هيهات لو حاولت عكس الموازيـن=== قضا القضا فيمـا مضـى وانتهانـا

[بعيـد المرامع]

ماذا قال الشاعر كديميس العصيمي ..حتى تقوم قائمة حرب..!!

ووين وجه الاساءه..حتى تجتذبنا ..وتشذبنا سفهائها!!

ولماذا على قول المصيريين .. كل هالبربجنده..وفتح الاجنده..والسفهاء المجنده..

وهل بيت كديميس

ياحرب لو حطيتو البيت بيتين = ماهوب موصلكم ليا مستوانا
انتم رجال بالمعارك غثيثين=لكن ما تلحق اخطاكم اخطانا

فيه من الاساءه شي!!!!!!!ووينها!!!!


ام ان رؤية الشاعر كديميس على الشاشه ..تعتبر فلم رعب ..ترتعد منه الفرائص ..وتشل منه الافكار


ثم انه مدحكم ..ومدح نفسه ..وهذا نجده في الشعر من على مر العصور ..ومن خلقت الدنيا

وفي شعراء الشيوخ والفرسان

هذا الشيخ تركي بن حميد في خضم المعارك ومع شيخ قحطان واعظم فرسانها محمد بن هادي

وما دار بينهم من مساجلات ..تعدها القبيلتين من روائعهم ومفاخرهم

يقول الشيخ تركي بن حميد

وأنتم كما حوت على الشط لاهوم = وحنا خلقنا للواهيم عله
وانتم كما ضلع طويل ومزموم = وحنا خلقنا الله نجوم تهله
وانتم كما طير البحر ذاك أبا اللحوم = وطير البحر ما يذبحه غير ظله

وهذا رد الشيخ بن هادي..لا تناقص نفسه..ولا لحقته شكه..ولا سبنا

بل مدح نفسه ومدحنا ..

وإن كان تطري النجم فالنجم مفقوم= والنجم يدوي والجبل راسي له
ما نشتحن للحرب والحرب مفهوم= ويا سعد منا باللقا فزعة له
ما خلقة الدنيا ولا الناس في يوم =واللي تمنى حربنا مضحي له
أن كان في نفسه فلا هوب مليوم =نعم الشوارب وافي الشبر كله

ويقول الشيخ تركي بن حميد

انا برمحي باول القوم ملحوم = ولا انت رمحك عند ساره تشله

وهذا جواب الشيخ محمد بن هادي

ان كان رمحك باول الخيل ملحوم = فانا برمحي حاميٍ نجد كله

ياطيبهم ..وياطيب تاريخهم ..


وشتان بين الثقه بالنفس وردود الافعال


ونختم . ببعض الابيات من قصيدته العصماء .

سر يالقلم ننقض كلام المحامين= لصارت الدعوه حمايا حمانا
نقض الحجج لابد له من براهين=ومعنا شهادة الوفا لدعانا
ومن مدنا بالصاع نجزاه صاعين=واللي ياعادينا عليه اعتدانا
كان الحميدي(1) وازملاه متصافين=على الحكي فيما ما تقدم حكانا
تلحقوا غارات ناسٍ قديمين=واخطوا وحنا من خطاهم خطانا
ودام الشريعه تاخذ العين بالعين=حنا ما تقضي الشريعه قضانا
حنا بميزان المعاني ثقيلين=وعلى مماشينا بعيدٍ مدانا
هيهات لو حولت عكس الموازين=قضا القضا فيما مضى وانتهانا
ياحرب لو حطيتم البيت نصفين=ماهوب موصلكم ليا مستوانا
انتم رجال بالمعارك غثيثين=لكن ما تلحق اخطاكم اخطانا
حنا عتيبه ملحقين المخلين=بعنا بسوق الطايلات وشرانا
قومٍ على صولات الايام ضارين=لو عضنا ناب الدهر ما قوانا
يهابنا الطماع لو قلبه اذهين=نبطش محلات الطمع لاغزانا
لنا سلوم غاليات المثامين=سلومنا محدن حملها سوانا
في سلم لوماء الوجه عام وشهرين=وادخيلنا مامون داخل حمانا
ثلاثماية يوم تزداد ستين =تنحا المنايا عنه هيبة لحانا
ومن حده الموت الحمر والديايين=تخير الحصن الحصين ونصانا
وبالحين نملى فارغات الموازين=جيب الصحون ومكرمات الصيانا
للضيف والجيران والمستحقين=إليا من وهاب العطايا عطانا
ابيوتنا للضيف مثل البساتين=يفرح به الملهوف ليلة ضوانا
نجود بالماجود بالعسر واللين=وضحك الحجاج وما حلا من نبانا
حنا على حفظ المواجيب حرّصين=مانعطي الطرقي قراطيع مانا
والجار له واجب وحنا وفيين=ندعيه للكرمه ولو ما دعانا
جيرانا دايم حشام وعزيزيين=وندرا شرفهم عن كلام اسفهانا
حنا بوجه الجار دايم جديدين=يزيد مع زايده اثنينه وفانا
وان جاء نهار المعمعه واللغا الشين=نبيع غلا الروح دون اقصرانا
وان راح نشدق قفاه بسكاكين =نحمي مجاله عقب عنه انتحانا
وخوينا لو هو من اللي معادين=يأمن بنا في كل درب مشانا
ليا عودة عشر اكثر الناس ثنتين=وصاروا بغرات الخوي عقربانا
ولصرنا مع الخوي بدرب متخاوين=نرعى الحقوق ولانخون خويانا

كتب على عجاله ..


