب ولاينكـر=لو النهـار تغيـب شمسه والظـلام ايباكره
متجلي ٍ بين الصحابه لاحتمى الجو وعكـر=مثل الجـدي حـوله انجوم ً للرجم متجاكره
اشدهم علـي وعثمان وعمـر وابوبكـر=اللي شمـوخ امجادهـم مافيه فكر ٍ حاكره
شعري تزكى بمدحته والحمد لله والشكـر=اللي مايشكـر ربه بيمـوت محـد ٍ شاكره
( عتيبه )
يالشعر تكفى لانخاك الفكـر نخـوة معتصـم=عطني بنـادرة البيـوت اجزالهـا واسمانهـا
شوارد ٍمافوقهـا الا شاهـد النثـري وسـم=اللي حداهـا ليـن طاعتلـه وشـد ارسانهـا
قصيدة ٍمثـل الخـرز بالفكرناظمهـا نظـم=حتى العتيبـي كـل ماغنـى يجـر الحانهـا
الله يجملنـي مـع عتيبـه بعيديـن الهـمـم=مدام راسي حـي بيـن اشيوخهـا واعيانهـا
الملتقى عنـدي مهـم لكـن شوفتهـم اهـم=ساعة عتيبـه خيمتبـه واعرضـة ذيدانهـا
فـي موقـع ٍ زوارتـه تقـول زوار الحـرم=مافيه ديـره غيرجايـن وفـد مـن سكانهـا
كن الجيوب سجود مسجد عيد الاضحى لازدحم=قدام بيبان المضايـف مـن كثـر ضيفانهـا
الحيل تذبح والدلال تصـب والضـو يشتعـم=وكلمة هلا ينطحبها الضيفـان مـع بيبانهـا
والعود الازرق كنه الضباب فـي كـل مخيـم=مطايبه دوب العيـون تشـوف مـن دخانهـا
هـذي عوايـد للعتيبـي لاخــلا ولاعــدم=من غير قاصـر بالقبايـل وبفعـل شجعانهـا
حنا هل البـل والمراجـل والفعايـل والشيـم=وانى الفخر بخيار ذيدان العرب وازيانهـا
وشلون مانفخـر وحنـا بالزمـان المنصـرم=نغزي وناخذها بحد السيـف مـن مرحانهـا
نفخر بوضح ٍتدحـم الاخصـام بـالاول دحـم=كم هجمة ٍ عجزة على الاول تصف اوزانهـا
غزايز ٍ من كثر مايردم عليهـا مـن الشحـم=كن اقبب المساجـد اتثنـى علـى حجبانهـا
ونفخر بصفر ٍ ماطمع فيهـا شـواوي الغنـم=من غليها نص العـرب مايقـدرون اثمانهـا
عرب ٍ تقول ارقابهنّ سيوف ٍ تقـص العظـم=لاخضبتهـا ايمـان قـوم ٍ ماتـذل ايمانـهـا
ونقوة مجاهيم ٍ تقـول اجنـاح ليـل ٍ مدلهـم=عن دربها تعزل الضيـا باشكالهـا والوانهـا
وشعل ٍ تقول اهضاب نجد اللي علاويها دهـم=اليا سطعت شمس العصر بضهورها وامتانهـا
هذي مراجل ربعـي الهيـلا قوييـن العـزم=قبيلـة ٍ وسـط الجزيـره راجـح ٍ ميزانهـا
امجادنا فـوق الكواكـب مالهـا حـد وحجـم=حتى الكواكب تصغر الهـا ويتقلـص شانهـا
الطيب كان انه جبل حنا علـى القمـه علـم=هاماتنا من فوق هامـات السحـب تيجانهـا
كم من فقير ٍ من عطانا جـاد بالمـال وكـرم=وكم من نفوس ٍ من غضبنا كفنـت بكفانهـا
مرسين في نجد العذيه جعل يسقيهـا الوسـم=دار ٍ تنفسنا غلاهـا مـن شـذى ريضانهـا
ويوم الاوامر صدرة بالرقم من قصـر الحكـم=تقديـر ٍ الوقفـة عتيبـه ولوفـا جدانـهـا
