الا يالله عفوك لا معي بيجر ولا جـــــــــــــــوال - الهيـــــــــــــلا *** منتدى قبيلة عتيبة

صعوط المجانيين · 07-Jun-2007, 06:15 PM

الا يالله عفـوك لا معـي بيجـر ولا جـوال
ولا عندي وظيفه والتجـارة فاشلـن فيهـا.
ولا عندي شهادة ٍ ولا حرفـة تسـد الحـال
ولا حظن ٍ كبير ٍ لأخطـت الجـرة يقديهـا.
مخابي الثوب تومي ما بداخلها من زمان ريال
بها فاتـورة الكهـرب ولا يمـدي أقضيهـا.
على ذيك العراوي تتعب الحادي مع الجمـال
ثلاثة شهور في الورشة وشهرين مغطيهـا.
أبيها لو تجمل يـوم وأجلبهـا علـى الـدلال
يجيها واحد ٍ حظه مثـل حظـي ويشريهـا.
نصيت العسكرية يوم قالـوا للنظـام إرجـال
وقدمت الملف وصـورة ٍ متشخـص ٍ فيهـا.
خذ الأوراق مني واحد ٍ ما عنـد أبـوه دلال
سلوم الناس وأهل المعرفه والطيب مخطيهـا.
قراها في دقيقه وألتفت عجـل ٍ علـي وقـال
شهادتك العظيمه ياولد وين أنـت مخفيهـا.
هزيت الراس ما عندي تقول إني من البنقال
وقمت أحب خشمـه وأطلبـه بالله تمشيهـا.
حذفها من يده شين الطبيعه والنبـا والفـال
وقال أزين تعود صـوب نوقاتـك تعشيهـا.
تناوشته من الكرسي وعفت الحل والترحـال
وضربته بالبياله عقب ما بيحـت شاهيهـا.
خذونـي للسجـن لانـي بظالـم ولامحتـال
مجرد واحد ٍ جـا يكحـل عيونـه فيعميهـا.
ويومني خرجت أقفيت لأرض الله وسيع الجال
على برن هـواه يـداوي العلـه ويبريهـا.
أدور قصعة الجربوع والضب الفتـى يحتـال
والأرنب يا شفاة الروح محلاهـا وطاريهـا.
بلا كهرب ولا بيجـر ولا غـاز ٍ ولا نقـال
قوانين الحضاره لاتبـي شوفـي ولا أبيهـا.

الشاعر /سعد بن جدلان[/quote]

ابوبجاد الرويس · 08-Jun-2007, 12:26 AM

مشكور اخوي صعوط المجانين

ولاهنت على نقل القصيدة الجزله

وصح لسان ابن جدلان

متعب العصيمي · 08-Jun-2007, 01:17 AM

ويومني خرجت أقفيت لأرض الله وسيع الجال
على برن هـواه يـداوي العلـه ويبريهـا.
أدور قصعة الجربوع والضب الفتـى يحتـال
والأرنب يا شفاة الروح محلاهـا وطاريهـا.
بلا كهرب ولا بيجـر ولا غـاز ٍ ولا نقـال
قوانين الحضاره لاتبـي شوفـي ولا أبيهـا.

لاهنت لاهنت لاهنت صح لسانك..
دام العطا,,
موودتي,,