عيضه الثبيتي و عجاب الدغيلبي

[طارق الثعلي]

السلام عليكم ورحمة الله وبركاته
طابت أوقاتكم بكل خير
طاروق تم مؤخراً بين الشاعرين عيضه الثبيتي و عجاب الدغيلبي
في منتديات مجالس البجادية

عيضه الثبيتي
سلام الله سلام من الميانـه مايطـق البـاب // سلام أصحاب عند أصحاب في جلسه شبابيه!!
وش أكبر مامضى فوقك من الأيام ياعجـاب؟//عسى ماهو نهار أنّـي قضبتـك فالبجاديـه!!

عجاب الدغيلبي

أرحبك ياعيضه لو تسليمك عليـه عتـاب // سنام المجد كيف توصفه شقة عزوبيـة !!
سؤالك يوم وجهته كذا مدري وش الأسباب // لكن السحر فوق الساحر اللي يقلب النية !!

عيضه الثبيتي

لو أعطيك العسل يمكن توقّع فيه سم الـداب // معك ذله لكن أدواك سـم الـداب والحيّـه!!
تراها من محبّه ياوسيع المعرفـه وإعجـاب // نبى نعرّضك شمس الصيف مانبغى لك الفيّه!!



عجاب الدغيلبي

ذكاء ماهوب ذل الرجل يحسب للأمور حساب // لكن أنته ماتدري يوم غشـوك الحراميـة!!
لابالله كلمتي في وسط قلبك جالها مضـراب // ولاينفعـك كثـر الإحتياطـات الوقائية


عيضة الثبيتي
ترى الشكّه بعيد وطاب ليلك يالعتيبي طـاب // وهـذا الليـل ياعجـاب ياحيـك وياحـيـه
مانبغى الشيخ يمشي فالدير والبشت فالدولاب // نبي بشته على جنبه ولا هو بشت عارية


عجاب الدغيلبي
عساك بخير كيف الحال بعد انهارت الأعصاب // عرفنا المشكلـة لاداعـي فحوصـات طبيـة
يبين الشيخ من فعله نهار الموقف الغصـاب // لكن البشت دون الفعل يحسب طـاق طاقيـة

عيضه الثبيتي

ترى موقعك لبخه مير وش موقعك فالاعـراب // عساك المبتداء اللّي فالـدروس الابتدائيـه!!
وش اتقول العرب لاجبت رمحً غير رمح ذياب // وأنا خابرك من ذخـر الهلالـي والهلاليـه!!



عجاب الدغيلبي
على طارى الدروس وما يخص الضعف فالطلاب // ليا منك ضعفـت أزيـدك دروس ٍ خصوصيـة
رمح وألا حسـام أهـم شـي نجـرّي الهيـاب // بيـوم ٍ يعتـزي رأس العتيـبـي بالعتيبـيـة


عيضه الثبيتي
ليا عدّيت مع طلعة كرا تضحك على ديراب // ولاللضعف في ضلع الهدا ياخوك أماريه!!
ليا حل الدهر يابو سعد من صالح الحطّاب // ولن لاحت بروق الغيث من حظ الغناويه!!




عجاب الدغيلبي
جبالٍ شامخة لكـن مايمنـع تصيـر تـراب // بفعـل الله تعالـى ثـم بنجـوم ٍ سمـاويـة
ترا (( اندرويد)) ميزاته نظام ٍ يدعم الوتساب // وأبو كشاف عند الناس منتهـي الصلاحيـة


عيضه الثبيتي
اجل ياصاحبي وش لون وضع الخيمه أم أطناب // ليا هبتك صرصر وأنت فـي بـر النعيريـه!!
ياكم رجل اجودي مع سكة القوماني النصـاب // غدا مخلاص وأنته فالخطر ميتيـن فالميّـه!!



عجاب الدغيلبي
مادامك خفت من جو الصحاري والنسيم الهاب // تعيش العمر في بيتك على فقدان حرية
على ويش الخطر دام الأمن في حالة استتباب // وباق الهرج أظنه يعتبر حقد وكراهية

[عثمان الثبيتي]

شهادتي في عيضه مجروحه

وهذ لايمنع ان ابدي رايي به

الفرق واضح حيث تقوق عيضه

فعيضه شاعر سوفا يكون له شان اذا انصف اعلامياً

وكلامي لايعني ان عجاب ماهو شاعر لا والله عجاب شاعر علم

ونتشرف بالشاعرين كلهم عينين في راس

[منصف في زمن الظلم]

عيضه شاعر قادم وبقوه
محترم وقوي

[محمد علي الشريف]

ياسلام شعار كبار صراحه وطاروق قمه

[فهيد النفيعي]

عيضه الثبيتي و عجاب الدغيلبي

لله دركم يامبدعين على هذا الطاروق

تسليمة عيضه لم تمشي على عجاب

الطاروق بشكل عام الفتل من عيضه والنقض من عجاب

لفت انتباهي عجاب في الإتيان بالمفردات الجديدة التي لم تستهلك من قبل مثل:

الإحتياطات الوقائية

فحوصات طبية

الوتساب

استتباب

صحت ألسنتكم جميعكم مبدعين

[ابو عاتق]

صح ألسنتهم

والحقيقه انهم ابدعوا عيضه ابدع ابداع لايستغرب عليه في الفتل

وعجاب ابدع في النقض والتركيب الغير مستهلك

الله يبيض وجيههم ويكثر أمثالهم في شعراء عتيبه


ومشكور لك ياطارق على الاختيار الرائع

آخر تعديل ابو عاتق يوم 11-May-2012 في 05:02 PM.

[سعد حميد الثبيتي]

لله در الشاعرين ابدعوا ابداع غير مستغرب وحقيقة اجمل ماقرات في هذا الصرح هذه المحاوره القيمه

نحيتي وتقديري للشا عرين

[طارق الثعلي]

كل الشكر للأخوان الذين شرفوا الموضوع بمرورهم الكريم