قمنـا بتحطيـم الرقـوم الكايـده رقـم رقـم=بعزوم قـوم ٍ ياصـل السبّـع سنـا نيرانهـا
والله يحفظ المملكـه ويديـم بالامـن النعـم=تحـت قيـادة حاكـم ٍ دار البـلاد وصانهـا
( الحياه )
يالله ياللي قدرتـك فـوق إحتمـالات العقـل=عجزت تخيّلهـا العقـول إخفافهـا وإثقالهـا
ولا وصل علمـك جبـروت التقـدّم فالـدول=اللي ماتكبحهـا الظغـوط ولاتهـزّ إرجالهـا
أسماك من عظمك إثقال ٍ حملها ماهـو سهـل=لـولاك كـان نفوسنـا تنهـار ماتشتالـهـا
ياذا الجناب اللي به إنظاف الضماير تستظـل=من حرّ زفرات الجحيم اللي تجـرّ أغلالهـا
تعلم بما تخف ِ الصدور اللي بملهـا تشتغـل=وأنته على عرشك تعرف أسرارها وأعمالهـا
يارب زوّدنا الصبر لا زاد بالنفـس الزعـل=حتـى الليالـي ماتهـدّ أحلامنـا بأهوالـهـا
الوقت قام يسوقنا على العسر سـوق الجمـل=لين الديـار اللـي نبيهـا بيّـن إضمحلالهـا
وأهل العزوم اللي تفوق إعزومها كوكب زحل=تموت غبن إليا حداهـا الوقـت دون آمالهـا
ولاّ القلوب اللاهيـه يلعبّهـا طيـش الجهـل=ماهمّهـا عـز النفـوس المكرمـه وإذلالهـا
الناس حسب إعقولها تعمل وتِجهـد فالعمـل=ويّبيـن وجـه التجربـه بأفعالهـا وأقوالهـا
لو كان تلبس من ثياب الطهر زاهيـة الحلـل=قلبـي يعـرف إطبوعهـا بإقفايهـا وإقبالهـا
الكذب فاللي ما أسلمت بآخر ديانات الرسـل=والصدق فاللي يـمّ بيـت الله تشـد إرحالهـا
والطيب تسعى له إرجـال ٍ لاتكـلّ ولاتمـل=وأهل الحظوظ إبلا جهود إحظوظها تسعى لها
والكبر يطغى فالنفوس اللي معايشهـا الفشـل=ولاّ التواضع في نفـوس ٍ عالـي ٍ منزالهـا
والعشق ليل ٍ يسهره من يرتجي فجر الوصل=إليا غفت عنه العيـون اللـي مايِحمـد فالهـا
وإن عاش حلم المرتجي مابين ياس وبين أمل=تفنيـه دورات الزمـن بأيامـهـا وإليالـهـا
الوقت يجري بالظـروف القاسيـات وينتقـل=والأرض قامت تختلف مع إختـلاف أجيالهـا
وجه الكرم ماعاد له حق ٍ على وجه البخـل=ولايهـزّه قـدر شرهـات اللحـى وإسبالهـا
وتبدلت بيض المعام النزّه بسود العقل=الي تورد للعرب بحجامها واشكالها
حتى الحجاج المسفهل معقود ماهـو مسفهـل=أمسى من الدنيا يحسب إقصارهـا وإطوالهـا
العمر مـرّه كـل مايـزداد يقـرب للأجـلل=و الهقاوي يتعبـون أهـل العـزوم إجمالهـا
يالله عسى وجه السنين المقبله وجـه ٍ خجـل=مايخطي بحـق الآمـال ولايقـص إحبالهـا
وإن خان قلنـا ( قـدّر الله وماشـاء فعـل )=هذي حظـوظ ٍ للبشـر بأعمالهـا وأحوالهـا
هذا ما أستطعنا جمعه من نقطة في بحر الشاعر : مشاري النثري
أتمنى أن يحوز العمل على رضاكم
« آخـــر الـــمـــشـــاركــــات »
26-Mar-2010, 01:15 AM
ديوان الشاعر : مشاري النثري
العرض العادي