بعيد المرامع ..منتديات عتيبه الهيلا


[/font][/color]

التوقيع

تنويه ..وتنبيه ..مرامعي.. لوحظ في بعض المنتديات و من بعض الاخوه هداهم الله ..سرقة بعض مواضيعي في منتدى الهيلا..ونشرها في منتدياتهم ..بمعرف "بعيد المرامع" ..لإيهام القارئ والمتصفح ..بأنه صاحب الموضوع..والكاتب بعيد المرامع لذا أود التنويه .. بأني ..انا يا بعيد المرامع..ليس لدي اي معرف اخر..خارج موقع منتديات عتيبه الهيلا إطلاقاً.. B3EED_MRAM3@HOTMAIL.COM

[الصف الواحد]

لاهنت بعيد المراميع

دوما مميز


تحياتي

[ماني بهايب]

لاوالله مافيها شي ولاتستحق هالهيلمه والهجوم الصاخب على قبيلة عتيبه
وعلى علم من اعلامها كديميس العصيمي العتيبي



كان الخصم في هالمشكله طاقم قناة الساحه الوقحه
من الرئيس الى المرؤس .

لكن مالفيد حيله .

[متعب العصيمي]

بعيد المرامع خشمك ><


ووماحدث من مهاترات على قبيلة عتيبة لايمثلون الا انفسهم ..

والشاعر كديميس لم يذهب للقناة ليجري اللقاء

حنا على حفظ المواجيب حرّصين= مانعطي الطرقـي قراطيـع مانـا
والجار له واجـب وحنـا وفييـن= ندعيه للكرمـه ولـو مـا دعانـا
جيرانا دايـم حشـام وعزيزييـن= وندرا شرفهم عن كـلام اسفهانـا
حنا بوجه الجـار دايـم جديديـن= يزيـد مـع زايـده اثنينـه وفانـا

وبنسبة للقنوات أذا صارت بدون رقابه وتقدم مقدمين غير مؤهلين وهما الربح المادي فقط مايصلح لها الا كذا

[الرومي]

اخي بعيد المرامع.

انا قلت وجهت نظري قبل وهي ان قبيلة حرب صعدت الموقف مع ان اللقاء عادي جدا ولايثير غريزت احد ..وقبيلة حرب اكبر بكثير من تقديم شكوا لامارة الرياض بخصوص اللقاء في القناة ..

واخر شي تخرج قبيلة كبيرة مثل حرب بشريط اعتذار في قناة الساحة مصحوب بخلل فني ..

اعتقد ان هذا العذر لايسوا تحرك قبيلة بمشائخها ..وعلى قولة المثل ((تمخض الجمل فولد فارا)).
كان التصعيد كبير جدا والنتيجة صغيرة جدا ..

قناة الساحة معروف تاريخها الاسود في شب العنصرية بين القبائل ..الشاعر كديميس كان عفوي في اللقاء وصريح وهذة الصراحة استغلت من القناة ..

التوقيع

migeed33@hotmail.com

[ابو عطا]

المشاركة الأصلية كتبت بواسطة الرومي

واخر شي تخرج قبيلة كبيرة مثل حرب بشريط اعتذار في قناة الساحة مصحوب بخلل فني ..

اعتقد ان هذا العذر لايسوا تحرك قبيلة بمشائخها ..وعلى قولة المثل ((تمخض الجمل فولد فارا)).
كان التصعيد كبير جدا والنتيجة صغيرة جدا ..

قناة الساحة معروف تاريخها الاسود في شب العنصرية بين القبائل ..الشاعر كديميس كان عفوي في اللقاء وصريح وهذة الصراحة استغلت من القناة ..

صدقت اخي الرومي ..

كديميس لم يركض خلف قناه الساحه لاجراء اللقاء وكما سمعنافي اللقاء ان قناه الساحه كانت حريصه على هذة المقابله .


السبب هو قناه الساحه وهي من اثارة العنصريه .

[ابو نادر]

كلامك سليم
بيض الله وجهك

[سمران]

بعيد المرامع
لافض فوك

اسمعى حريبي لاتسيئ الظن بيا حكم ضميرك قبل لاتحكم عليه

[كايف العتيبي]

ان رؤية الشاعر كديميس على الشاشه ..تعتبر فلم رعب ..ترتعد منه الفرائص ..وتشل منه الافكار

" هنا مربط الفرس "

بعيد يعطيك العافية ...

[الدلبحي 511]

لاهنت يالذيب على الموضوع

تقبل مروري